No Kasano a Maparmek Dagiti Negatibo a Rikna

● Inreklamo ni Asaf: “Sigurado a kinaubbaw ti panangdalusko iti pusok ken ti panangbuggok kadagiti imak iti mismo a kinaawan basol ket nasaplitak iti intero nga agmalem, ket ti pannakailintegko tunggal bigat.”​—Salmo 73:13, 14.

● Insennaay ni Baruc: “Asiak pay,ita, ta ti rigatko ninayonan ni Jehova iti ladingit! Napakilak gapu iti panagsennaayko, ket awan nasarakak a lugar a paginanaan.”​—Jeremias 45:3.

● Inyasug ni Noemi: “Ti Mannakabalin-amin pinagbalinna a napait unay kaniak. Napanak idi a sipupunno, ket ima-ima a pinasublinak ni Jehova. Apay koma nga awagandak iti Noemi, idinto ta ni Jehova ti nangipababa kaniak ket ti Mannakabalin-amin ti nangpataud iti didigra kaniak?”​—Ruth 1:20, 21.

NAGLAON ti Biblia iti nakaad-adu a pagarigan dagiti matalek nga agdaydayaw ken Jehova a masansan a linapunos dagiti pannakaupay. Kinapudnona, kas imperpekto a tattao, pasaray makariknatay amin iti kasta. Mabalin a nalaklaka a maupay ti dadduma kadatayo​—​nalabit buyogen pay ketdi iti panangay-ay iti bagi​—gapu kadagiti nakas-ang a pasamak iti biagda.

Ngem no mabaybay-an, dadaelen dagitoy a rikrikna ti relasionyo kadagiti dadduma ken ni Jehova a Dios. Inamin ti maysa a Kristiano a babai a nalaka a mangay-ay iti bagina: “Adu ti diak pinatgan nga awis a sosial a panaglalangen gapu ta kasla diak maikari a makilangen kadagiti kakongregasionak.” Ti kasta a rikrikna talaga a dadaelenna ti biag ti maysa a tao! Kasanoyo a maparmek dagita?

Umadanikayo ken ni Jehova

Iti Salmo 73, sipaprangka nga insurat ni Asaf ti pannakaburiborna. Immapal idi pinagdiligna ti kasasaadna ken ti narang-ay a biag dagiti nadangkes. Napaliiwna a kasla awan pannakadusa dagiti nadangkes nupay natangsit ken naranggasda. Inyebkas ngarud ni Asaf ti riknana a kasla awan serserbi ti panangikagumaanna nga agbiag a nalinteg.​—Salmo 73:3-9, 13, 14.

Kas ken Asaf, napaliiwyo kadi a kasla naballigi dagiti managdakdakes ket ipagpannakkelda pay ketdi dagiti madi nga aramidda? Kasano a pinarmek ni Asaf ti negatibo a riknana? Kinunana: “Ket nagut-utobak tapno maammuak daytoy; maysa idi dayta a riribuk kadagiti matak, agingga a simrekak iti naindaklan a santuario ti Dios. Kayatko idi a lasinen ti masanguananda.” (Salmo 73:16, 17) Inaramid ni Asaf dagiti positibo nga addang. Nagkararag ken Jehova. No usarentayo ti sasao nga inaramat ni apostol Pablo idi agangay, minedmed ni Asaf ti “pisikal a tao” babaen ti panangriingna iti “naespirituan a tao” iti unegna. Buyogen ti napabaro a naespirituan a panangmatmat, natarusanna a kagura ni Jehova ti kinadakes ket dusaennanto dagiti managdakdakes iti naikeddeng a tiempo.​—1 Corinto 2:14, 15.

Anian a nagpateg a bigbigenyo dagiti kinapudno iti biag kas ipakita ti Biblia! Ipalagip kadatayo ni Jehova a pagaammona ti ar-aramiden dagiti managdakdakes. Kuna ti Biblia: “Dikay payaw-awan: Ti Dios saan a maysa a marabrabak. Ta aniaman nga imulmula ti maysa a tao, daytoyto met ti apitenna . . . Gapuna ditay koma sumuko nga agaramid iti nasayaat.” (Galacia 6:7-9) Ikabilto ni Jehova dagiti nadangkes “iti nagalis a pagsaadan”; ‘pagtinnagennanto ida kadagiti pannakarba.’ (Salmo 73:18) Kanayon nga agballigi ti nadibinuan a hustisia kamaudiananna.

Ti patinayon a pannangan iti naespirituan a taraon iti lamisaan ni Jehova ken ti makagunggona a pannakitimpuyog iti ili ti Dios ti tumulong kadakayo tapno mapabileg ti pammatiyo ken maparmek ti pannakaupay wenno dadduma pay a negatibo a rikrikna. (Hebreo 10:25) Kas ken Asaf, mapasaranyo ti naayat a suporta ti Dios no agtalinaedkayo a nasinged kenkuana. Intuloy ni Asaf: “Patinayon nga addaak kenka; tinengngelmo ti makannawan nga imak. Babaen ti pammatigmaanmo idalannakto, ket kalpasanna ipannakto iti mismo a kinadayag.” (Salmo 73:23, 24) Maysa a Kristiano a naabuso idi ubing pay ti nakabigbig a nainsiriban dagitoy a sasao. Kunana: “Ti panagtalinaed a nasinged iti kongregasion ti nangipakita kaniak iti sabali nga anggulo ti biag. Silalawag a nakitak a naayat dagiti Kristiano a panglakayen, a saanda a polis no di ket papastor.” Wen, dagiti naasi a Kristiano a panglakayen dakkel ti maaramidanda tapno mailiwliwag dagiti makadangran a rikrikna.​—Isaias 32:1, 2; 1 Tesalonica 2:7, 8.

Awatenyo ti Balakad ni Jehova

Nagsennaay ni Baruc, ti sekretario ni propeta Jeremias, gapu ta makapasikor unay ti annongenna. Ngem siaasi nga inturong ni Jehova ti atension ni Baruc iti adda a kinapudno. “‘Ngem no maipapan kenka, agtultuloy nga isapsapulam ta bagim iti naindaklan a bambanag. Dika itultuloy ti agsapul.’ ‘Ta adtoy mangipagtengak iti didigra iti isuamin a lasag,’ kuna ni Jehova, ‘ket itedkonto kenka ta kararuam kas maysa a samsam kadagiti amin a disso a papanam.’”​—Jeremias 45:2-5.

Sipaprangka nga inlawlawag ni Jehova a malmaldaang ni Baruc gapu kadagiti agimbubukodan a motibona. Saan a makaparagsak ken Baruc ti inted ti Dios nga annongenna no ti la naindaklan a bambanag ti sapsapulenna maipaay iti bagina. Mabalin met a makitayo a ti maysa a pudpudno nga epektibo nga addang tapno maparmek ti pannakaupay isu ti panangliklik kadagiti pakasingaan ken pananggun-od iti talna ti panunot nga itden ti nadiosan a pannakapnek.​—Filipos 4:6, 7.

Ti balo a ni Noemi dina impalubos a ti panagdukotna ti manglapped kenkuana a makilangen idiay Moab idi natay ti asawana ken ti dua nga annakna. Ngem adda ti mangipasimudaag a nagpasanaang maipapan iti kasasaadna ken iti dua a manugangna a babbai. Idi papanawenna ida, kinuna ni Noemi: “Ta napait unay kaniak gapu kadakayo, a ti ima ni Jehova rimmuar maibusor kaniak.” Ket idi simmangbay idiay Bethlehem, inyunay-unayna manen: “Saandak nga awagan iti Noemi [“Ti Pakaay-aywak”]. Awagandak iti Mara [“Napait”], ta ti Mannakabalin-amin pinagbalinna a napait unay kaniak.”​—Ruth 1:13, 20.

Nupay kasta, saan nga imputputong ni Noemi ti bagina ken Jehova ken iti ilina tapno agtultuloy nga agladingit. Idiay Moab, nangngegna idi nga “inturong ni Jehova ti asikasona iti ilina babaen ti panangtedna kadakuada iti tinapay.” (Ruth 1:6) Natarusanna a kasayaatan pay laeng kenkuana ti makipagnaed iti ili ni Jehova. Kaduana ti manugangna a ni Ruth, kalpasanna nagsubli ni Noemi idiay Juda ket sisisigo nga insurona ni Ruth no kasano a makilangen iti kabagianda a ni Boaz, ti manangsakana.

Kasta met ita, dagiti nasungdo a tattao nadaeranda a sibaballigi ti nasaem a rikna ti mabalo babaen ti panagbalinda nga okupado iti kongregasion Kristiano. Kas ken Noemi, inggaedda ti bagbagida iti naespirituan a bambanag, nga inaldaw a basaenda ti Sao ti Dios.

Dagiti Pagimbagan ti Panangyaplikar iti Nadiosan a Sirib

Mangted dagitoy a salaysay ti Biblia iti nauneg a pannakaawat no kasano a maparmek dagiti epekto ti negatibo a rikrikna. Nagpatulong ni Asaf iti santuario ni Jehova ket siaanus a naguray ken Jehova. Impangag ni Baruc ti balakad ket liniklikanna dagiti materialistiko a pakasingaan. Sireregta a nakilangen ni Noemi iti ili ni Jehova, nga insaganana ni agkabannuag a Ruth para kadagiti pribilehiona iti panagdayaw iti pudno a Dios.​—1 Corinto 4:7; Galacia 5:26; 6:4.

Maparmekyo ti pannakaupay ken dadduma pay a negatibo a rikrikna no sipapanunotkayo kadagiti nadibinuan a balligi nga ipapaay ni Jehova iti ilina, kas indibidual wenno kas maysa a grupo. Tapno maaramidyo dayta, utobenyo ti naindaklan nga ayat ni Jehova idi impaayna kadakayo ti subbot. Tagipatgenyo ti napudno nga ayat iti Nakristianuan a panagkakabsat. Ipamaysayo ti biagyo iti nakaas-asidegen a baro a lubong ti Dios. Ket sapay koma ta agtignaykayo a kas ken Asaf: “Ngem no maipapan kaniak, ti iyaadani iti Dios naimbag kaniak. Iti Soberano nga Apo Jehova insaadko ti kamangko, tapno ideklarak amin nga aramidmo.”​— Salmo 73:28.