“Ti Nangisit ti Buokna a Reyna iti Desierto ti Siria”
KAYUMANGGI ti kudilna, maris perlas ti ngipenna, nangisit ken naraniag dagiti matana. Edukada ken eksperto iti adu a pagsasao. Naikuna a nasirsirib daytoy a mannakigubat a reyna ngem ni Cleopatra ken nalabit agpadada a napintas. Gapu ta natured unay a nakidangadang iti kabilgan a turay ditoy lubong idi kaaldawanna, tinungpalna ti propetiko nga akem iti maysa a drama iti Kasuratan. Kalpasan ti nabayagen nga ipapatayna, indaydayaw dagiti mannurat, ken nakapimpintas ti panangiladawan dagiti pintor kenkuana. Inladawan ti maysa a mannaniw idi maika-19 a siglo kas “ti nangisit ti buokna a reyna iti desierto ti Siria.” Daytoy a babai a napalalo ti pannakaidaydayawna isu ni Zenobia—ti reyna ti Palmyra a siudad ti Siria.
Apay a naglatak ni Zenobia? Aniat’ kasasaad idi ti politika a nakaigapuan ti panagbalinna a nabileg? Aniat’ maikuna maipapan iti kababalinna? Ken ania a propetiko nga akem ti intungpal daytoy a reyna? Usigentay nga umuna ti geograpiko a kasasaad a nakaipalgakan daytoy a drama.
Maysa a Siudad iti Pungto ti Desierto
Masarakan ti Palmyra a siudad ni Zenobia agarup 210 a kilometro iti amianan a daya ti Damasco, iti makin-amianan a pungto ti Syrian Desert a pakatannawagan iti kabambantayan ti Anti-Lebanon. Daytoy nadam-eg a siudad ket adda iti agarup nagtengngaan ti Baybay Mediteraneo iti laud ken ti Karayan Eufrates iti daya. Nalabit pagaammo dayta idi ni Ari Solomon kas Tadmor, lugar a nakapatpateg iti pagarianna gapu iti dua a rason: kas baluarte ti makin-amianan a pagbeddengan ken isu laeng ti mamagkakamang kadagiti agaabay nga il-ili iti desierto. Gapuna, ni Solomon “binangonna ti Tadmor idiay let-ang.”—2 Cronicas 8:4.
Iti historia, awan nadakamat maipapan iti Tadmor kabayatan ti sangaribu a tawen kalpasan ti panagturay ni Ari Solomon. No agpayso nga isu dayta ti Palmyra, nangrugi ti panaglatakna kalpasan a nagbalin ti Siria kas probinsia a sarikedked ti Imperio ti Roma idi 64 K.K.P. “Napateg ti Palmyra iti Roma gapu iti dua a rason, iti ekonomia ken militaria,” kuna ni Richard Stoneman iti librona a Palmyra and Its Empire—Zenobia’s Revolt Against Rome. Yantangay masarakan daytoy a siudad dagiti palma iti kangrunaan a ruta ti negosio a mamagkamang iti Roma ken Mesopotamia ken ti Daya, lumasat iti dayta dagiti komersial a kinabaknang ti lubong idi un-unana—dagiti rekado manipud iti East Indies, seda nga aggapu idiay China, ken dadduma pay a tagilako manipud iti Persia, Makin-Abagatan a Mesopotamia, ken dagiti pagilian iti Mediteraneo. Nakapatpateg iti Roma ti pannakaiserrek dagitoy a tagilako.
Iti tay-ak ti militaria, ti probinsia ti Siria ti nagserbi kas bangen iti nagbaetan dagiti agdangdangadang a turay ti Roma ken Persia. Ti karayan Eufrates insinana ti Roma manipud iti kabangibangna iti daya kabayatan ti immuna a 250 a tawen iti Kadawyan a Panawentayo. Adda laeng ti Palmyra iti kabangibang ti desierto, iti lauden ti siudad ti Dura-Europos iti Eufrates. Gapu ta nabigbigda ti kinapateg ti Palmyra, binisita dayta dagiti emperador ti Roma a kas kada Hadrian ken Valerian. Ad-adda a pinadaeg ni Hadrian ti arkitekturana ken nakaad-adu ti indonarna. Ginunggonaan ni Valerian ti maysa a natan-ok a taga Palmyra nga agnagan Odaenathus—asawa ni Zenobia—babaen ti panangital-ona kenkuana, idi 258 K.P., kas konsul ti Roma gapu ta naballigi ti pannakidangadangna iti Persia ket pinalawana ti pagbeddengan ti Imperio ti Roma iti Mesopotamia. Napateg ti naaramidan ni Zenobia iti pannakaital-o ti asawana iti poder. Insurat ni historiador Edward Gibbon: “Ti balligi ni Odenathus ket maigapu unay iti awan kaaspingna a kinasirib ken kinatibkerna [ni Zenobia].”
Kabayatanna, inkeddeng ni Ari Sapor ti Persia a kariten ti kinasupremo ti Roma ken ipaneknekna ti kinasoberanona kadagiti amin a dati a probinsia ti Persia. Nagmartsa a nagpalaud a kaduana ti nabileg a buyotna, ket sinakupda dagiti ili ti Nisibis ken Carrhae (Haran) a baluarte ti Roma, sada rinebbek ti makin-amianan a Siria ken Cilicia. Indauluan a mismo ni Valerian dagiti buyotna a maibusor kadagiti manangraut ngem naabakda ket kinautibo dagiti Persiano.
Nautob ni Odaenathus a nasayaat no mangipatulod kadagiti nangingina a sagut ken mensahe ti kappia iti ari ti Persia. Sipapangas nga imbilin ni Ari Sapor a maibelleng dagita a sagut iti Eufrates ket imbilinna a dumatag kenkuana ni Odaenathus kas gumawgawawa a kautibo. Kas sungbat, inummong dagiti taga Palmyra ti buyot dagiti nomad iti desierto ken dagiti natda a buyot ti Roma ket rinugianda a parmeken dagiti agsansanuden a Persiano. Gapu kadagiti naalibtak a taktika dagiti mannakigubat iti desierto, dagiti buyot ni Sapor—a napaksuyan ken naparigatan iti kinaadu ti sinamsamda—dida nakagaway ken napilitanda a naglibas.
Kas panangbigbig ni Gallienus, nga anak ken suno ni Valerian, iti panangabak ni Odaenathus ken ni Sapor, ginaladanna ni Odaenathus iti corrector totius Orientis (gobernador iti intero a Dumaya). Idi agangay, ginaladan met ni Odaenathus ti bagbagina nga “ari dagiti ar-ari.”
Tarigagayan ni Zenobia ti Mangbukel iti Imperio
Idi 267 K.P., iti kangitingitan ti panagturayna, napapatay ni Odaenathus ken ti agtawid kenkuana, a naipagarup a gapuanan ti managibales a kaanakan. Ni Zenobia ti simmukat iti saad ni lakayna, tangay ubing pay ti anakna. Yantangay napintas, determinado, kabaelanna ti mangituray, naruam a nangikamkampania iti daydi asawana, ken makapagsao iti nadumaduma a lenguahe, nagun-odna ti panagraem ken suporta dagiti iturayanna—naisangsangayan dayta kadagiti Bedouin. Magustuan idi ni Zenobia ti agsursuro ket adu ti kinapulapolna a mamasirib. Maysa kadagiti mammagbagana ni pilosopo ken orador Cassius Longinus—a naawagan a “sibibiag a libraria ken magmagna a museo.” Kuna ni autor Stoneman: “Kabayatan ti lima a tawen kalpasan ti ipapatay ni Odenathus . . . naipaneknek ni Zenobia kadagiti tattaona nga isu ti reyna iti Dumaya.”
Adda idi ti Persia iti maysa a deppaar ti pagturayan ni Zenobia, a pinakapuyda nga agassawa, ket iti sabali bangir adda sadiay ti marmarpuogen a Roma. Maipapan iti kasasaad ti Imperio ti Roma iti dayta a tiempo, kuna ni historiador J. M. Roberts: “Ti maikatlo a siglo ket . . . nakaam-amak a tiempo iti Roma agpadpada kadagiti sarikedkedna iti dumaya ken iti lumaud, idinto ta iti pagilian nangrugin ti baro a panawen ti gerra sibil ken panagsasalisal a mangagaw iti poder. Nagsasaruno a nagturay ti duapulo ket dua nga emperador (malaksid kadagiti nanglimlimo).” Iti sabali a bangir, ti reyna ti Siria ket talaga a napaneknekan ti kinaturayna iti pagarianna. Kuna ni Stoneman: “Yantangay makontrolna dagiti dua nga imperio [ti Persia ken Roma], mabalinna a gandaten ti mangpataud iti maikatlo a mangdominar kadakuada a dua.”
Naaddaan ni Zenobia iti gundaway a mangpalawa iti pagarianna idi 269 K.P., idi adda nagpammarang idiay Egipto a manglaban iti turay ti Roma. Dagus a nagmartsa ti buyot ni Zenobia a napan idiay Egipto, pinarmekda dagiti rebelde, ken sinakupda ti pagilian. Nagaramid kadagiti sinsilio a naipanagan kenkuana tapno ipakaammona nga isu ti reyna ti Egipto. Limmawan ti pagarianna manipud iti karayan Nilo agingga iti karayan Eufrates. Iti daytoy a tiempo ti panagbiagna, isu ti nagsaad kas “ari ti abagatan” a nadakamat iti padto ni Daniel iti Biblia, tangay ti pagarianna idi ti nagturay iti abagatanen ti pagilian ni Daniel. (Daniel 11:25, 26) Sinakupna met ti kaaduan a paset ti Asia Menor.
Pinabileg ken pinapintas ni Zenobia ti kabeserana a Palmyra nga uray la a nagbalin a kas kadagiti daddadakkel a siudad ti Roma. Napattapatta a nasurok a 150,000 ti populasionna. Napno ti siudad kadagiti nangayed a pasdek publiko, templo, hardin, sadiri, ken monumento, a napalawlawan kadagiti pader a naikuna a 21 a kilometro ti paglikawanna. Naintar iti kangrunaan a kalsada dagiti agaabay nga adigi a Corinthian pillar a nasurok a 15 a metro ti katayagda—nga agarup 1,500 ti kaaduda. Naruay dagiti estatua ken ladawan dagiti bannuar ken nababaknang a managparabur iti siudad. Idi 271 K.P., nangipatakder ni Zenobia iti sangaparis nga estatuada nga agassawa. Iti pungto ti desierto, rumimatrimat idi ti Palmyra a kasla saniata.
Maysa idi ti Templo ti Init kadagiti kasasayaatan a patakder idiay Palmyra ket di pagduaduaan a dayta ti katan-okan a narelihiosuan a buya iti siudad. Nalabit nagdaydayaw met ni Zenobia iti didiosen a nainaig iti dios-init. Nupay kasta, ti Siria idi maikatlo a siglo ket nagpupuniponan ti adu a relihion. Iti pagturayan ni Zenobia addada agkunkuna a Kristiano, Judio, astrologo, ken agdaydayaw iti init ken bulan. Kasano ti panangmatmatna iti nadumaduma a wagas ti panagdayaw iti pagarianna? Kuna ni autor Stoneman: “Ti masirib nga agturay ibilangna a napateg dagiti aniaman a kustombre nga agparang a nasayaat kadagiti tattaona. . . . Ninamnamada a dagiti didios naintarda iti dasig ti Palmyra.” Agparang nga impalubos ni Zenobia ti wayawaya iti relihion. Ngem agpayso kadi a ‘naintar dagiti didios iti dasig ti Palmyra’? Aniat’ agur-uray idi a pagtungpalan ti Palmyra ken ti “masirib nga agturay[na]”?
Ti Emperador ‘Tignayenna ti Kinaturedna’ a Maibusor ken Zenobia
Idi tawen 270 K.P., nagbalin ni Aurelian nga emperador ti Roma. Nagballigi dagiti lehionna a nangabug ken nangdisiplina kadagiti barbaro iti amianan. Idi 271 K.P.—ni Aurelian a mangirepresentar idin iti “ari ti amianan” iti padto ni Daniel—‘tinignayna ti pannakabalin ken kinaturedna a maibusor iti ari ti abagatan,’ nga inrepresentar ni Zenobia. (Daniel 11:25a) Direkta nga imbaon ni Aurelian ti dadduma kadagiti buyotna idiay Egipto sana indauluan ti kaaduan a buyotna a nagpadaya idiay Asia Menor.
Ti ari ti abagatan—ti turay nga indauluan ni Zenobia—‘nakigubat’ ken Aurelian nga addaan iti “dakkel unay ken nabileg a buyot” iti sidong ti dua a heneral, da Zabdas ken Zabbai. (Daniel 11:25b) Ngem sinakup ni Aurelian ti Egipto sada nagturong idiay Asia Menor ken Siria. Naabak ni Zenobia idiay Emesa (a Homs itan), ket nagsanud idiay Palmyra.
Idi rinaut ni Aurelian ti Palmyra, naglibas da Zenobia ken ti anakna nga agturong idiay Persia tapno agpatulongda, ngem natiliw dagiti Romano idiay Karayan Eufrates. Insuko dagiti taga Palmyra ti siudadda idi 272 K.P. Saan a rinanggasan ni Aurelian dagiti agnanaed sadiay. Inummongna ti naruay a samsam, a pakairamanan ti imahen iti Templo ti Init, sa napan idiay Roma. Saan a pinatay ti emperador ti Roma ni Zenobia no di ket pinagbalinna a kangrunaan a pabuya iti prosesion ti panagballigina idiay Roma idi 274 K.P. Nagbalin a matrona ti Roma iti unos ti panagbiagna.
Nadadael ti Desierto a Siudad
Sumagmamano a bulan kalpasan a sinakup ni Aurelian ti Palmyra, pinapatay dagiti taga Palmyra dagiti buyot ti Roma nga imbatina. Idi nadamag ni Aurelian daytoy nga iyaalsa, dagus nga imbilinna nga agsubli dagiti soldadona, ket iti daytoy a gundaway impatawda ti nakaal-alingget a pammales kadagiti umili. Nagbalin nga ad-adipen dagidiay nakalasat iti naulpit a pammapatay. Narebbek ken nadadael dayta a nadayag a siudad ket saanen a mabalin a tarimnen. Gapuna, ti narang-ay a siudad nagsublin iti dati a kasasaadna—ti “Tadmor idiay let-ang.”
Idi nakidangadang ni Zenobia iti Roma, dida ammo nga isuda ken Emperador Aurelian ti nagakem kas “ari ti abagatan” ken “ari ti amianan,” a tinungpalda ti paset ti maysa a padto a nairekord iti adu a detalye babaen ti mammadto ni Jehova agarup 800 a tawen sakbay dayta. (Daniel, kapitulo 11) Babaen ti naisangsangayan a personalidadna, adu ti nangraem ken Zenobia. Ngem ti kapatgan isu ti akemna a nangirepresentar iti napolitikaan a turay a naipakpakauna iti padto ni Daniel. Saan a simmurok iti lima a tawen ti panagturayna. Itatta, ti Palmyra a kabesera ti pagarian ni Zenobia ket maysa laengen a purok. Uray ti nabileg nga Imperio ti Roma nabayag metten a napukaw ken pinarmek dagiti moderno a pagarian. Anianto ti masakbayan dagitoy a turay? Ti pagtungpalanda ket agpannuray met iti sigurado a pannakatungpal ti padto ti Biblia.—Daniel 2:44.
[Kahon iti panid 29]
Ti Impatawid ni Zenobia
Idi nagsubli ni Emperador Aurelian idiay Roma kalpasan ti panangparmekna ken Zenobia a reyna ti Palmyra, imbangonanna ti init iti maysa a templo. Insaadna iti dayta dagiti estatua ti dios-init nga inggapuna iti siudad ni Zenobia. Maipapan iti dayta, kuna ti magasin a History Today: “Ti manayon unay a gapuanan ni Aurelian ket nalabit ti pannakayussuat, idi AD 274, ti tinawen a piesta ti init a mairana iti winter solstice, ti maika-25 ti Disiembre. Idi nagbalin a Kristiano dayta nga imperio nayakar iti daytoy a petsa ti kasangay ni Kristo tapno nalaklaka a maawat ti baro a relihion dagidiay nangramrambak iti pipiesta idi ugma. Nakaskasdaaw a panunoten a ni Emperador Zenobia ti kangrunaan koma a bigbigen a nakaigapuan ti . . . panangrambak [dagiti tattao] iti Krismastayo.”
[Mapa/Ladawan iti panid 28, 29]
(Para iti aktual a pannakaurnosna, kitaem ti publikasion)
BAYBAY MEDITERANEO
SIRIA
Antioquia
Emesa (Homs)
PALMYRA
Damasco
MESOPOTAMIA
Eufrates
Carrhae (Haran)
Nisibis
Dura-Europos
[Credit Lines]
Mapa: Mountain High Maps® Copyright © 1997 Digital Wisdom Inc.
Kolonada: Michael Nicholson/Corbis
[Ladawan iti panid 29]
Sinsilio ti Roma a nalabit nangiladawan ken Aurelian
[Ladawan iti panid 30]
Templo ti init idiay Palmyra
[Credit Line]
The Complete Encyclopedia of Illustration/J. G. Heck
[Ladawan iti panid 31]
Kasarsarita ni Reyna Zenobia dagiti soldadona
[Credit Line]
Giovanni Battista Tiepolo, Queen Zenobia Addressing Her Soldiers, Samuel H. Kress Collection, Photograph © Board of Trustees, National Gallery of Art, Washington
[Picture Credit Line iti panid 28]
Detalye ti: Giovanni Battista Tiepolo, Queen Zenobia Addressing Her Soldiers, Samuel H. Kress Collection, Photograph © Board of Trustees, National Gallery of Art, Washington