Ipatpategyo Kadi Unay Dagiti Pammalagip ni Jehova?

“Ti kararuak sinalimetmetanna dagiti pammalagipmo, ket ay-ayatek ida iti kasta unay.”​—SALMO 119:167, NW.

1. Sadino ti kangrunaan a pakasarakantayo iti maulit-ulit a pannakadakamat dagiti pammalagip ni Jehova?

KAYAT ni Jehova a naragsak dagiti tattaona. Siempre, tapno masagraptayo ti pudno a kinaragsak, masapul a tungpalentayo dagiti linteg ken bilin ti Dios. Tapno maaramidtay dayta, impaayannatayo kadagiti pammalagip. Maulit-ulit a nadakamat dagitoy iti Kasuratan, nangruna iti Salmo 119, a nalabit pinutar ti agtutubo a prinsipe ti Juda a ni Ezekias. Mangrugi daytoy nagimnas a kanta kadagitoy a sasao: “Naragsak dagidiay awan pagkuranganna iti dalanda, dagidiay magmagna iti linteg ni Jehova. Naragsak dagidiay mangsalsalimetmet kadagiti pammalagipna; nga agtultuloy a mangbirok kenkuana iti amin a pusoda.”​—Salmo 119:1, 2, NW.

2. Kasano a nainaig dagiti pammalagip ti Dios iti kinaragsak?

² ‘Magnatayo iti linteg ni Jehova’ babaen ti pananggun-od iti umiso a pannakaammo iti Saona ken panagbiag a mayannurot iti dayta. Ngem gapu ta imperpektotayo, kasapulantayo dagiti pammalagip. Ti Hebreo a sao a naipatarus a “pammalagip” ipasimudaagna nga ipalagip ti Dios kadatayo ti linteg, dagiti alagaden, paglintegan, bilin, ken iparebbengna. (Mateo 10:18-20) Agtalinaedtayo a naragsak no la ket ta agtultuloy a salimetmetantayo dagita a pammalagip, ta tulongandatayo a mangliklik kadagiti naespirituan a palab-og nga agtungpal iti didigra ken ladingit.

Salimetmetanyo Dagiti Pammalagip ni Jehova

3. Maibatay iti Salmo 119:60, 61, ania ti manamnamatayo?

³ Impateg unay ti salmista dagiti pammalagip ti Dios. Inkantana: “Nagdardarasak, ket diak nagtantan a mangtungpal kadagiti bilinmo. Binarakusandak dagiti tali dagiti nadangkes. Diak linipatan ti lintegmo.” (Salmo 119:60, 61, NW) Tulongandatayo dagiti pammalagip ni Jehova a mangibtur iti pannakaidadanes gapu ta agtalektayo a kabaelan ti nailangitan nga Amatayo a pugsaten dagiti tali a panglapped kadatayo dagiti kabusor. Iti naituding a tiempo, ruk-atannatayo kadagita a tubeng tapno maikasabatayo ti Pagarian.​—Marcos 13:10.

4. Kasano ti rumbeng a panangmatmattayo kadagiti pammalagip ti Dios?

⁴ No dadduma, tubngarennatayo dagiti pammalagip ni Jehova. Kanayon nga apresiarentay koma ti kasta a pannubngar, kas iti inaramid ti salmista. Iti kararagna iti Dios, kinunana: “Dagiti pammalagipmo ti pagray-uak . . . Ay-ayatek dagiti pammalagipmo.” (Salmo 119:24, 119, NW) Ad-adu dagiti pammalagip ti Dios nga adda kadatayo ngem iti salmista. Ti ginasut a sasao a naadaw iti Hebreo a Kasuratan nga agparang iti Griego a Kasuratan ipalagipda kadatayo saan laeng a dagiti bilin ni Jehova iti ilina iti sidong ti Linteg no di pay ket dagiti panggepna maipapan iti kongregasion Kristiano. No makita ti Dios a rumbeng a palagipannatayo kadagiti banag a mainaig kadagiti lintegna, pagyamanantayo ti kasta a palagip. Ket no ‘kumpettayo kadagiti pammalagip ni Jehova,’ maliklikantayo dagiti sulisog a di makaay-ayo iti Namarsua ken mangipaidam kadatayo iti ragsak.​—Salmo 119:31.

5. Kasanotay a masursuro nga ipateg iti kasta unay dagiti pammalagip ni Jehova?

⁵ Kasano koma kadakkel ti panangipategtayo kadagiti pammalagip ni Jehova? “Ti kararuak sinalimetmetanna dagiti pammalagipmo, ket ay-ayatek ida iti kasta unay,” inkanta ti salmista. (Salmo 119:167, NW) Masursurotayo nga ipateg iti kasta unay dagiti pammalagip ni Jehova no ibilang ken awatentayo dagitoy kas pammagbaga ti maysa nga Ama a pudpudno a maseknan kadatayo. (1 Pedro 5:6, 7) Kasapulantayo dagiti pammalagipna, ket rumayray ti panangipategtayo kadagita no makitatayo ti imbag nga itdenda kadatayo.

No Apay a Kasapulantayo Dagiti Pammalagip ti Dios

6. Ania ti maysa a rason a kasapulantayo dagiti pammalagip ni Jehova, ket ania ti tumulong kadatayo a manglagip kadagitoy?

⁶ Kasapulantayo dagiti pammalagip ni Jehova gapu ta makalipattayo. Kuna ti The World Book Encyclopedia: “Kaaduanna, umadu nga umadu ti malipatan dagiti tattao iti panaglabas ti panawen. . . . No dadduma, mabalin a saanmo a matandaanan ti maysa a nagan wenno impormasion nga adda iti murdong ti dilam. . . . Pannakalipat ti awag iti kasta a temporario a panaglibtaw ti memoria a masansan a mapasamak. Inyarig dayta dagiti sientista iti panangbirok iti naiwagat a banag iti maysa a siled nga agkaiwara ti nagyanna. . . . Ti maysa a nasayaat a pamay-an tapno sigurado a malagipmonto ti maysa nga impormasion isu ti panangadal iti dayta uray no ipagarupmo a kabesadomon.” Ti naanep a panagadal ken panangulit-ulit tulongannatayo a mangpanunot kadagiti pammalagip ti Dios ken mangannurot kadagita nga agpaay iti pagimbagantayo.

7. Apay nga ad-adda a kasapulantay ita dagiti pammalagip ti Dios?

⁷ Ad-adda a kasapulantay ita dagiti pammalagip ni Jehova gapu ta nakaro unayen ti kinadakes. No ipangagtayo dagiti pammalagip ti Dios, makagun-odtayo iti pannakaawat a kasapulan tapno ditay matnag kadagiti dakes nga aramid ti lubong. “Ad-adda ti pannakaawatko ngem kadagiti amin a mannursurok,” kinuna ti salmista, “agsipud ta dagiti pammalagipmo isuda ti pakaseknak. Agtignayak a buyogen ti dakdakkel a pannakaawat ngem kadagiti lallakay, agsipud ta tinungpalko dagiti bilinmo. Tinengngelko dagiti sakak iti tunggal dakes a dana, tapno masalimetmetak ti saom.” (Salmo 119:99-101, NW) No ipangagtayo dagiti pammalagip ti Dios, maliklikantayo ti “tunggal dakes a dana” ket ditay agbalin a kas iti kaaduan a tattao, a “nasipngetan ti isipda, ken naisina manipud iti biag a kukua ti Dios.”​—Efeso 4:17-19.

8. Kasano nga ad-adda a masarangettayo dagiti pakasuotan ti pammati?

⁸ Kasapulantay met dagiti pammalagip ti Dios agsipud ta pabilgendatayo a mangibtur iti adu a suot a mapasarantayo iti daytoy “tiempo ti panungpalan.” (Daniel 12:4, NW) No awan dagita a pammalagip, agbalintayo a “mananglipat a managdengngeg.” (Santiago 1:25) Ngem ti naanep a personal ken kongregasional a panagadal iti Kasuratan iti tulong dagiti publikasion nga ipapaay ti “matalek ken masirib nga adipen” tulongannatayo a mangsaranget a sibaballigi kadagiti pakasuotan ti pammati. (Mateo 24:45-47) Matulongandatayo dagita a naespirituan a probision a mangtingiting no ania ti masapul nga aramidentayo tapno maay-ayo ni Jehova no sumangbay kadatayo dagiti narikut a kasasaad.

Ti Napateg a Paset Dagiti Gimongtayo

9. Siasino dagiti “sagut a tattao,” ken kasanoda a tultulongan dagiti kapammatianda?

⁹ Mangngegtayo met dagiti pammalagip ti Dios kadagiti Nakristianuan a gimong, a pakaadalantayo iti pannursuro babaen dagiti nadutokan a kakabsat. Insurat ni apostol Pablo nga ‘idi immuli [ni Jesus] sadi ngato impanawna dagiti nakayawan; nangted kadagiti sagut a tattao.’ Kinuna pay ni Pablo: ‘Inted [ni Kristo] ti sumagmamano kas apostol, ti sumagmamano kas mammadto, ti sumagmamano kas managebanghelio, ti sumagmamano kas papastor ken mannursuro, a maipaay iti pannakaator dagiti sasanto, maipaay iti trabaho a panagministerio, maipaay iti pannakapabileg ti bagi ni Kristo.’ (Efeso 4:8, 11, 12) Anian a yamantayo ta dagitoy a “sagut a tattao”​—dagiti nadutokan a panglakayen​—iturongda ti atensiontayo kadagiti pammalagip ni Jehova no agtataripnongtayo tapno agdayaw!

10. Ania ti kangrunaan a punto ti Hebreo 10:24, 25?

¹⁰ Ti panagyaman kadagiti probision ti Dios tignayennatayo a tumabuno kadagiti lima a gimongtayo iti kongregasion iti kada lawas. Impaganetget ni Pablo a nasken ti regular a panagtataripnong. Insuratna: “Agpipinnanunottayo koma iti maysa ken maysa tapno mangparegta iti ayat ken nasayaat nga ar-aramid, a saantay a baybay-an ti panagtataripnongtayo a sangsangkamaysa, kas iti kaugalian dagiti sumagmamano, no di ket agpipinnaregtatayo iti maysa ken maysa, ket nangnangruna a kasta bayat a makitkitayo a ti aldaw umas-asidegen.”​—Hebreo 10:24, 25.

11. Kasanotayo a mabenepisiaran iti tunggal maysa kadagiti linawas a gimongtayo?

¹¹ Apresiarenyo kadi ti maar-aramidan dagiti gimong maipaay kadatayo? Ti linawas a Panagadal iti Pagwanawanan patibkerenna ti pammatitayo, tulongannatayo a mangannurot kadagiti pammalagip ni Jehova, ken pabilgennatayo a mangsaranget iti “espiritu ti lubong.” (1 Corinto 2:12; Aramid 15:31) Iti Miting Publiko, mangidatag dagiti agpalawag iti pannursuro a naibatay iti Sao ti Dios, a pakairamanan dagiti pammalagip ni Jehova ken dagiti agkakaimbag a “sasao ti agnanayon a biag” nga insawang ni Jesus. (Juan 6:68; 7:46; Mateo 5:1–7:29) Ti Teokratiko nga Eskuelaan ti Panagministro parang-ayenna ti abilidadtayo a mangisuro. Makatulong unay ti Gimong ti Serbisio a mangpasayaat iti panangiparangtayo iti naimbag a damag iti binalaybalay, panagsarungkar, panagadal iti Biblia iti pagtaengan, ken iti dadduma pay a benneg ti ministeriotayo. Ti basbassit a grupo iti Panagadal iti Libro ti Kongregasion ipaayannatayo iti ad-adu a gundaway nga agkomento a masansan a pakairamanan dagiti pammalagip ti Dios.

12, 13. Iti maysa a pagilian ti Asia, kasano nga imparangarang dagiti adipen ti Dios ti panangipategda kadagiti Nakristianuan a gimong?

¹² Ti regular nga itatabuno kadagiti gimong ti kongregasion ipalagipna kadatayo dagiti bilin ti Dios ken tulongannatayo nga agtalinaed a natibker iti naespirituan iti baet dagiti gubat, kinarigat ti biag, ken dadduma pay a pakasuotan ti pammatitayo. Iti maysa a pagilian ti Asia, inapresiar unay ti 70 a Kristiano ti kinapateg dagiti gimong idi pinanawanda dagiti pagtaenganda ket kapilitan a nagkamangda iti kabakiran. Gapu ta determinadoda a mangitultuloy iti regular a panagtataripnongda, nagsublida iti ilida a dinidigra ti gubat, rinakrakda ti natda a paset ti Kingdom Hall, sada binangon manen iti kabakiran.

¹³ Kalpasan ti adu a tawen a panagibturda kabayatan ti gubat iti sabali pay a paset ti isu met laeng a pagilian, sireregta pay laeng nga agserserbi dagiti adipen ni Jehova. Napagsaludsodan ti maysa kadagiti panglakayen iti dayta a lugar: “Ania ti kangrunaan a nakatulong iti panagkaykaysa dagiti kakabsat?” Ti sungbatna? “Iti 19 a tawen, pulos a dikam kinanselar ti gimong. Adda dagiti tiempo a gapu iti panagbomba wenno dadduma pay a pakarigatan, saan a makapan dagiti dadduma a kakabsat iti paggigimongan, ngem ituloymi latta ti gimong.” Pudno nga apresiaren dagitoy nga ing-ingungoten a kakabsat ti kinapateg ti ‘saan a panangbaybay-a iti panagtataripnongda.’

14. Ania ti maadaltayo iti ugali ti baket a ni Ana?

¹⁴ “Saan a pulos limmanglangan idiay templo” ti 84 ti tawenna a balo a ni Ana. Iti kasta, adda ni Ana idi naipan sadiay ni maladaga a Jesus di nagbayag kalpasan ti pannakaipasngayna. (Lucas 2:36-38) Determinadokay kadi a di lumangan kadagiti gimong? Ikagkagumaanyo kadi a tabunuan ti amin a sesion dagiti asamblea ken kombensiontayo? Ti pannursuro a makagunggona iti naespirituan a magun-odtayo kadagitoy a panagtataripnong ket nalawag a pammaneknek a maseknan ti nailangitan nga Amatayo iti ilina. (Isaias 40:11) Makaparagsak met dagiti kasta nga okasion, ket ti itatabunotayo paneknekanna nga ipatpategtayo dagiti pammalagip ni Jehova.​—Nehemias 8:5-8, 12.

Naiduma Gapu Kadagiti Pammalagip ni Jehova

15, 16. Kasano a ti panangsalimetmet kadagiti pammalagip ni Jehova apektaranna ti kababalintayo?

¹⁵ Ti panangsalimetmet kadagiti pammalagip ti Dios pagbalinennatayo a naiduma iti daytoy dakes a lubong. Kas pagarigan, ti panangipangag kadagiti pammalagip ti Dios lapdannatayo nga agaramid iti seksual nga imoralidad. (Deuteronomio 5:18; Proverbio 6:29-35; Hebreo 13:4) Saantay a masulisog nga agulbod, agkusit, wenno agtakaw no tungpalentayo dagiti pammalagip ti Dios. (Exodo 20:15, 16; Levitico 19:11; Proverbio 30:7-9; Efeso 4:25, 28; Hebreo 13:18) Ti panangsalimetmet kadagiti pammalagip ni Jehova igawidnatayo met nga agibales, gumura, wenno mangpardaya iti sabali a tao.​—Levitico 19:16, 18; Salmo 15:1, 3.

¹⁶ No ipangagtayo dagiti pammalagip ti Dios, agtalinaedtayo a nasantuan, wenno naiduma, tapno makapagserbitayo kenkuana. Ket anian a nagpateg ti panagbalin a di paset daytoy a lubong! Iti kararagna ken Jehova iti maudi a rabii ti biagna ditoy daga, kastoy ti indawat ni Jesus maipuon kadagiti pasurotna: “Intedko ti saom kadakuada, ngem ti lubong ginurana ida, agsipud ta saanda a paset ti lubong, a kas kaniak a saan a paset ti lubong. Kiddawek kenka, a dika ikkaten ida iti lubong, no di ket aywanam ida gapu iti daydiay nadangkes. Saanda a paset ti lubong, a kas kaniak a saan a paset ti lubong. Santipikarem ida babaen iti kinapudno; ti saom ket kinapudno.” (Juan 17:14-17) Itultuloytayo nga ipateg ti Sao ti Dios, a mamagbalin kadatayo a maikari a mangipaay iti sagrado a panagserbi kenkuana.

17. Ania ti mapasamak no ditay ikankano dagiti pammalagip ti Dios, isu nga ania ti rumbeng nga aramidentayo?

¹⁷ Kas ad-adipen ni Jehova, kayattayo ti agtalinaed a maikari nga agserbi kenkuana. Ngem no ditay ikankano dagiti pammalagip ti Dios, mabalin a maringbawannatayo ti espiritu ti lubong, a maiparangarang iti panagsasao, literatura, paglinglingayan, ken kondukta a gagangay iti lubong. Ket sigurado a ditay kayat ti agbalin a managayat iti kuarta, napalangguad, natangsit, awanan panagyaman, saan a nasungdo, narungsot, managpannakkel, managayat iti ragragsak imbes a managayat koma iti Dios​—sumagmamano laeng dagitoy kadagiti kababalin nga iparparangarang dagidiay naisina iti Dios. (2 Timoteo 3:1-5) Yantangay agbibiagtayon iti arinunos ti maudi nga al-aldaw daytoy dakes a sistema ti bambanag, itultuloytay nga ikararag ti tulong ti Dios tapno maitultuloytayo a salimetmetan dagiti pammalagip ni Jehova ket iti kasta ‘makapagaluadtayo maitunos iti saona.’​—Salmo 119:9, NW.

18. Ti panangsalimetmet kadagiti pammalagip ti Dios tignayennatay a mangaramid kadagiti ania a positibo nga addang?

¹⁸ Saandatay la a ballaagan dagiti pammalagip ni Jehova maipapan kadagiti banag a rumbeng a ditay aramiden. Ti panangsalimetmet kadagiti pammalagipna gutugotennatayo nga agaramid iti naimbag, agtalek a naan-anay ken ni Jehova ken agayat kenkuana iti amin a puso, kararua, panunot, ken pigsatayo. (Deuteronomio 6:5; Salmo 4:5; Proverbio 3:5, 6; Mateo 22:37; Marcos 12:30) Dagiti pammalagip ti Dios tignayendatay met nga agayat kadagiti kaarrubatayo. (Levitico 19:18; Mateo 22:39) Maipakitatayo a nangnangruna ti panagayattayo iti Dios ken iti kaarruba babaen ti panangtungpal iti pagayatanna ken panangiranud kadagiti sabsabali iti makaited-biag a “pannakaammo iti Dios.”​—Proverbio 2:1-5.

Biag ti Kaipapanan ti Panangsalimetmet Kadagiti Pammalagip ni Jehova!

19. Kasanotay a maipakita kadagiti sabsabali a praktikal ken makagunggona ti panangipangag kadagiti pammalagip ni Jehova?

¹⁹ No salimetmetantayo dagiti pammalagip ni Jehova ken tulongantayo dagiti sabsabali a mangaramid iti kasta, maisalakantayo ti bagbagitayo ken dagidiay dumngeg kadatayo. (1 Timoteo 4:16) Kasanotay a maipakita kadagiti sabsabali a pudno a praktikal ken makagunggona ti panangipangag kadagiti pammalagip ni Jehova? Babaen ti panagbiagtayo a mayannurot kadagiti prinsipio ti Biblia. Iti kasta mapaneknekan dagidiay “siuumiso a maikari iti biag nga agnanayon” a ti panagbiag nga isursuro ti Sao ti Dios ti pudno a kasayaatan a suroten. (Aramid 13:48) Makitadanto met a ‘ti Dios pudno nga adda iti tengngatayo’ ket matignayda a tumipon kadatayo nga agdayaw ken ni Soberano nga Apo Jehova.​—1 Corinto 14:24, 25.

20, 21. Tulongandatayo dagiti pammalagip ti Dios ken ti nasantuan nga espirituna a mangaramid iti ania?

²⁰ No itultuloytay nga adalen ti Kasuratan, iyaplikar ti maad-adaltayo, ken aprobetsaren dagiti naespirituan a probision ni Jehova, masursurotayo nga ipateg iti kasta unay dagiti pammalagipna. No maipangag, tulongandatayo dagitoy a pammalagip a mangikawes iti “baro a personalidad a naparsua maitunos iti pagayatan ti Dios iti pudno a kinalinteg ken kinasungdo.” (Efeso 4:20-24) Dagiti pammalagip ni Jehova ken ti nasantuan nga espirituna tulongandatayo a mangiparangarang iti ayat, rag-o, talna, mabayag a panagitured, kinamanangaasi, kinaimbag, pammati, kinaalumamay, panagteppel​—dagiti galad a naiduma unay kadagiti kababalin ti lubong nga iturayan ni Satanas! (Galacia 5:22, 23; 1 Juan 5:19) Gapuna, agyamantayo no mapalagipantayo kadagiti bilin ni Jehova iti personal a panagadaltayo iti Biblia, babaen kadagiti nadutokan a panglakayen, ken kadagiti gimong, asamblea, ken kombensiontayo.

²¹ Gapu ta salsalimetmetantayo dagiti pammalagip ni Jehova, makapagrag-otayo uray no agsagabatayo maigapu iti kinalinteg. (Lucas 6:22, 23) Mangnamnamatayo nga isalakannatayo ti Dios kadagiti napeggad unay a kasasaad. Nangnangruna a napateg dayta ita ta maur-urnongen dagiti amin a nasion iti “gubat ti naindaklan nga aldaw ti Dios a Mannakabalin-amin” iti Har–Magedon.​—Apocalipsis 16:14-16.

22. Ania koma ti determinasiontayo maipanggep kadagiti pammalagip ni Jehova?

²² Tapno magun-odtayo ti di kaikarian a sagut a biag nga agnanayon, masapul nga ipategtayo iti kasta unay ken naimpusuan a tungpalentayo dagiti pammalagip ni Jehova. Sapay koma ngarud ta ti kaririknatayo ket kas iti salmista a nangikanta iti kastoy: “Ti kinalinteg dagiti pammalagipmo ket agingga iti tiempo a di nakedngan. Ikkannak iti pannakaawat, tapno makapagtultuloyak nga agbiag.” (Salmo 119:144, NW) Ket sapay koma ngarud ta iparangarangtayo ti determinasion a nayebkas iti sasao ti salmista: “Immawagak kenka [Jehova]. O isalakannak! Ket salimetmetakto dagiti pammalagipmo.” (Salmo 119:146, NW) Wen, iti sao ken aramid, paneknekantayo a talaga nga ipatpategtayo iti kasta unay dagiti pammalagip ni Jehova.

Kasanoyo a Sungbatan?

• Kasano ti panangmatmat ti salmista kadagiti pammalagip ni Jehova?

• Apay a kasapulantayo dagiti pammalagip ti Dios?

• Ania ti paset dagiti gimongtayo no maipapan kadagiti pammalagip ti Dios?

• Kasano a dagiti pammalagip ni Jehova pagbalinendatayo a naiduma iti daytoy a lubong?

[Ladawan iti panid 15]

Kasta unay ti panangipateg ti salmista kadagiti pammalagip ni Jehova

[Dagiti Ladawan iti panid 16, 17]

Kas panangtulad ken Ana, determinadokay kadi a di lumangan kadagiti gimong?

[Ladawan iti panid 18]

Ti panangipangag kadagiti pammalagip ni Jehova pagbalinennatayo a naiduma kas nadalus ken maikari nga agserbi kenkuana