Inaramidda ti Pagayatan ni Jehova

Pinili ni Maria “ti Naimbag a Bingay”

IDI kaaldawan ni Jesus, nasalukoban dagiti Judio a babbai kadagiti rabiniko a tradision. Ngarud, saan a naiparegta kadakuada ti agadal iti Linteg. Kinapudnona, kuna ti maysa a kapanunotan a naadaw iti Mishnah: “No sursuruan ti maysa nga ama ti anakna a babai maipapan iti Linteg, kasna la sinuruan iti kinaderrep.”​—Sotah 3:4.

Nagbanaganna, adu ti di unay nakaadal kadagiti babbai idi umuna a siglo a Judea. “Awan ebidensia a sakbay ti ministerio ni Jesus napalubosan dagiti Judio a babbai nga agbalin nga adalan ti maysa a naindaklan a mannursuro, ket sigurado a saan a mabalin a makikuyogda iti kasta a mannursuro, wenno mangisuro kadagiti sabsabali malaksid kadagiti ubbing,” kuna ti The Anchor Bible Dictionary. Kas ad-adda pay a panangipababa kadagiti babbai, adda dagiti narelihiosuan a papangulo a nangituyang iti pagalagadan a saan a rumbeng a kasarita ti lalaki ti maysa a babai iti publiko!

Inwaksi ni Jesus dagiti kasta a nagdakes nga ugali. Sinursuruanna ken nagbalin a pasurotna agpadpada dagiti babbai ken lallaki. (Lucas 8:1-3) Iti naminsan, sinangaili da Marta ken Maria ni Jesus. (Lucas 10:38) Kakabsat ni Lazaro dagitoy dua a babbai, ket adalan ken nasinged a gagayyem ni Jesus dagitoy tallo. (Juan 11:5) Nalabit prominente daytoy a pamilia, kas makita iti kinaadu ti immay nangliwliwa kada Marta ken Maria idi natay ni Lazaro. Aniaman ti kasasaadda, ti napasamak iti pagtaenganda idi sinangailida ni Jesus ket nakaipaay iti nagpateg a leksion saan laeng a kadakuada no di pay ket kadatayo.

Nakasursuro iti Sakaanan ni Jesus

Awan duadua a magagaran da Marta ken Maria a mangisagana iti dakkel a padaya nga agpaay ken Jesus, ket mabalin nga ipalubos ti kasasaad ti biagda daytoy. (Idiligyo ti Juan 12:1-3.) Nupay kasta, idi simmangpet ti sangailida, ni Maria “nagtugaw iti sakaanan ti Apo ket nagtultuloy nga agim-imdeng iti saona.” (Lucas 10:39) Awan ti aniaman a tradision ti tao a makalapped ken Jesus a mangisuro iti maysa a napasnek a babai a magagaran a makaadal! Mailadawantayo ni Maria a nakatugaw iti sanguanan ni Jesus, kas maysa nga adalan a naipamaysa ti panagimdengna iti isursuro ti Apona.​—Idiligyo ti Deuteronomio 33:3; Aramid 22:3.

Saan a kas ken Maria, ni Marta ket “nasinga iti panangasikaso kadagiti adu nga annongen.” Maringgoran iti natrabaho a panagsagana iti naimas a taraon. Idi kuan, nakarurod ni Marta ta isuna laeng ti agsagsagana bayat a nakatugaw ti kabsatna iti sakaanan ni Jesus! Bimmallaet ni Marta bayat a kasarsarita ni Jesus ni Maria, a nalabit kellaat a kunkunana: “Apo, saanmo kadi a pakaseknan a ti kabsatko binaybay-annak nga agmaymaysa a mangasikaso kadagiti bambanag? Ngarud, ibagam kenkuana a tulongannak.”​—Lucas 10:40.

Awan dakesna ti mismo a dawat ni Marta. Kinapudnona, ti panangisagana iti taraon para iti maysa a grupo ket nadagsen a trabaho, ket saan koma a maymaysa a tao ti aggunay. Nupay kasta, nakakita ni Jesus iti gundaway a mangisuro iti napateg a leksion maibatay iti sasao ni Marta. Kinunana: “Marta, Marta, maringgoran ken mariribukanka maipapan kadagiti adu a bambanag. Nupay kasta, sumagmamano a bambanag ti kasapulan, wenno maysa laeng. Iti biangna, ni Maria pinilina ti naimbag a bingay, ket dinto maikkat dayta manipud kenkuana.”​—Lucas 10:41, 42.

Saan nga ibagbaga ni Jesus nga awan interes ni Marta iti naespirituan a bambanag. Iti kasunganina, ammona a nauneg ti debosion ni Marta iti Dios.a Awan duadua a dayta ti makagapu nga inawisna ni Jesus iti pagtaenganda. Nupay kasta, iti naalumamay a pannubngarna, impasimudaag ni Jesus a palpalabsen ni Marta ti manmano a gundaway a makasursuro manipud mismo nga Anak ti Dios gapu ta maringgoran iti taraon.

Ipapantayon a ti kultura idi mabalin a pinatalgedanna ti panangmatmat a ti pateg ti babai ket nangnangruna a mapaneknekan babaen ti kinasaetna kadagiti trabaho iti balay. Ngem ipakita ti sasao ni Jesus a dagiti babbai, kas kadagiti lallaki, ket mabalin nga agtugaw iti sakaanan ti Anak ti Dios tapno agimdeng iti sasao ti biag! (Juan 4:7-15; Aramid 5:14) Gapu iti daytoy, adayo a nasaysayaat koma no nagsagana ni Marta iti sumagmamano laeng a putahe​—wenno uray maysa laeng​—tapno makapagtugaw iti sakaanan ti Apo ket makasursuro kenkuana.​—Idiligyo ti Mateo 6:25.

Ti Maadaltayo

Adda ita dagiti lallaki ken babbai a nangipangag iti awis ni Jesus nga ‘umawat iti danum ti biag nga awan bayadna.’ (Apocalipsis 22:17) Dagiti dadduma a tinignay ti ayat​—kas ken Marta​—ikagumaanda ti tumulong iti pakasapulan dagiti kapammatianda. Praktikal ti panagpampanunotda ken alistoda nga agtignay, ket kari ni Jehova a gunggonaannanto dagiti naayat nga aramidda. (Hebreo 6:10; 13:16) Dadduma ti nalabit mayasping ken Maria. Naulimek ken managpanunotda. Ti gagarda a mangutob iti Sao ti Dios ti tumulong kadakuada nga agtalinaed a sititibker a nairamut iti pammati.​—Efeso 3:17-19.

Agpada a makatulong iti kongregasion Kristiano dagitoy dua a klase ti tattao. Nupay kasta, kasayaatan latta no amintayo ket ‘pilientayo ti naimbag a bingay’ babaen ti panangipangpangruna iti naespirituan a bambanag. No siguraduentayo dagiti napatpateg a banag, maaddanto kadatayo ti anamong ken parabur ni Jehova.​—Filipos 1:9-11.

[Footnote]