Idaydayawyo ni Jehova Gapu Kadagiti Naindaklan nga Aramidna!
“Ti kararuak itan-okna ni Jehova . . . agsipud ta Daydiay a nabileg nangaramid maipaay kaniak iti naindaklan nga ar-aramid.”—LUCAS 1:46-49.
1. Gapu iti ania a naindaklan nga ar-aramid a mayanatup nga idaydayawtayo ni Jehova?
MAIKARI ni Jehova a maidaydayaw gapu iti naindaklan nga ar-aramidna. Idi imbinsabinsa ni mammadto Moises ti pannakaispal ti Israel manipud Egipto, kinunana: “Dagiti matayo isuda ti nakakita kadagiti amin a naindaklan nga aramid ni Jehova.” (Deuteronomio 11:1-7) Umasping iti dayta, idi impakaammo ni anghel Gabriel iti birhen a ni Maria ti pannakaipasngay ni Jesus, kinuna ni Maria: “Ti kararuak itan-okna ni Jehova . . . agsipud ta Daydiay a nabileg nangaramid maipaay kaniak iti naindaklan nga ar-aramid.” (Lucas 1:46-49) Kas Saksi ni Jehova, itan-oktayo gapu iti naindaklan nga ar-aramidna kas iti panangwayawayana iti Israel iti Egipto a nakaadipenanda ken iti milagro a pannakayinaw ti dungdungnguenna nga Anak.
2. (a) Aniat’ kaipapanan ti “agnanayon a panggep” ti Dios iti natulnog a sangatauan? (b) Aniat’ napasaran ni Juan iti isla ti Patmos?
2 Adu kadagiti naindaklan nga aramid ni Jehova ti nainaig iti “agnanayon a panggepna” a panangbendision iti natulnog a tattao babaen ti Mesias ken ti turay ti Pagarianna. (Efeso 3:8-13) Rumangrang-ayen dayta a panggep idi napalubosan ni lakayen nga apostol Juan a sumirip iti silulukat a ruangan idiay langit iti sirmata. Nakangngeg iti arig-trumpeta a timek a nagkuna: “Umulika ditoy, ket ipakitak kenka ti bambanag a masapul a maaramid.” (Apocalipsis 4:1) Bayat ti panangidistiero ti gobierno ti Roma kenkuana idiay isla ti Patmos “gapu iti panagsao maipapan iti Dios ken panangsaksi ken Jesus,” immawat ni Juan iti “palgaak ni Jesu-Kristo.” Adut’ impalgak ti nakita ken nangngeg ti apostol maipapan iti agnanayon a panggep ti Dios, a mangipaay iti naespirituan a lawag ken naintiempuan a pammaregta kadagiti amin a pudno a Kristiano.—Apocalipsis 1:1, 9, 10.
3. Siasino dagiti irepresentar ti 24 a panglakayen a nasirmata ni Juan?
3 Iti dayta silulukat a ruangan idiay langit, nakakita ni Juan iti 24 a panglakayen, a situtugaw iti trono ken nakoronaan a kasla ar-ari. Nagruknoyda iti saklang ti Dios ket kinunada: “Maikarika, Jehova, a mismo a Diosmi, nga umawat iti dayag ken iti dayaw ken iti pannakabalin, agsipud ta pinarsuam ti amin a bambanag, ket gapu iti pagayatam napaaddada ken naparsuada.” (Apocalipsis 4:11) Irepresentar dagidiay a panglakayen ti amin a napagungar a napulotan a Kristiano nga adda iti natan-ok a saad nga inkari kadakuada ti Dios. Natignayda a mangidayaw ken Jehova gapu iti naindaklan nga ar-aramidna a nainaig iti panamarsua. Pagsiddaawantayo met ti pammaneknek ti “agnanayon a pannakabalin ken kina-Dios” ni Jehova. (Roma 1:20) Ket bayat nga umad-adu ti masursurotayo maipapan ken Jehova, ad-adu met ti rasontayo a mangitan-ok kenkuana gapu iti naindaklan nga ar-aramidna.
Ipakaammoyo ti Nadayaw nga Ar-aramid ni Jehova!
4, 5. Mangtedkayo iti pagarigan no kasano nga indaydayaw ni David ni Jehova.
4 Indaydayaw ni salmista David ti Dios gapu iti naindaklan nga ar-aramidna. Kas pagarigan, inkanta ni David: “Mangipaaykayo iti samiweng ken Jehova, nga agnanaed iti Sion; ibagayo kadagiti ili ti ar-aramidna. Ipaayannak iti parabur, O Jehova; kitaem ti pannakaparigatko babaen kadagidiay manggurgura kaniak, O sika a mangaon kaniak kadagiti ruangan ni patay, tapno iti kasta maideklarak amin dagiti nadayaw nga aramidmo kadagiti ruangan ti anak a babai ti Sion.” (Salmo 9:11, 13, 14) Idi naitednan ken anakna a Solomon ti plano ti arkitektura maipaay iti templo, binendito ken indaydayaw ni David ti Dios, a kunkunana: “Kukuam, O Jehova, ti kinanaindaklan ken ti kinamannakabalin ken ti kinapintas ken ti kinatan-ok ken ti dayaw . . . Kukuam ti pagarian, O Jehova, Daydiay mangipangato met iti bagim kas pannakaulo ti isuamin. . . . Ket ita, O Diosmi, agyamankami kenka ken idaydayawmi ti napintas a naganmo.”—1 Cronicas 29:10-13.
5 Maulit-ulit nga iyaw-awis—wen, idagdagadag—kadatayo ti Kasuratan nga idaydayawtayo ti Dios, kas iti inaramid ni David. Naglaon ti libro ti Salmo kadagiti pangidaydayaw iti Dios, ket agarup kagudua kadagitoy ti kanta ni David. Patinayon nga indaydayaw ken pinagyamananna ni Jehova. (Salmo 69:30) Kanayonanna, dagiti impaltiing ti Dios a kanta a pinutar ni David ken dagiti sabsabali ket maus-usar a pangidaydayaw ken Jehova sipud pay nagkauna a tiempo.
6. Kasano a magunggonaantayo iti naipaltiing a Salmo?
6 Anian a makagunggona dagiti Salmo kadagiti managdaydayaw ni Jehova! No kayattay ti agyaman iti Dios iti amin a naindaklan nga ar-aramidna maigapu kadatayo, mabalintay a lagipen ti naimnas a sasao a masarakan kadagiti Salmo. Kas pagarigan, apaman a makariingtayo iti baro nga agsapa, nalabit matignaytay a mangyebkas iti kastoy: “Nasayaat ti agyaman ken Jehova ken ti mangipaay iti samiweng iti naganmo, O Kangatuan; ti mangisarita iti bigat maipapan iti naayat a kinamanangngaasim ken maipapan iti kinamatalekmo bayat dagiti rabii, . . . ta pinagrag-onak, O Jehova, gapu iti aramidmo; gapu iti ar-aramid dagita imam agdir-iak a sirarag-o.” (Salmo 92:1-4) No napagballigiantayo ti lapped iti naespirituan nga irarang-aytayo, nalabit agduyostayo a mangipeksa iti rag-o ken panagyaman babaen ti kararag, a kas iti inaramid ti salmista idi inkantana: “O umaykayo agdir-itayo a sirarag-o ken Jehova! Agdir-itayo a sibaballigi iti Bato ti pannakaisalakantayo. Dumatagtayo iti sanguanan ti personana buyogen ti panagyaman; agdir-itayo a sibaballigi kenkuana buyogen dagiti samiweng.”—Salmo 95:1, 2.
7. (a) Ania’t makapainteres kadagiti adu a kanta dagiti Kristiano? (b) Ania ti maysa a rason a masapatayo kadagiti gimong ken palpasentayo?
7 Masansan nga idaydayawtayo ni Jehova babaen dagiti kanta kadagiti gimong ti kongregasion, asamblea, ken kombension. Makapainteres ta naibatay ti adu kadagitoy a kanta kadagiti naipaltiing a kapanunotan iti libro dagiti Salmo. Anian a ragsaktayo nga addaan iti naintiempuan a koleksion dagiti makaparag-o a kanta a pangidayaw ken Jehova! Ti maysa a nagsayaat a rason a masapatayo kadagiti gimong ken palpasentayo dayta isu ti panagkanta iti daydayaw nga agpaay iti Dios, iti kasta makidangdanggaytayo kadagiti kakabsattayo a mangidaydayaw ken Jehova babaen ti kanta ken kararag.
“Idaydayawyo ni Jah!”
8. Aniat’ naibinggas iti sao nga “Aleluya,” ket kasano ti gagangay a pannakaipatarusna?
8 Naibinggas ti panangidaydayaw ken Jehova iti sao nga “Aleluya,” a transliterasion ti Hebreo a sao a gistay kanayon a maipatarus kas “Idaydayawyo ni Jah.” Kas pagarigan, masarakantayo idiay Salmo 135:1-3 daytoy nabara, naganetget nga awis: “Idaydayawyo ni Jah! Idaydayawyo ti nagan ni Jehova, mangidatonkayo iti panagdayaw, O ad-adipen ni Jehova, dakayo a sitatakder iti balay ni Jehova, kadagiti paraangan ti balay ti Diostayo. Idaydayawyo ni Jah, ta ni Jehova naimbag. Mangipaaykayo iti samiweng iti naganna, ta makaay-ayo dayta.”
9. Aniat’ mangtignay kadatayo a mangidaydayaw ken Jehova?
9 Bayat nga us-usigentayo dagiti nakaskasdaaw a banag a pinarsua ti Dios ken amin nga ar-aramidna maigapu kadatayo, tignayennatayo ti naimpusuan nga apresasion a mangidaydayaw kenkuana. No utobentayo dagiti nakaskasdaaw a banag nga inaramid ti Dios agpaay iti ilina kadagidi naglabas a panawen, gutugotennatay ti pusotayo a mangitan-ok kenkuana. Ket bayat a mennamennaentayo ti naindaklan a bambanag nga inkari ni Jehova nga aramiden, ipamuspusantayo nga iyebkas ti panagdaydayaw ken panagyamantayo.
10, 11. Kasano a mangted rason ti mismo a kaaddatayo tapno idaydayawtayo ti Dios?
10 Ti mismo a kaaddatayo ikkannatay iti naimbag a rason a mangidaydayaw ken Jah. Inkanta ni David: “Idayawkanto [Jehova] agsipud ta iti nakaam-amak a pamay-an nakaskasdaaw ti pannakaaramidko. Nakaskasdaaw dagiti aramidmo, kas pagaammo unay ti kararuak.” (Salmo 139:14) Wen, ‘nakaskasdaaw ti pannakaaramidtayo’ ken addaantay kadagiti nagpateg a sagut a kas iti panagkita, panagdengngeg, ken panagpanunot. Saan kadi ngarud a maiparbeng nga agbiagtayo iti wagas a pakaidayawan ti Nangaramid kadatayo? Kasta ti kinuna ni Pablo idi insuratna: “Uray no mangmangan wenno umin-inum wenno agar-aramidkayo iti aniaman pay a banag, aramidenyo ti amin a bambanag a maipaay iti dayag ti Dios.”—1 Corinto 10:31.
11 Aramidentayo amin a bambanag a pakaidayawan ti Dios no pudno nga ay-ayatentayo. Kinuna ni Jesus a ti umuna a bilin ket: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo ken buyogen ti intero a pigsam.” (Marcos 12:30; Deuteronomio 6:5) Nalawag a rumbeng nga ayaten ken idaydayawtay ni Jehova kas Nangaramid kadatayo ken Manangipaay iti “tunggal naimbag a sagut ken tunggal naan-anay a rangkap.” (Santiago 1:17; Isaias 51:13; Aramid 17:28) Rumbeng laeng nga aramidentay ti kasta agsipud ta ti pannakabalintayo nga agrason, naespirituan a kapasidadtayo, ken ti pisikal a pigsatayo—amin a galad ken abilidadtayo—naggapuda ken Jehova. Kas Namarsua kadatayo, maikari ni Jehova iti ayat ken panangidaydayawtayo.
12. Kasanot’ panagriknayo maipapan iti naindaklan nga ar-aramid ni Jehova ken iti sasao ti Salmo 40:5?
12 Ti naindaklan nga ar-aramid ni Jehova ipaayannatayo iti nakaad-adu a rason a mangayat ken mangidaydayaw kenkuana! “Adu a banag ti inaramidmo, O Jehova a Diosko, ti mismo a nakaskasdaaw nga ar-aramidmo ken ti pampanunotmo maipaay kadakami,” inkanta ni David. “Awan ti maipadis kenka. No nagannayasak koma nga agibaga ken agsao maipapan kadakuada, nagbalinda nga ad-adu ngem iti kabaelak nga ibinsabinsa.” (Salmo 40:5) Di maibinsabinsa ni David ti amin a nakaskasdaaw nga ar-aramid ni Jehova, ket uray datayo. Ngem idaydayawtayo koma a kanayon ti Dios no maiturong iti atensiontayo ti aniaman kadagiti naindaklan nga aramidna.
Ar-aramid a Nainaig iti Agnanayon a Panggep ti Dios
13. Kasano a ti namnamatayo naisinggalut iti naindaklan nga ar-aramid ti Dios?
13 Ti namnamatayo ket naisinggalut iti naindaklan ken nadayaw nga ar-aramid a nainaig iti agnanayon a panggep ti Dios. Kalpasan ti panagrebelde a napasamak idiay Eden, inted ni Jehova ti umuna a padto a napnuan-namnama. Kinuna ti Dios idi sinentensiaanna ti serpiente: “Mangikabilakto ti panagginnura iti nagbaetanyo iti babai ken iti nagbaetan ti bin-im ken ti bin-ina. Dunorennakanto iti ulo ket dunoremto iti mukod.” (Genesis 3:15) Nayukuok iti puspuso dagiti matalek a tattao ti namnama iti naikari a Bin-i ti babai kalpasan ti naindaklan nga aramid ni Jehova a panangispal kada Noe ken ti pamiliana iti sangalubongan a Layus a nangpunas iti dakes a lubong. (2 Pedro 2:5) Dagiti naimpadtuan a kari kadagiti matalek a lallaki a kas kada Abraham ken David nayonanna ti pannakaawattayo iti aramidento ni Jehova babaen iti dayta a Bin-i.—Genesis 22:15-18; 2 Samuel 7:12.
14. Aniat’ kasayaatan a pagarigan ti naindaklan nga ar-aramid ni Jehova maigapu iti sangatauan?
14 Ti kasayaatan a pannakaiparangarang ni Jehova kas naindaklan ti ar-aramidna maigapu iti sangatauan ket napasamak idi intedna ti bugbugtong nga Anakna—ti naikari a Bin-i, ni Jesu Kristo—kas daton a subbot. (Juan 3:16; Aramid 2:29-36) Nangipaay ti subbot iti pakaibatayan ti pannakikapia iti Dios. (Mateo 20:28; Roma 5:11) Inserrek ni Jehova iti kongregasion Kristiano, a naipasdek idi Pentecostes 33 K.P., dagiti immuna a naikapia. Inkasabada a sisasaknap ti naimbag a damag babaen ti tulong ti nasantuan nga espiritu, nga impakitada no kasano a linuktan ti ipapatay ken panagungar ni Jesus ti dalan tapno masagrap ti natulnog a tattao dagiti agnanayon a bendision iti sidong ti turay ti nailangitan a Pagarian ti Dios.
15. Kasano a nakaskasdaaw a nagtignay ni Jehova iti kaaldawantayo?
15 Iti kaaldawantayo, nakaskasdaaw ti panagtignay ni Jehova a mangurnong kadagiti kaudian a napulotan a Kristiano. Naigawid dagiti mangdadael nga angin tapno maselioan dagiti natda iti 144,000, a makipagturayto ken Kristo idiay langit. (Apocalipsis 7:1-4; 20:6) Sinigurado ti Dios a maispal dagiti napulotan a Kristiano manipud pannakaadipen iti “Babilonia a Dakkel,” ti sangalubongan nga imperio ti ulbod a relihion. (Apocalipsis 17:1-5) Dayta a pannakaispal idi 1919 ken ti pannalaknib ti Dios a napasaranda nanipud idin inikkanna iti gundaway ti napulotan a natda a mangaramid iti ania? Agsilnag iti panangipaayda iti maudi a pangsaksi sakbay a pagpatinggaen ni Jehova ti dakes a sistema ti bambanag ni Satanas inton “dakkel a rigat” nga um-umayen a sipapardas.—Mateo 24:21; Daniel 12:3; Apocalipsis 7:14.
16. Aniat’ mapaspasamak kas bunga ti agdama-aldaw a sangalubongan a trabaho a panangikasaba iti Pagarian?
16 Sireregta nga indaulo dagiti napulotan a Saksi ni Jehova ti sangalubongan a trabaho a panangikasaba iti Pagarian. Nagbanaganna, umad-adu ti bilang ti “sabsabali a karnero” nga agdaydayaw itan ken Jehova. (Juan 10:16) Pagrag-oantayo ta silulukat pay laeng kadagiti naemma ti gundaway ditoy daga a makikadua kadatayo a mangidaydayaw ken Jehova. Dagidiay umawat iti awis nga “umayka” ti maispalto iti dakkel a rigat, buyogen ti namnama nga idaydayawdanto ni Jehova iti agnanayon.—Apocalipsis 22:17.
Rinibu Dagiti Tumiptipon iti Pudno a Panagdayaw
17. (a) Kasano nga agar-aramid ni Jehova iti naindaklan nga ar-aramid mainaig iti trabahotayo a panangasaba? (b) Kasano a matungtungpal ti Zacarias 8:23?
17 Agar-aramid ni Jehova iti naindaklan ken nadayaw nga ar-aramid mainaig iti trabahotayo a panangasaba. (Marcos 13:10) Iti kallabes a tawtawen, ‘linuktanna dagiti dadakkel a ruangan a mangiturong iti panagaramid.’(1 Corinto 16:9) Daytoy ti namagbalin a posible ti pannakaiwaragawag ti naimbag a damag kadagiti nalawa a teritoria a pakabusbusoran idi ti kinapudno. Adu a nagbibiag iti naespirituan a kinasipnget ti mangipangpangagen iti awis nga agdayaw ken Jehova. Tungtungpalenda dagitoy naimpadtuan a sasao: “Daytoy ti kinuna ni Jehova ti buybuyot, ‘Mapasamakto kadagidiay nga aldaw a sangapulo a lallaki manipud kadagiti amin a pagsasao ti nasnasion kumpetdanto, wen, pudno a kumpetdanto iti pandiling ti maysa a lalaki a Judio, a kunkunada: “Kumuyogkaminto kadakayo, ta nangngegmi a ti Dios adda kadakayo.”’” (Zacarias 8:23) Ti “kadakayo” ditoy isuda dagiti naespirituan a Judio, ti natda kadagiti napulotan a Kristiano iti panawentayo. Tangay ti sangapulo irepresentarna ti kinanaan-anay ti aniaman a naindagaan, ti “sangapulo a lallaki” iladladawanda ti “dakkel a bunggoy,” a naitimpuyog iti “Israel ti Dios,” a kaduada a mangbukel iti “maymaysa nga arban.” (Apocalipsis 7:9, 10; Galacia 6:16) Anian a rag-o a makita ti nakaad-adun a mangipapaay a sangsangkamaysa iti sagrado a panagserbi kas managdaydayaw ni Jehova a Dios!
18, 19. Aniat’ pammaneknek a bembendisionan ni Jehova ti trabaho a panangasaba?
18 Maragsakantayo ta pinullo a ribu—wen, ginasut a ribu—ti mangab-abrasa iti pudno a panagdayaw iti dagdaga a sigud a dominado ti ulbod a relihion a pagaruptay idi a dinto pulos umawat iti naimbag a damag dagiti umili. Kitaenyo ti agdama a Yearbook of Jehovah’s Witnesses, ket miraenyo ti dagdaga a mangirepreport itan iti 100,000 aginggat’ gistay 1,000,000 nga agibumbunannag iti Pagarian. Nabileg a pammaneknek daytoy a bembendisionan ni Jehova ti trabaho a panangikasaba iti Pagarian.—Proverbio 10:22.
19 Kas ili ni Jehova, idaydayaw ken pagyamanantayo ti nailangitan nga Amatayo iti panangipaayna kadatayo iti pudpudno a panggep ti biag, makagunggona a trabaho iti panagserbi kenkuana, ken nalawag a panangmatmat iti masanguanan. Magagarantayo iti kaitungpalan ti amin a karkari ti Dios ken determinadotayo nga ‘agtalinaed iti ayat ti Dios, a maipaay iti agnanayon a biag.’ (Judas 20, 21) Anian a ragsaktayo a makakita nga agdagupen iti 6,000,000 ti dakkel a bunggoy a mangidaydayaw iti Dios! Babaen ti nakabatbatad a pamendision ni Jehova, ti napulotan a natda agraman ti kakaduada a sabsabali a karnero naorganisarda iti aganay 91,000 a kongregasion iti 235 a daga. Nagsayaat ti pannakataraontayo amin iti naespirituan babaen ti di mabannog a panagregget ti “matalek ken masirib nga adipen.” (Mateo 24:45) Ti rumangrang-ay a teokratiko nga organisasion nga addaan naayat a panangaywan ti mangiwanwanwan iti trabaho ti Pagarian babaen ti 110 a sanga nga opisina dagiti Saksi ni Jehova. Agyamantayo ta tinignay ni Jehova ti puspuso dagiti tattaona a ‘mangpadayaw kenkuana iti napapateg a bambanagda.’ (Proverbio 3:9, 10) Gapu itoy, agtultuloy ti sangalubongan a trabahotayo a panangasaba, agraman panangibangon kadagiti pagimprentaan, pagtaengan a Bethel ken pagtaengan dagiti misionero, Kingdom Hall, ken Assembly Hall sigun iti pakasapulan.
20. Kasano koma ti panangapektar kadatayo ti panangut-utob iti naindaklan ken nadayaw nga ar-aramid ni Jehova?
20 Ditay madakamat amin a naindaklan ken nadayaw nga ar-aramid ti nailangitan nga Amatayo. Ngem mateppelan aya ti asinoman a nalinteg panagpuspusona ti makiraman iti bunggoy dagiti mangidaydayaw ken Jehova? Saan! Ngarud, idir-i koma ti amin a mangay-ayat iti Dios: “Idaydayawyo ni Jah! Idaydayawyo ni Jehova manipud iti langlangit, idaydayawyo kadagiti kangatuan. Idaydayawyo, dakayo amin nga anghelna . . . , dakayo nga agtutubo a lallaki ken kasta met dakayo a birhen, dakayo a lallakay agraman ubbing. Idaydayawda koma ti nagan ni Jehova, ta ti naganna laeng ti di magaw-at ti kangatona. Ti dayawna adda iti ngatuen ti daga ken langit.” (Salmo 148:1, 2, 12, 13) Wen, itan ken iti agnanayon, idaydayawtayo ni Jehova gapu kadagiti naindaklan nga aramidna!
Kasanoyo a Sungbatan?
• Ania ti sumagmamano kadagiti nadayaw nga aramid ni Jehova?
• Apay a magutugotkayo a mangidaydayaw ken Jehova?
• Kasano a ti namnamatayo ket nainaig iti naindaklan nga ar-aramid ti Dios?
• Kasano nga agar-aramid ni Jehova iti nadayaw nga ar-aramid mainaig iti trabaho a panangikasaba iti Pagarian?
[Ladawan iti panid 10]
Naimpusuan kadi a makipagkankantakayo kadagiti kanta a pangidayaw ken Jehova?
[Dagiti Ladawan iti panid 13]
Pagrag-oantayo ta silulukat pay laeng kadagiti naemma ti gundaway a makikadua kadatayo a mangidaydayaw ken Jehova