Apay a Parmekenyo ti Perpeksionismo?
Ar-aramidenyo kadi a kanayon ti amin a kabaelanyo? No kasta, makagunggona dayta kadakayo ken iti sabsabali. Iti sabali a bangir, nalabes unay ti dadduma ket nagbalinda a perpeksionista. Ania ti ipasimudaag dayta?
BUENO, naipaulog ti sao a “perpeksionismo” kas “ti pagannayasan a mangbabalaw iti aniaman a saan a perpekto.” Nalabit addada am-ammoyo a kasta ti ugalida. Ti nalabes a panangnamnamada iti sabsabali ket mabalin nga agbanag iti adu a parikut, a mangpataud iti pannakadismaya ken pannakaupay. Ammo dagiti natimbeng a tattao a saan a makaay-ayo ti panagbalin a perpeksionista wenno ti nalabes ken di nainkalintegan a panangnamnama iti amin a banag iti panagbiag. Masapul a maparmek dayta. Ngem no maipapan iti bukodtayo a kababalin wenno galad, nalabit a narigat a mailasin ti kasta nga ugali a kinaperpeksionista, isut’ gapuna a maysa a karit ti panangparmek iti dayta.
Adu ti responsabilidad ken agsusukot dagiti parikut ni Nelson. Kanayon a tingitingenna ti estadistika, ket produksion ti prioridadna. Iti negosio a napigsa ti kompetensia, gagangay nga adda dagiti mangipagarup a nasken ti perpeksionismo tapno agballigida. Nupay nalabit apresiaren dagiti dadduma ti kinaepisiente ni Nelson, ti kinaperpeksionistana ti pakaigapuan dagiti pisikal a parikut a kas iti panagsaksakit ti ulo ken panagsiksikorna. Kaslakayo kadi ken ni Nelson?
Apektado met dagiti agtutubo iti perpeksionismo. Idi ubing pay, nagaget nga ageskuela ni Rita a taga Rio de Janeiro. Nagpammarang a saan nga ambisiosa, ngem nasakit ti nakemna no dina magun-od ti kangatuan a marka. Kuna ni Rita: “Manipud pay kinaubingko, idildiligko ti bagik kadagiti dadduma. Nawayada idinto ta kanayon a maringgoranak a mangikamakam kadagiti bambanag. Kasla awan payen panawenko nga aginana gapu iti pannakakumikomko.”
Idi ubing pay ni Maria, agsangit no saan a kas kadagiti sabali nga ubbing ti kalaingna nga agdrowing. Malaksid iti dayta, gapu ta dina kayat ti agkamali iti musika, kanayon a maringgoran ken aburido imbes koma a maragsakan nga agtokar wenno agkanta. Adda maysa pay nga ubing a taga Brazil nga agnagan Tânia a nupay inkagumaanna ti agbalin a naannad ken di makiinnartap, inaminna a nakangatngato pay la dagiti pagalagadanna, idiay man eskuelaan wenno idiay balayda. Impapanna a di unay maay-ayo dagiti tattao kenkuana no saan a perpekto ti magapuananna. Maysa pay, no dadduma nalabes ti namnamaen ni Tânia iti sabsabali, isut’ gapuna a maupay ken maladingitan.
Nupay napateg ti kinasigo, kinagaget, ken pannakapnek, dagiti negatibo a rikrikna, kas iti panagbuteng a mapaay, ket mabalin a bunga ti panangituyang kadagiti kalat a di maragpat. Nalabit namnamaen dagiti nagannak wenno dagiti sabsabali ti perpeksionismo kadagiti agtutubo nga estudiante ken atleta a narigatda a maragpat. Kas pagarigan, nangato ti arapaap ti maysa nga ina para iti anakna a ni Ricardo. Kayatna nga agbalinto a doktor, agtokar iti piano, ken makasao iti adu a lenguahe. Maawatanyo kadi a daytoy a nalabes a panangnamnama ket agbanag iti parikut ken pannakaupay?
Apay a Liklikanyo ti Panagbalin a Perpeksionista?
Sapsapulen ti kaaduan ti nangato ti kalidadna a trabaho a makapasa kadagiti nainget a pagrukodan ti kinaumiso ken kinasigo. Gapuna, masapul a makisalisal dagiti tattao iti negosio. Ti buteng a mapukawan iti panggedan ti maysa pay a mangpaagawa unay kadagiti tattao. Adda dagiti trabahador a kasda la iti atleta nga agsakripisio iti kasta unay tapno makaaramid iti baro a rekord. Ket no maipasango iti nainget a kompetision, madagdag nga ad-adda pay nga agensayo. Nalabit agtomar pay iti agas a pangpapigsa ket namnamaenna a mangabak. Imbes a mapnekda iti nasayaat a panangikagumaanda a maragpat ti kasayaatan a magapuananda, ti panagbalin a perpeksionista ti rason a dagiti tattao “magutugotda gapu iti buteng a mapaay” wenno “madagdagda nga agbalin a numero uno.”—The Feeling Good Handbook.
Pudno a pagarupen ti dadduma a kanayon a maparang-ayda ti gapuananda iti arte wenno isports. Ngem sigun ken Dr. Robert S. Eliot, “ti perpeksionismo ket inanama a dinto pulos pumudno.” Intuloyna: “Ramanen dayta ti pannakakonsiensia, panagpambar, ken ti panagamak a mauyaw.” No kasta, pudno unay ti sasao ni Ari Solomon: “Idin nakitak amin nga aramid ken tunggal napnuan-laing nga aramid, a gapu itoy, ti tao inaguman ti kaarrubana. Daytoy met isu ti kinaubbaw ken maysa a panagagawa iti angin.”—Eclesiastes 4:4.
Ania ti mabalinyo nga aramiden no perpeksionistakayo? Pudno aya a no ad-adda nga agreggetkayo ad-adda met a maupaykayo? Kayatyo kadi ti saan unay a mangnamnama ken saan unay a nainget? Ania ti kaipapanan ti panagbalin a perpekto? Tarigagayanyo kadi nga aramiden ti amin a kabaelanyo ket liklikanyo ti perpeksionismo? No mausar dagiti imperpekto a tattao dagiti inted ti Dios a sagudayda tapno maadalda dagiti bambanag a pagimbagan ti sabsabali, panunotenyo laengen ti magapuanan ti sangatauan iti sidong ti perpekto a kasasaad ken panangiwanwan ti Dios!
[Ladawan iti panid 4]
Nalabit kalikaguman ti nagannak wenno dagiti dadduma ti perpeksionismo a di maragpat dagiti agtutubo