Agur-uray a ‘Sigagagar a Mangsegsegga’

“Ta ti sigagagar a panangsegga ti sangaparsuaan ket agur-uray iti pannakaipanayag dagiti annak ti Dios.”​—ROMA 8:19.

1. Ania ti pagpadaan ti kasasaad dagiti Kristiano ita ken ti kasasaad dagiti Kristiano idi umuna a siglo?

UMASPING ti kasasaad dagiti pudno a Kristiano ita iti kasasaad dagiti Kristiano idi umuna a siglo. Nakatulong ti maysa a padto kadagiti adipen ni Jehova kadagidi nga aldaw a mangammo no kaano nga agparang ti Mesias. (Daniel 9:24-26) Daydi met laeng a padto ti nangipakauna iti pannakadadael ti Jerusalem ngem saan a naglaon iti impormasion a tumulong kadagiti Kristiano a mangammo a nasaksakbay no kaano a madadael dayta a siudad. (Daniel 9:26b, 27) Kasta met, naintiempuan a tinignay ti maysa a padto dagiti napasnek nga estudiante ti Biblia idi maika-19 a siglo a mangsegga. Babaen ti pananginaigda iti “pito a panawen” ti Daniel 4:25 iti “panawen dagiti Gentil,” ninamnamada nga awaten ni Kristo ti kinaturay iti Pagarian iti 1914. (Lucas 21:24, King James Version; Ezequiel 21:25-27) Nupay naglaon ti libro ni Daniel iti adu a padto, awan kadagitoy ti naglaon iti impormasion a tumulong kadagiti estudiante ti Biblia iti agdama a panawen a mangkuenta iti eksakto a tiempo a pannakadadael ti intero a sistema ti bambanag ni Satanas. (Daniel 2:31-44; 8:23-25; 11:36, 44, 45) Nupay kasta, asidegen a mapasamak daytoy, ta agbibiagtayon iti “panawen ti panungpalan.”​—Daniel 12:4.a

Kinasalukag Kabayatan ti Kaadda ni Kristo

2, 3. (a) Ania ti mangbukel iti kangrunaan a pammaneknek nga agbibiagtayon iti panawen a kaadda ni Kristo kas ari? (b) Ania ti mangipakita a nasken nga itultuloy dagiti Kristiano ti agsalukag kabayatan ti kaadda ni Jesu-Kristo?

² Pudno, pinagsegga ti maysa a padto dagiti Kristiano sakbay a naisaad ni Kristo a kas ari idi 1914. Ngem ti inted ni Kristo a “pagilasinan” ti kaaddana ken ti panungpalan ti sistema ti bambanag ket buklen dagiti pasamak. Ket kaaduan kadagitoy ti mapasamak kalpasan a mangrugi ti kaaddana. Dagita a pasamak​—gubgubat, kinakirang ti taraon, ginggined, angol, ilalanlan ti kinakillo, pannakaidadanes dagiti Kristiano, ken ti sangalubongan a pannakaikaskasaba ti naimbag a damag ti Pagarian​—ti agserbi a kangrunaan a pammaneknek nga agbibiagtayon iti panawen ti kaadda ni Kristo kas ari.​—Mateo 24:3-14; Lucas 21:10, 11.

³ Ngem ti kangrunaan a punto ti pammakada a balakad ni Jesus kadagiti adalanna ket: “Agtultuloykayo a kumitkita, agtultuloykayo a siririing, . . . agtultuloykayo nga agbantay.” (Marcos 13:33, 37; Lucas 21:36) Ti naannad a panangbasa iti konteksto dagitoy a pammagbaga maipapan iti kinasalukag ipakitana a saan a ti panangsiput iti pagilasinan ti panangrugi ti kaaddana ti kangrunaan a tuktukoyen ni Kristo. Imbes ketdi, bilbilinenna idi dagiti pudno nga adalanna nga itultuloyda ti agsalukag kabayatan ti kaaddana. Ania ti pagsalukagan a kanayon dagiti pudno a Kristiano?

4. Ania ti panggep ti pagilasinan nga inted ni Jesus?

⁴ Impaay ni Jesus ti naindaklan a padtona kas sungbat iti saludsod a: “Kaanonto a mapasamak dagitoy a bambanag [dagiti pasamak a mangiturong iti pannakadadael ti Judio a sistema ti bambanag], ket anianto ti pagilasinan ti kaaddam ken ti panungpalan ti sistema ti bambanag?” (Mateo 24:3) Ti naipadto a pagilasinan ti mangipasimudaag saan laeng nga iti kaadda ni Kristo no di pay ket dagiti pasamak a mangiturong iti panungpalan ti agdama a dakes a sistema ti bambanag.

5. Kasano nga impakita ni Jesus a nupay isu ket addan iti naespirituan a wagas, ‘umayto’ pay laeng?

⁵ Impakita ni Jesus a kabayatan ti “kaaddana” (Griego, pa·rou·siʹa) isu ket umay a napnuan pannakabalin ken dayag. Maipapan iti kasta nga ‘iyaay’ (kayulogan dagiti porma ti Griego a sao nga erʹkho·mai), kinunana: “Iti kasta ti pagilasinan ti Anak ti tao agparangto iti langit, ket kalpasanna isuamin a tribo ti daga saplitendanto ti bagbagida iti panagun-unnoy, ket makitadanto ti Anak ti tao nga um-umay kadagiti ulep ti langit agraman pannakabalin ken dakkel a dayag. . . . Ita agsursurokayo manipud iti kayo a higos kas maysa a pangngarig iti daytoy a punto: Apaman la unay a ti kabbaro a sangana gumanus ken pataudenna dagiti bulbulong, ammoyo a ti kalgaw asidegen. Kastakayo met, inton makitayo amin dagitoy a bambanag, ammuenyo nga isu [ni Kristo] asidegen kadagiti ruangan. . . . Agtultuloykayo nga agbantay, ngarud, agsipud ta dikay ammo no iti ania nga aldaw nga umay ti Apoyo. . . . Paneknekanyo a sisasaganakayo, agsipud ta iti oras a dikay ipagarup nga isu dayta, ti Anak ti tao umay.”​—Mateo 24:30, 32, 33, 42, 44.

Apay nga Umay ni Jesu-Kristo?

6. Kasanonto a madadael ti “Babilonia a Dakkel”?

⁶ Nupay addan kas Ari nanipud 1914, masapul nga ukomen pay ni Jesu-Kristo dagiti sistema ken tattao sakbay nga iwayatna ti pannusa kadagidiay masarakanna a dakes. (Idiligyo ti 2 Corinto 5:10.) Iti saan a mabayag, tignayento ni Jehova dagiti napolitikaan nga agtuturay a mangdadael iti “Babilonia a Dakkel,” ti sangalubongan nga imperio ti palso a relihion. (Apocalipsis 17:4, 5, 16, 17) Espesipiko a kinuna ni apostol Pablo a dadaelento ni Jesu-Kristo “ti tao ti kinakillo”​—ti apostata a klero ti Kakristianuan, a prominente a paset ti “Babilonia a Dakkel.” Insurat ni Pablo: “Maipanayagto daydiay nakillo, a papatayento ni Apo Jesus babaen ti espiritu ti ngiwatna ket pukawennanto babaen ti pannakaiparangarang ti kaaddana.”​—2 Tesalonica 2:3, 8.

7. Inton umay ti Anak ti tao iti dayagna, anianto a panangukom ti iwayatna?

⁷ Iti asidegen a masanguanan, ukomento ni Kristo dagiti nasion maibatay iti panangtratoda kadagiti kakabsatna nga adda pay ditoy daga. Mabasatayo: “Inton ti Anak ti tao dumteng iti dayagna, ket amin dagiti anghel maikuyogda kenkuana, iti kasta agtugawto iti nadayag a tronona. Ket isuamin dagiti nasion maurnongdanto iti sanguananna, ket paglalasinennanto dagiti tattao iti maysa ken maysa, a kas ti maysa a pastor ilasinna dagiti karnero manipud kadagiti kalding. Ket ikabilnanto dagiti karnero iti makannawan nga imana, ngem dagiti kalding iti makannigidna. . . . Kunaento ti ari kadakuada [dagiti karnero], ‘Pudno kunak kadakayo, ‘No kasano nga inaramidyo dayta iti maysa kadagiti kanunumuan kadagitoy kakabsatko, inaramidyo dayta kaniak.’ . . . Ket [dagiti kalding] agturongdanto iti agnanayon a pannakagessat, ngem dagiti nalinteg iti agnanayon a biag.”​—Mateo 25:31-46.

8. Kasano ti panangdeskribir ni Pablo iti iyaay ni Kristo a mangukom kadagiti nadangkes?

⁸ Kas naipakita iti pangngarig maipapan kadagiti karnero ken kalding, iwayatto ni Jesus ti maudi a panangukom kadagiti amin a nadangkes. Impanamnama ni Pablo kadagiti agsagsagaba a kapammatianna ti “gin-awa a mairaman kadakami inton pannakaipanayag ni Apo Jesus manipud langit a kadua dagiti mannakabalin nga anghelna iti dumardarang nga apuy, bayat nga iyegna ti pammales kadagidiay di makaammo iti Dios ken kadagidiay di agtulnog iti naimbag a damag maipapan ken Apotayo a Jesus. Dagitoy a mismo agpasardanto iti pannakaukom a dusa nga agnanayon a pannakadadael manipud iti sanguanan ti Apo ken manipud iti dayag ti pigsana, inton tiempo nga isu umay tapno maipadayag mainaig kadagiti sasantona.” (2 Tesalonica 1:7-10) Tangay dandanin dumteng amin dagitoy a makapagagar a pasamak, saan kadi a rebbengna nga ipakitatayo ti pammati ket sigagagar nga itultuloytayo a seggaan ti iyaay ni Kristo?

Sigagagar a Pananguray iti Pannakaipanayag ni Kristo

9, 10. Apay a dagiti napulotan nga adda pay ditoy daga sigagagar nga ur-urayenda ti pannakaipanayag ni Jesu-Kristo?

⁹ “Ti pannakaipanayag ni Apo Jesus manipud langit” ket saan laeng a tapno dadaelenna dagiti nadangkes no di pay ket tapno gunggonaanna dagiti nalinteg. Dagiti natda a napulotan a kakabsat ni Kristo nga adda pay ditoy daga mabalin nga agsagabada pay sakbay ti pannakaipanayag ni Kristo, ngem pagrag-oanda ti nadayag a nailangitan a namnamada. Insurat ni apostol Pedro kadagiti napulotan a Kristiano: “Itultuloyyo ti agrag-o yantangay mairamankayo kadagiti panagsagaba ni Kristo, tapno makapagrag-okayo ken agrag-okayo met iti napalalo kabayatan ti pannakaipanayag ti dayagna.”​—1 Pedro 4:13.

¹⁰ Determinado dagiti napulotan nga agtalinaed a matalek agingga a ni Kristo ‘urnongenna ida a sangsangkamaysa kenkuana’ tapno ti “nasubok a kualidad” ti pammatida “masarakan koma a pakaigapuan ti pannakaidayaw ken dayag ken dayaw inton pannakaipanayag ni Jesu-Kristo.” (2 Tesalonica 2:1; 1 Pedro 1:7) Maipapan iti kakasta a matalek a napulotan-espiritu a Kristiano, maikuna daytoy: “Ti pangsaksi maipapan ken Kristo napatibker iti tengngayo, tapno dikay pulos agkurang iti aniaman a sagut, bayat a sigagagar nga ur-urayenyo ti pannakaipalgak ni Apotayo a Jesu-Kristo.”​—1 Corinto 1:6, 7.

11. Bayat nga ur-urayenda ti pannakaipanayag ni Jesu-Kristo, ania ti aramiden dagiti napulotan a Kristiano?

¹¹ Ti rikna dagiti napulotan a natda ket kas iti rikna ni Pablo, idi insuratna: “Ibilangko a dagiti panagsagaba iti agdama a panawen awan aniaman a pategda no maidilig iti dayag a maipanayagto kadatayo.” (Roma 8:18) Saan a ti panangkuenta kadagiti tiempo ti nakaibatayan ti pammatida. Okupadoda nga agserserbi ken Jehova, a mangipapaayda iti nagsayaat nga ulidan kadagiti kakaduada, dagiti “sabsabali a karnero.” (Juan 10:16) Ammo dagitoy a napulotan nga asidegen nga agpatingga daytoy dakes a sistema, ket ipangpangagda ti pammagbaga ni Pedro: “Patibkerenyo dagiti panunotyo maipaay iti trabaho, sipupuotkayo a naan-anay; isaadyo ti namnamayo iti di kaikarian a kinamanangaasi a maiyeg kadakayo inton pannakaipanayag ni Jesu-Kristo.”​—1 Pedro 1:13.

“Ti Sigagagar a Panangsegga ti Sangaparsuaan”

12, 13. Kasano a “naipasidong iti kinabarengbareng” ti sangatauan, ket ania ti il-iliwen dagiti sabsabali a karnero?

¹² Adda met kadi sigagagar a segseggaan dagiti sabsabali a karnero? Adda. Kalpasan ti panangdakamatna iti nadayag a namnama dagidiay napulotan-espiritu nga “annak” ni Jehova ken “makipagtawid ken Kristo” iti nailangitan a Pagarian, kinuna ni Pablo: “Ti sigagagar a panangsegga ti sangaparsuaan ket agur-uray iti pannakaipanayag dagiti annak ti Dios. Ta ti sangaparsuaan naipasakop iti kinabarengbareng, saan a babaen ti kabukbukodanna a nakem no di ket babaen kenkuana a nangipasakop iti dayta, a maibatay iti namnama a ti sangaparsuaan a mismo mawayawayaanto met manipud iti pannakaadipen iti panagrupsa ket maaddaan iti nadayag a wayawaya dagiti annak ti Dios.”​—Roma 8:14-21; 2 Timoteo 2:10-12.

¹³ Gapu iti basol ni Adan, “naipasakop iti kinabarengbareng” dagiti amin a kaputotanna, a nayanakda a kas adipen ti basol ken ipapatay. Saanda a kabaelan a wayawayaan ti bagbagida iti kasta a pannakaadipen. (Salmo 49:7; Roma 5:12, 21) O, anian a panagtarigagay dagiti sabsabali a karnero a ‘mawayawayaan iti pannakaadipen iti panagrupsa’! Ngem sakbay a mapasamak dayta, adda dagiti banag a masapul a maaramid sigun kadagiti tiempo ken panawen ni Jehova.

14. Anianto ti mairaman iti “pannakaipanayag dagiti annak ti Dios,” ket kasanonto nga agresulta daytoy iti ‘pannakawayawaya [ti sangatauan] iti pannakaadipen iti panagrupsa’?

¹⁴ Masapul a ‘maipanayag’ nga umuna ti natda kadagiti napulotan nga “annak ti Dios.” Ania ti ramanen daytoy? Iti tiempo nga inkeddeng ti Dios, nabatadto kadagiti sabsabali a karnero a dagiti napulotan ‘naselioandanto’ iti kamaudiananna ken naipadayagdanton tapno makipagturayda ken Kristo. (Apocalipsis 7:2-4) ‘Maipanayagto’ met dagiti napagungar nga “annak ti Dios” inton makiramanda ken Kristo a mangdadael iti dakes a sistema ti bambanag ni Satanas. (Apocalipsis 2:26, 27; 19:14, 15) Kalpasanna, kabayatan ti Sangaribu a Tawen a Panagturay ni Kristo, ‘maipanayagdanto’ pay kas papadi a mangiburay kadagiti gunggona ti daton a panubbot ni Jesus iti natauan a “sangaparsuaan.” Agresultanto daytoy iti ‘pannakawayawaya [ti sangatauan] iti pannakaadipen iti panagrupsa’ ket iti kamaudiananna sumrekdanto iti “nadayag a wayawaya dagiti annak ti Dios.” (Roma 8:21; Apocalipsis 20:5; 22:1, 2) Gapu iti kakasta a naindaklan a namnama, makapasiddaaw kadi a dagiti sabsabali a karnero ‘ur-urayenda ti pannakaipanayag dagiti annak ti Dios” a buyogen ti “sigagagar a panangsegga”?​—Roma 8:19.

Ti Kinaanus ni Jehova Kaipapananna ti Pannakaisalakan

15. Ania ti pulos a ditay koma liplipatan maipapan kadagiti tiempo nga intuding ni Jehova a pannakapasamak dagiti bambanag?

¹⁵ Ni Jehova ti Naindaklan a Manangikeddeng iti Tiempo. Apag-isu dagiti tiempo nga intudingna a pannakapasamak dagiti bambanag. Mabalin a saan a kanayon a mapasamak dagiti bambanag iti wagas a ninamnamatayo. Nupay kasta, makapagtalektayo a naan-anay a matungpalto amin a kari ti Dios. (Josue 23:14) Mabalin nga ipalpalubosna nga agtultuloy dagiti bambanag a napapaut ngem iti ninamnama dagiti adu. Ngem ikagumaantay koma a maawatan dagiti dalanna ket idaydayawtayo gapu iti siribna. Insurat ni Pablo: “O nagunegen dagiti kinabaknang ken sirib ken pannakaammo ti Dios! Anian a di pannakasukimat kadagiti panangukomna ken di pannakatalunton kadagiti dalanna! Ta ‘siasino ti nakaammo iti panunot ni Jehova, wenno siasino ti nagbalin a manangbalakadna?’”​—Roma 11:33, 34.

16. Siasino dagiti magunggonaan iti kinaanus ni Jehova?

¹⁶ Insurat ni Pedro: “Dungdunguen, yantangay ur-urayenyo dagitoy a bambanag [ti pannakadadael ti daan a “langlangit” ken “daga” ken ti isusukat ti “baro a langlangit” ken “baro a daga” nga inkari ti Dios], aramidenyo ti amin a kabaelanyo tapno masarakannakayo iti kamaudiananna a di namulitan ken awan pakapilawanna ken sitatalna. Kanayonanna pay, ibilangyo ti kinaanus ni Apotayo a kas pannakaisalakan.” Gapu iti kinaanus ni Jehova, minilion pay ti maipaayan iti gundaway a maisalakan iti “aldaw ni Jehova,” a kellaatto nga umay a “kasla mannanakaw.” (2 Pedro 3:9-15) Ti kinaanusna ikkannatay met iti gundaway a ‘mangitultuloy a mangitrabaho iti pannakaisalakantayo buyogen ti buteng ken panagpigerger.’ (Filipos 2:12) Kinuna ni Jesus a masapul nga ‘asikasuentayo ti bagbagitayo’ ken ‘agtalinaedtayo a siririing’ no kayattay ti maanamongan ken agballigi iti “panagtakder iti sanguanan ti Anak ti tao” inton umay mangukom.​—Lucas 21:34-36; Mateo 25:31-33.

Itultuloyyo ti Aguray a Buyogen ti Panagibtur

17. Ania a sasao ni apostol Pablo ti ipapusotay koma?

¹⁷ Indagadag ni Pablo kadagiti naespirituan a kakabsatna a matmatanda, ‘saan a dagiti bambanag a makita, no di ket dagiti bambanag a di makita.’ (2 Corinto 4:16-18) Dina kayat a kumudrep ti panagkitada iti nailangitan a gunggona nga adda iti sanguananda. Napulotantayo man a Kristiano wenno kameng ti sabsabali a karnero, itultuloytay koma a panunoten ti nakaskasdaaw a namnama nga adda iti sanguanantayo ken saantay a sumuko. ‘Itultuloytay [koma] ti aguray a buyogen ti panagibtur,’ a paneknekantayo a “saan a datayo ti kita nga agsanud nga agturong iti pannakadadael, no di ket ti kita nga addaan pammati nga agturong iti pannakataginayon a sibibiag ti kararua.”​—Roma 8:25; Hebreo 10:39.

18. Apay a sitatalek a maipabiangtay ken Jehova dagiti tiempo ken panawen?

¹⁸ Sitatalek a maipabiangtayo ken Jehova dagiti tiempo ken panawen. “Dinto agbayag” ti pannakatungpal dagiti karina sigun iti tiempo nga inkeddengna. (Habacuc 2:3) Kabayatanna, ad-adda a napnuan kaipapanan kadatayo ti pammagbaga ni Pablo ken Timoteo. Kinunana: “Sipapasnek a bilinenka iti imatang ti Dios ken ni Kristo Jesus, a naikeddeng a mangukom kadagiti sibibiag ken kadagiti natay, ken babaen iti pannakaiparangarangna ken iti pagarianna, ikasabam ti sao, naganetgetka koma iti dayta iti mainugot a panawen, iti nariribuk a panawen . . . Aramidem ti trabaho ti managebanghelio, naan-anay nga itungpalmo ti ministeriom.”​—2 Timoteo 4:1-5.

19. Ania ti naintiempuan pay laeng nga aramiden ti ili ni Jehova, ken apay?

¹⁹ Nakapusta ti biagtayo ken ti biag dagiti kaarrubatayo. Insurat ni Pablo: “Itultuloymo nga asikasuen ti bagim ken ti isursurom. Agtalinaedka kadagitoy a bambanag, ta babaen ti panangaramidmo iti daytoy maisalakanmonto agpadpada ti bagim ken dagidiay agimdeng kenka.” (1 Timoteo 4:16) Nakaab-ababan ti tiempo daytoy dakes a sistema ti bambanag. Bayat a segseggaantayo dagiti makapagagar a pasamak iti masanguanan, laglagipentay koma a kanayon a tiempo ken panawenna pay laeng a kayat ni Jehova nga ikasaba ti ilina ti naimbag a damag ti Pagarian. Masapul a maitungpal dayta a trabaho iti kapkapnekanna. “Iti kasta umayton ti panungpalan,” kinuna ni Jesus.​—Mateo 24:14.

[Footnote]

Kas Pangrepaso

◻ Maipapan iti panangkuenta iti tiempo, kasano a pumada ti kasasaadtayo iti kasasaad dagiti Kristiano idi umuna a siglo?

◻ Apay a dagiti Kristiano masapul nga “agtultuloy[da] nga agbantay,” uray kabayatan ti kaadda ni Kristo?

◻ Apay a sigagagar ti sangatauan a mangsegsegga iti “pannakaipanayag dagiti annak ti Dios”?

◻ Apay a sitatalek a maipabiangtay ken Jehova dagiti tiempo ken panawen?

[Ladawan iti panid 17]

Masapul nga agtalinaed a siririing dagiti Kristiano bayat a segseggaanda ti iyaay ni Kristo

[Ladawan iti panid 18]

Kanayon nga okupado dagiti napulotan a natda nga agserserbi ken Jehova, a saanda nga ibatay ti pammatida iti panangkuenta iti tiempo