No Kasano a Taginayonen ti Rag-o iti Amin-Tiempo a Panagserbi

NABATAD nga ipakita ti kaitungpalan ti padto iti Biblia nga agbibiagtayo iti maudi nga al-aldaw daytoy dakes a sistema. Tangay ammoda daytoy, busbusbosen dagiti adipen ni Jehova a Dios ti amin a panawen a kabaelanda nga ipaay a mangisaknap iti naimbag a damag ti Pagarianna. Nasurok nga 600,000 a Saksi ni Jehova ti nangyurnos iti biagda tapno makapagserbida iti amin a tiempo. Dadduma kadakuada ket amin-tiempo a manangiwaragawag iti Pagarian a maaw-awagan payunir. Dadduma ket boluntario iti Bethel iti hedkuarter ti Watch Tower Society wenno kadagiti sanga nga opisinana. Kaskasdi dagiti dadduma ket misionero ken agdaldaliasat a manangaywan.

Ipakpakita ti Biblia nga iti maudi nga al-aldaw, addanto dagiti “napeggad a tiempo a narigat a pakilangenan.” (2 Timoteo 3:1-5) Iti Griego a teksto ti Biblia, nausar ti termino a mabalin a maipatarus a “dagiti naikeddeng a tiempo a nadawel.” Gapuna, di koma a namnamaen ti asinoman ti awanan-problema a biag iti kaaldawantayo. Para iti sumagmamano a Kristiano a ministro, agparang a nakaro dagiti problema a nalabit maisaludsodda iti bagida, ‘Makapagtultuloyak pay ngata iti amin-tiempo a panagserbi, wenno kasapulan a sumardengak?’

Aniada a situasion ti mabalin a pangtingitingan ti maysa iti kasasaadna kas payunir, boluntario iti Bethel, agdaldaliasat a manangaywan wenno misionero? Mabalin nga adda nakaro a panagsakit. Nalabit ti lakay/baketen wenno masakit a kabagian agkasapulan iti agtultuloy a panangaywan. Mabalin a mangrugi nga agpamilia ti maysa a pagassawaan. Siasinoman a mangisardeng iti amin-tiempo a panagserbi gapu iti kakasta a rason ken kadagiti Nainkasuratan a pagrebbengan di rumbeng a pagbainan a mangaramid iti kasta a panagbalbaliw.

Nupay kasta, kasanon no ti maysa ket agngayngayangay a sumardeng iti amin-tiempo a panagserbi gapu iti kinaawan rag-o? Nalabit ti maysa a payunir bassit laeng ti masarsarakanna a mangipangag iti ministeriona ket maisaludsodna, ‘Apay pay laeng nga itultuloyko ti agsakripisio idinto ta bassit ti dumngeg?’ Mabalin a ti maysa a boluntario iti Bethel saan unay a naragsak iti trabahona. Wenno ti agsublisubli a sakit, nupay saan met a lapped iti panagserbi a payunir, ti in-inut a mangikkat iti ragsak ti maysa a tao. Kasano a mamantener ti kakasta a tao ti rag-oda? Usigentayo ti kinuna ti sumagmamano nga aduan kapadasan a ministro.

Panangsaranget iti Pannakaupay

Ni Anny, a naggapu idiay Switzerland, ket nagadal iti Watchtower Bible School of Gilead idi 1950. Ninamnamana a maidestino iti sabali a pagilian kas misionera. Idi naituding manen nga agtrabaho iti Bethel idiay Europa, naupay ni Anny. Nupay kasta, inawatna ti trabahona iti Translation Department ket agingga ita agtartrabaho pay laeng sadiay. Kasanona a napagballigian ti pannakaupayna? “Adu idi ken ita ti trabaho a kasapulan nga aramiden. Ti rikna ken tarigagayko ket saan a kas kapateg ti trabaho,” inlawlawag ni Anny.

No maup-upaytayo iti trabahotayo, mabalintay a tuladen ti kababalin ni Anny. Ti personal a tarigagaytayo saan nga isut’ kangrunaan. Ti kapatgan ket maasikaso koma a naimbag amin dagiti nadumaduma a responsabilidad mainaig iti panangisaknap iti mensahe ti Pagarian. Kuna kadatayo ti Proverbio 14:23 nga “iti amin a trabaho adda gunggonaen.” Aniaman a rebbengen ti naited kadatayo, ti simamatalek a panangaramid iti daytoy tumulong iti pannakaitungpal ti trabaho mainaig iti Pagarian. Ket adda dakkel a pannakapnek​—wen, rag-o​—iti kasta nga inted-Dios a trabaho.​—Idiligyo ti 1 Corinto 12:18, 27, 28.

Pannakilangen iti Sabsabali

Karaman iti amin-tiempo a panagserbi ti nadekket a pannakilangen iti amin a kita dagiti tattao​—iti tay-ak ti ministerio, iti Bethel, iti pagtaengan dagiti misionero, wenno kabayatan a bumisbisita kadagiti kongregasion kas agdaldaliasat a manangaywan. Ngarud, ti rag-o agpannuray unay iti nasayaat a pannakilangen iti sabsabali. Nupay kasta, dagiti ‘nadawel a panawen’ a naipadto kadagitoy maudi nga al-aldaw pagbalinenna a narigat ti pannakilangen kadagiti tao. Kasano a maliklikan ti maysa a ministro ti pannakapukaw ti rag-ona, uray no adda nangupay kenkuana? Nalabit adda masursurotayo ken Wilhelm.

Nagbalin ni Wilhelm a kameng ti pamilia ti Bethel idiay Europa idi 1947. Kalpasanna, nagserbi kas payunir ken agdaldaliasat a manangaywan. “No makakitakam nga agassawa kadagiti banag nga iti pagarupmi di umiso wenno personal a mangburibor kadakami, ibagami ken Jehova ti mariknami sa ipannuraymin kenkuana ti pannakarisut dagiti bambanag,” inlawlawag ni Wilhelm.​—Salmo 37:5.

Nalabit mariribukankay a mismo gapu iti ugali ti maysa a pada a Kristiano a nagsao kadakayo nga awanan panagraem wenno sidadarasudos. Laglagipenyo a masansan nga agbidduttayo amin iti panagsasaotayo. (Santiago 3:2) Gapuna apay a diyo usaren daytoy a situasion nga umadani nga ad-adda iti “Dumngeg iti kararag”? (Salmo 65:2) Ibagayo dayta a banag ken Jehova, sa ipannurayyo dayta kenkuana. No kayat ti Dios ti mangaramid kadagiti panagbalbaliw, aramidenna dayta. Dagidiay agnanaed iti pagtaengan dagiti misionero kasapulan a laglagipenda daytoy no adda tumanor a kakastoy a parikut, tangay tumulong daytoy kadakuada a mangmantener iti rag-oda iti panagserbi ken Jehova.

No Nakapuy ti Salun-at

Sumagmamano laeng a tattao ti kanayon a nakaradkad. Uray dagidiay adda iti makunkuna a kabambannuaganna mabalin nga agsagabada iti panagleddaang wenno sakit. Sakit ti makagapu a kasapulan a sumardeng ti dadduma iti amin-tiempo a panagserbi, ngem nagsayaat latta ti magapgapuananda kas agibumbunannag ti Pagarian. Nupay kasta, kabaelan ti dadduma ti agtultuloy iti amin-tiempo a panagserbi iti laksid ti nakapuy a salun-at. Kas pagarigan, usigenyo da Hartmut ken Gislind.

Da Hartmut ken Gislind ket pagassawaan a nakabusbos iti 30 a tawen kas payunir, misionero, ken iti trabaho a panagdaliasat. Agpadada a nagsagaba kadagiti nakaro a sakit a no dadduma mapakapsutanda unay iti pisikal ken emosional. Nupay kasta, nagsayaat ti maar-aramidanda ken maparparegta pay ketdi ti dadduma nga agsagsagaba kadagiti umasping met laeng a suot. Ania a balakad ti ipapaayda? “Kumitakayo iti masanguanan saan ket nga iti napalabas. Aramidenyo ti kasayaatan iti tunggal situasion. Kada aldaw nalabit makaipaay iti uray laeng maysa a gundaway a mangidayaw ken Jehova. Aramatenyo ti kasta a gundaway, ket tagiragsakenyo dayta.”

Usigenyo ti kasasaad ni Hannelore. Pinarigat ti agsublisubli a sakit kabayatan ti 30 a tawenna kas payunir, misionera, iti trabaho a panagdaliasat a kaduana ni lakayna, ken iti panagserbi iti Bethel. Kuna ni Hannelore: “Sipapanunotak iti isyu a pinataud ni Satanas​—a dagiti tattao agserbida laeng ken Jehova no ti panangaramid iti dayta ket nalaka para kadakuada. Iti panangibtur kadagiti suot, maaddaanak iti paset iti panangpaneknek nga ulbod ni Satanas.” Nabileg daytoy a pammaregta. Laglagipenyo a napateg kenkuana ti personal a kinasungdoyo ken Jehova no maipasidong iti suot.​—Job 1:8-12; Proverbio 27:11.

No ikagkagumaanyo ti mangaramid iti natimbeng a pangngeddeng mainaig iti salun-atyo, usigenyo ti dua a paset ti padto ni Jesu-Kristo maipapan iti panungpalan ti sistema dagiti bambanag. Impadto ni Jesus dagiti angol iti nadumaduma a lugar. Kinunana met: “Daytoy naimbag a damag ti pagarian maikaskasabanto iti isuamin a mapagnaedan a daga.” (Mateo 24:3, 14; Lucas 21:11) Ammo ni Jesus nga iti maudi nga al-aldaw, makidangadang dagiti adalanna iti sakit. Ngem ammona a maitungpal ti panangasaba saan laeng a babaen dagiti tattao a nakaradkad no di pay ket dagiti indibidual nga addaan nakaro a sakit. No makapagtultuloytayo iti amin-tiempo a panagserbi iti laksid ti sakit, saanto a lipatan ni Jehova ti ayat nga ipakpakitatayo maigapu iti naganna.​—Hebreo 6:10.

Panangtaginayon iti Rag-o iti Laksid ti Kinaawan-Interes ti Publiko

Maapektaran ti kababalintayo iti reaksion dagiti tao iti trabaho a panangikasaba iti Pagarian. “Marigatan uray dagiti payunir a mangiruangan iti saritaan iti maysa a bumalay,” kinuna ti maysa nga aduan kapadasan a ministro. “Kasapulan nga ikagumaantay amin a taginayonen ti rag-otayo.” Wen, ti kinaawan-interes ti publiko mabalin a kissayanna ti rag-otayo iti panagserbi iti tay-ak. Gapuna kasano a mamantener ti rag-o ti maysa a payunir a kanayon a maipaspasango iti kinaaleng-aleng? Itden dagiti aduan kapadasan a ministro dagiti sumaganad a singasing a napadas ken nasuboken.

Ti kinaawan-interes mangipasango iti karit, ngem dina kaipapanan ti pannakapaay. Ti nasaknap a kinaaleng-aleng a mismo ket saan a rason tapno sumardeng iti amin-tiempo a panagserbi. Mamantenertayo ti rag-otayo iti laksid ti kinaawan-interes no mangikuditayo iti umdas a panawen maipaay iti naregget a panagadal iti Kasuratan. ‘Kabalannatay [dagitoy] maipaay iti tunggal naimbag nga aramid,’ ket ramanen dayta ti pannakisarita kadagidiay madi a dumngeg iti naimbag a damag. (2 Timoteo 3:16, 17) Nupay madi idi a dumngeg dagiti tao ken ni propeta Jeremias, saan a daytat’ nangpasardeng kenkuana. (Jeremias 7:27) No ad-adalenyo ti Biblia iti tulong dagiti Nakristianuan a publikasion, magunggonaantay iti dakkel no imutektekantayo dagiti kapanunotan a mangpabileg iti pammatitayo ken tumulong kadatayo a mangsango iti kinaawan-interes.

Uray pay no maysa a karit ti kinaawan-interes, sukimatentay ti kababalintayo kadagidiay kaskasabaantayo. Apay a saanda nga interesado? Kas pagarigan, ti maysa a rason a nasaknap ti kinaawan-interes iti adu a paset ti Europa ket gapu iti dakes a rekord ti ulbod a relihion. Saanen a marikna dagiti tao nga adda paset ti relihion iti biagda, ket dida met kayat ti makibiang iti dayta. Kasapulan nga agbalintayo a mannakibagay, a makisaritatayo kadagiti tao maipapan kadagiti banag a mangapektar kadakuada, kas iti kinaawan-trabaho, salun-at, krimen, di panangpalugod, aglawlaw, ken ti pangta ti gubat.

Iti panglukat a sasaotayo iti bumalay, mabalintay ti mangdakamat iti banag a pakaseknan dagiti tao iti lugarda. Kastat’ pinadas nga inaramid ni Dietmar idi mangaskasaba iti maysa a purok a sadiay di unay naballigi. Adda agnanaed sadiay a nangdakamat nga adda napasamak a trahedia iti purok iti napalabas nga aldaw. Gapuna iti kada ruangan, sipapasnek nga inyebkas ni Dietmar ti pannakipagriknana iti napasamak a trahedia. “Kellaat a nangrugin a makisarita dagiti tao,” kinunana. “Adda iti panunot ti tunggal maysa ti trahedia. Naaddaanak iti adu a nasayaat a pannakisarita iti dayta nga aldaw gapu ta nangipakitaak iti interes iti biagda.”

Masapul a kasabaantayo dagiti tattao maipapan iti Pagarian sadinoman ti pakasarakantayo kadakuada. Mabalin a nabunga ti impormal a panangasaba, ket masanaytayo ti bagitayo iti daytoy a trabaho babaen ti panangaramat kadagiti singasing a naipaay kadagiti naibatay-Biblia a publikasion. Mabalin a mangibunga iti rag-o ti sumagmamano a nainggayyeman a sasao wenno iti panangipaima kadagiti kopia ti magasin a Pagwanawanan ken Agriingkayo! iti bumalay. No simmarungkartay manen ken nakairugi iti panangyadal iti Biblia iti interesado a tao, makabiroktay pay iti interesado babaen ti panangisaludsod iti: “Adda kadi pay ammom nga agtarigagay nga agadal iti Biblia?” Mabalin a mangiturong daytoy iti pannakaipasdek ti maysa pay a panangyadal iti Biblia iti pagtaengan. Iti aniaman a kasasaad, agbalintayo koma a positibo, nga agtalek buyogen ti kararag ken Jehova, a ditay ipalubos ti kinaawan-interes a mangupay kadatayo.

Pammabileg Manipud iti Sabsabali

Da Jürgen ken Christiane ket payunir ken makiramraman iti trabaho a panagdaliasat iti nasurok a 30 a tawenen. Iti naminsan natudinganda a mangasaba iti lugar a dagiti tattao awanan interes ken narigat a kasarsarita. Anian a pannakasapul da Jürgen ken ni baketna iti pammaregta! Ngem aniaman ti makagapu, saan a naipaay ti dadduma iti kongregasion ti kasapulanda.

Gapuna ammo ni Jürgen manipud iti kapadasan a “marigrigatan ti sumagmamano a payunir. Kasapulanda ti ad-adu a pammaregta manipud kadagiti panglakayen ken dadduma nga agibumbunannag.” Imbaga ti Dios ken ni Moises a paregtaen ken pabilgenna ni Josue. (Deuteronomio 3:26-28) Ket dagiti Kristiano agbalinda koma a gubuayan ti pammaregta iti maysa ken maysa. (Roma 1:11, 12) Dagiti agibumbunannag iti Pagarian maparegtada dagidiay adda iti amin-tiempo a serbisio babaen kadagiti makapabileg a sasao ken panangkaduada kadakuada iti ministerio sagpaminsan.

Ti Rag-o ni Jehova​—Ti Pigsatayo

Natakuatan dagiti Kristiano a nangbusbos iti dakkel a paset ti biagda kas payunir wenno misionero, agserserbi iti Bethel, wenno sumarsarungkar kadagiti kongregasion iti trabaho a panagdaliasat a kaaduan a parikut ket apagbiit laeng, ngem ti dadduma agbayag. Uray ti sumagmamano a parikut a kasla din pulos marisut uray kaano dinatay koma ikkatan iti rag-o. Ni Ramon, nga agserserbi iti sabali a pagilian iti nasurok nga 45 a tawenen, isingasingna a no malmaldaytayo gapu kadagiti parikut, “rumbeng a panunoten[tayo] ti adu a bendision nga adda kadatayo ken ti rinibu a sabsabali pay nga agsagsagaba iti ad-adu a rigat.” Kinapudnona, ti panagsagaba mapaspasaran dagiti kapammatiantayo iti intero a lubong, ket talaga a maseknan ni Jehova kadatayo amin.​—1 Pedro 5:6-9.

Gapuna, no ti personal a kasasaadtayo palubosannatay a makiraman iti amin-tiempo a panagserbi ken agtalinaed iti dayta, mantenerentayo ti rag-otayo babaen ti panagpannuray iti nailangitan nga Amatayo. Pabilgenna dagiti adipenna, ken amintayo laglagipentay koma a ‘ti rag-o ni Jehova isu ti pigsatayo.’​—Nehemias 8:10.

[Ladawan iti panid 21]

“Ti rikna ken tarigagayko ket saan a kas kapateg ti trabaho”

[Ladawan iti panid 22]

‘Ibagami ken Jehova ti mariknami sa ipannuraymin kenkuana dagiti bambanag’

[Dagiti Ladawan iti panid 23]

“Aramidenyo ti kasayaatan iti tunggal situasion. Kada aldaw nalabit makaipaay iti uray laeng maysa a gundaway a mangidayaw ken Jehova”

[Ladawan iti panid 23]

“Iti panangibtur kadagiti suot, maaddaanak iti paset iti panangpaneknek nga ulbod ni Satanas”

[Dagiti Ladawan iti panid 24]

“Marigrigatan ti sumagmamano a payunir. Kasapulanda ti ad-adu a pammaregta manipud kadagiti panglakayen ken dadduma nga agibumbunannag”

[Ladawan iti panid 24]

“Rumbeng a panunotentayo ti adu bendision nga adda kadatayo”