Kasano a Mabalbaliwan ni Jesus ti Biagyo?

NAINDAKLAN a Mannursuro ni Jesu-Kristo a nagbiag idiay Palestina agarup 2,000 a tawenen ti napalabas. Bassit la ti ammotayo maipapan iti panagubingna. Ngem, napasingkedan unay nga idi agarup 30 ti tawenna, inrugina ti ministeriona tapno ‘saksianna ti kinapudno.’ (Juan 18:37; Lucas 3:21-23) Dagiti uppat nga adalanna a nangisurat iti kabibiagna impamaysada ti pakasarsaritaanna iti simmaruno a tallo ket kagudua a tawen.

Bayat ti ministeriona, inted ni Jesu-Kristo kadagiti adalanna ti bilin nga agserbi nga agas iti adu a sakit ti lubong. Ania dayta a bilin? Kinuna ni Jesus: “Mangtedak kadakayo iti maysa a baro a bilin, nga ayatenyo ti maysa ken maysa; kas ti panagayatko kadakayo, kasta met nga ayatenyo ti maysa ken maysa.” (Juan 13:34) Wen, ayat ti mangrisut iti adu a problema ti sangatauan. Naminsan, idi adda nagimtuod ken Jesus no ania ti kangrunaan a bilin, insungbatna: “‘Masapul nga ayatem ni Jehova a Diosmo iti amin a pusom ken iti amin a kararuam ken iti amin a panunotmo.’ Daytoy ti kadakkelan ken umuna a bilin. Ti maikadua, nga umasping iti dayta, isu daytoy, ‘Masapul nga ayatem ti kaarrubam a kas iti bagim.’”​—Mateo 22:37-40.

Impakita ni Jesus kadatayo babaen ti sasao ken ar-aramid no kasano nga ayaten ti Dios ken ti padatayo a tattao. Usigentayo ti sumagmamano a pagarigan ket kitaentayo no ania ti maadaltayo kenkuana.

Dagiti Pannursurona

Iti maysa kadagiti kalatakan a sermon iti historia, imbaga ni Jesu-Kristo kadagiti pasurotna: “Awan ti makabalin nga agpaadipen iti dua nga appo; ta mabalin a guraenna ti maysa ket ayatenna ti sabali, wenno agtalinaed iti maysa ket umsienna ti sabali. Dikay mabalin ti agpaadipen iti Dios ken kadagiti Kinabaknang.” (Mateo 6:24) Praktikal pay la kadi ita ti pannursuro ni Jesus a panangyun-una iti Dios iti biagtayo, idinto ta nagadu ti mamati a ti kuarta ti mangrisut iti isuamin a problema? Pudno, masapultay ti kuarta tapno agbiagtayo. (Eclesiastes 7:12) Ngem, no palubosantay ti “Kinabaknang” nga agbalin nga apotayo, “ti ayat iti kuarta” isunto ti mangkontrol kadatayo, nga iturayanna ti intero a biagtayo. (1 Timoteo 6:9, 10) Adu ti natnag iti daytoy a silo ket nagresulta daytoy iti pannakapukaw ti pamiliada, salun-atda, ken uray ti biagda.

Iti kasumbangirna, ti panagpannuray iti Dios a kas Apotayo mangted iti panggep iti panagbiag. Kas Namarsua, isu ti Gubuayan ti biag, ket ngarud, isu laeng ti maikari a pagdayawantayo. (Salmo 36:9; Apocalipsis 4:11) Dagidiay makaadal kadagiti galadna ken makasursuro a mangayat kenkuana matignayda nga agtungpal kadagiti bilinna. (Eclesiastes 12:13; 1 Juan 5:3) Magunggonaantayo no aramidentay ti kasta.​—Isaias 48:17.

Iti Sermon idiay Bantay, insuro met ni Jesus kadagiti adalanna no kasanoda nga ayaten ti padada a tattao. Kinunana: “Isuamin a bambanag, ngarud, a kayatyo nga aramiden kadakayo dagiti tattao, masapul a kasta met ti aramidenyo kadakuada.” (Mateo 7:12) Ti sao a “tattao” nga inusar ditoy ni Jesus ramanenna uray dagiti kabusor ti maysa a tao. Iti dayta met la a sermon, kinunana: “Itultuloyyo nga ayaten dagiti kabusoryo ket ikararaganyo dagidiay mangidaddadanes kadakayo.” (Mateo 5:43, 44) Saan kadi a risuten ti kasta nga ayat ti adu a problema a sarsarangtentay ita? Kasta ti pannakaawat ni Mohandas Gandhi a panguluen dagiti Hindu. Naadaw a kastoy ti kunkunana: “No agnunumo[tayo] iti pannursuro nga impaay ni Kristo iti daytoy a Sermon iti Bantay, marisuttayto dagiti problema . . . ti intero a lubong.” Marisut ti adu a problema ti sangatauan no mayaplikar dagiti pannursuro ni Jesus maipapan ti ayat.

Dagiti Aramidna

Saan laeng nga insuro ni Jesus dagiti napateg a kinapudno maipapan iti panangipakita iti ayat no di pay ket inaramidna ti insurona. Kas pagarigan, inyun-unana ti pagimbagan ti sabsabali imbes a ti bukodna. Naminsan, okupado unay ni Jesus ken dagiti adalanna a mangtultulong iti tattao nga awan pay tiempodan a mangan. Nakita ni Jesus a masapul nga aginana iti apagbiit dagiti adalanna, isu nga impanna ida iti naulimek a lugar. Ngem idi dimtengda sadiay, nakitada ti umariwekwek a tattao nga agur-uray kadakuada. Ania ngata ti reaksionyo no makitayo ti umariwekwek a mangnamnama nga agtrabahokayo idinto ta kasapulan koma ti aginana iti apagbiit? Bueno, “simnek ti asi [ni Jesus] kadakuada” ket “rinugianna nga isuro ida kadagiti adu a bambanag.” (Marcos 6:34) Ti kastoy a pannakaseknan kadagiti dadduma ti kanayon a nangtignay ken Jesus a tumulong kadakuada.

Saan la nga insuro ni Jesus dagiti tattao. Nangipaay met iti praktikal a tulong. Kas pagarigan, naminsan pinakanna ti nasurok a 5,000 a tattao a nagim-imdeng kenkuana agingga iti mumalem. Di nagbayag kalpasan dayta, pinakanna ti maysa pay a dakkel a bunggoy​—nasurok nga 4,000 iti daytoy a gundaway​—a nagim-imdeng kenkuana iti tallo nga aldaw ket awanen ti taraonda. Iti damo a gundaway, lima a tinapay ken dua nga ikan ti inusarna, ket iti maikadua, pito a tinapay ken sumagmamano a babassit nga ikan. (Mateo 14:14-22; 15:32-38) Milagro? Wen, nagaramid kadagiti milagro.

Inagasan met ni Jesus ti adu a masaksakit. Pinaimbagna dagiti bulsek, pilay, agkukutel, ken tuleng. Wen, pinagungarna pay dagiti natay! (Lucas 7:22; Juan 11:30-45) Naminsan, adda agkukutel a nagpakaasi kenkuana: “No koma laeng kayatmo, kabaelannak a dalusan.” Ania ti inaramid ni Jesus? “Iti kasta simnek ti asina, ket inunnatna ti imana ket sinagidna, ket kinunana kenkuana: ‘Kayatko. Madalusanka koma.’” (Marcos 1:40, 41) Babaen ti kakasta a milagro, imparangarang ni Jesus ti panagayatna kadagiti maparparigat.

Marigatankay kadi a mamati kadagiti milagro nga inaramid ni Jesus? Marigatan ti dadduma. Ngem, laglagipenyo a silalatak nga inaramid ni Jesus dagiti milagrona. Uray dagiti bumusbusor kenkuana, a nagbirok iti pangbabalawanda kenkuana iti tunggal gundaway, dida mailibak nga isu addaan pannakabalin nga agaramid iti milagro. (Juan 9:1-34) Maysa pay, adda panggep dagiti milagrona. Timmulong dagitoy kadagiti tattao a mangilasin kenkuana nga Isu ti imbaon ti Dios​—Juan 6:14.

Iti panangaramidna kadagiti milagro, ni Jesus dina inturong ti atension iti bagina. Imbes ketdi, indaydayawna ti Dios, ti Gubuayan ti pannakabalinna. Naminsan idiay Capernaum, adda ni Jesus iti balay a napusek iti tattao. Adda paralisado a lalaki a kayatna ti maimbagan ngem di makastrek. Isu a nakaidda iti langkapi nga imbaba dagiti gagayyemna manipud iti atep. Idi nakitana ti pammatida, pinaimbag ni Jesus ti paralitiko. Gapuna, “indaydayaw [dagiti tattao] ti Dios” ken kinunada: “Ditay pay pulos nakakita ti kas iti dayta.” (Marcos 2:1-4, 11, 12) Nangipaay dagiti milagro ni Jesus iti dayaw ken Jehova a Diosna, ken natulonganna dagidiay agkasapulan.

Ngem saan a ti namilagruan a panangagas kadagiti masakit ti kangrunaan a paset ti ministerio ni Jesus. Inlawlawag ti maysa a nagsurat iti kabibiag ni Jesus: “Dagitoy naisuratda tapno patienyo koma a ni Jesus isu ti Kristo nga Anak ti Dios, ket, gapu iti panamati, maaddaankay koma iti biag babaen ti naganna.” (Juan 20:31) Wen, immay ni Jesus ditoy daga tapno dagiti tattao a mamati maaddaanda koma iti biag.

Ti Datonna

‘Immay ni Jesus ditoy daga?’ maisaludsodyo. ‘Naggapuanna?’ Kinuna a mismo ni Jesus: “Bimmabaak manipud langit tapno aramidek, saan a ti pagayatak, no di ket ti pagayatan daydiay nangibaon kaniak.” (Juan 6:38) Sibibiag idin sakbay a nagbalin a tao kas bugbugtong nga Anak ti Dios. Ania ngarud ti pagayatan Daydiay nangibaon kenkuana ditoy daga? “Ti Dios inayatna ti lubong iti kasta unay isu nga intedna ti bugbugtong nga Anakna,” kuna ni Juan, maysa kadagiti nangisurat iti Ebanghelio, “tapno tunggal maysa a mangalagad iti pammati kenkuana saan koma a madadael no di ket maaddaan iti agnanayon a biag.” (Juan 3:16) Kasano a posible daytoy?

Ipalgak ti Biblia no kasano a nagbalin ni patay a di maliklikan a kapadasan ti sangatauan. Ti Dios inikkanna ti immuna a natauan a pagassawaan iti biag nga addaan namnama nga agbiag nga agnanayon. Nupay kasta, kinaykayatda a supringen ti Nangaramid kadakuada. (Genesis 3:1-19) Kas resulta daytoy a tignay, ti immuna a basol ti tao, natawid dagiti kaputotan da Adan ken Eva ti di matarigagayan a tawid nga ipapatay. (Roma 5:12) Tapno maikkan ti tao iti pudno a biag, masapul a maawan ti basol ken ipapatay.

Awan sientipiko a makabael a mangpukaw ken patay babaen ti genetic engineering. Ngem, adda pamuspusan ti Namarsua iti tao a mamagbalin a perpekto kadagiti natulnog a tattao tapno mabalinda ti agbiag nga agnanayon. Subbot ti awag ti Biblia iti daytoy a probision. Inlako ti immuna a natauan a pagassawaan ti bagida ken dagiti annakda iti pannakaadipen iti basol ken ipapatay. Ti biagda kas perpekto a tattao nga agtulnog iti Dios insukatda iti biag a di agpasakup iti Dios, a makaammodan a mangikeddeng no ania ti umiso ken di umiso. Tapno masubbot ti perpekto a natauan a biag, masapul nga adda maibayad a katupag ti perpekto a natauan a biag a napukaw dagiti immuna a nagannak kadatayo. Gapu ta natawidtayo ti kinaimperpekto, saan a maipaay ti tattao dayta a gatad.​—Salmo 49:7.

Isu a nakibiang ni Jehova a Dios tapno tumulong. Inyalisna ti perpekto a biag ti bugbugtong nga Anakna iti aanakan ti maysa a birhen, a nangipasngay ken Jesus. Kadagiti naglabas a dekada, mabalin a dikay patien nga agpasngay ti maysa a birhen. Ngem itatta, nabaelan dagiti sientipiko ti namataud kadagiti animal babaen ti cloning ken mayallatiwda iti maysa nga animal ti genes ti sabali. Ngarud, asino ti adda kalinteganna a mangkuestion iti pannakabalin ti Namarsua a manglab-aw iti kadawyan a pamay-an ti panagpaadu?

Idi nga addan perpekto a natauan a biag, addan ti gatad a mangsubbot iti sangatauan manipud basol ken ipapatay. Kaskasdi, ti maladaga a Jesus a nayanak ditoy daga masapul nga agmataengan tapno agbalin a “mangngagas” a kabaelanna nga ipaay ti “agas” a pangpaimbag kadagiti sakit ti sangatauan. Inaramidna daytoy babaen ti panagbiagna a perpekto ken awanan basol. Saan laeng a nakita ni Jesus ti panagtutuok ti sangatauan iti sidong ti basol no di ket napadasanna dagiti pisikal a limitasion ti maysa a tao. Daytoy ti namagbalin kenkuana a naas-asi pay a mangngagas. (Hebreo 4:15) Dagiti namilagruan a panangagasna idi adda ditoy daga ti nangpaneknek nga agpada nga addaan tarigagay ken pannakabalin a mangpaimbag kadagiti masakit.​—Mateo 4:23.

Kalpasan ti tallo ket kagudua a tawen a ministerio ni Jesus ditoy daga, pinapatay dagiti bumusbusor kenkuana. Impakitana a ti perpekto a tao mabalinna ti agtulnog iti Namarsua uray pay iti baet dagiti karirigatan a suot. (1 Pedro 2:22) Ti indatonna a perpekto a natauan a biag nagbalin a gatad ti subbot, a mabalinna a subboten ti sangatauan manipud basol ken ipapatay. Kinuna ni Jesu-Kristo: “Awan ti asinoman nga addaan dakdakkel nga ayat ngem iti daytoy, a ti maysa isukona ti kararuana maigapu kadagiti gagayyemna.” (Juan 15:13) Iti maikatlo nga aldaw kalpasan ti ipapatayna, napagungar ni Jesus iti naespirituan a biag, ket sumagmamano a lawas kalpasanna nagpalangit tapno idatagna ti gatad ti subbot ken Jehova a Dios. (1 Corinto 15:3, 4; Hebreo 9:11-14) Babaen ti panangaramidna iti dayta, nabalinan ni Jesus nga iyaplikar ti pateg ti subbot a datonna kadagidiay sumurot kenkuana.

Kayatyo kadi ti magunggonaan iti kastoy a wagas ti pannakapaimbag ti naespirituan, emosional, ken pisikal a saksakit? Masapul ti pammati ken Jesu-Kristo tapno maaramid ti kasta. Apay a dikay umadani a mismo iti Mangngagas? Maaramidyo dayta babaen ti panangadalyo ken Jesu-Kristo ken iti pasetna iti pannakaisalakan dagiti matalek a tattao. Siraragsak dagiti Saksi ni Jehova a tumulong kadakayo.

[Ladawan iti panid 5]

Addaan ni Jesus iti tarigagay ken pannakabalin a mangpaimbag iti masakit

[Ladawan iti panid 7]

Kasanonakay nga apektaran ti ipapatay ni Jesus?