Ipangagyo ti Naimpadtuan a Sao ti Dios
“Addaankami iti naimpadtuan a sao a napagbalin nga ad-adda a sigurado; ket naimbag ti ar-aramidenyo iti panangimdengyo iti dayta.”—2 PEDRO 1:19.
1, 2.Ania nga ehemplo ti maisalaysayyo maipapan iti saan a pudno a mesias?
KADAGITI naglabas a siglo, pinadas dagiti saan a pudno a mesias nga ipadles ti masanguanan. Idi maikalima a siglo K.P., adda maysa a lalaki a Moises ti inyawagna iti bagina. Kinombinsirna dagiti Judio iti puro ti Creta nga isu ti mesias ket aonenna ida iti rigat. Idi dimteng ti naituding nga aldaw a pannakawayawayada, simmurotda kenkuana iti nangato a disso a matantannawagan ti Baybay Mediteraneo. Imbagana a tumpuakda laeng iti baybay ket agbisngay dayta. Nagadu kadagiti timpuak ti nalmes, ngem didan nabirokan dayta saan a pudno a mesias.
2 Idi maika-12 a siglo, nagparang ti maysa a “mesias” idiay Yemen. Nagkiddaw ti caliph, wenno agturay, iti pagilasinan ti kinamesiasna. Insingasing daytoy a “mesias” iti caliph a pugotanda. Impadtona a ti madagdagus a panagungarna ti agserbi a pagilasinan. Immanamong ti caliph—ket daydin ti kanibusanan dayta a “mesias.”
3.Asino ti pudno a Mesias, ket ania ti pinaneknekan ti ministeriona?
3 Naan-anay a pannakapaay ti inyeg dagiti saan a pudno a mesias ken dagiti padtoda, ngem ti panangipangag iti naimpadtuan a sao ti Dios di pulos mangiturong iti pannakaupay. Ti pudno a Mesias a ni Jesu-Kristo ti nabiag a kaitungpalan ti adu a padto iti Biblia. Kas pagarigan, iti panangadawna iti padto ni Isaias, kastoy ti insurat ni Mateo, a maysa kadagiti nangisurat iti Ebanghelio: “‘O daga ti Zabulon ken daga ti Neftali, nga adda iti denna ti dalan ti baybay, iti sabali a bangir ti Jordan, Galilea dagiti nasion! dagiti tattao nga agtugtugaw iti sipnget nakakitada ti dakkel a lawag, ket no maipapan kadagidiay agtugtugaw iti rehion ti anniniwan ti patay, timpuar ti lawag kadakuada.’ Manipuden iti dayta a tiempo rinugian ni Jesus ti nangaskasaba ket kunkunana: ‘Agbabawikayo, ta ti pagarian ti langlangit immasidegen.’” (Mateo 4:15-17; Isaias 9:1, 2) Ni Jesus dayta a “dakkel a lawag,” ket pinaneknekan ti ministeriona nga isu ti Mammadto nga impakpakauna ni Moises. Mapapatay dagidiay di mangipangag ken Jesus.—Deuteronomio 18:18, 19; Aramid 3:22, 23.
4. Kasano a tinungpal ni Jesus ti Isaias 53:12?
4 Tinungpal met ni Jesus ti padto iti Isaias 53:12: “Imbukbokna ti kararuana ken patay, ket naibilang kadagiti managlabsing: nupay kasta inawitna ti basol dagiti adu, ken nagaramid iti panangibabaet kadagiti managlabsing.” Gapu ta ammo idi ni Jesus nga iti saan a mabayag ipaaynanton ti biagna kas subbot, pinabilegna ti pammati dagiti adalanna. (Marcos 10:45) Inaramidna daytoy iti naidumduma a wagas babaen ti panagbalbaliw ti langana.
Ti Panagbalbaliw ti Langa ni Jesus Pabilgenna ti Pammati
5. Iti bukodyo a sasao, kasanoyo a deskribiren ti panagbalbaliw ti langa ni Jesus?
5 Maysa a naimpadtuan a pasamak daydi panagbalbaliw ti langa ni Jesus. Kinuna ni Jesus: “Ti Anak ti tao naikeddeng nga umay iti dayag ni Amana agraman dagiti anghelna . . . Pudno kunak kadakayo nga addada sumagmamano kadagidiay sitatakder ditoy a didanto pulos maramanan ni patay agingga nga umuna pay a makitada ti Anak ti tao nga um-umay iti pagarianna.” (Mateo 16:27, 28) Aktual kadi a nakita ti dadduma kadagiti apostol ti iyaay ni Jesus iti Pagarianna? Kuna ti Mateo 17:1-7: “Innem nga aldaw kalpasanna innala ni Jesus da Pedro ken Santiago ken Juan a kabsatna ket inkuyogna ida a sumang-at iti maysa a nangato a bantay nga is-isuda. Ket nagbalbaliw ti langana iti sanguananda.” Anian a nakaskasdaaw a pasamak! “Ti rupana nagsilnag a kas iti init, ket dagiti makinruar a kawesna nagraniagda a kas iti lawag. Ket, adtoy! nagparang kadakuada da Moises ken Elias, a makisasao kenkuana.” Kasta met, “maysa a naraniag nga ulep ti nanglinong kadakuada,” ket nangngegda ti mismo a timek ti Dios a nagkuna: ‘Daytoy ti Anakko, ti dungdungnguen, isu nga inanamongak; agimdengkayo kenkuana.’ Idi mangngegda daytoy, dagiti adalan nagpaklebda ket nagbutengda iti kasta unay. Idin ni Jesus immasideg ket, idi sinagidna ida, kinunana: ‘Bumangonkayo ket dikay agbuteng.’”
6. (a) Apay a kinuna ni Jesus a ti panagbalbaliw ti langana ket maysa a sirmata? (b) Ania ti imparipirip ti panagbalbaliw ti langa ni Jesus?
6 Mabalin a napasamak daytoy nakaskasdaaw a pagteng iti maysa kadagiti turod ti Bantay Hermon. Nagpatnag nga adda idi sadiay ni Jesus ken dagiti tallo nga apostol. Nabatad a rabii idi nagbalbaliw ti langa ni Jesus isu nga ad-adda a naraniag ti buya. Kinuna ni Jesus a maysa dayta a sirmata gapu ta saan a literal nga adda sadiay da Moises ken Elias, a nabayagen a natay. Ni laeng Kristo ti aktual nga adda sadiay. (Mateo 17:8, 9) Ti kasta a narangrang a buya ti nangipaay kada Pedro, Santiago, ken Juan iti karkarna a pangripiripan iti nadayag a kaadda ni Jesus iti turay ti Pagarian. Dagiti napulotan a makipagtawid ken Jesus ti iladladawan da Moises ken Elias, ket ti sirmata sititibker a pinasingkedanna ti pammaneknek ni Jesus maipapan iti Pagarian ken ti masanguanan a panagarina.
7. Kasanotay nga ammo a nalawag pay laeng idi iti isip ni Pedro ti panagbalbaliw ti langa ni Jesus?
7 Nakatulong ti panagbalbaliw ti langa ni Jesus a nangpabileg iti pammati dagiti tallo nga apostol a maaddaanto iti napateg nga akem iti kongregasion Kristiano. Ti panagsilnag ti rupa ni Kristo, ti nakaranraniag a pagan-anayna, ken ti mismo a timek ti Dios a nagkuna a ni Jesus ti dungdungnguenna nga Anak a masapul nga imdenganda—sieepektibo a tinungpal amin dagitoy ti nakairantaanda. Ngem awan pangibagbagaan dagiti apostol iti sirmata agingga a di pay napagungar ni Jesus. Agarup 32 a tawen kalpasanna, nalawag pay laeng daytoy a sirmata iti isip ni Pedro. Maipapan iti dayta ken ti kaipapananna, insuratna: “Saan, saan a babaen ti panangsurot kadagiti nalaing pannakapartuatna nga ulbod a sarsarita a pinakaammuandakayo iti pannakabalin ken kaadda ni Apotayo a Jesu-Kristo, no di ket babaen ti pannakasaksi iti kinatan-okna. Ta inawatna ti dayaw ken dayag manipud iti Dios nga Ama, idi a dagiti sasao a kas kadagitoy naipaayda kenkuana babaen iti natan-ok a dayag: ‘Daytoy ti anakko, ti dungdungnguek, isu nga inanamongak a mismo.’ Wen, dagitoy a sasao nangngegmi a naipaay manipud langit bayat nga addakami a naikuyog kenkuana idiay nasantuan a bantay.”—2 Pedro 1:16-18.
8. (a) Ti imbaga ti Dios maipapan iti Anakna inturongna ti atension iti ania? (b) Ania ti impasimudaag ti ulep a nagparang idi nagbalbaliw ti langa ni Jesus?
8 Ti kapatgan isu ti imbaga ti Dios: “Daytoy ti Anakko, ti dungdungnguen, isu nga inanamongak; agimdengkayo kenkuana.” Dagitoy a sao iturongda ti atension ken Jesus kas Ari nga insaad ti Dios, a masapul a pagtulnogan ti sangaparsuaan. Ti ulep a nangsalinong ipasimudaagna a di makita ti kaitungpalan daytoy a sirmata. Makitanto laeng babaen dagiti mata ti pannakaawat dagidiay makabigbig iti “pagilasinan” ti di makita a kaadda ni Jesus iti turay ti Pagarian. (Mateo 24:3) Kinapudnona, ti bilin ni Jesus a maipakaammonto laeng ti sirmata kalpasan ti panagungarna ipakitana a maitan-ok ken maipadayagto kalpasan ti panagungarna.
9. Apay a ti panagbalbaliw ti langa ni Jesus pabilgenna ti pammatitayo?
9 Kalpasan ti panangtukoyna iti panagbalbaliw ti langa ni Jesus, kinuna ni Pedro: “Gapu itoy addaankami iti naimpadtuan a sao a napagbalin nga ad-adda a sigurado; ket naimbag ti ar-aramidenyo iti panangimdengyo iti dayta kas iti pagsilawan nga agsilsilnag iti nasipnget a disso, agingga nga agbannawag ti aldaw ket lumgak ti baggak, kadagiti pusoyo. Ta ammuenyo nga umuna daytoy, nga awan ti padto ti Kasuratan nga agtaud iti aniaman a kabukbukodan a panangipaulog. Ta ti padto saan a naiyeg uray kaano babaen ti pagayatan ti tao, no di ket dagiti tattao nagsaoda manipud iti Dios bayat nga idaldalan ida ti nasantuan nga espiritu.” (2 Pedro 1:19-21) Ti panagbalbaliw ti langa ni Jesus ipaganetgetna ti kinamapagtalkan ti naimpadtuan a sao ti Dios. Masapul nga ipangagtayo dayta a sao, saan a dagiti “nalaing pannakapartuatna nga ulbod a sarsarita” a di nagtaud wenno anamongan ti Dios. Ti panagbalbaliw ti langa ni Jesus pabilgenna koma ti pammatitayo iti naimpadtuan a sao agsipud ta pimmudnon dayta a sirmata maipapan iti dayag ni Jesus ken ti turay ti Pagarian. Wen, addaantayo iti di mailibak a pammaneknek nga adda itan ni Kristo kas mannakabalin a nailangitan nga Ari.
No Kasano a Lumgak ti Baggak
10. Asino wenno ania ti “baggak” a dinakamat ni Pedro, ket apay a kasta ti sungbatyo?
10 Insurat ni Pedro: “Naimbag ti ar-aramidenyo iti panangimdengyo iti [naimpadtuan a sao] kas iti pagsilawan nga agsilsilnag iti nasipnget a disso, agingga nga agbannawag ti aldaw ket lumgak ti baggak.” Asino wenno ania ti “baggak”? Maminsan la nga agparang iti Biblia ti sao a “baggak,” ket umasping ti kaipapananna iti “bituen ti agsapa.” Iti Apocalipsis 22:16, naawagan ni Jesu-Kristo a “ti naraniag a bituen ti agsapa.” Adda dagiti tiempo ti tawen a dagiti kasta a bituen ti maudi a lumgak iti daya. Lumgakda sakbay unay nga agparang ti init, ket iti kasta ipakpakaunada ti panagbannawag ti baro nga aldaw. Inusar ni Pedro ti sao a “baggak” kas panangtukoy ken Jesus kalpasan ti panangawatna iti turay ti Pagarian. Iti dayta a panawen, limgak ni Jesus iti intero nga uniberso, agraman iti daga! Kas Mesianiko a Baggak, ipakpakaunana ti panagbannawag ti baro nga aldaw, wenno panawen, para iti natulnog a sangatauan.
11. (a) Apay a di kayat a sawen ti 2 Pedro 1:19 a lumgak ti “baggak” iti literal a puso dagiti tattao? (b) Kasanoyo nga ilawlawag ti 2 Pedro 1:19?
11 Adu a patarus ti Biblia ti mangisursuro a ti pisikal a puso ti tao ti tuktukoyen ti sasao ni apostol Pedro a nailanad iti 2 Pedro 1:19. Agdagsen laeng iti 250 agingga iti 300 a gramo ti puso ti nataengan. Kasano ngarud a lumgak ni Jesu-Kristo kadagitoy a babassit nga organo ti tao idinto ta maysa itan a nadayag nga imortal nga espiritu a parsua idiay langit? (1 Timoteo 6:16) Siempre, mainaig ti piguratibo a pusotayo iti daytoy a banag, ta agpannuray iti dayta ti panangipangagtayo iti naimpadtuan a sao ti Dios. Ngem usigenyo a naimbag ti 2 Pedro 1:19, ket makitayo a nagaramat ti Baro a Lubong a Patarus kadagiti kur-it (comma) a mangilasin iti sasao nga “agingga nga agbannawag ti aldaw ket lumgak ti baggak” iti nagbaetan dagiti immun-una a sao ti bersikulo ken ti sasao a “kadagiti pusoyo.” Mabalin nga ipatarus daytoy a bersikulo iti kastoy: ‘Addaankami iti naimpadtuan a sao a napagbalin nga ad-adda a sigurado; ket naimbag ti ar-aramidenyo iti panangimdengyo iti dayta kas iti pagsilawan nga agsilsilnag iti nasipnget a disso, kayatna a sawen, kadagiti pusoyo, agingga nga agbannawag ti aldaw ket lumgak ti baggak.’
12. Ania ti kasasaad ti puso ti kaaduan a tattao, ngem ania ti kasasaad dagiti pudno a Kristiano?
12 Ania ti kasasaad ti piguratibo a puso ti kaaduan iti managbasol a sangatauan? Adda dagiti pusoda iti naespirituan a kasipngetan! Ngem no pudnotayo a Kristiano, kas man la addaantayo iti silaw a mangsilsilnag iti pusotayo, a nasipnget koma no awan dayta. Kas ipasimudaag ti sasao ni Pedro, agtalinaed a nasalukag dagiti pudno a Kristiano ken malawaganda iti panagbannawag ti baro nga aldaw babaen ti panangipangag iti naraniag a naimpadtuan a sao ti Dios. Ammoda a limgaken ti Baggak, saan a kadagiti literal a puso dagiti tattao, no di ket iti amin a sangaparsuaan.
13. (a) Apay a masiguradotayo a limgaken ti Baggak? (b) Apay a maibturan dagiti Kristiano dagiti narigat a kasasaad nga impakpakauna ni Jesus a mapasamak iti kaaldawantayo?
13 Limgaken ti Baggak! Masiguradotayo dayta babaen ti panangipangag iti naindaklan a padto ni Jesus maipapan iti kaaddana. Dagiti pasamak a kas kadagiti awan pay kaaspingna a gubat, bisin, ginggined, ken ti sangalubongan a pannakaikaskasaba ti naimbag a damag ket kaitungpalan dayta a padto. (Mateo 24:3-14) Nupay apektarandatayo met kas Kristiano dagiti narigat a kasasaad nga impadto ni Jesus, makapagibturtayo buyogen ti natalna ken naragsak a puso. Apay? Gapu ta ipangpangagtayo ti naimpadtuan a sao ti Dios ken adda pammatitayo kadagiti inkarina a mapasamak iti masanguanan. Ammotayo nga addatayon iti wangawangan ti kasayaatan kadagiti panawen agsipud ta adayon ti nagtengtayo iti “panawen ti panungpalan”! (Daniel 12:4, NW) Mapaspasaran ti lubong ti nakas-ang a kasasaad a naipadto iti Isaias 60:2: “Adtoy, ti kinasipnget abungotanna ti daga, ket ti napuskol a kinasipnget kadagiti il-ili.” Kasano a mabirokan ti asinoman ti dalanna iti daytoy a kasipngetan? Masapul a sipapakumbaba nga ipangagna itan ti naimpadtuan a sao ti Dios, sakbay a naladaw unayen. Nasken nga agpannuray dagiti nasingpet panagpuspusona a tattao ken Jehova a Dios, ti Ubbog ti biag ken lawag. (Salmo 36:9; Aramid 17:28) Babaen laeng ti panangaramidna iti dayta a malawlawagan ti maysa a tao ken manamnamana ti agbiag iti nakaskasdaaw a masanguanan a pinanggep ti Dios agpaay iti natulnog a sangatauan.—Apocalipsis 21:1-5.
“Ti Silaw Immay iti Lubong”
14. Ania ti masapul nga aramidentayo tapno mapasarantayo ti kaitungpalan dagiti nakaskasdaaw a padto ti Biblia?
14 Nalawag nga ipakita ti Kasuratan nga agturturayen kas Ari ni Jesu-Kristo. Gapu ta nagturayen idi 1914, agur-uray a matungpal dagiti nakaskasdaaw a padto. Tapno mapasarantayo ti kaitungpalanda, masapul nga agbalintayo a naemma ken ipakitatayo ti pammatitayo ken Jesu-Kristo, a pagbabawyantayo dagiti dakes nga aramid ken basol a naaramidtayo gapu iti kinaawan pannakaammo. Siempre, dagidiay agayat iti sipnget saanda a magun-od ti biag nga agnanayon. Kinuna ni Jesus: “Daytoy ti pakaibatayan ti pannakaukom, a ti silaw immay iti lubong ngem dagiti tattao inayatda ti sipnget imbes a ti lawag, ta nadangkes dagiti aramidda. Ta ti mangyugali kadagiti nakadakdakes a bambanag guraenna ti lawag ket saan nga umay iti lawag, tapno di matubngar dagiti aramidna. Ngem ti mangaramid iti pudno umay iti lawag, tapno dagiti aramidna maiparangarangda kas naaramid a maitunos iti Dios.”—Juan 3:19-21.
15. Ania ti mapasamak no ditay ikankano ti pannakaisalakan nga impaay ti Dios babaen ti Anakna?
15 Dimteng ti naespirituan a lawag iti lubong babaen ken Jesus, ket nasken ti panagimdeng kenkuana. Insurat ni Pablo: “Ti Dios, nga iti nabayagen a tiempo nagsao kadagiti ammatayo iti adu a paspasamak ken iti adu a pamay-an babaen kadagiti mammadto, nagsao kadatayo iti pagnguduan dagitoy nga aldaw babaen ti maysa nga Anak, a dinutokanna nga agtawid iti isuamin a bambanag.” (Hebreo 1:1, 2) Ania ti mapasamak no ditay ikankano ti pannakaisalakan nga impaay ti Dios babaen ti Anakna? Intuloy a kinuna ni Pablo: “No ti sao a naisao babaen kadagiti anghel napaneknekan a natibker, ket ti tunggal salungasing ken nasukir a tignay umawat iti supapak a dusa maitunos iti kinahustisia; kasanonto ti panaglisitayo no liniwayantayo ti pannakaisalakan a kasta ti kinadakkelna idinto ta nangrugi a maisao babaen ken Apotayo ken pinatalgedan kadatayo dagidiay nakangngeg kenkuana, bayat a ti Dios nakikadua iti panangsaksi babaen kadagiti pagilasinan ken kasta met kadagiti tanda ken kadagiti nadumaduma a mannakabalin nga ar-aramid ken babaen kadagiti pannakaibunong ti nasantuan nga espiritu sigun iti pagayatanna?” (Hebreo 2:2-4) Wen, ni Jesus ti nakaisentruan ti naimpadtuan a sao a maiwarwaragawag.—Apocalipsis 19:10.
16. Apay a naan-anay a makapagtalektayo iti amin a padto ni Jehova a Dios?
16 Kas nadakamaten, kinuna ni Pedro: “Awan ti padto ti Kasuratan nga agtaud iti aniaman a kabukbukodan a panangipaulog.” Awan ti pudno a padto nga agtaud iti nakem ti tao, ngem naan-anay a makapagtalektayo iti amin a padto ti Dios. Ni Jehova a Dios a mismo ti nagtaudan dagitoy. Babaen ti nasantuan nga espiritu, impaawatna kadagiti adipenna no kasano a matungtungpal dagiti padto ti Biblia. Wen, agyamantayo ken Jehova ta maim-imatangantayon ti kaitungpalan ti adu kadagita a padto sipud pay idi tawen 1914. Ken masiguradotayo a matungpalto a di bumurong amin dagiti dadduma pay a padto maipapan iti panungpalan daytoy dakes a sistema ti bambanag. Nasken nga agtultuloy nga ipangagtayo dagiti nadibinuan a padto bayat nga isilsilnagtayo ti lawagtayo. (Mateo 5:16) Anian a yamantayo ta ni Jehova ‘pinagtangkayagna kadatayo ti lawag iti kasipngetan’ a nangbungon iti daga iti kaaldawantayo!—Isaias 58:10.
17. Apay a kasapulantayo ti naespirituan a lawag nga aggapu iti Dios?
17 Makakitatayo gapu iti pisikal a lawag. Dayta met ti mangpatubo kadagiti mula a mangted kadatayo iti nagduduma a taraon. Saantayo nga agbiag no awan ti pisikal a lawag. Ti ngay naespirituan a lawag? Dayta ti mangiwanwan kadatayo ken mangipakita no ania ti mapasamak iti masanguanan kas naipadto iti Sao ti Dios, ti Biblia. (Salmo 119:105) Ni Jehova a Dios siaayat nga ‘ibabaonna ti silaw ken kinapudnona.’ (Salmo 43:3) Rumbeng nga ipategtayo unay dagiti kasta a probision. Ikagumaantay ngarud nga agsepen ti lawag ti “nadayag a pannakaammo ti Dios” tapno lawaganna ti piguratibo a pusotayo.—2 Corinto 4:6; Efeso 1:18.
18. Ania ti nakasagana nga aramiden itan ti Baggak ni Jehova?
18 Pudno a naparaburantayo ta ammotayo nga idi 1914, limgak ti Baggak a ni Jesu-Kristo iti intero nga uniberso ken tungtungpalennan ti kaipapanan ti sirmata maipapan iti panagbalbaliw ti langana! Addan ti Baggak ni Jehova, a nakasagana a mangibanag iti panggep ti Dios kas kanayonan a kaitungpalan ti kaipapanan ti panagbalbaliw ti langana—ti “gubat ti naindaklan nga aldaw ti Dios a Mannakabalin-amin.” (Apocalipsis 16:14, 16) No naglabasen daytoy daan a sistema, tungpalenton ni Jehova ti karina maipapan iti “baro a langlangit ken maysa a baro a daga” nga iti dayta maidaydayawtayo iti agnanayon kas Soberano nga Apo ti uniberso ken Dios ti pudno a padto. (2 Pedro 3:13) Agingga iti dayta a naindaklan nga aldaw, itultuloytayo ti magna iti nadibinuan a lawag babaen ti panangipangag iti naimpadtuan a sao ti Dios.
Kasanoyo a Sungbatan?
• Kasanoyo a deskribiren ti panagbalbaliw ti langa ni Jesus?
• Kasano a ti panagbalbaliw ti langa ni Jesus pabilgenna ti pammati?
• Asino wenno ania ti Baggak ni Jehova, ket kaano a limgak?
• Apay a rumbeng nga ipangagtayo ti naimpadtuan a sao ti Dios?
[Ladawan iti panid 13]
Mailawlawagyo kadi ti kaipapanan ti panagbalbaliw ti langa ni Jesus?
[Ladawan iti panid 15]
Limgaken ti Baggak. Ammoyo kadi no kasano ken kaano?