Panangsursuro iti Natan-ok a Dalan ti Ayat

Kosovo, Lebanon, ken Ireland. Dagitoy dagiti lugar a masansan a maipadamag kadagiti kallabes a tawen. Sumiplot iti panunot ti tattao dagiti ladawan ti panagibukbok iti dara, panagbomba, ken panagpapatay. Siempre, saan a kabbaro dagiti naranggas a panagdadangadang maipuon iti panagduduma ti relihion, puli, kultura, wenno dadduma pay. Kinapudnona, adu ti kastoy a panagdadangadang iti intero a pakasaritaan ti tao, ket pinagsagabada iti kasta unay ti sangatauan.

GAPU ta adda dagiti gubat iti intero a pakasaritaan ti tao, adu ti agkuna a talaga a di malapdan dagiti gubat ket gagangay laeng nga aggiginnura dagiti tattao. Ngem namimpinsan a maisupadi ti kakasta a panangmatmat kadagiti sursuro ti Sao ti Dios, ti Biblia. Nabatad ti kuna ti Kasuratan: “Ti di agayat dina naam-ammo ti Dios, agsipud ta ti Dios ket ayat.” (1 Juan 4:8) Nalawag a kayat ti Namarsua nga agiinnayat dagiti tattao.

Ibaga met ti Biblia a naparsua ti tao a kaladladawan ti Dios. (Genesis 1:26, 27) Kaipapanan daytoy a kabaelan ti tao nga iparangarang dagiti galad ti Dios, a ti kangrunaan isu ti ayat. No kasta, apay ngarud a nakaro ti kinaawan panagayat ti tattao iti maysa ken maysa iti intero a historia? Ti Biblia manen ti mangilawlawag. Nagsukir ngamin iti Dios dagiti immuna a pagassawaan, da Adan ken Eva, ket nagbasolda. Kas banagna, natawid dagiti amin nga annakda ti basol ken kinaimperpekto. Kuna ti Roma 3:23: “Amin nagbasol ken agkurang iti dayag ti Dios.” Ti natawidtayo a basol ken kinaimperpekto minulitanda ti inted-Dios nga abilidadtayo nga agayat. Kayat kadi a sawen daytoy a saanen a kabaelan dagiti tattao ti agiinnayat? Ania ti panginanamaantayo a tagiragsakentayto ti natalna, naayat a relasion kadagiti padatayo a tattao?

Sursuruentayo nga Ayaten ti Dios

Ammo ni Jehova a Dios a kabaelan latta ti tattao ti agayat iti laksid ti kinaimperpektoda. Kalikagumanna ngarud iti amin nga agtarigagay a mangay-ayo kenkuana nga ipakatda ti inggat’ kabaelanda nga agayat. Imbatad ti Anak ti Dios, ni Jesu-Kristo, daytoy a rebbengen idi napagsaludsodan no ania ti kangrunaan a bilin iti Linteg a naited iti Israel. Kinunana: “‘Masapul nga ayatem ni Jehova a Diosmo iti amin a pusom ken iti amin a kararuam ken iti amin a panunotmo.’ Daytoy ti kadakkelan ken umuna a bilin.” Sa innayonna: “Ti maikadua, nga umasping iti dayta, isu daytoy, ‘Masapul nga ayatem ti kaarrubam a kas iti bagim.’ Kadagitoy dua a bilin nga agpannuray ti intero a Linteg.”​—Mateo 22:37-40.

Nupay kasta, adu a tattao ti marigatan nga agayat iti dida makita, ket datayo a tattao ditay makita ni Jehova a Dios gapu ta Espiritu. (Juan 4:24) Kaskasdi, inaldaw nga apektarannatayo ti aramid ti Dios, yantangay agpannuraytayo amin iti adu nga agkakaimbag a banag a pinarsuana a pakagunggonaantayo. Impatuldo ni apostol Pablo daytoy a kinapudno idi kinunana: “[Ti Dios] dina binaybay-an nga awan makasaksi iti bagina iti panagaramidna ti naimbag, nga inikkannakayo kadagiti tudo manipud langit ken kadagiti nabunga a pampanawen, a pinunnona a naan-anay dagiti pusoyo iti taraon ken ragsak.”​—Aramid 14:17.

Nupay iti nadumaduma a pamay-an magunggonaan ti isuamin kadagiti probision ti Namarsua, manmano ti agyaman kenkuana wenno matignay a mangyebkas iti panagyaman kenkuana. Masapul ngarud a lagipentayo ti amin nga agkakaimbag nga inaramidna para kadatayo ket utobentayo dagiti nagsasayaat a galad nga adda iti likudan ti amin nga aramidna. Dayta ti mangipabigbig kadatayo iti nakaskasdaaw a sirib ken pannakabalin ti Naindaklan a Namarsua kadatayo. (Isaias 45:18) Kangrunaan iti amin, dayta ti tumulong koma tapno makitatayo ti kinamanagayat ti Dios, a saanna la nga inted ti biag kadatayo no di ket inaramidna pay a posible ti panangtagiragsaktayo iti adu a pakaay-ayuan ti biag.

Kas pagarigan, panunotenyo ti nakaad-adu a klase ti agkakapintas a sabong a pinarsua ti Dios ditoy daga. Anian a nagsayaat ta inikkannatayo iti abilidad a makakita ken maay-ayo kadagitoy nga agkakapintas a banag! Kasta met, impaay ti Dios ti amin a nasustansia a taraon a pagbiagtayo. Anian a kinaimbagna ta pinarsuanatayo met nga addaan sentido ti panagraman tapno matagiragsaktayo ti pannangan! Saan aya a nabatad a pammaneknek dagitoy a pudno nga ay-ayatennatayo ti Dios ken maseknan iti pagimbagantayo?​—Salmo 145:16, 17; Isaias 42:5, 8.

Malaksid iti panangyam-ammona ti bagina kadatayo babaen ti “libro ti nakaparsuaan,” ipalgak kadatayo ti Namarsua no ania ti klasena a Dios babaen ti Saona, ti Biblia. Nairekord ngamin iti Biblia ti adu a naayat nga aramid ni Jehova a Dios idi ken ti naruay a bendision nga inkarina nga ipaay iti sangatauan iti asideg a masanguanan. (Genesis 22:17, 18; Exodo 3:17; Salmo 72:6-16; Apocalipsis 21:4, 5) Kangrunaan iti amin, ipakita ti Biblia kadatayo ti kangrunaan nga ebkas ti ayat ti Dios iti sangatauan​—ti panangipaayna iti bugbugtong nga Anakna kas Mannubbottayo tapno maruk-atantayo iti pannakaadipen iti basol ken ipapatay. (Roma 5:8) Kinapudnona, bayat nga umad-adu ti ammotayo maipapan iti naayat a Namarsua kadatayo, ad-adda a matignaytayo a naimpusuan a mangayat kenkuana.

Sursuruentayo nga Ayaten ti Padatayo a Tattao

Malaksid iti panagayattayo iti Dios iti amin a puso, kararua, ken isiptayo, impatuldo ni Jesus a masapul met nga ayatentayo ti kaarrubatayo kas iti bagitayo. Kinapudnona, ti ayat iti Dios kalikagumanna nga ayatentayo ti padatayo a tattao. Kinuna ni apostol Juan: “Dungdungnguen, no kastoy ti panangayat ti Dios kadatayo, ngarud pagrebbengantayo a mismo nga ayaten ti maysa ken maysa.” Impaganetgetna pay: “No ti asinoman kunaenna: ‘Ay-ayatek ti Dios,’ ket kaskasdi a gurguraenna ni kabsatna, isu ket naulbod. Ta ti di agayat iti kabsatna, a nakitana, dina mabalin nga ayaten ti Dios, a dina nakita. Ket addaantayo iti daytoy a bilin manipud kenkuana, a daydiay agayat iti Dios rebbeng nga ayatenna met ni kabsatna.”​—1 Juan 4:11, 20, 21.

Agbibiagtayo ita iti lubong a ti kaaduan a tattao ipangpangrunada ti bagida, a ‘managayatda iti bagbagida,’ kas impadto ti Biblia. (2 Timoteo 3:2) No kayattayo ngarud a sursuruen ti natan-ok a dalan ti ayat, pagreggetantayo a balbaliwan ti panagpampanunottayo ket tuladentayo ti naayat a Namarsua kadatayo, imbes a surotentayo ti managimbubukodan a panagbiag ti kaaduan a tattao. (Roma 12:2; Efeso 5:1) Ti Dios “manangngaasi [uray] kadagiti awanan panagyaman ken nadangkes,” ken “pagleggakenna ti initna kadagiti nadangkes a tattao ken kadagiti naimbag ket pagtuduenna kadagiti nalinteg a tattao ken kadagiti nakillo.” Gapu iti kasta a nakasaysayaat nga ulidan nga intuyang ti nailangitan nga Amatayo, ikagumaantayo koma ti agbalin a naasi ken mannakitinnulong iti isuamin. Iti kasta, mapaneknekantayo nga ‘annaknatayo ti naayat a nailangitan nga Amatayo.’​—Lucas 6:35; Mateo 5:45.

No maminsan, agresulta dagiti naayat nga aramid iti pannakatulong kadagiti tattao nga agbalin a managdaydayaw iti pudno a Dios. Sumagmamano a tawenen ti napalabas, maysa nga agtagibalay a Saksi ni Jehova ti nangiranud iti mensahe ti Biblia iti kaarrubana, ngem napagkedkedan. Ngem saan a naupay iti dayta. Imbes ketdi, nasayaat latta ti impakitana ket inkagumaanna ti tumulong iti dayta a kaarrubana. Tinulonganna iti naminsan nga immakar iti sabali a balay. Iti sabali a gundaway, adda inyurnosna a nangkadua iti dayta a kaarrubana a sumabet idiay eropuerto kadagiti kabagianna. Idi agangay, nagpayadal met laeng iti Biblia ti kaarrubana ket nagbalin a naregta a Kristiano iti laksid ti nakaro a panangidadanes ti lakayna. Wen, dagidiay nga ebkas ti ayat impasdekda ti pamuon dagiti agnanayon a bendision.

No napudnotayo, bigbigentayo nga inayatnatayo ti Dios saan a gapu ta naruay ti makaay-ayo a galadtayo. Iti kasumbangirna, ayatennatayo uray adu ti biddut ken pagkurangantayo. Gapu ta kasta, sursuruentayo koma nga ayaten dagiti padatayo a tattao uray adu ti pagkuranganda. No sanayentayo a kitaen ken apresiaren dagiti nasayaat a galad ti sabsabali imbes a sapulentay dagiti biddutda, nalaklakatayto nga ayaten ida. Nalabit a maaddaantayo pay iti nasged a panangipateg ken ayat kadakuada a kas iti nasinged nga aggayyem imbes nga ayaten ida gapu laeng ta adda prinsipio a sursurotentayo.

Parayrayenyo ti Ayatyo

Masapul a maparayray ken sukayen ti ayat ken panaggayyem, ket makatulong unay iti daytoy ti kinapasnek ken kinapudno. Dagiti dadduma padasenda nga ilimed dagiti pagkuranganda tapno pagparangenda kadagiti tattao a kayatda a gayyemen a nasayaatda. Ngem masansan a makadadael ti kasta nga aramid, yantangay maammuanto met laeng ti dadduma ti pudno a kasasaad ket adayuandanto dayta a tao gapu iti kasta a panagulbod. Ditay ngarud koma maamak a maammuan ti dadduma ti talaga a kinasiasinotayo​—uray adda dagiti pagkapuyan nga ikagkagumaantay a parmeken. Nalabit a daytoy ti tumulong tapno agbalinda a gayyemtayo.

Kas pagarigan, adda maysa a nababa ti adalna a Saksi a baket iti maysa a kongregasion iti Adayo a Daya. Ngem nikaanoman nga inlimedna dayta iti dadduma. Kas pagarigan, sipaprangka nga aminenna a dina kabaelan nga ilawlawag kadagiti sabsabali babaen dagiti padto ti Biblia ken ti historia a nagpatingga idi 1914 ti Panawen dagiti Gentil.a Nupay kasta, isu ket nagsayaat a pagwadan no iti kinaregta iti ministerio, agraman iti panagayat ken kinaparabur kadagiti kakabsat, isut’ gapuna a sidudungngo nga aw-awaganda kas gameng ti kongregasion.

Iti dadduma a kultura, alasenda ti nabatad a panaglailo; naisuro dagiti tattao iti nadayaw ngem pormal a pannakilangen iti sabsabali. Nupay nasayaat a kanayon ti agbalin a nadayaw ken mannakaawat, saan koma a ti kinadayawtayo ti mangmedmed wenno manglapped iti panangipakitatayo iti riknatayo kadagiti sabsabali. Di imbain ni Jehova ti panangyebkasna iti panangdungngona iti ili a pinilina, ti nagkauna nga Israel, a kunana kadakuada: “Nagayatak kenka iti agnanayon a panagayat.” (Jeremias 31:3) Umarngi iti dayta, kinuna ni apostol Pablo kadagiti kapammatianna idiay Tesalonica: “Yantangay adda nadungngo a panagayatmi kadakayo, naay-ayokami unay a mangiburay kadakayo, saan laeng a ti naimbag a damag ti Dios, no di ket kasta met dagiti bukodmi a kararua, agsipud ta nagbalinkayo a dungdungnguenmi.” (1 Tesalonica 2:8) Isu a bayat a pagreggetantayo a parayrayen ti napudno a panagayat iti padatayo a tattao, ad-adda a maitunos iti sursuro ti Biblia nga iyebkastayo a natural ti kasta a riknatayo imbes a medmedan.

Makalikaguman ti Agtultuloy a Panagregget

Awan sardayna ti panagsursuro nga agayat ken mangipakita iti ayat kadagiti sabsabali. Kalikagumanna ti kasta unay a panagreggettayo gapu ta masapul nga ikagumaantayo a parmeken dagiti pagkapuyantayo ken pagkedkedan ti napigsa nga impluensia daytoy lubong nga awanan panagayat. Nupay kasta, talaga a pagsayaatantayo dagiti nabaknang a gunggona nga itden daytoy.​—Mateo 24:12.

Uray iti daytoy nakaro ti kinaimperpektona a lubong, matagiragsaktayo ti napasayaat a relasion iti padatayo a tattao, nga agbanag iti kasta unay a rag-o, talna, ken pannakapnektayo ken kadagiti sabsabali. Babaen ti kasta a panagregget, mapaneknekantayo a maikaritayo iti nagsayaat a namnama a panagbiag nga agnanayon iti baro a lubong ti Dios. Kangrunaan ti amin, no sursuruentayo ti natan-ok a dalan ti ayat, mabalin a magun-odtayo ti anamong ken bendision ti naayat a Namarsua kadatayo, ita ken iti agnanayon!

[Footnote]

[Dagiti Ladawan iti panid 10]

Maipakita ti Nakristianuan nga ayat babaen ti naimbag nga ar-aramid

[Picture Credit Line iti panid 8]

UN PHOTO 186226/M. Grafman