Dakayo a Pampamilia, Idaydayawyo ti Dios kas Paset ti Kongregasionna
“Kadagiti gimgimong idaydayawkonto ni Jehova.”—SALMO 26:12.
1. Ania ti maysa a napateg a paset ti pudno a panagdayaw malaksid pay iti panagadal ken panagkararag iti pagtaengan?
TI PANAGDAYAW ken Jehova ramanenna saan laeng a ti panagkararag ken panagadal iti Biblia iti pagtaengan no di pay ket ti pannakiraman kadagiti aktibidad ti kongregasion ti Dios. Nabilin dagiti nagkauna nga Israelita nga ‘ummongenda dagiti tattao, dagiti lallaki ken babbai ken dagiti ubbing,’ tapno adalenda ti linteg ti Dios ken magnada iti dalanna. (Deuteronomio 31:12; Josue 8:35) Naiparegta idi kadagiti lallakay ken ‘babbaro ken babbalasang’ nga idaydayawda ti nagan ni Jehova. (Salmo 148:12,13) Maar-aramid met iti uneg ti kongregasion Kristiano dagiti umarngi nga urnos. Kadagiti Kingdom Hall iti intero a daga, nawaya dagiti lallaki, babbai, ken ubbing a makipartisipar kadagiti maangay a taripnong, ket adu ti maragsakan unay iti dayta.—Hebreo 10:23-25.
2. (a) Apay a napateg ti panagsagana iti panangtulong kadagiti agtutubo a mangtagiragsak kadagiti gimong? (b) Makin-ulidan ti napateg?
2 Pudno, mabalin a maysa a karit ti panangtulong kadagiti agtutubo a makiraman a kanayon iti aktibidad ti kongregasion. No agparang nga awan ragsak ti dadduma nga annak a tumabuno kadagiti gimong a kaduada dagiti dadakkelda, ania ngata ti problema? Gagangay laeng nga ababa ti aanusan ken nalaka a masikoran ti kaaduan nga ubbing. Ti panagsagana ket makatulong a mangrisut iti daytoy a problema. No saanda a nakasagana, sinsinan laeng ti pannakipaset dagiti ubbing kadagiti gimong. (Proverbio 15:23) No saanda a nakasagana, narigat para kadakuada ti rumang-ay iti naespirituan a mangyeg iti pannakapnek. (1 Timoteo 4:12,15) Ania ti mabalin nga aramiden? Umuna, nasken nga isaludsod dagiti nagannak no agsagsaganada met laeng a mismo para kadagiti gimong. Nabileg nga impluensia ti ulidanda. (Lucas 6:40) Importante met ti naannad a panangiplano iti sangapamiliaan a panagadal.
Panangpatanor iti Puso
3. Kabayatan ti panagadal ti pamilia, apay a nasken ti panangikagumaan a mangpatanor iti puso, ket ania ti kalikaguman daytoy?
3 Ti panagadal ti pamilia ket saan koma a basta tiempo ti panangpunno iti ulo iti pannakaammo no di pay ket panangpatanor iti puso. Kalikaguman daytoy ti panangammo kadagiti problema dagiti kameng ti pamilia ken naayat a pannakaseknan iti tunggal maysa. Ni Jehova “sukimatenna ti puso.”—1 Cronicas 29:17.
4. (a) Ania ti kayat a sawen ti “awanan pannakaawat”? (b) Ania ti ramanen ti ‘panangsalimetmet iti pannakaawat’?
4 Ania ti masarakan ni Jehova no sukimatenna ti puso dagiti annaktayo? Kuna ti kaaduan kadakuada nga ay-ayatenda ti Dios, ket nasayaat dayta. Ngem ti ubing wenno ti maysa a nabiit pay nga agsursuro maipapan ken Jehova ket saan pay unay a nairuam kadagiti dalan ni Jehova. Gapu ta kurang iti kapadasan, mabalin nga “awanan pannakaawat,” kas kuna ti Biblia. Nalabit saan nga amin a motibona ket dakes, ngem kasapulan ti panawen tapno masukog ti pusona nga agbalin a talaga a makaay-ayo iti Dios. Ramanen daytoy ti panangitunos iti pampanunot, tarigagay, rikrikna, emosion, ken kalat iti biag nga anamongan ti Dios, sigun iti kabaelan dagiti imperpekto a tattao. No sukogen ti maysa a tao ti kinataona iti nadiosan a wagas, ‘masalimetmetanna ti pannakaawat.’—Proverbio 9:4; 19:8.
5, 6. Kasano a dagiti nagannak matulonganda dagiti annakda a ‘mangsalimetmet iti pannakaawat’?
5 Matulongan kadi dagiti nagannak ti annakda a ‘mangsalimetmet iti pannakaawat’? Pudno, awan ti tao a makaikabil iti nasayaat a kasasaad ti puso iti sabali a tao. Naikkan ti tunggal maysa kadatayo iti nawaya a nakem, ket dakkel ti maaramidan ti aniaman nga ipalubostayo a panunoten. Nupay kasta, buyogen ti pannakaawat, mabalin a masansan a kasarita dagiti nagannak ti anakda ket ammuenda no ania ti linaon ti pusona ken no ania a tulong ti kasapulanna. Usarenyo dagiti saludsod a kas iti ‘Aniat’ panagriknam iti daytoy?’ ken ‘Ania a talaga ti kayatmo nga aramiden?’ Kalpasanna, siaanus a dumngegkayo. Dikay agpungtot. (Proverbio 20:5) No kayatyo a danonen ti puso, nasken ti kinaanus, pannakaawat, ken ayat.
6 Tapno maparayray dagiti nasayaat a tarigagay, pagsasaritaanyo a masansan dagiti bunga ti espiritu—tunggal maysa kadagitoy—ket sangapamiliaan nga ikagumaanyo a patanoren dagitoy. (Galacia 5:22,23) Patanorenyo ti panagayat ken Jehova ken ni Jesu-Kristo, saan laeng a babaen ti panangibaga a rebbengtay nga ayaten ida no di ket babaen ti panangilawlawag kadagiti makagapu no apay nga ay-ayatentay ida ken no kasanotay a mayebkas dayta nga ayat. (2 Corinto 5:14,15) Parayrayenyo ti tarigagay a mangaramid iti umiso babaen ti panangilawlawag kadagiti pagimbagan nga itden dayta. Patanorenyo ti tarigagay a mangiwaksi kadagiti di umiso a pampanunot, panagsasao, ken kababalin babaen ti panangilawlawag kadagiti dakes nga epekto dagiti kasta a banag. (Amos 5:15; 3 Juan 11) Ipakitayo no kasano a ti pampanunot, panagsasao, ken kondukta—naimbag man wenno dakes—maapektaranna ti relasion ti maysa ken Jehova.
7. Ania ti mabalin nga aramiden tapno matulongan dagiti annak a mangtaming kadagiti problema ken agdesision iti wagas nga agtalinaedda a nasinged ken Jehova?
7 No adda problema ti ubing wenno adda napateg a desisionanna, mabalintay nga isaludsod kenkuana: ‘Iti panagkunam, kasano ngata ti panangmatmat ni Jehova iti daytoy? Ania ti ammom maipapan ken Jehova ta naikunam ti kasta? Nagkararagka kadin kenkuana maipapan iti dayta?’ Aginggat’ mabalin, iruamyo dagiti annakyo manipud iti kinaubingda a sipapasnek a mangsierto iti pagayatan ti Dios ken mangaramid iti dayta. No maaddaanda iti nasinged ken personal a relasion ken Jehova, naragsakda a magna kadagiti dalanna. (Salmo 119:34, 35) Patanoren daytoy kadakuada ti panangipateg iti pribilehio a makitimpuyog iti kongregasion ti pudno a Dios.
Panagsagana Para Kadagiti Gimong ti Kongregasion
8. (a) Ania ti makatulong kadatayo tapno mairaman iti panagadal ti pamiliatayo amin a banag nga agkasapulan iti atension? (b) Kasano kapateg ti kastoy a panagadal?
8 Adu a banag ti nasken nga ipaayan iti atension kabayatan ti panagadal ti pamilia. Kasanoyo a maasikaso amin dagitoy? Imposible a maaramid amin a banag nga aggigiddan. Ngem nalabit makatulong no mangaramidkayo iti listaan. (Proverbio 21:5) Sagpaminsan a repasuenyo dayta ket kitaenyo no ania ti rumbeng nga umuna nga asikasuen. Ipakitayo nga interesadokayo iti irarang-ay ti tunggal miembro ti pamilia. Napateg a paset ti Nakristianuan nga edukasion ti kastoy nga urnos iti panagadal ti pamilia, a makatulong iti panagbiagtayo ita ken isagananatayo para iti biag nga agnanayon iti masanguanan.—1 Timoteo 4:8.
9. Aniada a kalat maipapan iti panagsagana kadagiti gimong ti mabalintay nga aramiden a progresibo kabayatan ti sangapamiliaan a panagadaltayo?
9 Karaman kadi iti sangapamiliaan a panagadalyo ti panagsagana para kadagiti gimong ti kongregasion? Adu a proyekto ti mabalin a progresibo nga aramidenyo bayat ti panagadalyo a sangsangkamaysa. Nalabit adu a lawas, bulan, wenno tawen pay ketdi a maileppas ti dadduma kadagitoy. Ikonsideraryo dagitoy a kalat: (1) nakasagana ti tunggal maysa iti pamilia nga agkomento kadagiti gimong ti kongregasion; (2) agkomento ti tunggal maysa iti bukodna a sasao; (3) panangiraman kadagiti kasuratan no agkomento; ken (4) panangusig no kasano a personal a mayaplikar ti material. Makatulong amin daytoy iti maysa nga indibidual a mangipapuso iti kinapudno.—Salmo 25:4, 5.
10. (a) Kasanotay a maipaayan iti atension ti tunggal maysa kadagiti gimongtayo iti kongregasion? (b) Apay a makagunggona daytoy?
10 Uray no ti material iti Pagwanawanan a maadal iti lawas ti adalen ti pamiliayo, dikay liplipatan ti kinapateg ti personal wenno sangapamiliaan a panagsagana para iti Panagadal ti Kongregasion iti Libro, Teokratiko nga Eskuelaan ti Panagministro, ken Gimong ti Serbisio. Napateg met dagitoy a paset ti programa a mangisuro kadatayo a magna iti dalan ni Jehova. Mabalin a maiwayaanyo sagpaminsan ti agsagana a sangapamiliaan para kadagiti gimong, ngem mabalin a makatulong no usarenyo sagpaminsan ti sangapamiliaan a panagadalyo iti panagsagana para iti tunggal maysa kadagitoy a gimong. Apay? No agdadanggaykayo, mapasayaatyo ti abilidadyo nga agadal. Iti kasta, ad-adu ti magunggonayo kadagiti gimong a mismo. Malaksid iti dadduma pay a banag, pagsasaritaanyo dagiti gunggona nga itden ti regular a panagsagana kadagitoy a gimong ken ti kinapateg ti panangilatang iti masnup a panawen para iti dayta.—Efeso 5:15-17.
11, 12. Kasano a makatulong kadatayo ti panangisagana kadagiti makanta iti kongregasion, ket kasano a maaramid daytoy?
11 Kadagiti “Dalan ti Dios iti Biag” a Kombension, naparegtatayo nga agsagana iti maysa pay a paset dagiti gimongtayo—ti panagkanta. Naaramidyo kadi daytan? Ti panangaramid iti kasta ket tumulong a mangyukuok kadagiti kinapudno ti Biblia iti panunot ken pusotayo ken parayrayenna ti ragsaktayo a tumabuno kadagiti gimong ti kongregasion.
12 Ti panagsagana a pakairamanan ti panagbasa ken panagsasarita maipapan iti kaipapanan dagiti sao iti dadduma kadagiti nayeskediul a kanta matulongannatayo nga agkanta a naimpusuan. Iti nagkauna nga Israel, dagiti instrumento ti musika ket prominente idi a mausar iti panagdayaw. (1 Cronicas 25:1; Salmo 28:7) Adda kadi miembro ti pamiliayo nga ammona ti agtokar? Apay a dikay usaren dayta nga instrumento a mangensayo iti maysa kadagiti Kingdom song a mausar iti umay a gimong, sa sangapamiliaan a kantaenyo dayta. Mabalinyo met a danggayan dagiti nairekord a kanta. Iti dadduma a pagilian, nagimnas ti panagkanta dagiti kakabsattayo uray no awan ti tokar. Bayat a magmagnada wenno agob-obrada iti talon, masansan a kaay-ayoda a kantaen dagiti kanta a nayeskediul para kadagiti umay a gimong ti kongregasion.—Efeso 5:19.
Sangapamiliaan a Panagsagana iti Serbisio iti Tay-ak
13, 14. Apay a napateg ti sangapamiliaan a panagsasarita a mangisagana iti pusotayo para iti ministerio iti tay-ak?
13 Napateg a paset iti biagtayo ti panangasaba kadagiti sabsabali maipapan ken Jehova ken ti panggepna. (Isaias 43:10-12; Mateo 24:14) Agtutubo man wenno nataengan, ad-adda a matagiragsaktayo daytoy nga aktibidad ken nasaysayaat ti maaramidantayo no nakasaganatayo. Kasanotay a maaramid daytoy iti uneg ti pamilia?
14 Kas kadagiti dadduma pay a banag a nainaig iti panagdayawtayo, nasken nga isaganatayo ti pusotayo. Masapul a pagsasaritaantayo saan laeng a no ania ti aramidentayo no di pay ket no apay nga aramidentay dayta. Idi tiempo ni Ari Josafat, nasursuruan dagiti tattao iti linteg ti Dios, ngem kuna ti Biblia kadatayo a ‘saan pay a nakasagana ti pusoda.’ Gapu iti daytoy, nalakada a matnag kadagiti sulisog a mangyadayo kadakuada iti pudno a panagdayaw. (2 Cronicas 20:33; 21:11) Ti kalattayo ket saan a tapno laeng makaireport iti oras a nabusbos iti panangasaba, wenno tapno laeng makaipaima iti literatura. Ti ministeriotayo ket ebkas koma ti ayattayo ken Jehova ken ti ayattayo kadagiti tattao a nasken a maikkan iti gundaway a mangpili iti biag. (Hebreo 13:15) Maysa daytoy nga aktibidad a mamagbalin kadatayo a ‘katrabahuan ti Dios.’ (1 Corinto 3:9) Anian a pribilehio! Bayat a makiramramantayo iti ministerio, makitintinnulongtayo kadagiti nasantuan nga anghel. (Apocalipsis 14:6, 7) Kadagiti panagsasarita ti pamilia ti kasayaatan a tiempo a panangpatanor iti kastoy a panangipateg, iti man linawas a panagadaltayo wenno no pagsasaritaantayo ti maitutop a teksto iti Panangsukimat Kadagiti Kasuratan iti Inaldaw-aldaw!
15. Kaanotay a makapagsagana a sangapamiliaan para iti serbisio iti tay-ak?
15 Bayat ti sangapamiliaan a panagadalyo, isapsaparanyo kadi no dadduma a tulongan dagiti kameng ti sangakabbalayanyo nga agsagana para iti serbisio iti tay-ak iti agdama a lawas? Mabalin a makagunggona unay ti panangaramid iti kasta. (2 Timoteo 2:15) Makatulong dayta a mamagbalin iti panagserbida a makapnek ken nabunga. No dadduma, mabalinyo nga usaren ti intero a panagadalyo iti kasta a panagsagana. Kaaduanna, mabalinyo a pagsasaritaan iti apagbiit dagiti aspeto ti ministerio iti tay-ak iti ngudo ti panagadal ti pamiliayo wenno iti dadduma nga aldaw ti lawas.
16. Ilawlawagyo ti kinapateg ti tunggal maysa kadagiti addang a nailista iti parapo.
16 Mabalinyo nga ipamaysa ti panagadalyo kadagiti agsasaruno nga addang, kas iti sumaganad: (1) Mangisagana iti naensayo a naimbag a presentasion a pakairamanan ti panangibasa iti maysa a teksto iti Biblia no ipalubos ti oras. (2) Siguraduenyo nga aginggat’ mabalin, addaan ti tunggal maysa iti pangasaba a bag, Biblia, kuaderno, pagsurat, tract, ken dadduma pay a presentable a literatura. Saan a kasapulan a nangina ti pangasaba a bag, ngem nadalimanek koma. (3) Pagsasaritaanyo no sadino ken no kaano a mabalin ti mangasaba iti di pormal a wagas. Surnadanyo ti tunggal paset daytoy a panagsanay inton agkukuyogkayo a mangasaba. Mangtedkayo kadagiti makatulong a singasing, ngem dikay mangbalakad maipapan iti nakaad-adu a punto.
17, 18. (a) Ania a kita ti panagsagana kas pamilia ti makatulong a mamagbalin iti ministeriotayo iti tay-ak a nabungbunga? (b) Ania nga aspeto daytoy a panagsagana ti mabalin nga aramiden a linawas?
17 Ti panangaramid kadagiti adalan ket nagpateg a paset ti trabaho nga impaannong ni Jesu-Kristo kadagiti pasurotna. (Mateo 28:19, 20) Saan laeng a panangasaba ti ramanen ti panangaramid kadagiti adalan. Kalikagumanna ti panangisuro. Kasano a makatulong ti sangapamiliaan a panagadalyo tapno sieepektibo a maaramidyo daytoy?
18 Kas pamilia, pagsasaritaanyo no siasino ti nasayaat a sarungkaranyo. Nalabit nangala iti literatura ti sumagmamano kadakuada; nalabit dimngeg laeng dagiti dadduma. Mabalin a nasarakanyo ida iti panagbalaybalayyo wenno iti di pormal a panangasaba iti pagtagilakuan wenno idiay eskuelaan. Agpaiwanwankayo iti Sao ti Dios. (Salmo 25:9; Ezequiel 9:4) Ikeddengyo no asino kadakayo ti mayat a sumarungkar iti dayta a lawas. Ania ti topikoyo? Ti panagsasarita ti pamilia matulonganna ti tunggal miembro nga agsagana. Tandaananyo dagiti espesipiko a teksto nga iranudyo kadagiti interesado agraman dagiti maitutop a punto iti broshur nga Ania ti Kalikaguman ti Dios Kadatayo? wenno ti libro a Pannakaammo a Mangiturong iti Biag nga Agnanayon. Saan koma a nakaad-adu a punto ti saklawenyo iti maysa laeng nga isasarungkar. Sakbay a panawanyo ti bumalay, mangibatikayo iti saludsod a masungbatanto iti sumaruno nga isasarungkar. Apay a dikay iraman iti linawas a rutina ti pamilia ti panangiplano no siasino ti sarungkaran ti tunggal maysa, no kaano, ken no ania ti namnamaenna a maibanag. Ti panangaramid iti daytoy ket makatulong a mamagbalin iti ministerio ti amin a miembro ti pamilia a nabungbunga.
Itultuloyyo nga Isuro Kadakuada ti Dalan ni Jehova
19. Tapno makapagtultuloy dagiti miembro ti pamilia a magna iti dalan ni Jehova, ania ti masapul a mariknada, ket ania ti makatulong iti daytoy?
19 Maysa a karit iti daytoy nadangkes a lubong ti panagbalin nga ulo ti pamilia. Ikagkagumaan ni Satanas ken dagiti demoniona a dadaelen ti espiritualidad dagiti adipen ni Jehova. (1 Pedro 5:8) Maysa pay, adu ita ti pakakumikomanyo a nagannak, nangruna dakayo nga agsolsolo a nagannak. Narigat nga isaparan amin a kayatyo nga aramiden. Ngem saan a bambannog dayta, uray no maysa laeng a singasing ti mayaplikaryo iti kada gundaway, sa in-inut a parang-ayenyo ti programa ti sangapamiliaan a panagadalyo. Makaparagsak a gunggona ti pannakakita kadagidiay nasinged unay kadatayo a sisusungdo a magna iti dalan ni Jehova. Tapno sibaballigi a makapagna iti dalan ni Jehova, nasken a pagrag-oan dagiti miembro ti pamilia ti tumabuno kadagiti gimong ti kongregasion ken makipaset iti ministerio iti tay-ak. Tapno maaramid dayta, nasken ti panagsagana—panagsagana a mangpatanor iti puso ken iti wagas a maragsakan ti tunggal maysa a makiraman iti ministerio.
20. Ania ti makatulong iti ad-adu pay a nagannak a mangsagrap iti rag-o a nayebkas iti 3 Juan 4?
20 Maipapan kadagidiay natulonganna iti naespirituan a pamay-an, insurat ni apostol Juan: “Awanen ti adda kaniak a dakdakkel pay a pakaigapuan ti kinamanagyaman ngem kadagitoy a bambanag, a mangngegko koma a dagiti annakko agtultuloyda a magmagna iti kinapudno.” (3 Juan 4) Dagiti sangapamiliaan a panagadal a maangay a sipapanunot kadagiti masnup a kalat ken dagiti ulo ti pamilia a naayat a tumulong a mangasikaso kadagiti kasapulan ti tunggal miembro ti pamiliana ket dakkel ti maaramidanna tapno masagrap ti pamiliana ti kasta a rag-o. No patanorenda ti panangipateg iti dalan ti Dios a maipaay iti biag, matulongan dagiti nagannak ti pamiliada a mangsagrap iti kasayaatan a dalan ti biag.—Salmo 19:7-11.
Mailawlawagyo Kadi?
◻ Apay a nagpateg kadagiti annaktayo ti panagsagana kadagiti gimong?
◻ Kasano a dagiti nagannak matulonganda dagiti annakda a ‘mangsalimetmet iti pannakaawat’?
◻ Kasano a makatulong ti sangapamiliaan a panagadaltayo iti panagsagana kadagiti amin a gimong?
◻ Kasano a ti sangapamiliaan a panagsagana iti serbisio iti tay-ak matulongannatayo nga agbalin nga ad-adda nga epektibo?
[Ladawan iti panid 20]
Mabalinyo nga iraman iti sangapamiliaan a panagadalyo ti panagsagana kadagiti gimong ti kongregasion
[Ladawan iti panid 21]
Makagunggona ti panangensayo iti makanta kadagiti gimong