Pagarian ti Dios​—Baro a Turay Ditoy Daga

‘Ti pagarian . . . burakennanto ken ibusennanto amin dagitoy a pagpagarian, ket isu agtalinaedto iti agnanayon.’​—DANIEL 2:44.

1. Ania ti manamnamatayo iti Biblia?

TI Biblia ket impaltiing ti Dios nga agpaay kadagiti tattao. Insurat ni apostol Pablo: “Idi inawatyo ti sao ti Dios, a nangngegyo kadakami, inawatyo dayta, saan a kas sao dagiti tattao, no di ket, kas iti kinapudno daytoy, kas sao ti Dios.” (1 Tesalonica 2:13) Nailanad iti Biblia ti nasken a maammuantayo maipapan iti Dios: impormasion maipapan iti personalidad, pangpanggep, ken dagiti iparebbengna kadatayo. Naglaon dayta iti kasayaatan a balakad iti biag ti pamilia ken inaldaw a kondukta. Detalyado nga ipalgakna dagiti padto a natungpalen, matungtungpal, ken matungpalto pay laeng iti masanguanan. Wen, “amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg, tapno ti tao ti Dios naan-anay koma a makabael, naan-anay a nakabalan maipaay iti tunggal naimbag nga aramid.”​—2 Timoteo 3:16, 17.

2. Kasano nga impaganetget ni Jesus ti tema ti Biblia?

² Ti kapatgan iti Biblia isu ti temana: ti pannakaalangon ti kinasoberano ti Dios (ti kalinteganna nga agturay) babaen ti nailangitan a Pagarianna. Dayta ti nakaisentruan ti ministerio ni Jesus. “Rinugian ni Jesus ti nangaskasaba ket kunkunana: ‘Agbabawikayo, ta ti pagarian ti langlangit immasidegen.’” (Mateo 4:17) Impakitana no ania ti rumbeng a paset dayta iti biagtayo, nga indagadagna: “Itultuloyyo, ngarud, a sapulen nga umuna ti pagarian ken ti kinalintegna.” (Mateo 6:33) Impakitana met no kasano kapateg dayta babaen ti panangisurona kadagiti pasurotna nga ikararagda ti kastoy iti Dios: “Umay koma ti pagariam. Maaramid koma ti pagayatam, kas sadi langit, kasta met iti rabaw ti daga.”​—Mateo 6:10.

Baro a Turay Ditoy Daga

3. Apay a napateg unay kadatayo ti Pagarian ti Dios?

³ Apay a napateg unay kadagiti tattao ti Pagarian ti Dios? Agsipud ta iti saanen a mabayag, baliwannanton iti agnanayon ti turay ditoy daga. Kuna ti padto iti Daniel 2:44: “Kadagiti al-aldaw dagita nga ar-ari [nga agturturay ita ditoy daga], ti Dios ti langit mamangonto iti maysa a pagarian [maysa a gobierno idiay langit] a kaanoman dinto madadael ket ti panagturayna dinto met maited iti sabali nga ili; ngem burakennanto ken ibusennanto amin dagitoy a pagpagarian [dagiti gobierno ditoy daga], ket isu agtalinaedto iti agnanayon.” Inton agturay a naan-anay ti nailangitan a Pagarian ti Dios, saanton nga iturayan dagiti tattao ti daga iti uray kaano. Agnanayon nga awanton dagiti mamagsisina ken di makapnek a natauan a turay.

4, 5. (a) Apay a maikari unay ni Jesus nga agbalin nga Ari ti Pagarian? (b) Anianto ti aramiden ni Jesus iti asidegen a masanguanan?

⁴ Ti Kangrunaan nga Agturay iti nailangitan a Pagarian, iti sidong ti panangiturong a mismo ni Jehova, ket maikari unay​—ni Kristo Jesus. Sakbay nga immay ditoy daga, nagbiag idiay langit kas “mamangulo nga agobra,” ti umuna kadagiti amin a pinarsua ti Dios. (Proverbio 8:22-31) “Isu ti ladawan ti di makita a Dios, ti inauna kadagiti amin a parsua; agsipud ta babaen kenkuana amin a sabsabali pay a bambanag naparsuada iti langlangit ken iti rabaw ti daga.” (Colosas 1:15, 16) Ket idi imbaon ti Dios ni Jesus ditoy daga, tinungpalna ti pagayatan ti Dios iti amin a tiempo. Inibturanna dagiti nakaro unay a suot ken natay a matalek ken Amana.​—Juan 4:34; 15:10.

⁵ Gapu iti kinasungdona iti Dios uray agingga ken patay, nagunggonaan ni Jesus. Pinagungar ti Dios iti nailangitan a biag ken intedna kenkuana ti kalintegan nga agbalin nga Ari ti nailangitan a Pagarian. (Aramid 2:32-36) Kas Ari ti Pagarian, ni Kristo Jesus ti nangtedan ti Dios iti naindaklan nga annongen a mangidaulo iti linaklaksa a mannakabalin nga espiritu a parparsua a mangikkat iti natauan a turay ken amin a kinadakes ditoy daga. (Proverbio 2:21, 22; 2 Tesalonica 1:6-9; Apocalipsis 19:11-21; 20:1-3) Kalpasanna, ti nailangitan a Pagarian ti Dios iti sidong ni Kristo ti agbalinto a baro a turay, ti kakaisuna a gobierno iti intero a daga.​—Apocalipsis 11:15.

6. Ania a kita ti turay ti manamnamatayo iti Ari ti Pagarian?

⁶ Maipapan iti baro nga Agturay iti daga, kuna ti Sao ti Dios: “Isu naikkan iti panagturay, ken dayag, ken maysa a pagarian, nga amin dagiti il-ili, nasnasion, ken pagsasao agserbida koma kenkuana.” (Daniel 7:14) Gapu ta tuladento ni Jesus ti ayat ti Dios, naan-anayto ti talna ken kinaragsak iti sidong ti turayna. (Mateo 5:5; Juan 3:16; 1 Juan 4:7-10) “Ti irarang-ay ti gobiernona ken ti kappia awanto ti inggana, . . . tapno maitandudo dayta babaen ti kinahustisia ken kinalinteg.” (Isaias 9:7, Revised Standard Version) Anian a bendision ti maaddaan iti Agturay a nabuyogan iti ayat, kinahustisia, ken kinalinteg ti panagturayna! Gapuna, ipakpakauna ti 2 Pedro 3:13: “Adda baro a langlangit [ti nailangitan a Pagarian ti Dios] ken maysa a baro a daga [baro a kagimongan dagiti tattao ditoy daga] nga ur-urayentayo sigun iti karina, ket kadagitoy nga agtaeng ti kinalinteg.”

7. Kasano a matungtungpal ita ti Mateo 24:14?

⁷ Talaga a ti Pagarian ti Dios ti kasayaatan a damag para iti amin a mangipatpateg iti kinalinteg. Dayta ti gapuna a, kas paset ti pagilasinan nga agbibiagtayon iti “maudi nga al-aldaw” daytoy dakes a sistema, impadto ni Jesus: “Daytoy naimbag a damag ti pagarian maikaskasabanto iti isuamin a mapagnaedan a daga a maipaay a pangsaksi kadagiti isuamin a nasnasion; ket iti kasta umayton ti panungpalan.” (2 Timoteo 3:1-5; Mateo 24:14) Matungtungpalen dayta a padto, ta agarup innem a milion a Saksi ni Jehova iti 234 a pagilian ti mangbusbusbos iti nasurok a maysa a bilion nga oras iti kada tawen a mangipakpakaammo iti Pagarian ti Dios iti sabsabali. Maitutop a maawagan a Kingdom Hall ti tunggal maysa kadagiti lugar a pagdaydayawanda iti agarup 90,000 a kongregasion iti intero a lubong. Dita ti pakasursuruan dagiti tattao maipapan iti umay a baro a gobierno.

Dagiti Makipagturay

8, 9. (a) Sadino ti paggapuan dagiti makipagturay ken Kristo? (b) Ania ti manamnamatayo iti turay ti Ari ken dagiti makipagturay kenkuana?

⁸ Adda dagiti makipagturay ken Kristo Jesus iti nailangitan a Pagarian ti Dios. Impakpakauna ti Apocalipsis 14:1-4 a 144,000 a tattao ti ‘magatang manipud iti daga’ ken mapagungar iti nailangitan a biag. Mairaman kadagitoy dagiti lallaki ken babbai nga, imbes a paserbian, sipapakumbaba nga agserbida iti Dios ken kadagiti padada a tattao. “Isudanto dagiti papadi ti Dios ken ni Kristo, ket makipagturaydanto kenkuana kas ar-ari iti sangaribu a tawen.” (Apocalipsis 20:6) Basbassit nga amang ti bilangda ngem ti “dakkel a bunggoy, nga awan ti tao a makabael a mangbilang, manipud kadagiti isuamin a nasion ken kadagiti tribu ken kadagiti il-ili ken kadagiti pagsasao” a makalasatto iti panungpalan ti agdama a sistema. Mangipapaay met dagitoy iti “sagrado a panagserbi [iti Dios] iti aldaw ken rabii,” ngem saanda a naayaban idiay langit. (Apocalipsis 7:9, 15) Isuda ti mangbukel iti pundasion ti baro a daga kas iturayan ti nailangitan a Pagarian ti Dios.​—Salmo 37:29; Juan 10:16.

⁹ Iti panangikeddengna no siasino dagiti makipagturay ken Kristo sadi langit, pinili ni Jehova dagiti matalek a tattao a naglak-am iti nadumaduma a parikut. Napasaran met dagitoy nga ari ken papadi ti gistay amin a napasaran dagiti tattao. No kasta, ti panagbiagda ditoy daga parayrayenna ti kabaelanda a mangituray kadagiti tattao. Uray ni Jesus a mismo “nasursurona ti panagtulnog manipud kadagiti bambanag a sinagabana.” (Hebreo 5:8) Maipapan kenkuana, kinuna ni apostol Pablo: “Addaantayo kas nangato a padi, saan a ti maysa a dina mabalin ti makipagrikna kadagiti kinakapuytayo, no di ket ti maysa a nasuboken kadagiti amin a banag kas kadatayo, ngem awanan basol.” (Hebreo 4:15) Anian a makaliwliwa a maammuan nga iti nalinteg a baro a lubong ti Dios, dagiti tattao ket iturayanto dagiti naayat, mannakipagrikna nga ari ken papadi!

Paset Kadi ti Panggep ti Dios Ti Pagarian?

10. Apay a ti nailangitan a Pagarian ket saan a paset ti orihinal a panggep ti Dios?

¹⁰ Ti kadi nailangitan a Pagarian ket paset ti orihinal a panggep ti Dios idi pinarsuana da Adan ken Eva? Iti salaysay ti Genesis maipapan iti panamarsua, awan ti nadakamat a Pagarian a mangituray iti sangatauan. Ni Jehova a mismo ti Agturay kadakuada, ket no la ket ta agtulnogda kenkuana, saan a kasapulan ti aniaman a sabali a turay. Ipakita ti Genesis kapitulo 1 a nakilangen ni Jehova kada Adan ken Eva, nalabit babaen ti inauna a nailangitan nga Anakna. Inaramat ti salaysay dagiti balikas a kas iti “kinuna kadakuada ti Dios” ken “kinuna pay ti Dios” kadakuada.​—Genesis 1:28, 29, NW; Juan 1:1.

11. Ania ti perpekto a kasasaad ti sangatauan idi damo?

¹¹ Kuna ti Biblia: “Ti Dios nakitana amin nga inaramidna, ket, adtoy, nasayaatda unay.” (Genesis 1:31) Naan-anay a perpekto ti amin nga adda iti minuyongan ti Eden. Nagnaed da Adan ken Eva iti paraiso. Addaanda iti perpekto a panunot ken perpekto a bagi. Mabalinda ti makisarita iti Nangaramid kadakuada ken kasta met ti Dios kadakuada. Ket no agtalinaedda a matalek, maaddaanda kadagiti perpekto nga annak. Saan koma a kasapulan ti baro a nailangitan a gobierno.

12, 13. Bayat nga umadu ti perpekto a tattao, apay a kabaelan pay latta ti Dios ti makikomunikar kadakuada?

¹² Bayat nga umadu dagiti tattao, kasano ti pannakikomunikar ti Dios kadakuada amin? Usigenyo dagiti bituen iti langit. Nagrupogrupoda kadagiti maawagan a galaksi. Adda dagiti galaksi a naglaon iti maysa a bilion a bituen. Ti dadduma, agarup maysa a trilion. Ket sigun iti pattapatta dagiti sientista, adda agarup 100 a bilion a galaksi iti uniberso a makita ti tao! Kaskasdi, kuna ti Namarsua: “Itangadyo dagiti matayo idiay ngato, ket kitaenyo no asino ti namarsua kadagitoy, a babaen iti panangbilang isu iruarna dagiti buybuyotda; isu inagananna ida amin; gapu iti kinadakkel unay ti kinamaingelna, ken agsipud ta napigsa iti pannakabalin, awan ti agkurang uray no maysa.”​—Isaias 40:26.

¹³ Yantangay kabaelan ti Dios nga ammuen ti maipapan kadagitoy a bituen, sigurado nga ammona ti maipapan kadagiti tattao, a basbassit nga amang ti bilangda. Uray ita, minilion dagiti adipenna nga agkarkararag kenkuana iti inaldaw. Makadanon a dagus iti Dios dagita a kararag. Saan ngarud a parikut kenkuana ti pannakikomunikar kadagiti amin a perpekto a tattao. Saanna a kasapulan ti nailangitan a Pagarian tapno maasikasona amin ida. Anian a nagsayaat nga urnos​—a ni Jehova ti Agturay, a direkta a makaadani dagiti tattao kenkuana, ken maaddaan iti gundaway a di pulos matay, agbiag nga agnanayon iti paraiso a daga!

“Saan nga Agtaud iti Tao”

14. Apay nga agnanayon a kasapulan dagiti tattao ti turay ni Jehova?

¹⁴ Nupay kasta, dagiti tattao​—uray dagiti perpekto​—agnanayon a kasapulanda ti turay ni Jehova. Apay? Agsipud ta saan ida a pinarsua ni Jehova nga agbiag a sibaballigi nga awan iti sidong ti turayna. Kasapulan dayta ti sangatauan kas binigbig ni propeta Jeremias: “O Jehova, ammok a ti dalan ti tao saan nga agtaud kenkuana met laeng; saan nga agtaud iti tao a magna ti panangiturong kadagiti addangna. O Jehova, dusaennak [“ilintegnak,” NW].” (Jeremias 10:23, 24) Kinamaag iti biang dagiti tattao no ipagarupda a kabaelanda nga iturong a sibaballigi ti kagimongan uray no saan ida nga iturayan ni Jehova. Maisupadi dayta iti nakaparsuaanda. Sigurado nga agtungpal iti panagimbubukodan, gura, kinaulpit, kinaranggas, gubgubat, ken ipapatay ti di panagpaituray ken Jehova. “Ti maysa a tao addaan pannakabalin iti sabali a maipaay iti pagdaksanna.”​—Eclesiastes 8:9.

15. Ania ti nagbanagan ti di umiso a pili dagiti immuna a nagannak kadatayo?

¹⁵ Nakalkaldaang ta inkedddeng dagiti immuna a nagannak kadatayo a saanda a kasapulan ti Dios kas Agturay kadakuada, ket pinilida ti agbiag nga agbukbukod. Nagbanaganna, saanen a tinaginayon ti Dios ti kinaperpektoda. Kasda la iti alikamen a de-koriente a naisina iti gubuayan ti koriente. Isu nga idi agangay, kimmapsut agingga a natayda. Nagbalinda a kas iti adda depektona a molde, ket dayta laeng a kasasaad ti maipatawidda kadagiti kaputotanda. (Roma 5:12) “Ti Bato [ni Jehova], naan-anay ti aramidna; ta amin a dalanna kinalinteg. . . . Dakes ti inaramidda kenkuana, isuda saanna ida nga annak, dayta ti pilawda.” (Deuteronomio 32:4, 5) Pudno, da Adan ken Eva ket inimpluensiaan ti rebelde nga espiritu a parsua a nagbalin a ni Satanas, ngem addaanda idi iti perpekto a panunot ket mabalinda koma nga iwaksi dagiti dakes a singasingna.​—Genesis 3:1-19; Santiago 4:7.

16. Kasano a paneknekan ti historia ti resulta ti isisina iti Dios?

¹⁶ Adu a pasamak iti historia ti mangpaneknek iti resulta ti di panagpaituray iti Dios. Iti las-ud ti rinibu a tawen, pinadasen dagiti tattao ti amin a kita ti natauan a gobierno, amin a sistema iti ekonomia ken kagimongan. Kaskasdi, agtultuloy a ‘rumangrang-ay [ti kinadakes] manipud dakes nga agturong iti dakdakes pay.’ (2 Timoteo 3:13) Ti maika-20 a siglo paneknekanna dayta. Napno dayta iti nakaro a guranggura, kinaranggas, gubgubat, bisin, kinapanglaw, ken panagsagaba a nakarkaro ngem iti aniaman a panawen iti historia. Ket uray kasano karang-ay itan ti medisina, matayto met laeng dagiti tattao. (Eclesiastes 9:5, 10) Iti panangpadasda a mangiturong kadagiti bukodda nga addang, nagpasakup dagiti tattao ken ni Satanas ken kadagiti demoniona, isut’ gapuna nga iti Biblia maawagan ni Satanas a “ti dios daytoy a sistema ti bambanag.”​— 2 Corinto 4:4.

Ti Sagut a Nawaya a Nakem

17. Kasano ti rumbeng a panangusar iti sagut ti Dios a nawaya a nakem?

¹⁷ Apay nga impalubos ni Jehova nga agwaywayas dagiti tattao? Agsipud ta pinarsuana ida nga addaan iti naisangsangayan a sagut a nawaya a nakem, ti pannakabalin nga agpili a siwayawaya. “No sadino ti yan ti espiritu ni Jehova, adda wayawaya,” kinuna ni apostol Pablo. (2 Corinto 3:17) Awan ti mayat nga agbalin a robot, nga inaldaw a diktaran ti sabali iti amin a kanito no ania ti ibaga ken aramidenna. Ngem kayat ni Jehova nga usaren dagiti tattao dayta a sagut a nawaya a nakem iti umiso a pamay-an, tapno mabigbigda a nainsiriban ti panagtungpal iti pagayatanna ken ti agtultuloy a panagpasakup kenkuana. (Galacia 5:13) No kasta, saan a naan-anay ti wayawaya, ta agresulta dayta iti riribuk. Masapul a makontrol dayta iti las-ud ti pagbeddengan dagiti naayat a linteg ti Dios.

18. Ania ti impakita ti Dios iti panangpalubosna iti tao a mangaramat iti wayawayana nga agpili?

¹⁸ Iti panangpalubosna iti sangatauan nga agwaywayas, namimpinsan nga impakita ti Dios a kasapulantayo ti turayna. Ti wagas ti panagturayna, ti kinasoberanona, isu ti kakaisuna nga umiso a pamay-an. Mangyeg dayta iti naan-anay a ragsak, pannakapnek, ken kinarang-ay. Dinisenio ngamin ni Jehova ti panunot ken bagitayo iti wagas a maitunos kadagiti lintegna. “Siak ni Jehova a Diosmo, a mangisuro kenka a maipaay iti gunggonam, a mangiturong kenka iti dalan a papanam koma.” (Isaias 48:17) Saan a makapadagsen ti wayawaya nga agpili iti las-ud ti pagbeddengan dagiti linteg ti Dios no di ket agbanag iti makaay-ayo ken nadumaduma a kita ti taraon, pagtaengan, arte, ken musika. No umiso ti pannakaaramatna, ti nawaya a nakem nangyeg koma iti nakaskasdaaw, kankanayon a makaparagsak a biag iti paraiso a daga.

19. Ania ti usaren ti Dios a mangikappia kadagiti tattao kenkuana?

¹⁹ Ngem gapu ta di umiso ti pinilida, simmina dagiti tattao ken Jehova, nagbalinda nga imperpekto, kumapsut, ken matayda. Nasken ngarud a masubbotda iti dayta a nasaem a kasasaad ken maisubli ti umiso a relasionda iti Dios kas annakna. Ti Pagarian ti inkeddeng ti Dios a pamay-an tapno maibanag daytoy, ket ni Jesu-Kristo ti Mannubbot. (Juan 3:16) Babaen iti daytoy nga urnos, dagiti pudno nga agbabawi​—kas iti barayuboy nga anak iti pangngarig ni Jesus​—maikappiadanto iti Dios ket awatennanto ida kas annakna.​—Lucas 15:11-24; Roma 8:21; 2 Corinto 6:18.

20. Kasano nga ibanag ti Pagarian ti panggep ti Dios?

²⁰ Di bumurong a maaramidto ditoy daga ti pagayatan ni Jehova. (Isaias 14:24, 27; 55:11) Babaen ti Pagarianna iti sidong ni Kristo, naan-anay nga alangonen (ikalintegan wenno paneknekan) ti Dios ti karbenganna kas Soberanotayo. Gibusanto ti Pagarian ti turay ti tao ken dagiti demonio ditoy daga, ket daytanto laeng ti agturay manipud langit iti sangaribu a tawen. (Roma 16:20; Apocalipsis 20:1-6) Ngem iti dayta a panawen, kasanonto a maiparangarang ti kinatan-ok ti panagturay ni Jehova? Ket kalpasan ti sangaribu a tawen, anianto ti akem ti Pagarian? Mausig dagitoy a saludsod iti sumaganad nga artikulo.

Dagiti Punto a Marepaso

• Ania ti tema ti Biblia?

• Siasino ti mangbukel iti baro a turay ditoy daga?

• Apay a pulos a di agballigi ti natauan a turay a naisina iti Dios?

• Kasano ti rumbeng a panangusar iti nawaya a nakem?

[Ladawan iti panid 10]

Impaganetget ti pannursuro ni Jesus ti turay ti Dios babaen ti Pagarian

[Dagiti Ladawan iti panid 12]

Iti tunggal pagilian, ti Pagarian ti kangrunaan nga isursuro dagiti Saksi ni Jehova

[Dagiti Ladawan iti panid 14]

Paneknekan ti historia dagiti dakes a resulta ti isisina iti Dios

[Credit Lines]

Dagiti soldado idi Gubat Sangalubongan I: U.S. National Archives photo; kampo konsentrasion: Oświęcim Museum; ubing: UN PHOTO 186156/J. Isaac