“Nalinteg Kadi Ta Pusom Kaniak?”

“Kumuyogka kaniak, ket kitaem ti regtak a maipaay ken ni Jehova.”​—2 AR-ARI 10:16.

1, 2. (a) Kasano nga ad-adda a dimmakes ti narelihiosuan a kasasaad ti Israel? (b) Idi 905 K.K.P., ania a dakkel a panagbalbaliw ti napasamak iti Israel?

TI TAWEN 905 K.K.P. ket tiempo ti dakkel a panagbalbaliw idiay Israel. Agarup 100 a tawen sakbayna, impalubos ni Jehova a mabingay ti nagkaykaysa a pagarian ti Israel gapu iti panagapostasia ni Solomon. (1 Ar-ari 11:9-13) Inturayan ni Roboam nga anak ni Solomon ti makin-abagatan a pagarian, ti Juda, bayat nga adda iti babaen ni Ari Jeroboam nga Efraimita ti makin-amianan a pagarian, ti Israel. Nakalkaldaang, dakes ti panangrugi ti makin-amianan a pagarian. Di kayat ni Jeroboam a mapan dagiti iturayanna iti makin-abagatan a pagarian tapno agdaydayawda idiay templo, amangan no mapanunotda ti agsubli iti balay ni David. Gapuna, insungsongna ti panagdaydayaw iti sinan-urbon a baka idiay Israel ket iti kasta impasdekna ti idolatria a nagpaut iti pakasaritaan ti makin-amianan a pagarian.​—1 Ar-ari 12:26-33.

² Ad-adda a dimmakes ti kasasaad idi nagbalin nga ari ni Acab nga anak ni Omri. Ti ganggannaet nga asawana a ni Jezabel insungsongna ti panagdaydayaw ken ni Baal ken pinapatayna dagiti mammadto ni Jehova. Iti laksid dagiti prangka a ballaag ni propeta Elias, saan a pinasardeng ni Acab ti asawana. Nupay kasta, idi 905 K.K.P., natay ni Acab, ket ni Joram nga anakna ti nagturay. Panawenen tapno madalusan ti daga. Ni Eliseo a kasuno ni Elias impakaammona iti panguluen ti buyot a ni Jehu nga isu ket pulotan ni Jehova kas sumaruno nga ari ti Israel. Ti misionna? Papatayenna ti managbasol a sangakabbalayan ni Acab, ken ibalesna ti dara dagiti mammadto nga imbuyat ni Jezabel!​—2 Ar-ari 9:1-10.

3, 4. Kasano nga impakita ni Jehonadab a ti pusona ‘nalinteg iti puso ni Jehu’?

³ Kas panagtungpal iti bilin ti Dios, pinapapatay ni Jehu ni nadangkes a Jezabel, ket kalpasanna dinalusanna ti Israel babaen ti panangikisapna iti sangakabbalayan ni Acab. (2 Ar-ari 9:15–​10:14, 17) Idi agangay, nakasarak iti kaduana. “Nagsarakda ken ni Jonadab nga anak ni Recab nga umay a sumabet kenkuana, ket isu ti kinablaawanna, ket kinunana kenkuana, Nalinteg ta pusom, a kas ti pusok nalinteg ita pusom? Ket ni Jonadab kinunana, Isu ti kasta. No nalinteg, yawatmo kaniak ta imam. Ket isu inyawatna kenkuana di imana; ket isu ti inngatona kenkuana idi lugan. Ket kinunana, kumuyogka kaniak, ket kitaem ti regtak a maipaay ken ni Jehova. Iti kasta isu ti pinaulida idi lugan.”​—2 Ar-ari 10:15, 16.

⁴ Saan nga Israelita ni Jehonadab (wenno, Jonadab). Nupay kasta, maitunos iti naganna (kayatna a sawen “Madadaan ni Jehova,” “Natan-ok ni Jehova,” wenno “Naparabur ni Jehova”) isu ket managdaydayaw ni Jehova. (Jeremias 35:6) Addaan la ketdi iti naisalsalumina nga interes a makakita iti “regta [ni Jehu] a maipaay ken ni Jehova.” Kasanotay nga ammo? Bueno, saan a naiparparna ti panagsarakda iti napulotan nga ari ti Israel. ‘Immay [ni Jehonadab] a sumabet kenkuana,’ ket naaramid daytoy idi napapatayen ni Jehu ni Jezabel ken dagiti sabsabali pay iti balay ni Acab. Ammo ni Jehonadab ti mapaspasamak idi pinatganna ti awis ni Jehu a lumugan iti karuahena. Di pagduaduaan a dimmasig ken ni Jehu​—ken ni Jehova​—iti daytoy a salisal iti nagbaetan ti ulbod ken pudno a panagdayaw.

Moderno-Aldaw a Jehu ken Moderno-Aldaw a Jehonadab

5. (a) Ania a panagbalbaliw ti asidegen a maaramid iti intero a sangatauan? (b) Asino ti Natantan-ok a Jehu, ket siasino dagiti pannakabagina ditoy daga?

⁵ Iti kaaldawantayo, din agbayag addanto maaramid a dakkel a panagbalbaliw dagiti bambanag maipaay iti intero a sangatauan kas iti napasamak iti Israel idi 905 K.K.P. Asidegen ti panawen a panangikkat ni Jehova iti amin a dakes a resulta ti impluensia ni Satanas ditoy daga, agraman ti ulbod a relihion. Asino ti moderno-aldaw a Jehu? Awan sabali no di ni Jesu-Kristo, a nakaiturongan dagiti naimpadtuan a sasao: “Ibarikesmo ta kampilanmo ita lupom, O mannakabalin, ti dayag ken ti tan-okmo. Ket iti tan-okmo agsakayka a sirarang-ay, gapu iti pudno ken kinaemma ken kinalinteg.” (Salmo 45:3, 4) Ni Jesus ket irepresentar ditoy daga “ti Israel ti Dios,” dagiti napulotan a Kristiano “a mangtungtungpal kadagiti bilin ti Dios ken addaan iti trabaho a panangsaksi ken Jesus.” (Galacia 6:16; Apocalipsis 12:17) Manipud pay idi 1922, situtured nga ipakpakdaar dagitoy napulotan a kakabsat ni Jesus ti iyaay ti panangukom ni Jehova.​—Isaias 61:1, 2; Apocalipsis 8:7–​9:21; 16:2-21.

6. Siasino dagiti naggapu iti amin a nasion a dimmasig kadagiti napulotan a Kristiano, ket kasano ti iluluganda iti karuahe, no ar-arigen, ti Natantan-ok a Jehu?

⁶ Saan nga agmaymaysa dagiti napulotan a Kristiano. Kas ken Jehonadab a rimmuar a sumabet ken Jehu, adu ti naggapu kadagiti nasion a dimmasig ken Jesus, ti Natantan-ok a Jehu, ken kadagiti pannakabagina ditoy daga iti pudno a panagdayaw. (Zacarias 8:23) Inawagan ni Jesus iti “sabsabali a karnero[na],” idi 1932 naipabigbigda kas moderno-aldaw a katupag ni Jehonadab idi un-unana ken naawisda a ‘lumugan iti karuahe’ ti moderno-aldaw a Jehu. (Juan 10:16) Kasano? Babaen ti ‘panangtungpalda kadagiti bilin ti Dios’ ken pannakipagkaykaysada kadagiti napulotan iti “trabaho a panangsaksi ken Jesus.” Iti moderno a panawen, ramanen daytoy ti panangikasaba iti naimbag a damag maipapan iti naipasdeken a Pagarian ti Dios iti sidong ni Jesus kas Ari. (Marcos 13:10) Idi 1935 naipabigbig dagitoy a “Jonadab” kas “dakkel a bunggoy” iti Apocalipsis 7:9-17.

7. Kasano nga ipakpakita dagiti Kristiano itatta a ti ‘pusoda nalinteg pay laeng’ iti puso ni Jesus?

⁷ Sipud idi dekada 1930, situtured nga ipampaneknek ti dakkel a bunggoy ken dagiti napulotan a kakabsatda ti panangsuportada iti pudno a panagdayaw. Iti dadduma a pagilian ti Makindaya ken Makinlaud a Europa, iti Adayo a Daya, ken iti Africa, adu kadakuada ti natay maigapu iti pammatida. (Lucas 9:23, 24) Iti dadduma a pagilian, naibalbalud, narangranggasan, wenno saan, naidaddadanesda. (2 Timoteo 3:12) Anian a kinamatalek ti impakitada! Ket ipakita ti Report iti 1997 a Tawen Serbiso a determinadoda pay laeng nga agserbi iti Dios, uray ania ti mapasamak. ‘Nalinteg pay laeng ti pusoda’ iti puso ni Jesus. Naipakita daytoy idi 1997, idi a 5,599,931 nga agibumbunannag iti Pagarian, a gistay bin-ig a “Jonadab,” ti nangbusbos iti 1,179,735,841 nga oras iti trabaho a panangsaksi ken Jesus.

Naregtada Pay Laeng a Mangaskasaba

8. Kasano nga ipakpakita dagiti Saksi ni Jehova ti regtada a maipaay iti pudno a panagdayaw?

⁸ Napardas ti panagpatpataray ni Jehu iti karuahena​—a pakakitaan ti regtana a mangitungpal iti annongna. (2 Ar-ari 9:20) Ni Jesus, ti Natantan-ok a Jehu, ket nadeskribir kas ‘inibus’ ti regta. (Salmo 69:9) Di ngad pakasdaawan a naregta dagiti pudno a Kristiano ita. Iti kongregasion ken iti publiko, ‘ikaskasabada ti sao a sigaganetget iti mainugot a panawen, iti nariribuk a panawen.’ (2 Timoteo 4:2) Naipakita ti regtada nangnangruna idi rugrugi ti 1997 kalpasan a ti maysa nga artikulo iti Ministeriotayo iti Pagarian pinaregtana dagiti amin a makabael nga ag-auxiliary pioneer. Iti tunggal pagilian adda naikeddeng a bilang dagiti auxiliary pioneer a ragpaten. Ania ti resultana? Nagsayaat! Nalabsan ti adu a sanga ti naikeddeng a bilang. Uppat a ribu ti kalat ti Ecuador ngem idi Marso nakaireport iti 6,936 nga auxiliary pioneer. Nakaireport ti Japan iti dagup a 104,215 kadagidiay a tallo a bulan. Idiay Zambia, a sadiay 6,000 ti kalat, 6,414 nga auxiliary pioneer ti nagreport idi Marso; 6,532 idi Abril; ken 7,695 idi Mayo. Iti intero a lubong, no pagtiponen agdagup iti 1,110,251 ti kangatuan a bilang dagiti auxiliary ken regular pioneer, 34.2-porsiento a panagrang-ay no idilig idi 1996!

9. Malaksid iti panagbalaybalay, kadagiti ania a dadduma pay a pamay-an nga idandanon dagiti Saksi ni Jehova ti naimbag a damag kadagiti tattao?

⁹ Kinuna ni apostol Pablo kadagiti panglakayen idiay Efeso: “Diak minedmedan ti panangibaga kadakayo ti aniaman kadagiti bambanag a makagunggona wenno uray ti panangisuro kadakayo iti publiko ken iti binalay-balay.” (Aramid 20:20) Tultuladen dagiti Saksi ni Jehova ita ti inaramid ni Pablo ket sireregta nga ikaskasabada ti naimbag a damag iti balbalay. Nupay kasta, mabalin a narigat a madanon dagiti tattao kadagiti pagtaenganda. Gapuna, parparegtaen ti “matalek ken masirib nga adipen” dagiti agibumbunannag iti Pagarian a sarungkaranda dagiti tattao iti panggedanda, kadagiti lansangan, aplaya, iti publiko a parke​—iti sadinoman a pakasarakan kadagiti tattao. (Mateo 24:45-47) Nagsayaat ti resultana.

10, 11. Kasano nga impakita dagiti agibumbunannag iti dua a pagilian ti nasayaat a panagregget a mangbirok kadagiti interesado a masansan a di madanon iti pagtaenganda?

¹⁰ Idiay Copenhagen, Denmark, mangaskasaba ti maysa a bassit a grupo dagiti agibumbunannag kadagiti lansangan iti ruar dagiti estasion ti tren. Manipud Enero agingga idi Hunio, nakaipaimada iti 4,733 a magasin, adu a tattao ti nakasaritada, ken adu dagiti sinarungkaranda. Adu nga agibumbunannag iti dayta a pagilian ti regular a mangitultulod iti magasin kadagiti paglakuan. Iti maysa nga ili rinibu dagiti makitienda kada Biernes. Isu a nangyurnos ti kongregasion iti regular a panangasaba iti tiendaan. Iti maysa a lugar, masarsarungkaran dagiti eskuelaan ken maipapaayan kadagiti publikasion a naglaon iti impormasion a maitutop a nangnangruna kadagiti mannursuro.

¹¹ Idiay met Hawaii, ikagkagumaanda a danonen dagidiay awan iti pagtaenganda. Karaman kadagiti naisangsangayan a teritoria dagiti publiko a lugar (lansangan, parke, paradaan, ken pagsardengan ti bus), komersial a lugar, shopping center ken eropuerto, panangasaba babaen ti telepono, transportasion publiko (panangasaba kadagiti bus), ken kadagiti paraangan ti kolehio. Kasapulan ti panagannad tapno masigurado a kalalainganna ti bilang dagiti Saksi a matudingan iti tunggal teritoria ken nasanay a naimbag dagidiay natudingan. Naipadamag a maar-aramid iti adu a pagilian dagiti nasayaat pannakaorganisarna nga urnos a kas kadagitoy. Kas resultana, madandanonen dagiti interesado a tattao a nalabit saan koma a pulos madanon iti ministerio a panagbalaybalay.

Panagtalinaed a Natibker

12, 13. (a) Ania a taktika ti inusar ni Satanas maibusor kadagiti Saksi ni Jehova idi 1997? (b) Kasano a ti kasunganina ti nagbalin nga epekto ti ulbod a propaganda iti maysa a pagilian?

¹² Iti sumagmamano a pagilian idi 1997, dagiti Saksi ni Jehova ti biktima ti nagdakes, ulbod a propaganda a nabatad a nairanta a mangiturong iti posible a legal a tignay maibusor kadakuada. Ngem natibkerda! (Salmo 112:7, 8) Linaglagipda ti kararag ti salmista: “Dagiti natangsit nangparboda iti ulbod a maibusor kaniak: iti amin a pusok salimetmetakto dagiti al-alagadem.” (Salmo 119:69) Ti kasta a panangpadpadakes ket maysa laeng a pammaneknek a magurgura dagiti pudno a Kristiano kas impadto ni Jesus. (Mateo 24:9) Ket no dadduma ti kasunganina ti epekto dayta. Idiay Belgium, nabasa ti maysa a lalaki ti artikulo a mangpadpadakes kadagiti Saksi ni Jehova iti nalatak nga inaldaw a pagiwarnak. Gapu ta naklaat iti pammardaya, nakigimong iti Kingdom Hall iti simmaganad a Domingo. Nakipagadal iti Biblia kadagiti Saksi ket napartak ti irarang-ayna. Dati a miembro ti bunggoy dagiti kriminal daytoy a lalaki. Nakatulong ti panagadalna iti Biblia a nangdalus iti kabibiagna, a nadlaw dagiti tattao a makaam-ammo kenkuana. Saan la ketdi a napanunot ti nagsurat iti mamarpardaya nga artikulo ti kasta a resulta!

¹³ Binabalaw ti sumagmamano a nasingpet panagpuspusona a tattao idiay Belgium ti makaallilaw a propaganda. Maysa kadakuada ti dati a prime minister a nangannugot a dayawenna ti magapgapuanan dagiti Saksi ni Jehova. Ken insurat ti maysa a diputado: “Maisupadi kadagiti maiwarwaras a damag no dadduma, no kaniak a maysa, saan a pulos a pangta [dagiti Saksi ni Jehova] kadagiti institusion ti Estado. Mannakikappia, napasnek, ken nadayawda kadagiti autoridad.” Pudno a nainsiriban dagiti sao ni apostol Pedro: “Taginayonenyo a nasayaat ti kababalinyo iti tengnga dagiti nasion, tapno, iti banag a pangsawanda iti maibusor kadakayo a kasla managaramid iti dakes, dayawenda koma ti Dios iti aldaw a panangsukimatna kas bunga ti nasayaat nga ar-aramidyo a masaksianda.”​—1 Pedro 2:12.

Naisangsangayan a Pannakaselebrar ti Memorial

14. Ania dagiti sumagmamano a makaparagsak a report maipapan iti timmabuno iti Memorial idi 1997?

¹⁴ Maikanatad a dagidiay mangsaksi ken Jesus rebbeng nga ibilangda ti Pananglaglagip iti ipapatayna a napateg nga okasion iti tawenda. Idi 1997, 14,322,226 ti timmabuno iti pannakaselebrar dayta nga okasion idi Marso 23. Nasurok a 1,400,000 ti ad-aduanna ngem idi 1996. (Lucas 22:14-20) Iti adu a pagilian ad-adu nga amang dagiti timmabuno iti Memorial ngem ti bilang dagiti agibumbunannag iti Pagarian, a mangipakpakita nga adda nasayaat a pangnamnamaan iti irarang-ay. Kas pagarigan, idiay Haiti, agdagup iti 10,621 dagiti agibumbunannag idi 1997, bayat a 67,259 ti timmabuno iti Memorial. Mabalinyo a sukimaten ti tinawen a report iti panid 18 agingga iti 21 ket makitayo no mano pay a pagilian ti naaddaan met iti nangato a bilang dagiti timmabuno no maidilig iti bilang dagiti agibumbunannag.

15. Iti dadduma a pagilian, kasano a pinarmek dagiti kakabsattayo dagiti narikut a problema tapno maselebraranda ti Memorial?

¹⁵ Kadagiti dadduma, saan a nalaka ti tumabuno iti Memorial. Idiay Albania, adda curfew iti alas 7:00 ti rabii gapu iti sibil a riribuk. Kadagiti 115 a babassit a grupo iti intero a pagilian, nangrugi ti Memorial iti alas 5:45 ti malem. Limnek ti init iti alas 6:08 ti rabii, a pangrugian ti Nisan 14. Naipasa dagiti emblema iti agarup alas 6:15 ti rabii. Iti kaaduan, naipaay ti pangserra a kararag iti alas 6:30 ti rabii, ket nagdardaras a nagawid dagidiay timmabuno sakbay ti curfew. Kaskasdi, 3,154 ti timmabuno iti Memorial, idinto ta 1,090 ti kangatuan a bilang dagiti agibumbunannag. Iti maysa a pagilian ti Africa, awan ti makapan iti Kingdom Hall gapu iti sibil a riribuk, isu a nagtulag ti dua a panglakayen nga agsarakda iti pagtaengan ti maysa pay a panglakayen tapno mayurnosda ti selebrasion iti babassit a grupo. Tapno madanonda ti balay, nasken a ballasiwen dagiti dua a panglakayen ti maysa a kanal. Nupay kasta, adda ranget iti dayta a lugar, ket paltogan dagiti sniper ti siasinoman nga aggandat a bumallasiw iti kanal. Timmaray a bimmallasiw ti maysa a panglakayen a di naan-ano. Bumalballasiw ti maikadua idi nakangngeg iti kanalbuong. Nagpakleb ket nagkaradap tapno saan a mapuntaan dagiti bala a sumanengseng iti ngatuen ti ulona. Sibaballigi a nakapagmimiting dagiti panglakayen, ket naasikaso ti kasapulan ti kongregasion.

“Manipud Kadagiti Isuamin a Nasion ken Kadagiti Tribo . . . ken Kadagiti Pagsasao”

16. Kasano nga inyurnos ti klase matalek ken masirib nga adipen ti pannakaisaknap ti naimbag a damag kadagiti babassit a grupo a sabali ti pagsasaoda?

¹⁶ Kinuna ni apostol Juan nga aggapu ti dakkel a bunggoy “kadagiti isuamin a nasion ken kadagiti tribo ken kadagiti il-ili ken kadagiti pagsasao.” (Apocalipsis 7:9) Gapuna, inyurnos ti Bagi a Manarawidwid ti pannakaipablaak dagiti literatura iti ad-adu pay a pagsasao​—agraman dagidiay ar-aramaten dagiti nasulinek a tribu ken babassit a grupo dagiti tattao. Kas pagarigan, idiay Mozambique, nairuar iti lima pay a pagsasao ti tract a Biag iti Maysa a Natalna a Baro a Lubong. Idiay Nicaragua, naipablaak iti pagsasao a Miskito ti broshur a Tagiragsakenyo ti Biag nga Agnanayon Ditoy Daga!​—ti kaunaan a publikasion ti Watch Tower Society iti dayta a pagsasao. Siraragsak nga inawat dagiti adu nga Indian a Miskito ti broshur idi makitada dayta iti bukodda a pagsasao. Idi 1997 inanamongan ti Sosiedad dagiti literatura iti 25 a kanayonan a pagsasao ken nakaimaldit iti nasurok a maysa a bilion a magasin.

17. Ania a grupo a sabali ti pagsasaoda ti natulongan idiay Korea, ket kasano a dakkel ti maitultulong dagiti videotape kadagitoy a tattao?

¹⁷ Idiay Korea adda maysa pay a grupo a sabali ti pagsasaoda ti natulongan. Idi 1997 naangay ti kaunaan a kombension iti sign language a Koreano. Adda 15 a sign language a kongregasion idiay Korea nga addaan 543 nga agibumbunannag, ngem 1,174 ti timmabuno iti kombension, ken 21 ti nabautisaran. Tapno matulongan dagiti tuleng a di unay makatarus iti naibalikas wenno naisurat a sao, maar-aramid iti videotape dagiti publikasion iti 13 a nadumaduma a sign language. No kasta, matultulongan dagiti tuleng nga “agbasa” ken uray mangadal iti naimbag a damag, buyogen ti nasayaat a resulta. Idiay Estados Unidos, dati alaenna ti aginggat’ lima a tawen para iti maysa a tuleng a rumang-ay agingga nga agpabautisar. Ita ta adun dagiti video a magun-odan iti American Sign Language, para iti dadduma a tuleng, agarup makatawen laengen.

‘Panagtalinaed iti Karuahe’

18. Kalpasan ti panagsarakda ken Jehonadab, ania ti inaramid ni Jehu?

¹⁸ Idi 905 K.K.P., kalpasan ti panagkuyogda ken Jehonadab, rinugian ni Jehu a gibusan ti ulbod a panagdayaw. Inawisna dagiti amin nga agdaydayaw ken ni Baal: “Agngilinkayo iti maysa a gimong a nadaeg ken ni Baal.” Kalpasanna nagbaon iti intero a daga tapno masigurado nga awan ti mailaksid nga agdaydayaw ken ni Baal. Bayat a nagaaripuno dagiti tattao iti nadaeg a templo ti ulbod a dios, sinigurado ni Jehu nga awan ti agdaydayaw ken ni Jehova nga adda sadiay. Kamaudiananna, pinapatay ni Jehu ken ti buyotna dagiti agdaydayaw ken ni Baal. “Kasta ti panangdadael ni Jehu ken ni Baal iti Israel.”​—2 Ar-ari 10:20-28.

19. Gapu iti asidegen a dumteng iti sangatauan, ania nga espiritu ti rumbeng nga ipakitatayo, ket ania a trabaho ti sigaganetget nga aramidentayo?

¹⁹ Iti kaaldawantayo, umad-adanin ti naan-anay a pannakaukom ti amin nga ulbod a relihion. Iti panangiwanwan dagiti anghel, iwarwaragawag dagiti Kristiano ti naimbag a damag iti intero a sangatauan, a gutgutugotenda ida nga agbuteng iti Dios ken sumina iti ulbod a relihion. (Apocalipsis 14:6-8; 18:2, 4) Maparparegta dagiti naemma nga agpasakup iti Pagarian ti Dios iti sidong ti Ari nga insaad ni Jehova, ni Jesu-Kristo. (Apocalipsis 12:10) Iti daytoy makapagagar a tiempo, rebbeng a ditay ipalubos nga agmawmaw ti regtatayo bayat nga agtalinaedtayo a natibker maipaay iti pudno a panagdayaw.

20. Ania ti determinado nga aramidenyo iti 1998 a tawen serbisio?

²⁰ Naminsan, idi a marigrigatan unay ni Ari David, inkararagna: “Natalged ti pusok, O Dios, ti pusok natalged: agkantaakto, wen, agkantaakto kadagiti panangidaydayaw. Agyamanakto kenka, O Apo, iti tengnga dagiti tattao.” (Salmo 57:7, 9) Sapay koma ta natibkertayo met. Kabayatan ti 1997 a tawen serbisio, iti sango ti adu a pakarigatan, sipipigsa a naidaydayaw ni Jehova a Dios. Sapay koma ta kasta met laeng, napigpigsa pay ketdi, a panangidaydayaw ti mangngegan iti agdama a tawen serbisio. Ket sapay koma ta pudno daytoy uray pay ania ti aramiden ni Satanas a mangupay wenno mangbusor kadatayo. Iti kasta, maipakitatayo a nalinteg ti pusotayo iti puso ti Natantan-ok a Jehu, ni Jesu-Kristo, ken amin-kararua nga ipangagtayo ti naipaltiing a pammaregta: “Siyayamankayo ken Jehova, ken agragsakkayo, dakayo a sililinteg; ket umsiagkay iti rag-o, dakayo a nasingpet iti puso.”​—Salmo 32:11.

Mailawlawagyo Kadi?

◻ Ania a panagbalbaliw ti napasamak iti Israel idi 905 K.K.P.?

◻ Asino ti moderno-aldaw a Jehu, ket kasano nga ipakpakita ti “dakkel a bunggoy” a ‘nalinteg ti pusoda’ iti pusona?

◻ Ania nga estadistika manipud iti tinawen a report ti mangipamatmat iti regta nga impakita dagiti Saksi ni Jehova iti 1997 a tawen serbisio?

◻ Aniaman ti aramiden ni Satanas maibusor kadatayo, ania nga espiritu ti ipakitatayo iti 1998 a tawen serbisio?

[Tsart iti panid 18-21]

REPORT TI 1997 A TAWEN SERBISIO DAGITI SAKSI NI JEHOVA ITI SANGALUBONGAN

(Kitaem ti bound volume)

[Ladawan iti panid 15]

Ti naisangsangayan a bilang dagiti timmabuno iti Memorial ipakitana nga adda nasayaat a pangnamnamaan iti irarang-ay

[Ladawan iti panid 16]

No kasano a sinuportaran ni Jehonadab ni Jehu, kasta met a supsuportaran ita ti “dakkel a bunggoy” ti Natantan-ok a Jehu, ni Jesu-Kristo, ken dagiti napulotan a kakabsatna