Maus-usig ti Pannakapagungar ni Jesus

“Aminek kadakayo a siguradokami a nagbiag ni Jesus . . . , ngem saan a kasta ti kinasiguradomi nga Isu ket pinagungar ti Dios.” Kasta ti kinuna ti Arsobispo ti Church of England idiay Canterbury.

SAAN a pinagduaduaan ni Kristiano nga apostol Pablo ti panagungar ni Jesus. Iti kapitulo 15 ti umuna a naipaltiing a suratna kadagiti Kristiano iti nagkauna a Corinto, kinuna ni Pablo: “Inyawatko kadakayo, mairaman kadagiti immuna a bambanag, daydiay inawatko met, a ni Kristo natay maipaay kadagiti basoltayo sigun iti Kasuratan; ket isu naitabon, wen, nga isu napagungar iti maikatlo nga aldaw sigun iti Kasuratan.”​—1 Corinto 15:3, 4.

Ti panamati iti panagungar ni Jesu-Kristo ti nangtignay kadagiti adalanna a mangikasaba iti ebanghelio iti intero a Griego ken Romano a lubong​—“iti isuamin a parsua nga adda iti baba ti langit.” (Colosas 1:23) Kinaagpaysuanna, ti panagungar ni Jesus ti mismo a pundasion ti Nakristianuan a pammati.

Nupay kasta, manipud idi damo, addan dagiti agduadua ken saan a mamati iti panagungar ni Jesus. Imbilang ti kaaduan a Judio a panagtabbaaw ti panangibaga dagiti pasurot ni Jesus a daytoy a lalaki a nailansa ket isu ti Mesias. Ken para iti kaaduan nga edukado a Griego, makarimon ti ideya maipapan iti panagungar gapu ta mamatida iti imortalidad ti kararua.​—Aramid 17:32-34.

Dagiti Managduadua iti Moderno a Panawen

Iti napalabas a tawtawen, nangipablaak ti sumagmamano nga eskolar nga agkunkuna a Kristiano kadagiti libro ken artikulo a namagbalin iti panagungar ni Jesus kas sarsarita laengen ken nangparnuayda iti nakaro a panagdedebate maipapan iti daytoy a banag. Iti panangbirokda iti “pudpudno a Jesus,” ibagbaga ti nadumaduma nga eskolar a bin-ig a sarsarita dagiti salaysay ti Ebanghelio maipapan iti awan nagyanna a tanem ken dagiti panagparang ni Jesus kalpasan ti panagungarna, napartuat kano dagitoy nabayag kalpasan ti ipapatayna tapno mapasingkedan dagiti kunkunada a nailangitan a pannakabalinna.

Kas pagarigan, usigentayo dagiti kapanunotan ti Aleman nga eskolar a ni Gerd Lüdemann a propesor ti Baro a Tulag ken autor ti libro a What Really Happened to Jesus​—A Historical Approach to the Resurrection. Kinunana a ti panagungar ni Jesus ket “awan pakaibatayanna a salaysay” a nasken nga iwaksi ti tunggal maysa a mamati iti “nasientipikuan a panangmatmat ti lubong.”

Sigun ken Propesor Lüdemann, ti napagungar a Kristo a nagparang ken apostol Pedro ket maysa laeng a sirmata nga epekto ti napalalo a ladingit ken pannakakonsiensia ni Pedro gapu iti panangilibakna ken Jesus. Kinuna pay ni Lüdemann a ti naminsan a panagparang ni Jesus iti nasurok a 500 a manamati ket maysa a kaso ti “napalaus a ragsak ti bunggoy.” (1 Corinto 15:5, 6) Iti ababa a pannao, adu nga eskolar ti agkuna a dagiti salaysay ti Biblia maipapan iti panagungar ni Jesus ket napartuat a kapkapadasan a nangparnuay kadagiti adalan iti napabaro a naespirituan a panagtalek ken napalaus a regta.

Siempre, adu ti saan unay nga interesado kadagiti intelektual a kontrobersia. Nupay kasta, rumbeng a paginteresantayo amin ti maipapan iti panagungar ni Jesus. Apay? Agsipud ta no saan a napagungar, naibasar ti Kristianidad iti palso a pundasion. Iti sabali a bangir, no ti panagungar ni Jesus ket pudno a pasamak iti historia, naibasar ti Kristianidad iti kinapudno. No kasta, saan laeng a dagiti imbaga ni Kristo ti maalangon no di pay ket dagiti karina. Kanayonanna, no adda panagungar, saan a kankanayon nga agballigi ni patay no di ket maysa a kabusor a mabalin a parmeken.​—1 Corinto 15:55.

[Picture Credit Line iti panid 3]

Manipud iti Self-Pronouncing Edition of the Holy Bible, a naglaon iti King James ken Revised a bersion