Dagiti Nasayaat nga Ulidan​—Makasursurokayo Met Laeng Kadi Kadakuada?

“NAGBALINKAYO a pagulidanan dagiti isuamin a manamati idiay Macedonia ken idiay Acaya.” Kasta ti insurat ni apostol Pablo kadagiti matalek a Kristiano nga agnanaed iti Tesalonica. Pudno a makomendaran ti ulidan nga impakitada kadagiti kapammatianda. Ngem tultuladen la dagiti taga Tesalonica ti ulidan ni Pablo ken dagiti kakaduana. Kinuna ni Pablo: “Ti naimbag a damag nga ikaskasabami saan a dimteng kadakayo buyogen ti sasao laeng no di ket kasta met a buyogen ti pannakabalin ken buyogen ti nasantuan nga espiritu ken nabileg a panamati, kas iti pagaammoyo no ania a kita ti tattao ti nagbalinanmi kadakayo maigapu kadakayo; ket nagbalinkayo a tumutulad kadakami.”​—1 Tesalonica 1:5-7.

Wen, saan la a nagsermon ni Pablo. Nagserbi nga inspirasion ti mismo a biagna​—maysa nga ulidan iti pammati, panagibtur, ken panagsakripisio. Gapu iti daytoy, nagbalin ni Pablo ken ti kakaduana a nabileg nga impluensia iti biag dagiti taga Tesalonica, a nangtignay kadakuada a mangawat iti kinapudno “iti sidong ti adu a rigat.” Ngem saan la a da Pablo ken dagiti katrabahuanna ti nagbalin nga inspirasion dagidi a manamati. Makapabileg met ti ulidan dagiti dadduma a nagibtur iti pakarigatan. Insurat ni Pablo kadagiti taga Tesalonica: “Nagbalinkayo a tumutulad, kakabsat, kadagiti kongregasion ti Dios nga adda idiay Judea a naikaykaysa ken Kristo Jesus, agsipud ta nangrugikayo met nga agsagaba iti im-ima dagiti mismo a kailianyo iti isu met laeng a bambanag a kas iti sagsagabaenda met iti im-ima dagiti Judio.”​—1 Tesalonica 2:14.

Ni Kristo Jesus​—Ti Kangrunaan nga Ulidan

Nupay nangipakita ni Pablo iti ulidan a maikari a tuladen, ni Jesu-Kristo ti dinakamatna a kangrunaan nga ulidan a rumbeng a suroten dagiti Kristiano. (1 Tesalonica 1:6) Ni Kristo ti kangrunaan nga Ulidantayo idi ken ita. Insurat ni apostol Pedro: “Naayabankayo iti daytoy a kurso, agsipud ta uray ni Kristo nagsagaba a maipaay kadakayo, a nangibati kadakayo iti maysa a pagwadan tapno surotenyo a sisisinged dagiti addangna.”​—1 Pedro 2:21.

Nupay kasta, natay ni Jesus kas tao agarup 2,000 a tawenen ti naglabas. “Agnanaed [itan] iti di maasitgan a lawag” kas imortal nga espiritu a parsua. Iti kasta, “awan maysa kadagiti tattao ti nakakita wenno mabalin a makakita” kenkuana. (1 Timoteo 6:16) Kasanotay ngarud a matulad ni Jesus? Maysa a pamay-an isu ti panangadal kadagiti uppat a salaysay ti Biblia maipapan iti biagna. Mangipaay dagiti Ebanghelio iti naun-uneg a pannakaawat iti personalidad, kabibiag, ken “kababalin ti isip[na].” (Filipos 2:5-8) Magun-od ti kanayonan nga impormasion no adalenyo a naimbag ti libro a Ti Katan-okan a Tao a Nagbiag Pay Laeng, a detalyado a mangisalaysay kadagiti pasamak iti biag ni Jesus sigun iti panagsasaganadna.a

Dakkel ti epektona ken apostol Pablo ti kinamanagsakripisio ni Jesus. Kinunana kadagiti Kristiano a taga Corinto: “Iti biangko siraragsakakto unay a mangbusbos ken naan-anay a mabusbos maipaay kadagiti kararuayo.” (2 Corinto 12:15) Anian a kababalin a kas ken Kristo! Bayat nga ut-utobentayo ti perpekto nga ulidan ni Kristo, matignaytayo met koma a mangtulad kenkuana iti mismo a biagtayo.

Kas pagarigan, insuro ni Jesus a rumbeng nga agtalektayo iti kari ti Dios nga ipaayna ti material a kasapulantayo. Ngem saan la a dayta ti inaramidna. Inaldaw nga imparangarangna ti kasta a panagtalek ken kompiansa ken ni Jehova. Kinunana: “Dagiti sora addaanda kadagiti rukib ket dagiti tumatayab iti langit addaanda kadagiti pagaponan, ngem ti Anak ti tao awan lugar a pangisaadanna ti ulona.” (Mateo 6:25; 8:20) Dagiti kadi material a banag ti kangrunaan a pampanunoten ken pakakumikomanyo? Wenno ipakpakita kadi ti panagbiagyo a birbirokenyo nga umuna ti Pagarian? Komusta met ngay ti panangmatmatyo iti panagserbi ken Jehova? Kas kadi iti panangmatmat ti Ulidantayo, ni Jesus? Ipakita ti Biblia a saan a basta insuro ni Jesus ti panagbalin a naregta no di ket imparangarangna ti nasged a kinaregta iti adu a gundaway. (Juan 2:14-17) Kanayonanna, anian a nagsayaat nga ulidan ti impakita ni Jesus no maipapan iti ayat! Insakripisiona ti mismo a biagna agpaay kadagiti adalanna! (Juan 15:13) Tultuladenyo met la kadi ni Jesus babaen ti panagayatyo kadagiti Kristiano a kakabsatyo? Wenno palubosanyo kadi a malapdan ti ayatyo iti dadduma gapu kadagiti pagkuranganda?

Nupay ikarkarigatantayo a suroten ti ulidan ni Kristo, masansan nga agkamalitayo. Ngem sigurado a maay-ayo ni Jehova no ikagkagumaantayo nga ‘ikawes ni Apo Jesu-Kristo.’​—Roma 13:14.

“Pagulidanan ti Arban”

Adda kadi dagiti mabalin ita a pagulidanantayo iti kongregasion? Adda a talaga! Dagiti nadutokan a kakabsat a lallaki nga addaan ti annongen ti nangnangruna a masapul a mangipakita iti ulidan. Kinuna ni Pablo ken Tito, a nagserbi kadagiti kongregasion idiay Creta ken nangdutok kadagiti manangaywan, a tunggal nadutokan a panglakayen masapul a “lalaki a siwayawaya manipud pammabasol.” (Tito 1:5, 6) Imbalakad met ni apostol Pedro “kadagiti lallakay” nga agbalinda a “pagulidanan ti arban.” (1 Pedro 5:1-3) Dagiti met ngay agserserbi kas ministerial nga adipen? Masapul met a “lallaki[da] nga agserbi iti nasayaat a pamay-an.”​—1 Timoteo 3:13.

Siempre, saan a realistiko a namnamaen a tunggal panglakayen wenno ministerial nga adipen ket nalaing iti amin a benneg ti Nakristianuan a ministerio. Kinuna ni Pablo kadagiti Kristiano idiay Roma: “Addaantayo kadagiti sagut nga agduduma sigun iti di kaikarian a kinamanangaasi a naited kadatayo.” (Roma 12:6) Nadumaduma ti paglaingan dagiti kakabsat. Saan a nainkalintegan a namnamaen nga awan pagkamalian ti panagtigtignay ken panagsasao dagiti panglakayen. Kuna ti Biblia iti Santiago 3:2: “Maitibkoltayo amin iti adu a daras. No ti asinoman saan a maitibkol iti sao, daytoy a maysa ket perpekto a tao, kabaelanna met a ngedngedan ti intero a bagina.” Ngem nupay imperpektoda, mabalinan latta dagiti panglakayen, kas ken Timoteo, ti ‘agbalin a pagulidanan kadagiti matalek iti panagsao, iti kababalin, iti ayat, iti pammati, iti kinadalus.’ (I Timoteo 4:12) No kasta ti aramiden dagiti panglakayen, situtulok dagiti kameng ti arban a mangyaplikar iti balakad ti Hebreo 13:7: “Lagipenyo dagidiay mangidadaulo kadakayo, . . . ket bayat nga ut-utobenyo ti pagbanagan ti kababalinda tuladenyo ti pammatida.”

Dadduma Pay a Moderno-Aldaw a Pagulidanan

Kadagiti kallabes a dekada, adu pay dagiti nangipakita iti nasayaat nga ulidan. Dagiti ngay rinibu nga agsaksakripisio a misionero a “nangpanaw kadagiti balbalay wenno kakabsat a lallaki wenno kakabsat a babbai wenno ama wenno ina wenno annak wenno dagdaga” tapno itungpalda ti Nakristianuan nga annongen iti sabali a pagilian? (Mateo 19:29) Panunotenyo met dagiti agdaldaliasat a manangaywan ken dagiti assawada, dagiti lallaki ken babbai nga agbolboluntario kadagiti opisina ti Watch Tower Society, ken dagiti payunir nga agserserbi kadagiti kongregasion. Makatukay kadi iti rikna ti dadduma dagiti kasta a pagwadan? Malagip ti Kristiano nga ebanghelisador idiay Asia ti maysa a misionero manipud iti maikawalo a klase ti Watchtower Bible School of Gilead. Kinunana a “sidadaan [daytoy matalek a misionero] a mangandur iti adu a lamok ken iti makapasikor a pudot. . . . Ad-adda pay a makaay-ayo ti abilidadna a mangasaba iti pagsasao nga Insik ken Malay nupay isut’ taga Inglatera.” Ania ngay ti bunga daytoy nagsayaat nga ulidan? Kinuna ti kabsat: “Ti kinatanang ken kompiansana ti nanggutugot kaniak tapno aramidek idi a kalat ti kinamisionero inton dumakkelak.” Saan a nakaskasdaaw a nagbalin a misionero daytoy a kabsat.

Naglaon ti Watch Tower Publications Index iti listaan ti nakaad-adu a pakasaritaan ti biag a nagparang kadagiti magasin a Pagwanawanan ken Agriingkayo! Naglaonda kadagiti kapadasan ti tattao a nangiwaksi kadagiti nailubongan a kurso ken kalat, nangparmek kadagiti pagkapuyan, nangbalbaliw iti kasta unay iti katataoda, nangtaginayon iti positibo a determinasion iti laksid ti ibubusor, ken nangiparangarang iti kinagaget, panagibtur, kinasungdo, kinapakumbaba, ken kinamanagsakripisio. Nagsurat ti maysa a managbasa maipapan kadagitoy a kapadasan: “Ad-adda a pagbalinendak a napakumbaba ken manangapresiar a Kristiano no basbasaek ti napasaran ti dadduma, ket tinulongandak a di agpannakkel wenno agimbubukodan.”

Kanayonanna, diyo liplipatan dagiti nasayaat nga ulidan iti mismo a kongregasionyo: dagiti ulo ti pamilia a kanayon a mangipapaay iti material ken naespirituan a kasapulan ti pamiliada; dagiti kabsat a babbai​—agraman dagiti agsolsolo nga inna​—a mangikagkagumaan a mangpadakkel iti ubing bayat nga aktiboda a makiramraman iti ministerio; ti lallakay ken babbaket agraman dagiti masakit nga agtultuloy a matalek iti laksid ti kumarkaro nga an-annayen ken panagkapuy ti salun-at. Saan kadi a matukay ti riknayo kadagiti kasta a pagwadan?

Agpayso, napno ti lubong iti dakes nga ehemplo. (2 Timoteo 3:13) Kaskasdi, utobenyo ti balakad ni Pablo kadagiti Kristiano nga agnanaed idiay Judea. Kalpasan nga insalaysayna dagiti mapagulidanan a kababalin ti adu a nagkauna a matalek a lallaki ken babbai, indagadag ni apostol Pablo kadakuada: “No kasta, ngarud, gapu ta addaantayo iti kastoy kadakkel nga ulep dagiti saksi a nanglikmut kadatayo, . . . buyogen ti panagibtur a tarayentayo met koma ti lumba a naikabil iti sanguanantayo, bayat a kumitatayo a sipapasnek iti Kangrunaan nga Ahente ken Manangan-anay iti pammatitayo, ni Jesus.” (Hebreo 12:1, 2) Nalikmut met ita dagiti Kristiano iti ‘dakkel nga ulep’ ti nagsasayaat a pagulidanan​—agpadpada idi ken ita. Pudno met laeng kadi a makasursurokayo kadakuada? Mabalin no determinadokayo nga agbalin “a tumutulad, saan nga iti dakes, no di ket iti naimbag.”​—3 Juan 11.

[Footnote]

[Blurb iti panid 20]

Saan a realistiko a namnamaen a tunggal panglakayen wenno ministerial nga adipen ket nalaing iti amin a benneg ti Nakristianuan a ministerio

[Dagiti Ladawan iti panid 21]

Agbalin koma a “pagulidanan ti arban” dagiti panglakayen