Saganaanyo ti Napateg a Milenio!
AGLAPLAPUSANAN a bendision ti ipaayto ti Sangaribu a Tawen a Panagturay ni Kristo iti sangatauan. Iti sidong ti naayat a panangimaton ni Jesus, masuktanto iti nakaskasdaaw a kinaperpekto ti nakaay-ay-ay a kasasaad ti sangatauan. Amirisenyo no ania ti kaipapanan dayta kadakayo. Naan-anay a salun-at! Panunotenyo a kada bigat nga agriingkayo nasalsalibukagkayo ngem iti aldaw a limmabas. Minilion a lallaki, babbai, ken ubbing ti mangnamnama nga agbiag iti dayta naragsak a tiempo. Dayta ti pangnamnamaan ken ikarkararagda. Kombinsidoda gapu iti panagadalda iti Biblia a matagiragsakdanto dagitoy a bendision .
Ngem sakbay a rugianna ti Sangaribu a Tawen a Panagturayna, masapul nga ikkaten ni Jesu-Kristo ditoy daga dagiti bumusbusor iti turayna. Ibanagnanto daytoy iti gubat nga inawagan ti Biblia iti Armagedon. (Apocalipsis 16:16) Saan a makiraman dagiti pudno a Kristiano ditoy daga iti dayta a gubat. Daytat’ gubat ti Dios. Ket saanto a mapasamak iti maymaysa a lugar. Kuna ti Biblia a dumanon dayta agingga iti ungto ti daga. Mapapatayto dagiti kabusor ti turay ni Kristo. Awan asinoman kadakuada a makalasat!—Jeremias 25:33.
Isarunonto a sanguen ni Jesus ni Satanas a Diablo ken dagiti demoniona. Iladawanyo ti eksena, kas iti nakita ti nangisurat iti libro nga Apocalipsis: “Nakitak ti maysa nga anghel [ni Jesu-Kristo] a bumabbaba manipud langit nga addaan iti tulbek ti mangliwengliweng ken maysa a dakkel a kawar iti imana. Ket kinemmegna ti dragon, ti kadaanan a serpiente, nga isu ti Diablo ken Satanas, ket pinarautanna iti las-ud ti sangaribu a tawen.” (Apocalipsis 20:1, 2) Kalpasanna, madadaelto iti agnanayon da Satanas ken dagiti demoniona.—Mateo 25:41.
“Maysa a dakkel a bunggoy, nga awan ti tao a makabael a mangbilang” ti makalasatto iti Armagedon. (Apocalipsis 7:9) Iturongto ni Kristo dagitoy tapno magunggonaanda a naan-anay iti “ubbog ti dandanum ti biag,” a kas iti pastor a mangiturong iti karnerona iti mangsalbar-biag a danum. (Apocalipsis 7:17) Awanton ni Satanas ken dagiti demoniona a manglapped iti naespirituan nga irarang-ayda. Dagitoy a nakalasat iti Armagedon in-inutto a matulongan a mangikkat kadagiti pagannayasanda nga agbasol agingga nga agbalinda a perpekto!
Iti sidong ti naayat a turay ni Kristo,agtultuloyto ti panagrang-ay ti kasasaad ti panagbiag. Baeten ken Jesu-Kristo, ikkatento ni Jehova a Dios dagiti amin a pakaigapuan ti ut-ot ken ladingit. “Punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot.” (Apocalipsis 21:4) Inan-anay ni propeta Isaias ti panangiladawan idi kinunana:“Iti kasta maluktanton dagiti mata ti bulsek, ken dagiti lapayag ti tuleng maluktandanto. Iti kasta aglagtonto ti pilay a kas maysa nga ugsa, ken ti dila ti umel agkantanto.” (Isaias 35:5, 6) Ket agungarto dagiti natay, “dagiti dadakkel ken dagiti babassit,” nga addaan gundaway a saanen a pulos matay!—Apocalipsis 20:12.
Maur-urnong uray itan ti “dakkel a bunggoy” a makalasatto iti Armagedon. Agsagsaganadan para iti Sangaribu a Tawen a Panagturay ni Kristo. Nupay dida ammo no kaano a mangrugi dayta a turay, agtalekda nga umay dayta iti tiempo nga inkeddeng ti Dios. Mabalin a maysakayto kadakuada, ngem masapul met nga agsaganakayo—saan a babaen ti panangilakoyo kadagiti sanikuayo ken ipapan iti maysa a lugar, no di ket babaen ti pananggun-odyo iti umiso a pannakaammo maipapan ken ni Jehova a Dios ken kadagiti panggepna babaen ti panagadalyo iti Biblia. Maragsakan dagiti Saksi ni Jehova a mangilawlawag no kasano a makagunggona kadakayo ken iti pamiliayo ti panagadal iti Biblia, ket aramidenda daytoy nga awan bayadna wenno obligasion. Maragsakan dagiti agipabpablaak iti daytoy a magasin a mangipaay iti kanayonan nga impormasion.
[Kahon iti panid 7]
Ti Sangaribu a Tawen—Literal Wenno Simboliko?
Yantangay naisurat iti simboliko a sasao ti kaaduan a paset ti libro ti Biblia nga Apocalipsis, adda tumaud a saludsod. Ti ngay Sangaribu a Tawen a Panagturay ni Kristo a nadakamat iti Apocalipsis? Literal kadi dayta a tiempo wenno simboliko?
Adu ti mangipatuldo a literal a sangaribu-tawen a periodo ti kaipapananna. Usigenyo: Tinukoy ni apostol Pablo ti Sangaribu Tawen a Panagturay ni Kristo, a tiempo a maukom ti sangatauan, kas maysa nga aldaw. (Aramid 17:31; Apocalipsis 20:4) Insurat ni apostol Pedro a ti maysa nga aldaw (24 nga oras) ni Jehova ket kas sangaribu a tawen. (2 Pedro 3:8) Daytat’ mangpaneknek a literal a sangaribu a tawen dayta nga “aldaw” ti panangukom. Kanayonanna, namin-uppat a nadumaduma a daras a mabasatayo iti Apocalipsis 20:3,5-7 ti sasao a “ti sangaribu a tawen,” saan ket a “maysa a sangaribu a tawen.” Ipamatmat daytoy ti masnup a kawatiwat ti tiempo.