Panangidanon iti Naimbag a Damag Kadagiti Ad-adu Pay

BAYAT a pinampanunotko dagiti tattao iti pagilian a pagnanaedak, nautobko nga adu ti makaam-ammo kadagiti Saksi ni Jehova babaen laeng kadagiti damag iti warnakan. Napanunotko a masapul a makasarita dagitoy a tattao tapno maammuanda ti kinasiasino dagiti Saksi ni Jehova ken no ania a talaga ti pammatida. Ngem kasano a makatulongak? Kristiano a panglakayen ni lakayko, ket impaayannak iti nainsiriban a giya ken singasing.

Nakasarakkami iti napateg nga ideya iti artikulo a “Dagiti Magasin a Makaipaay ti Praktikal a Pakaliwliwaan,” a naipablaak iti Enero 8, 1995, a ruar ti magasin nga Agriingkayo! Maipanggep iti aramid ti maysa a Saksi, kuna ti artikulo: “Nakayugalianna a kolektaen dagiti daan a kopia ti magasin nga Agriingkayo! a naurnong ti dadduma a Saksi iti pagtaenganda. Kalpasanna, sarungkaranna dagiti ahensia a patienna a mangipakita iti naisangsangayan nga interes iti dadduma kadagiti topiko.”

Iti tulong ni lakayko, di nagbayag nakaurnongakon iti ginasut a kopia ti magasin. Manipud kadagitoy nakapiliak iti nadumaduma a tema a maibagay kadagiti tattao a kasabaak.

Babaen ti panangusar kadagiti direktorio ti telepono ken publiko a rekord, nangurnongak iti listaan a mangirepresentar kadagiti ospital, pagdagusan dagiti agtutubo, ken balay a pagtaraknan. Adda met dagiti nailistak a mangimammanehar kadagiti puneraria, superbisor ken mammagbaga iti eskuelaan, medical examiner, ken opisial kadagiti pagbaludan ken korte. Adda dagiti nairaman iti listaak a mangidadaulo kadagiti institusion a para kadagiti alkoholiko ken adikto iti droga, dagiti asosasion a mangtamtaming kadagiti isyu maipapan iti aglawlaw, kadagiti baldado ken biktima ti gubat, ken iti panagsirarak kadagiti taraon. Inramanko met dagiti mangimammanehar kadagiti opisina a para iti welfare, sosial a serbisio, ken kadagiti aktibidad ti pamilia.

Ania ti Ibagak?

Umuna nga iyam-ammok a silalawag ti kinasiasinok no bumisbisitaak. Kalpasanna dakamatek a sumagmamano laeng a minuto ti ibibisitak.

No makasangokon a mismo ti mangimatmaton kunaek: “Maysaak a Saksi ni Jehova. Nupay kasta, saanak nga immay tapno makisarita maipapan iti relihion, a nalabit saan a maiparbeng iti oras ti panagtrabaho.” Masansan a nataltalingenngen ti panagsasarita. Kalpasanna, ibagayko ti komentok iti kasasaad, itultuloyko: “Adda dua a pakaigapuan ti ibibisitak. Umuna, kayatko nga iyebkas ti panangapresiarko iti trabaho nga iyur-urnos ti opisinayo. Kinapudnona, saan nga ang-angaw ti panangisakripisio iti tiempo ken pigsa a maipaay iti publiko. Makomendaran unay daytoy.” Iti adu a kaso masdaaw ti tao no kastoy ti pannakisarita kenkuana.

Ita nalabit pampanunotennan no ania ti maikadua a makagapu iti ibibisitak. Ituloyko: “Daytoy ti maikadua a pakaigapuan ti ibibisitak: Manipud iti magasinmi nga Agriingkayo!, a maipabpablaak iti intero a lubong, nangpiliak iti sumagmamano nga artikulo a nangnangruna nga adda pakainaiganna iti kita ti trabahoyo ken dagiti parikut a nainaig iti dayta. Masiguradok a kayatyo a maammuan ti panangmatmat ti internasional a warnakan maipanggep kadagitoy a parikut. Maragsakanak a mangibati kadagitoy a kopia kadakayo.” Masansan nga ibagada kaniak a maapresiar ti panagreggetko.

Dagiti Di Ninamnama ken Makagunggona a Resulta

Babaen ti kastoy a pannakisaritak, nainggayyeman ti panangawat kaniak ti kaaduan; maysa laeng iti kada 17 ti nagkedked a makisarita. Adu ti di ninamnama ken makagunggona a kapadasak.

Kas pagarigan, kalpasan ti namimpat a panangpadasko ken siaanus a panagur-urayko, nakasaritak ti maysa a district school inspector. Okupado unay a tao. Ngem, mannakigayyem unay ken nakitungtong kaniak iti apagbiit. Idi pumanawakon, kinunana: “Pudno nga apresiarek ti panagreggetmo, ket sigurado a basaekto a naimbag ti literaturayo.”

Iti sabali pay a gundaway, napanak iti maysa a korte ti distrito, ket nakasaritak ti kangatuan a hues, agkabannuag a lalaki. Idi sumrekak iti opisinana, sinukimatna dagiti papelesna a medio makasursuron.

“Agsapa ti Martes laeng ti panagopisinak, ket mabalinkonto ti dumngeg iti aniaman nga impormasion,” kinunana a kasla makaunget.

“Dispensarendak koma iti di naintiempuan nga iyaayko,” insungbatko a dagus sa innayonko, “Siempre, maragsakanakto nga agsubli iti sabali a gundaway. Ngem kinapudnona personal a banag ti immayak.”

Ita naginteresen ti hues. Naal-alumamayen ti timekna a nangdamag no ania ti masapulko. Inulitko nga agsubliakto laengen inton Martes.

“Pangngaasim ta agtugawka,” impapilitna, a medio nakasdaawak. “Ania ti masapulmo?”

Naragsak ti panagsaritami, ket nagpadispensar iti kinasabrakna iti damo gapu ta talaga nga okupado unay.

“Ammom no aniat’ magustuak kadagiti Saksi ni Jehova?” pagammuan ta insaludsod ti hues. “Addaanda kadagiti prinsipio a natibker ti nakaibatayanna ket saanda a sumiasi iti dayta. Inaramid amin ni Hitler ti kabaelanna, ngem kaskasdi a di nakigubat dagiti Saksi.”

Idi sumrekkami a dua iti opisina, nalasindakami dagiti sekretaria sadiay. Idi kuan nagsao a kasla makaunget ti sekretario ehekutibo, “Saan a pulos nga awaten ti presidente ti aniaman a partido.”

“Ngem awatennakami,” kinunak a siaalumamay, “agsipud ta Saksi ni Jehova-kami. Saankami nga agpetpetision, ken tallo a minuto laeng ti ibibisitami.” Inkararagko a sipapasnek, “O Jehova, sapay koma ta pagballigienyo daytoy!”

Simmungbat ti sekretaria a kasla makasuron, “Sige, padasek ngarud.” Idi kuan pimmanawen. Kalpasan ti agarup dua a minuto, nga iti panagriknak ket kasla nakabaybayag unay, rimmuar a sinaruno ti mismo a presidente. Saan a nagsasao, inturongnakami iti opisinana, a linabsanmi ti dua pay a kuarto.

Idi rugianmin ti agsasarita, simmayaat metten ti pannakilangenna. Situtulok nga inawatna dagiti naisangsangayan a ruar ti magasin nga Agriingkayo! idi intukonmi dagitoy. Nagyamankami ken Jehova iti daytoy a gundaway a panangted iti nasayaat a pammaneknek maipapan iti panggep ti trabahotayo.

No lagipek ti adu a nagsasayaat a kapadasan, ad-adda a maapresiarko unay ti kinuna ni apostol Pedro: “Iti kinapudnona makitak a ti Dios saan a mangidumduma, no di ket iti tunggal nasion anamonganna ti tao nga agbuteng kenkuana ken agaramid iti kinalinteg.” (Aramid 10:34, 35) Pagayatan ti Dios a dagiti tattao iti amin a kasasaad, pagsasao, wenno aniaman ti takemda iti kagimongan maipaayanda iti gundaway a mangammo iti panggepna para iti sangatauan ken iti daga.​—Naipatulod.