Panangiranud iti Nakristianuan a Namnama Idiay Senegal

Datayo Dagiti Kita nga Addaan Pammati

Panangiranud iti Nakristianuan a Namnama Idiay Senegal

NAPATEG a taraon ti ikan nanipud pay idi un-unana a panawen. Rinibun a tawen nga agkalkalap ti tattao kadagiti taaw, dan-aw, ken karayan. Mangngalap idiay Baybay ti Galilea ti dadduma kadagiti apostol ni Jesu-Kristo. Nupay kasta, insuro kadakuada ni Jesus ti sabali a kita ti panagdaklis. Maysa daytoy a naespirituan a panagdaklis a pakagunggonaan saan laeng a dagiti mangngalap, no di ket uray dagiti makalap.

Maipapan iti daytoy, kinuna ni Jesus iti mangngalap a ni Pedro: “Manipud ita agkalapkanto iti tattao a sibibiag.” (Lucas 5:10) Maipatpatungpal ita daytoy a kita ti panagkalap iti nasurok a 230 a daga, agraman iti Senegal. (Mateo 24:14) Dagiti moderno-aldaw a “dumadaklis kadagiti tattao” iti Senegal situtured nga iranranudda ti Nakristianuan a namnamada kadagiti tattao.—Mateo 4:19.

Adda ti Senegal iti makinlaud nga ungto ti Africa, manipud iti nadarat a desierto a naibeddeng iti Sahara iti amianan agingga iti rehion ti nasalimuot a kabakiran ti Casamance iti abagatan. Mapulpul-oyan ti Senegal iti nabara nga angin manipud iti desierto ken ti nalamiis ken makapabang-ar nga angin manipud iti Atlantico. Nasurok a siam a milion a tattao ti agnanaed sadiay. Agdindinamag ti kinamanagpadagus dagiti umili ti Senegal. Saan a Kristiano ti kaaduan kadakuada. Adu ti agpaspastor, bayat nga agtartaraken ti dadduma kadagiti baka, kamelio, ken kalding. Adda met dagiti agmulmula iti mani, kapas, ken pagay. Wen, adda met dagiti mangngalap, a punnuenda dagiti iketda iti ikan manipud Taaw Atlantico ken iti sumagmamano a dadakkel a karayan nga agsikkosikko iti pagilian. Napateg iti ekonomia ti Senegal ti industria ti panagkalap. Kinapudnona, ti nasional a putaheda ket ceebu jën, nananam a taraon a buklen ti innapuy, ikan, ken natnateng.

“Dumadaklis Kadagiti Tattao”

Adda 863 a naanep a mangikaskasaba iti Pagarian ti Dios idiay Senegal. Nangrugi sadiay ti naespirituan a panagdaklis idi rugrugi ti dekada 1950. Naluktan ti maysa a sanga nga opisina ti Watch Tower Society idi 1965 idiay Dakar, ti kabeserana. Immay dagiti “dumadaklis” a misionero a naggapu iti adu nga adayo a pagilian. Nangrugi ti “panagdaklis,” ket nagtultuloy a rimmang-ay ti panangiranud iti Nakristianuan a namnama idiay Senegal. Idi agangay, nabangon idiay Almadies, iti ruar ti Dakar, dagiti patakder a kanayonan ti sanga nga opisina ket naidedikar ken Jehova idi Hunio 1999. Anian a tiempo ti panagrag-o!

Ti Karit ti Panangawat iti Kinapudno

Regular a makasabaan dagiti tattao nga addaan iti nadumaduma a kasasaad, ket adda dagiti nangipangag iti mangted namnama a mensahe a masarakan iti Sao ti Dios. Nupay adu ti awanan pannakaammo iti Biblia, maragsakanda a makaammo nga asidegen a matungpal dagiti inkari ni Jehova a Dios kadagiti matalek a propeta idi ugma.

Masansan a kasapulan ti tured tapno masalimetmetan dagiti Nakristianuan a prinsipio, nangnangruna no nairaman dagiti tradision ken kustombre ti pamilia. Kas pagarigan, nasaknap ti poligamia idiay Senegal. Usigenyo ti kaso ti maysa a lalaki nga addaan iti dua nga asawa idi nangrugi nga agadal iti Biblia. Awatenna ngata ti Nakristianuan a kinapudno ket tungpalenna ti Nainkasuratan a bilin a maysa laeng ti asawana? (1 Timoteo 3:2) Ti kadi umuna nga asawana idi kabambannuaganna ti pagtalinaedenna? Kasta ti inaramidna, ket naregta itan a panglakayen iti maysa kadagiti dakkel a kongregasion idiay Dakar. Inawat met ti pinagtalinaedna nga asawana ti kinapudno agraman ti 12 nga annakna: 10 iti pinagtalinaedna nga asawana ken 2 iti dati a maikadua nga asawana.

Mabalin met a makalapped iti panangawat iti Nakristianuan a namnama ti kinaawan adal. Kayat kadi a sawen daytoy a di mabalin nga awaten ken annuroten ti maysa nga awan adalna ti kinapudno? Saan. Usigenyo ti kapadasan ni Marie, nagaget nga ina ti walo nga ubbing. Nakitana a dagus a napateg a pagsasaritaanda nga agiina ti maysa a teksto ti Biblia kada aldaw sakbay nga isut’ mapan agtrabaho ken ageskuela dagiti ubbing. Ngem kasanona a maaramid daytoy idinto ta dina met ammo ti agbasa? Nasapa kada bigat nga alaenna ti bokleta a Panangsukimat Kadagiti Kasuratan iti Inaldaw-aldaw ket agtakder iti nadarat a lansangan iti sanguanan ti balayna. No adda lumabas a tattao, saludsodenna no ammoda ti agbasa. No adda masarakanna a makabasa, iyawatna ti bokleta sana idawat: “Diak makabasa, isu a di la mabalin nga ibasam ita kaniak daytoy a paset?” Imdenganna a naimbag ti maibasbasa. Kalpasanna, agyaman iti dayta a tao sa dagus a sumrek iti balayna ket sigaganaygay a pagsasaritaanda nga agiina ti teksto sakbay a mapan ageskuela dagiti ubbing!

Mangipangag ti Amin a Kita ti Tattao

Idiay Senegal, adda dagiti tattao a situtugaw iti tiendaan kadagiti lansangan nga aglaklako iti ikan, natnateng, wenno prutas, wenno nakasanggir iti linong ti makaay-ayo a kayo ti baobab bayat nga umin-inumda iti ataya, medio napait a berde a tsa. Gapu ta determinadoda a mangiranud iti naimbag a damag iti amin a masabetda, kinasarita ti dua a kakabsat a lallaki ti maysa a baldado nga agpalpalama iti lansangan. Kalpasan a kinablaawanda, kinunada: “Adu a tao ti mangted kenka iti kuarta ngem didaka met kasarita. Immasidegkami tapno kasaritadaka maipapan ti napateg a banag a mainaig iti masakbayam.” Nasdaaw ti agpalpalama. “Adda kayatmi nga isaludsod kenka,” kinuna dagiti kakabsat. “Ania ti makunam no apay a nakaro ti panagsagaba iti lubong?” “Pagayatan ngamin ti Dios,” insungbat ti agpalpalama.

Inusar ngarud dagiti kakabsat ti Kasuratan a nakirinnason kenkuana ket inlawlawagda ti Apocalipsis 21:4. Natukay unay ti rikna ti agpalpalama iti daytoy makaited namnama a mensahe ken gapu ta adda maseknan nga umasideg ken makisarita kenkuana maipapan ti Biblia. Nakasangit ti agpalpalama. Imbes a dumawat iti kuarta, kiniddawna kadagiti kakabsat nga alaenda amin dagiti sinsilio iti lata nga us-usarenna nga agpalimos! Talaga nga ipapilitna ta uray la naala ti atension ti amin a lumablabas. Kalpasan laeng ti adu a panangay-ayo a nakombinsir dagiti kakabsat nga idulinna ti kuarta. Immanamong met laeng ngem inyunay-unayna a sarungkarandanto koma manen.

Mangpapaadu met kadagiti nakalap iti naespirituan nga iket ti dakkel nga unibersidad ti Dakar. Maysa a medical student sadiay nga agnagan iti Jean-Louis ti nangrugi nga agadal iti Biblia. Inawatna a dagus ti kinapudno, indedikarna ti biagna ken Jehova, ket nagpabautisar. Tarigagayanna ti agserbi iti Dios iti amin-tiempo kas payunir, ngem nagustuanna met ti panagadalna iti medisina. Gapu ta adda kontratana iti pagilian a naggapuanna, obligado a mangileppas iti kursona. Ngem inggiddanna met ti nag-auxiliary pioneer. Di nagbayag kalpasan nga inawatna ti diplomana kas kualipikado a mangngagas, naawis nga agserbi kas doktor iti maysa a dakkel a pagtaengan ti Bethel idiay Africa. Maysa pay nga agkabannuag a lalaki a nakasabaan idiay Dakar University ti agserserbi met itan kas kameng ti pamilia ti Bethel iti naggapuanna a pagilian.

Pudno a naballigi ti naespirituan a panagkalap idiay Senegal. Maap-apresiar unay dagiti naibatay-Biblia a literatura dagiti Saksi ni Jehova ken maipabpablaak pay itan iti pagsasao a Wolof iti dayta a lugar. Adu a nasingpet ti panagpuspusoda a tattao ti agyamyaman gapu ta maikaskasaba ti naimbag a damag iti bukodda a pagsasao. Babaen ti pamendision ni Jehova, di pagduaduaan nga adu pay a simboliko nga ikan ti makalap, bayat a dagiti nasaet a “dumadaklis kadagiti tattao” idiay Senegal itultuloyda nga iranud ti Nakristianuan a namnama a simamatalek ken situtured.

[Mapa/Ladawan iti panid 31]

(Para iti aktual a pannakaurnosna, kitaem ti publikasion)

SENEGAL

[Ladawan]

Panangiranud iti Nakristianuan a namnama idiay Senegal

[Credit Line]