Agtakder a Naan-anay ken Addaan Natibker a Panamati

‘Kitaenyo! Ti Dakkel a Bunggoy!’

ADDA maysa a saludsod a pakariribukan idi dagiti adipen ni Jehova iti adu a dekada. Nabayag a nagreggetanda a risuten dayta babaen ti Kasuratan. Adu a diskusion ti pinarnuay ti suheto. Ngem natakuatan met laeng ti sungbat ti Biblia, ket pinagagarna dagiti dumdumngeg iti kombension idiay Washington, D.C., idi tawen 1935.

Ti puon ti diskusion ket maysa a gagangay a saludsod: Siasino ti mangbukel iti “dakkel nga umariwekwek” (King James Version), wenno “dakkel a bunggoy” (Baro a Lubong a Patarus), a nadakamat iti Apocalipsis 7:9? Agbiagto kadi idiay langit daytoy a grupo dagiti manamati?

Nabayagen a Saludsod

Sipud pay panawen ni apostol Juan agingga iti kaaldawantayo, pakariribukan dagiti Kristiano no asino ti mangbukel iti “dakkel nga umariwekwek.” Imbilang idi dagiti Estudiante ti Biblia ti dakkel a bunggoy kas segundario a klase nailangitan, maysa a grupo nga addaan pannakaammo iti Biblia ngem saanda unay nga inwaragawag dayta.

Nupay kasta, adda kakadua dagiti napulotan a Kristiano a rimmegta unay iti trabaho a panangasaba. Saanda a mangin-inanama a mapan idiay langit. Kinapudnona, ti namnamada ket maitunos iti palawag publiko a “Minilion a Sibibiag Ita ti Saanton a Pulos a Matay,” nga intampok ti ili ni Jehova nanipud 1918 inggat’ 1922. Mabendisionanto dagita a tattao iti biag nga agnanayon ditoy daga.

Inlawlawag ti The Watch Tower nga Oktubre 15, 1923, ti pangngarig ni Jesus maipapan kadagiti karnero ken kalding ket kinunana: “Dagiti karnero irepresentarda dagiti amin a tattao ti nasnasion, a saanda a nayanak iti espiritu ngem agannayasda iti kinalinteg, a bigbigenda iti panunotda ni Jesu-Kristo kas Apo ket ur-urayenda ken namnamaenda ti nasaysayaat a panawen iti sidong ti panagturayna.”​—Mateo 25:31-46.

Ad-adu Pay a Silnag ti Lawag

Idi tawen 1931, inlawlawag ti Vindication, Umuna a Libro, ti Ezequiel kapitulo 9 ket impabigbigna dagiti namarkaan iti muging maipaay iti pannakaitalimeng inton agngudo ti lubong nga isuda dagiti karnero iti pangngarig ni Jesus. Dineskribir ti Vindication, Maikatlo a Libro (naipablaak idi 1932), ti nalinteg panagpuspusona a lalaki a di Israelita a ni Jehonadab, a limmugan iti karuahe ni Jehu a napulotan nga ari ti Israel ket kimmuyog a mangkita iti regta ni Jehu a mangpapatay kadagiti ulbod a managdaydayaw. (2 Ar-ari 10:15-28) Kinuna ti libro: “Inrepresentar wenno inladawan ni Jehonadab dayta a klase dagiti tattao itatta ditoy daga [a] tinallikudanda ti organisasion ni Satanas, a nagtakder iti dasig ti kinalinteg, ket isudanto ti italimeng ti Apo inton tiempo ti Armagedon, nga ilasatnanto ida iti dayta a riribuk, ken ikkanna ida iti biag nga agnanayon ditoy daga. Dagitoy ti mangbukel iti klase ‘karnero.’”

Idi 1934, imbatad Ti Pagwanawanan a masapul nga agdedikar ken ni Jehova ken mabautisaran dagiti Kristiano a naindagaan ti namnamada. Pudno nga ad-adda a simmilnag idi a siraraniag ti lawag maipapan itoy klase a naindagaan!​—Proverbio 4:18.

Ti Naraniag a Gilap ti Pannakaawat

Ti pannakaawat iti Apocalipsis 7:9-17 dandani idin agsilnag a nakaranraniag. (Salmo 97:11) Impanamnama Ti Pagwanawanan a ti kombension a nakaiskediul iti Mayo 30 inggat’ Hunio 3, 1935, idiay Washington, D.C., U.S.A., ket “pudpudnonto a pakaliwliwaan ken pakagunggonaan” dagidiay iladladawan ni Jehonadab. Ket kasta nga agpayso!

Iti makagutugot a palawag maipapan “Ti Dakkel nga Umariwekwek,” iti agarup 20,000 a kombensionista, indatag ni J. F. Rutherford dagiti Nainkasuratan a pammaneknek a ti moderno-aldaw a “sabsabali a karnero” isu met laeng ti “dakkel a bunggoy” iti Apocalipsis 7:9. (Juan 10:16) Iti kangitingitan daytoy a palawag, indawat ti agpalpalawag: “Di la mabalin a tumakder amin dagidiay addaan namnama nga agbiag nga agnanayon ditoy daga?” Idi timmakder ti kaaduan kadagiti dumdumngeg, kinuna ni Rutherford: “Kitaenyo! Ti dakkel nga umariwekwek!” Adda panagulimek, a sinaruno ti nakapigpigsa a panagdir-i. Iti sumaganad nga aldaw, 840 a kabbaro a Saksi ni Jehova ti nabautisaran, a kaaduan kadagitoy ti agkunkuna a kameng ti dakkel a bunggoy.

Maysa a Naisangsangayan a Kaadda

Sakbay ti 1935, naginteres nga agbiag nga agnanayon iti Paraiso a daga ti umad-adu a bilang dagidiay nangipangag iti mensahe ti Biblia ken naregtada a mangikaskasaba iti naimbag a damag. Awan tarigagayda a mapan idiay langit, ta saan ida nga impaayan ti Dios iti namnama nga agbiag idiay langit. Ti panangipabigbigda a kameng ida ti dakkel a bunggoy ti sabsabali a karnero ipakitana a gistay malpasen idi 1935 ti panangayab iti 144,000 a napulotan a Kristiano.​—Apocalipsis 7:4.

Idi bimtak ti Gubat Sangalubongan II, inkagumaan ni Satanas a Diablo a pasardengen ti pannakaurnong dagidiay mangbukel iti dakkel a bunggoy. Naipawil iti adu a pagilian ti trabaho a panangikasaba iti Pagarian. Bayat dagidi nalidem nga aldaw, ken sakbay unay ti ipapatayna idi Enero 1942, kinuna ni J. F. Rutherford: “Kasla saan sa met a dumakkel ti ‘dakkel nga umariwekwek.’”

Ngem gapu iti pamendision ti Dios, nagbaliw ti bambanag. Bayat a ‘sitatakderda a naan-anay ken addaan natibker a panamati,’ itungtungpal dagiti napulotan ken ti kakaduada, ti sabsabali a karnero, ti rebbengen nga agaramid kadagiti adalan. (Colosas 4:12; Mateo 24:14; 28:19, 20) Idi 1946, ti bilang dagiti Saksi ni Jehova a mangaskasaba iti sangalubongan ket 176,456​—kaaduan kadagitoy ket kameng ti dakkel a bunggoy. Idi 2000, nasurok nga 6,000,000 a Saksi ti simamatalek nga agserserbi ken Jehova iti 235 a pagilian​—pudno a dakkel a bunggoy! Ket agtultuloy pay nga umad-adu.