Nailawlawag ti Libro ni Daniel!
SIGAGAGAR dagiti kombensionista a nangala iti kopiada ti kairuruar a 320 ti panidna a libro a napauluan, Ipangagyo ti Padto ni Daniel! Aniat’ makunada maipapan iti dayta a libro? Amirisenyo ti imbaga ti sumagmamano kadakuada.
“Kas iti kaaduan a tin-edyer, diak unay magustuan nga adalen ti kadaanan a historia. Isu nga idi naawatko ti kopiak ti baro a libro nga Ipangagyo ti Padto ni Daniel!, diak unay magagaran a mangbasa iti dayta, ngem pinadasko latta. Ayna, kamaliak gayam! Maysa daytoy kadagiti kapintasan pay laeng a libro a nabasak. Talaga a makapainteres! Diak mariknan nga agbasbasaak iti salaysay a napasamak rinibun a tawen ti napalabas. Ita laeng a mariknak a kas man la siak ni Daniel. Talaga a mailadawanko no kasano ti mayadayo iti pamiliam, maipan iti ganggannaet a pagilian, ken mamin-adu a masuot ti kinatarnawmo. Pagyamanan unay iti daytoy a libro.”—Anya.
“Ti kangrunaan a nakatulong kaniak isu ti nabatad a mensahe a ni Jehova ti naan-anay a mangkonkontrol kadagiti banag a mangapektar iti ilina. Babaen kadagiti sirmata ken tagtagainep ni Daniel ken ti dadduma pay nga impatarusna, nalawag a kanayon nga ipalpalubos ti Diostayo dagiti pasamak a maitunos iti panggepna. Daytoy ti mangpabileg iti namnamatayo kadagiti padto iti Biblia maipapan iti isagsaganana a baro a lubong.”—Chester.
“Nagustuak ti wagas a panamagbalinyo ken Daniel a nabiag. Ad-adda a naam-ammok babaen ti panangitampokyo kadagiti pakaseknan ken pakadanaganna. Nalawlawag itan ti pannakaawatko no apay a nakapatpateg ni Daniel ken Jehova. Kabayatan ti amin a pannakasuot ken pannakaidadanesna, saan a ti bagina ti impangpangrunana. Ti kangrunaan a nakaseknanna isu ni Jehova ken ti napintas a naganna. Pagyamanan iti panangitampokyo kadagitoy a punto.”—Joy.
“Daytoy ti nabayagen nga ur-urayenmi! Ita laeng a naipaawat no kasano kaadu iti linaon ti libro ni Daniel ti agaplikar iti tunggal maysa kadatayo. Kalpasan a nabasak ti adun a benneg ti baro a libro iti karabiyan daydi aldaw a pannakagun-odko iti dayta, insardengko pay biit ti agbasa tapno agyamanak ken Jehova babaen ti kararag.”—Mark.
“Dimi impagarup nga adda epektona kadagiti annakmi. Lima ken tallo ti tawenda. . . . Nupay paboritoda dagiti estoria maipapan kada Daniel, Ananias, Misael, ken Azarias iti libro a Ti Librok dagiti Estoria ti Biblia, adda epekto kadakuada ti pannakaisalaysay dagitoy nga estoria iti libro a Padto ni Daniel iti wagas a dimi impagpagarup. Uray ubbingda pay, kas man la am-ammodan a naimbag dagitoy a nalinteg nga agtutubo a lallaki. Nagsayaatda ketdin a pagsarmingan dagiti annakmi! Anian a nagsayaat a libro ti intedyo kadakami! Pagyamanan unay!”—Bethel.
“Kas man la kaduak dagiti agtutubo a lallaki a Hebreo bayat a nasuot ti pammatida; ket dayta ti nakaparegtaak a mangusig iti pammatik. Ti kahon ti repaso a napauluan “Ania ti Naawatanyo?” ipasagepsepna iti puso ti linaon ti kapitulo. Agyamanak manen kadakayo iti maysa pay nga obra maestra.”—Lydia.