Apay nga Agyamankayo?
GAPU iti pannakaopera ti durina, napilitan ni Harley a mangbalbaliw iti trabahona. Dati a makinista ngem maysa itan a klerk iti opisina. Idi napagsaludsodan no kasano ti panagriknana iti daytoy a panagbalbaliw, kinuna ni Harley: “Talaga a birukbirokek ti panagtrabaho iti makina. Ngem, iti kinaagpaysona, naragragsakak iti trabahok ita ngem iti dati.”
No apay a maibagana a kontento, kuna ni Harley: “Daytoy ket gapu iti kababalin dagiti katrabahuak. Saan a kas kadagidiay adda iti dati a pagtartrabahuak, apresiaren ti superbisorko ken dagiti katrabahuak ita ti maar-aramidak, ket saanda nga ipaidam ti komendasion. Dakkel unay ti nakaidumaan daytoy.” Tangay mariknana nga isu ket napateg ken kasapulan, naragsak itan a trabahador ni Harley.
Talaga a makaliwliwa iti puso ti maiparbeng a komendasion wenno panagyaman. Iti sabali a bangir, ti kinaawan panagyaman pakapuyenna ti nakem kas kinuna ni Shakespeare: “Pumuyotka, pumuyotka, sika nga angin ti lam-ek, naim-imbagka pay ngem ti kinaawan panagyaman ti tao.” Nakalkaldaang, adu ti agsagsagaba iti kasta a kinaawan asi.
Agannad Maibusor iti Kinaawan Panagyaman
Iti lubong ita manmanon a mangngeg ti napasnek nga ebkas ti panagyaman. Kas pagarigan, insaludsod ti maysa a mannurat: “No naaddaan tiempo ti nobia a nagsurat iti 200 nga imbitasion ti kasar, apay a di makaiwaya nga agsurat iti panagyaman para iti 163 a regalo?” Masansan a di man la madakamat uray ti simple a sao a “pagyamanan.” Masuksukatanen ti kinamanagyaman iti panangipangpangruna iti bagi. Daytoy a kasasaad ket maysa kadagiti tanda a pakailasinan iti maudi nga al-aldaw. Namakdaar ni apostol Pablo: “Masapul nga ammuem a kadagiti maudi nga al-aldaw dumtengto dagiti napeggad a tiempo. Dagiti tattao maseknanda unay iti bagbagida . . . awananda iti panagyaman.”—2 Timoteo 3:1, 2, Phillips.
Iti dadduma a kaso, ti panagyaman ket masuktan iti pammasablog. Aggubuay dagiti ebkas ti panagyaman iti puso a di pampanunoten ti personal a pagimbagan. Nupay kasta, ti pammasablog, a kadawyan a di naimpusuan ken aglablabes, mabalin nga aggubuay iti kabukbukodan a motibo a pannakaital-o wenno pananggun-od kadagiti personal a pagimbagan. (Judas 16) Malaksid iti panangallilaw iti mapasablogan, ti kasta a nalamuyot a panagsao ket masansan a bunga ti kinapasindayaw ken kinapangas. Siasino, no kasta, ti mayat a mabiktima iti pammasablog? Ngem ti napasnek a panagyaman pudno a makagin-awa.
Ti tao a mangyebkas iti panagyaman magunggonaan iti panangaramidna iti dayta. Ti kinabara a mapaspasaranna gapu iti naimpusuan a kinamanagyamanna mangyeg kenkuana iti ragsak ken talna. (Idiligyo ti Proverbio 15:13, 15.) Ken gapu ta positibo a kababalin, ti kinamanagyaman ti mangsaluad kenkuana kadagiti negatibo a rikna kas ti pungtot, imon, ken sakit ti nakem.
“Ipakitayo a Managyamankayo”
Idagadag kadatayo ti Biblia a sukayentayo ti kinamanagyaman, wenno agbalintayo a managyaman. Insurat ni Pablo: “Mainaig iti isuamin agyamankayo. Ta daytoy ti pagayatan ti Dios a naikaykaysa ken Kristo Jesus maipapan kadakayo.” (1 Tesalonica 5:18) Ket binalakadan ni Pablo dagiti taga Colosas: “Ti talna ni Kristo agturay koma kadagiti pusoyo . . . Ket ipakitayo a managyamankayo.” (Colosas 3:15) Adu a salmo ti naglaon kadagiti ebkas ti panagyaman, a mangipaspasimudaag a ti naimpusuan a panagyaman ket nadiosan a galad. (Salmo 27:4; 75:1) Nalawag, maragsakan ni Jehova a Dios no ipakitatayo ti kinamanagyaman kadagiti inaldaw a banag iti biag.
Ngem ania dagiti banag iti daytoy awanan panagyaman a lubong ti mamagbalin a narigat para kadatayo nga agyaman? Kasanotay a maipakita ti kinamanagyaman iti inaldaw-aldaw a panagbiag? Masungbatan dagitoy a saludsod iti sumaganad nga artikulo.