Pakagun-odanyo iti Nasayaat a Balakad?

Nagbalinen ti “industria ti balakad” a panguartaan iti binilion a doliar kada tawen. Kayat dagiti tattao ti agpatulong. Napaliiw ni Heinz Lehmann, eksperto mainaig iti kinalimbong ti panunot: “[Iti kagimongan ita] adda dagiti parikut iti edukasion ken iti relasion ti tattao. Nagbaliwen dagiti narelihiosuan a prinsipio. Saanen a natalged dagiti pamilia . . . , ket iti kasta agallaalla ti tattao.” Kuna ti autor a ni Eric Maisel: “Kas solusion, agpannuray itan kadagiti libro a mangipapaay iti balakad dagidiay dati nga agpatpatulong iti erbolario, pastor, wenno doktor ti pamilia no adda idi dagiti mental, espiritual, ken pisikal a parikutda.”

NANGBUANGAY ti American Psychological Association iti grupo a mangsukimat iti daytoy rumangrang-ay nga industria. Kinunada a nupay “dakkel ti namnama a matulongan ti tattao a mangtarus iti bagida ken iti dadduma . . . , kumarkaro dagiti nalabes ken naaliug a kari ken titulo dagitoy a programa.” Kuna ti maysa a mannurat iti Toronto Star: “Siputanyo ti kaadu dagiti palso nga organisasion mainaig iti relihion ken espiritualidad. . . . Agannadkayo nangnangruna iti amin a libro a mangipapaay iti balakad, tape wenno seminar a mangipanamnama iti nalabes, nupay agkalikagum la iti bassit a tiempo, pigsa wenno disiplina iti bagi.” Pudno, adu ti napaypayso nga agtarigagay a tumulong kadagiti agkasapulan. Nupay kasta, makapaladingit ta adda dagiti rinuker a tattao a manggunggundaway iti kinaliday ken panagsagaba ti padada a tao. Saanda a makaipaay kadagiti pudpudno a tulong wenno solusion.

Gapu iti daytoy, ania ti maysa a kangrunaan a gubuayan ti tulong a mapangnamnamaantayo? Pakasarakantayo iti praktikal a balakad a kanayon nga epektibo?

Gubuayan ti Mapangnamnamaan a Giya

Kinuna ni Henry Ward Beecher, maysa nga Americano a manangaskasaba idi maika-19 a siglo: “Ti Biblia ti impaay ti Dios a mangiturong kenka, tapno dika lumned iti tukok ti taaw, ken mangisuro kenka iti yan ti sangladan, ken no kasanoka a makadanon sadiay a di maisadsad iti katangriban wenno kadaratan.” Maysa met a tao ti nagkuna maipapan iti Biblia: “Kanayon a bumagay ti Kasuratan kadatay amin; mayataday daytoy a libro iti panagbaliw ti tiempotayo.” Apay a nasken nga ipasnekyo nga usigen daytoy a gubuayan?

Iti rekomendasionna met laeng, kuna ti Biblia: “Amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg, tapno ti tao ti Dios naan-anay koma a makabael, naan-anay a nakabalan maipaay iti tunggal naimbag nga aramid.” (2 Timoteo 3:16, 17) Namunganay dagiti linaon ti Biblia manipud iti Gubuayan ti biag, ni Jehova a Dios. (Salmo 36:9) Iti kasta, pagaammona unay ti pannakasukogtayo, kas ipalagip kadatayo ti Salmo 103:14: “Ammona ti pannakasukogtayo; isu malagipna a datayo tapuktayo.” Naan-anay ngarud a mapangnamnamaantayo ti linaon ti Biblia.

Kinapudnona, naglaon ti Biblia iti nakaad-adu a prinsipio ken giya a makagunggona no mayaplikar iti aniaman a kasasaad a pakaipasanguantayo. Babaen iti dayta a kunaen ti Dios kadatayo: “Isu daytoy ti dalan, magnakayo kenkuana.” (Isaias 30:21) Talaga kadi a maipaay ti Biblia dagiti kasapulan ti tattao ita? Kitaentayo.

Maipaay ti Biblia Dagiti Kasapulantayo . . .

A Mangdaer Kadagiti Pakaringgoran. Kuna ti Biblia kadatayo: “Dikay maringgoran iti aniaman, no di ket iti amin a banag babaen ti kararag ken araraw agraman panagyaman maipakaammo koma dagiti dawdawatyo iti Dios; ket ti talna ti Dios a mangringbaw iti amin a panunot aywanannanto dagiti pusoyo ken dagiti pannakabalin ti isipyo babaen ken Kristo Jesus.” (Filipos 4:6, 7) Pudno kadi a makatulong ti kararag iti panangdaer kadagiti emosional a pakaringgoran mainaig iti rigat ti biag, seksual ken berbal a pannakaabuso, wenno ipupusay ti maysa nga ay-ayaten? Usigenyo ti sumaganad a kapadasan.

Kuna ni Jackie, kalpasan a naammuanna ti seksual a pannakaabuso ti anakna a babai: “Narigat nga iyebkas ti pannakakonsiensia no saanmo a nasaluadan ti anakmo. Masapul a paksiatek ti marikriknak a gura, sakit ti nakem, ken pungtot. Nangrugi a dadaelen dagitoy a rikna ti biagko. Kasapulak unay ni Jehova a mangsaluad iti pusok.” Kalpasan nga inulit-ulitna a binasa ti Filipos 4:6, 7, inkarigatanna nga inyaplikar ti linaon dayta a balakad. “Inaldaw nga agkararagak, a naynay nga idawatko a didak koma lapunosen dagiti negatibo a rikna, ket tinulongannak ni Jehova a mangpatanor iti nasimbeng ken naragsak a puso. Natalnan ti biagko,” kuna ni Jackie.

Mabalin met a maipasangokayo ti kasasaad a di magawidan wenno di madaeran ket agresulta kadagiti emosional a pannakaringgor. Babaen ti panangipangag iti balakad ti Biblia nga agkararag, mabalinyo ti makalung-aw. Paregtaennatay ti salmista kadagitoy a sasao: “Ikumitmo ti dalanmo ken Jehova; agtalekka met kenkuana; ket isu ibanagnanto.”​—Salmo 37:5.

A Pammaregta. Inyebkas ti salmista ti apresasionna: “Jehova, ayatek ti pagnaedan a balaymo, ken ti yan a pagnaedan ti gloriam. Ti sakak agtakder iti nasimpa a disso: kadagiti gimgimong idaydayawkonto ni Jehova.” (Salmo 26:8, 12) Iparegta ti Biblia a regular koma nga agtataripnongtayo tapno agdayaw ken Jehova. Kasano a punnuan daytoy a timpuyog dagiti kasapulanyo? Ania ti nagun-od ti dadduma?

Kuna ni Becky: “Saan nga agserserbi ken Jehova dagiti dadakkelko, isu a busorenda ti aniaman a panagreggetko mainaig iti panagserbik iti Dios. Masapul a talaga nga ikarigatak ti makigimong.” Narikna ni Becky ti adu a bendision gapu ta nagporsegi a tumabuno a regular kadagiti Nakristianuan a gimong. “Pabilgen dagiti gimong ti pammatik, tapno maanusak dagiti inaldaw a pakarigatan kas maysa nga estudiante, anak, ken adipen ni Jehova. Naiduma ti tattao idiay Kingdom Hall kadagiti estudiante idiay eskuelaan! Manangipateg ken tumulongda, ket kanayon a makapabileg dagiti saritaanmi. Pudnoda a gagayyem.”

Wen, babaen ti panagtulnog iti balakad ti Biblia a regular nga agtataripnong, ipaay ni Jehova ti kasapulantayo a pammaregta. Ditoy a mariknatayo ti kinapudno dagiti sasao ti salmista: “Ti Dios isu ti kamang ken bilegtayo, sisisibay unay a saranay iti panagdukot.”​—Salmo 46:1.

Agpaay iti Makapnek ken Makagunggona a Trabaho. Ibalakad ti Biblia: “Agbalinkayo a natibker, di magaraw, a kankanayon nga aduankayo ti aramiden iti trabaho ti Apo, nga ammoyo a ti panagbannogyo saan nga ubbaw mainaig iti Apo.” (1 Corinto 15:58) Pudno met laeng aya a makapnek ti “trabaho ti Apo”? Adda kadi makagunggona a maibanag ti Nakristianuan a ministerio?

Inyebkas ni Amelia no ania ti marikriknana: “Inyadalak iti Biblia ti agassawa a dandani agsina. Natulongak met ti maysa nga ina a ti anakna a babai ket siraranggas a napapatay. Maburiboran daytoy nga ina ta dina masierto ti kasasaad ti natay. Kadagitoy dua a kaso, naaddaan iti talna ken namnama ti biagda ta inyaplikarda dagiti prinsipio ti Biblia. Kasta unay ti ragsak ken pannakapnekko ta nakatulongak kadakuada.” Kuna ni Scott: “Saritaemto iti sumaruno a tawtawen no nasayaat ti kapadasam iti tay-ak ti ministerio, nakaipasdekka iti baro a panagadal iti Biblia, wenno adda nasayaat a resulta ti di pormal a panangasabam. Dinto agbaliw ti rikna ken gagarmo kas idi damo tunggal dakamatem dagita! Ti ministerio ti gubuayan ti kadakkelan ken manayon a rag-o.”

Nabatad a tinagiragsak dagitoy a tattao ti makapnek ken makagunggona a trabaho gapu ta tinungpalda ti balakad ti Biblia a masapul nga agbalin nga aktibo a ministro. Maawiskayo met a makiraman iti daytoy a trabaho a panangisuro iti sabsabali maipapan kadagiti pagalagadan ken prinsipio ti Dios, a pagimbaganyo met laeng.​—Isaias 48:17; Mateo 28:19, 20.

Magunggonaan iti Sao ti Dios

Awan duadua, ti Biblia ket mapangnamnamaan a gubuayan ti epektibo a panangiwanwan iti agdama a lubong. Tapno magunggonaan iti dayta, masapultayo ti agtultuloy a panagporsegi. Masapul a regular a basaen, adalen, ken utobentayo dayta. Imbalakad ni Pablo: “Utobem dagitoy a bambanag; maipamaysaka kadakuada, tapno ti panagrang-aymo maiparangarang iti isuamin a tattao.” (1 Timoteo 4:15; Deuteronomio 11:18-21) Ipanamnama ti Dios a no ikagumaanyo nga iyaplikar ti balakad a masarakan iti Biblia, agballigikayo. Inkarina: “Agtalekka ken Jehova . . . Kadagiti amin a dalanmo isu ti bigbigem, ket isu iturongnanto dagiti desdesmo.”​—Proverbio 3:5, 6.

[Dagiti Ladawan iti panid 31]

Ti panangipangag iti balakad ti Biblia pagbalinenna a makapnek ken naragsak ti biag