Report Dagiti Manangiwaragawag iti Pagarian
Nateokratikuan nga Irarang-ay iti Namibia
DAMO a naipangngeg ti naimbag a damag ti Pagarian ti Dios idiay Namibia idi arinunos ti dekada 1920. Sipud idin, ginasut a nasingpet panagpuspusoda a tattao ti nangipangag iti mensahe ti Dios maipapan ti pannakaisalakan. Ipakita dagiti sumaganad a kapadasan no kasano nga ur-urnongen ni Jehova dagitoy napateg a gameng iti balayna.—Haggeo 2:7.
◻ Ni Paulus, a panagtalon ti pagbiaganna nga agnanaed iti umamianan a daya ti Namibia, ket damdamo a nakasarita dagiti Saksi ni Jehova idi napan idiay Windhoek, ti kabesera a siudad. Kombinsido a dagus ni Paulus a nasarakannan ti kinapudno. Nagawid nga awitna ti libro a Mabalinyo ti Agbiag nga Agnanayon iti Paraiso a Daga. Sa idi napan idiay Rundu, ti kaasitgan nga ili nga adda Kingdom Hall, nasarakan ni Paulus dagiti Saksi ket indawatna a sarungkaranda.
Nupay kasta, adayo unay para kadagiti Saksi ti mapan a linawas a mangikondukta iti panagadal iti Biblia ken ni Paulus. Saan a naupay ni Paulus no di ket inadalna ti Biblia a bukodna. Maysa pay, sireregta nga inkasabana kadagiti sabsabali dagiti banag a naad-adalna. Idi agangay, nabuangay ti maysa a grupo a panagadal iti Biblia. Idi a ti bassit a grupo nangngegda iti radio nga adda maangay nga asamblea dagiti Saksi ni Jehova idiay Rundu, pinagtitiponda dagiti bassit nga urnongda ket inyurnosda ti panagbiaheda tapno tumabuno.
Anian a makaparagsak a kapadasan para kadakuada ti damdamo a pannakitimpuyogda kadagiti Saksi ni Jehova! Nayurnos a dagus ti regular nga isasarungkar dagiti kualipikado a kakabsat a lallaki iti daytoy a grupo. Adda innem itan nga agibumbunannag iti purok a pagnanaedan ni Paulus.
◻ Idi nangngeg ni Johanna ti maysa a tao a mamadpadakes kadagiti Saksi ni Jehova, natukay ti interesna iti nagan ti Dios. Kinunana: “Naimula iti panunotko ti nagan a Jehova idi damo a mangngegko, ket nangrugi a pinampanunotko no asino ni Jehova. Agnanaedkami ken lakayko iti asideg ti Walvis Bay iti kosta ti Namibia. Naminsan a napankami idiay ili, nakitak idiay lansangan ti sumagmamano a Saksi nga agiwarwaras iti magasin a Pagwanawanan. Nangalaak iti kopiak ken kiniddawko nga iyadalandak iti Biblia, yantangay adu ti saludsodko. Nakasangitak idi kinunada a dida makaumay ta nadadaelan ti luganda. Di nagbayag kalpasanna, pimmusay ni lakayko, ket nagnaedak idiay Keetmanshoop. Maysa nga special pioneer (amin-tiempo nga ebanghelisador) ti naidestino a mangasaba sadiay, ket nangalaak kenkuana iti libro a Ti Kinapudno a Mangiturong iti Biag nga Awan Inggana. Iti damo pay laeng, nabigbigkon ti kinapudno.
“Idi agangay, naawisak a makiraman iti trabaho a panangasaba, ngem ti panagbuteng iti tao ti nangringbaw kaniak. Iti baet ti panagbalaybalaymi, inkararagko ken ni Jehova a matayak la koman imbes a mangasabaak. Idi damo a makiramanak iti panangasaba iti lansangan, nagyanak iti maysa a nalinged nga eskinita, bareng awan makakita kaniak. Kamaudiananna, naaddaanak met laeng iti tured a mangipaima iti magasin iti tao a lumabas, ket iti dayta la a kanito nga adda naibagak. Iti dayta nga aldaw, babaen ti tulong ni Jehova, nairanudko iti adu a tattao ti naibatay-Biblia a namnamak.
“Ita, kalpasan ti 12 a tawen, nupay napanglawak iti material, ipatpategko pay laeng ti pribilehiok nga agserbi kas payunir ken agtultuloy a tagtagiragsakek ti di matukod a rag-o gapu ta iranranudko kadagiti sabsabali ti kinapudno mainaig iti Pagarian.”