Dagiti Saludsod Manipud Kadagiti Agbasbasa

Indagadag ni Jesus: “Umagawakayo a sipipinget a sumrek iti akikid a ruangan, agsipud ta, ibagak kadakayo, adu ti agtarigagayto a sumrek ngem didanto kabalinan.” (Lucas 13:24) Ania ti kayatna a sawen, ken kasano nga agaplikar daytoy itatta?

Matarusantayo a naimbag daytoy makapainteres a sasao babaen ti panangusig iti kasasaad a nainaig iti dayta. Aginnem a bulan sakbay ti ipapatayna, adda ni Jesus idiay Jerusalem kabayatan ti anibersario ti pannakaidedikar manen ti templo. Imbagana nga isu ti pastor dagiti karnero ti Dios ngem impatuldona a saan a paset ti kakasta a karnero dagiti Judio iti pangkaaduan gapu ta nagkedkedda a dumngeg. Idi imbagana a ‘maymaysada’ iti Amana, pimmidut dagiti Judio iti batbato tapno uborenda. Naglibas a napan iti Perea iti labes ti Jordan.​—Juan 10:1-40.

Sadiay insaludsod ti maysa a lalaki: “Apo, bassit kadi dagidiay maisalakan?” (Lucas 13:23) Maitutop a saludsodenna dayta, agsipud ta iti daydi a tiempo, mamati dagiti Judio a limitado laeng ti bilang ti maikari iti pannakaisalakan. Iti kasta a kababalinda, saan a narigat a mailadawan no siasino ti pampanunotenda a mangbukel iti daydiay bassit. Anian a kamalida, kas impakita dagiti sumaganad a panagbalbaliw a naaramid idi ud-udina!

Iti dua a tawen, kaduada ni Jesus a mangisursuro, mangar-aramid kadagiti milagro, ken mangituktukon iti posibilidad ti panagtawidda iti nailangitan a Pagarian. Ania ti resultana? Isuda, ken nangruna ti papanguluenda, ipagpannakkelda idi a kaputotan ida ni Abraham ken ti pannakaitalek kadakuada ti Linteg ti Dios. (Mateo 23:2; Juan 8:31-44) Ngem dida bigbigen ken ipangag ti timek ti Nasayaat a Pastor. Adda idi iti sanguananda ti kasla silulukat a ruangan, a ti kangrunaan a gunggona dagiti sumrek iti daytoy isu ti pannakipaset iti Pagarian, ngem nagkitakitda. Sumagmamano laeng, kangrunaanna dagiti nagtaud iti nanumo a klase, ti nangipangag iti mensahe ni Jesus maipapan iti kinapudno, nagtignay, ken nagtalinaed kenkuana.​—Lucas 22:28-30; Juan 7:47-49.

Iti aldaw ti Pentecostes 33 K.P., dagiti naud-udi ti maikari a mapulotan iti espiritu. (Aramid 2:1-38) Saanda a naibilang kadagiti managaramid iti kinakillo a dinakamat ni Jesus nga agsangit ken agngaretnget dagiti ngipenda gapu ta saanda a ginundawayan ti naitukon kadakuada.​—Lucas 13:27, 28.

Iti kasta, ti “adu” idi umuna a siglo isuda dagiti Judio iti pangkaaduan, ken nangnangruna dagiti relihioso a papanguluen. Kunkunada a kayatda ti pabor ti Dios​—ngem maitunos kadagiti pagrukodan ken dalanda met laeng, saan nga iti Dios. Naigiddiat iti daytoy, ti “manmano” a nagtignay gapu iti napasnek a tarigagayda a makipaset iti Pagarian ti nagbalin a napulotan a miembro ti kongregasion Kristiano.

Ita, usigenyo ti ad-adda a napalawa a pakayaplikaranna a mapaspasamak iti kaaldawantayo. Nakaad-adu a tattao a tumabtabuno kadagiti simbaan ti Kakristianuan ti nasursuruan a mapandanto sadi langit. Nupay kasta, saan a naibatay daytoy a panagtarigagay kadagiti umiso a sursuro iti Kasuratan. Kas kadagiti Judio idi, tarigagayan dagitoy ti anamong ti Dios ngem kadagiti laeng kaykayatda a pamay-an.

Nupay kasta, addada sumagmamano iti panawentayo a sipapakumbaba a nangipangag iti mensahe ti Pagarian, nangidedikar iti bagida ken Jehova, ken inanamonganna. Nangiturong daytoy iti panagbalinda nga “annak ti pagarian.” (Mateo 13:38) Nangrugi a naawis dagitoy a napulotan nga “annak” idi Pentecostes 33 K.P. Nabayagen nga addaan pammaneknek dagiti Saksi ni Jehova a ti pannakilangen ti Dios iti ilina ipasimudaagna a naayabanen dagiti miembro ti nailangitan a klase. Gapuna, dagidiay nakaadal iti kinapudno ti Biblia kadagiti kallabes a tawen naawatanda a ti namnama a biag nga awan inggana iti paraiso a daga ti maituktukonen. Lab-awan dagitoy ti bumasbassit a bilang dagiti natda a napulotan a Kristiano, nga addaan namnama nga aktual a mapan idiay langit. Saan a nangnangruna nga agaplikar ti Lucas 13:24 kadagidiay saan a mangnamnama a mapan idiay langit, ngem sigurado a naglaon daytoy iti nainsiriban a balakad para kadakuada.

Babaen ti panangidagadagna kadatayo nga umagawatayo a sipipinget, di ibagbaga ni Jesus nga isu wenno ni Amana ket bangbangenanda ti dalantayo tapno malapdantayo. Ngem maawatantayo manipud Lucas 13:24 a dagiti kalikaguman ti Dios ipuerana dagiti di maikari. Iparipirip ti “umagawakayo a sipipinget” ti panangikarigatan, panangaramid iti amin a kabaelantayo. Ngarud, mabalin a maisaludsodtayo iti bagbagitayo, ‘Ar-aramidek kadi ti kabaelak?’ Iti sabali a pannao, arigna a kuna ti Lucas 13:24, ‘Masapul nga umagawaak a sipipinget a sumrek iti akikid a ruangan gapu ta adu ti agtarigagay a sumrek ngem dida kabalinan. Gapuna, pudno kadi nga umag-agawaak a sipipinget? Kaslaak kadi iti maysa nga atleta iti nagkauna nga istadium a mangipaay iti aminna tapno mangabak iti premio? Awan siasinoman nga atleta a nagkadua ti pusona, nga agpampamayan. Kastaak kadi?’

Ipasimudaag ti sasao ni Jesus a mabalin a kayat ti sumagmamano ti ‘sumrek iti ruangan’ no nanam-ay kadakuada, a saan nga agap-apura. Mabalin a maimpluensiaan iti kastoy a kapanunotan dagiti indibidual a Saksi. Mabalin nga ikalintegan ti sumagmamano, ‘Addada ammok a napasnek a Kristiano a nagregget iti adu a tawen, a nagsaksakripisio; ngem, iti ipapatayda di pay met nagngudo daytoy dakes a sistema. Nalabit, guminad bassit, agbiag kas iti dadduma.’

Nalaka ti agpanunot iti kasta, ngem nainsiriban kadi dayta? Kas pagarigan, kasta kadi ti panagpampanunot dagiti apostol? Sigurado a saan. Impaayda amin a kabaelanda iti pudno a panagdaydayaw​—agingga iti ipapatayda. Kas pagarigan, naibaga ni Pablo: “[Ni Kristo] daydiay impabpablaakmi . . . Gapu itoy a panggep pudno unay nga agtartrabahoak a sipipinget, nga umag-agawaak maitunos iti panagtignayna ken isu agar-aramid kaniak buyogen ti pannakabalin.” Idi bumaybayag insuratna: “Gapu itoy a panggep agtartrabahotayo a sipipinget ken umag-agawatayo, agsipud ta insadagtayo ti namnamatayo iti sibibiag a Dios, a Manangisalakan iti amin a kita ti tattao, nangnangruna kadagiti matalek.”​—Colosas 1:28, 29; 1 Timoteo 4:10.

Ammotayo a husto ti inaramid ni Pablo iti panagagawana. Anian a pannakapnek ti tunggal maysa kadatayo no maibagatayo iti kas iti kinuna ni Pablo: “Nakirupakak iti nasayaat a dangadang, tinarayko ti tarayen agingga iti pagpatinggaan, tinungpalko ti pammati.” (2 Timoteo 4:7) Gapuna, maitunos iti sasao ni Jesus a nailanad iti Lucas 13:24, mayimtuod ti tunggal maysa kadatayo, ‘Sisasaet ken sigaganetget met laeng kadi nga ar-aramidek ti amin a kabaelak? Wen, adda kadi ti pakakitaan a kanayonko nga ipappapuso ti balakad ni Jesus nga: “Umagawakayo a sipipinget a sumrek iti akikid a ruangan”?’