Kasapulan ti Tulong Tapno Maawatan ti Biblia
NAISALSALUMINA a libro ti Biblia. Sigun kadagiti nangisurat iti dayta, pinaltiingan ida ti Dios, ket ti linaonna mangipaay iti nawadwad a pammaneknek a pudno a naipaltiing dayta. (2 Timoteo 3:16) Malaksid iti dadduma pay a banag, ipakita ti Biblia no sadino ti nagtaudantayo, no apay nga addatayo, ken no ania ti masakbayantayo. Nalawag a maysa dayta a libro a maikari a basaentayo!
Mabalin a pinadasmon a binasa ti Biblia ngem marigatanka a mangtarus. Nalabit dimo ammo no sadino ti pakasarakam kadagiti sungbat dagiti saludsodmo. No kasta, saanka nga agmaymaysa. Kasta ti kasasaad ti maysa a lalaki idi umuna a siglo. Naggapu idiay Jerusalem ket nakakaruahe nga agawid idin idiay Etiopia a pagilianna. Sipipigsa a basbasaen ti opisial nga Etiope ti libro ti Biblia nga Isaias, a naisurat nasurok a pito gasut a tawen sakbayna.
Pagammuan, kinablaawan ti maysa a lalaki a nagtaray nga immasideg iti karuahe. Felipe ti nagan ti lalaki, a maysa nga adalan ni Jesus. Sinaludsodna iti Etiope: “Ammom kadi nga agpayso no ania ti basbasaem?” Simmungbat ti Etiope: “Pudno unay, kasano koma a maawatak, malaksid no adda nangidalan kaniak?” Ket inawisna ni Felipe a lumugan iti karuahe. Inlawlawag ni Felipe ti kaipapanan ti kasuratan a basbasaen ti lalaki ket impakaammona kenkuana “ti naimbag a damag maipapan ken Jesus.”—Aramid 8:30-35.
No kasano a tinulongan ni Felipe ti Etiope tapno matarusanna ti Sao ti Dios, dagiti Saksi ni Jehova tultulonganda ita dagiti tattao a mangtarus iti Biblia. Maragsakanda met a tumulong kenka. Kaaduanna, kasayaatan ti sistematiko a panagadal iti Biblia, a mangrugi kadagiti pagdamdamuan a Nainkasuratan a sursuro. (Hebreo 6:1) Bayat a rumangrang-ayka, kabaelamton ti mangipauneg iti inawagan ni apostol Pablo a “nakired a taraon”—kayatna a sawen, dagiti naun-uneg a kinapudno. (Hebreo 5:14) Nupay Biblia ti ad-adalem, dagiti dadduma pay a publikasion—a katulongan iti panagadal iti Biblia—matulongandaka a mangbirok ken mangtarus kadagiti teksto ti Biblia a mainaig iti nadumaduma a topiko.
Kaaduanna, mayurnos ti panagadal iti oras ken lugar a kombeniente kenka. Adda pay ketdi dagiti agadal babaen ti telepono. Saan a maangay ti panagadal iti maysa a klase; pribado dayta nga urnos a mayataday iti personal a kasasaadmo, agraman ti nalikudam ken edukasionmo. Awan ti bayadam iti kasta a panagadal iti Biblia. (Mateo 10:8) Awan dagiti eksamen, ken saanka nga alusiisen. Masungbatan dagiti saludsodmo, ken masursurom no kasano ti umadani iti Dios. Ngem apay a rumbeng nga adalem ti Biblia? Usigem ti sumagmamano a rason no apay a ti panagadal iti Biblia ad-adda a maparagsakna ti biagmo.