Apay nga Adalem ti Biblia?
KABAMBANNUAGAN, naganaygay, edukado, ken nasaliwanwan ti biag ni Bill. Ngem saan a kontento. Awan direksion ti biagna, ket pakariribukanna unay dayta. Iti panangpadasna a mangtakuat iti panggep ti biag, inusigna ti nadumaduma a relihion, ngem saanna a nasarakan ti birbirokenna. Idi 1991 naam-ammona ti maysa kadagiti Saksi ni Jehova, a nangibati kenkuana iti maysa a libro a mangilawlawag no ania ti kuna ti Biblia maipapan iti panggep ti biag. Nayurnos ti panagadal iti Biblia tapno maammuan ni Bill ti maipapan iti daytoy a topiko ken dadduma pay a banag.
Malagip ni Bill: “Iti damo a panagadalmi, ammok a daytoy ti birbirokek agsipud ta kanayonmi nga usaren ti Biblia. Makapagagar unay dagiti sungbat ti Biblia. Kalpasan daydi a panagadal, nagluganak a simmang-at iti bantay, dimsaagak iti trakko, sa nagsangitak iti napigsa gapu iti napalaus a rag-ok. Maragsakanak unay ta masungsungbatan met laengen dagiti saludsodko.”
Siempre, saan nga amin a makasarak iti kinapudno nga adda iti Biblia ket literal nga agsangit gapu iti ragsak. Ngem adu dagiti maragsakan no maammuanda dagiti sungbat ti napapateg a saludsod maipapan iti biag. Kasda la iti lalaki iti pangngarig ni Jesus a nakasarak iti gameng a naikali iti talon. Kinuna ni Jesus: “Gapu iti rag-o nga adda kenkuana mapan ket ilakona ti aniaman a bambanag nga adda kenkuana ket gatangenna dayta a talon.”—Mateo 13:44.
Ti Tulbek ti Addaan Panggep a Biag
Inut-utob ni Bill ti nagpateg a saludsod, Ania ti panggep ti biag? Iti rinibu a tawenen, inkarigatan dagiti pilosopo, teologo, ken sientista a takuaten ti sungbat dayta a saludsod. Di mabilangen dagiti libro nga insurat dagiti tattao a mangpadpadas a mangsungbat iti dayta. Ubbaw ti panagreggetda, ket adu ti mangipagarup a saan a masungbatan dayta a saludsod. Ngem adda sungbat. Nupay nauneg, saan a narikut. Nailawlawag dayta iti Biblia. Ti tulbek ti naragsak, addaan panggep a biag isu daytoy: Masapul nga addaantayo iti umiso a relasion ken ni Jehova, ti Namarsua kadatayo ken nailangitan nga Amatayo. Kasanotay a magun-od dayta?
Adda dua a kasla agsupadi nga aspeto ti iyaadani iti Dios. Dagidiay umadani iti Dios agbuteng ken agayatda kenkuana. Usigentayo ti dua a kasuratan a mangpasingked iti dayta. Idi un-unana a tiempo, ni masirib nga Ari Solomon inadalna a naimbag ti sangatauan ket inrekordna dagiti natakuatanna iti libro ti Biblia nga Eclesiastes. Iti pananggupgopna kadagiti kapaliiwanna, insuratna: “Ti panungpalan ti banag, ti isuamin a nangngeganen, ket: Agbutengka iti pudno a Dios ket salimetmetam dagiti bilinna. Ta daytoy isu ti intero a pagrebbengan ti tao.” (Eclesiastes 12:13) Sumagmamano a siglo kalpasanna, idi adda nagsaludsod no ania ti kangrunaan a bilin iti Linteg a naited ken Moises, insungbat ni Jesus: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.” (Mateo 22:37) Kasla karkarna kadi kenka a rumbeng nga agbutengka iti Dios ken ayatem? Amirisentayo ti kinapateg ti buteng ken ayat ken no kasano nga agdanggay dagitoy a mangpatanor iti makapnek a relasion iti Dios.
No Ania ti Kayat a Sawen ti Panagbuteng iti Dios
Tapno makaay-ayo ti panagserbitayo iti Dios, nasken ti napnuan panagraem a panagbuteng. Kuna ti Biblia: “Ti panagbuteng ken Jehova isu ti punganay ti sirib.” (Salmo 111:10) Insurat ni apostol Pablo: “Itultuloytayo koma ti maaddaan iti di kaikarian a kinamanangngaasi, a babaen iti dayta makaipaaytayo iti sagrado a panagserbi a makaay-ayo iti Dios buyogen ti nadiosan a buteng ken panagamak.” (Hebreo 12:28) Kasta met, nasirmata ni apostol Juan ti maysa nga anghel iti nagtangatangan a mangiwarwaragawag iti naimbag a damag, a kunkunana: “Agbutengkayo iti Dios ket idayawyo.”—Apocalipsis 14:6, 7.
Ti kastoy a panagbuteng iti Dios, a nasken unay tapno maaddaan panggep ti biag, ket saan a daydiay panagamak a napakuyogan iti panagsidduker. Mabalin nga agsiddukertayo no butbutngennatayo ti narungsot ken napeggad a kriminal. Ngem ti panagbuteng iti Dios—wenno nadiosan a buteng—ket nauneg a panagraem iti Namarsua. Ramanenna met ti umiso a panagbuteng a mangpaluksaw iti Dios gapu ta isu ti Katan-okan nga Ukom ken Mannakabalin-amin, nga addaan agpadpada iti pannakabalin ken autoridad a mangdusa kadagidiay agsukir.
Agdanggay ti Buteng ken Ayat
Nupay kasta, di kayat ni Jehova nga agserbi kenkuana dagiti tattao gapu laeng ta maamakda kenkuana. Ni Jehova ket kangrunaanna maysa a Dios ti ayat. Natignay ni apostol Juan a nangisurat iti kastoy: “Ti Dios ket ayat.” (1 Juan 4:8) Napnuan ayat ti pannakilangen ni Jehova a Dios iti sangatauan, ket kayatna a sumubad dagiti tattao babaen ti panangayatda met kenkuana. Ngem kasano nga agtunos ti kasta nga ayat ken ti nadiosan a buteng? Kinapudnona, agkanaig unay dagitoy. Insurat ti salmista: “Ti kinasinged ken Jehova kukua dagidiay agbuteng kenkuana.”—Salmo 25:14.
Panunotenyo laengen ti panagraem ken panagamak ti maysa nga ubing iti nabileg ken masirib nga ama. Kaskasdi, ti kasta nga ubing subadanna ti ayat ni amana. Agtalek iti amana ken agpaiwanwan kenkuana, a mangnamnama a pagimbaganna dayta. Kasta met, no ayaten ken agbutengtayo ken ni Jehova, agtulnogtayo kenkuana, ket agpaay daytoy a pagimbagantayo. Imutektekam ti kinuna ni Jehova maipapan kadagiti Israelita: “No koma laeng patanorenda nga agbuteng kaniak daytoy a pusoda ken mangsalimetmet a kanayon iti amin a bilbilinko, tapno naimbag ti lak-amda ken ti annakda agingga iti tiempo a di nakedngan!”—Deuteronomio 5:29.
Wen, mangiturong ti nadiosan a buteng, saan nga iti pannakaadipen, no di ket iti wayawaya, saan nga iti ladingit no di ket iti rag-o. Maipapan ken Jesus, kastoy ti impadto ni Isaias: “Addaanto iti ragsak iti panagbuteng ken Jehova.” (Isaias 11:3) Ken insurat ti salmista: “Naragsak ti tao nga agbuteng ken Jehova, a kadagiti bilinna naragsakan iti kasta unay.”—Salmo 112:1.
Nalawag a ditay masursuro a pagbutngan wenno ayaten ti Dios no ditay am-ammo. Dayta ti gapuna a nagpateg ti panagadal iti Biblia. Ti kasta a panagadal tulongannatayo a mangtarus iti personalidad ti Dios ken mangapresiar iti kinasirib ti panagpaidalan kenkuana. Bayat a sumingsingedtayo iti Dios, kayattay nga aramiden ti pagayatanna ken magutugottayo a mangtungpal kadagiti bilinna, ta ammotayo a pagsayaatantayo dagitoy.—1 Juan 5:3.
Makaparagsak no ammo ti maysa nga isu ket adda iti umiso a dana ti biag. Pudno daytoy ken Bill, a nadakamat iti pangrugian. Iti di pay nabayag, kinunana: “Iti panaglabas ti siam a tawen manipud iti damo a panagadalko iti Biblia, simmayaat ti relasionko ken Jehova. Ti damo a napalaus a rag-o a nariknak ket nagbalin a napaypayso a naragsak a wagas ti panagbiag. Kanayonen a positibo ti panangmatmatko iti biag. Napno dagiti aldawko iti makapnek nga aramid, saan nga iti ubbaw a panangsapul iti ragragsak. Nagbalin ni Jehova kaniak a napaypayso a persona, ket ammok a talaga a maseknan iti pagimbagak.”
Iti sumaganad nga artikulo, usigentayo pay no kasano a ti pannakaammo ken Jehova ket mangyeg iti rag-o ken agpaay a pagimbagan dagidiay agbiag a mayannurot iti dayta.
[Blurb iti panid 5]
Ti iyaadani iti dios kaipapananna ti panagayat ken panagbutengtayo kenkuana
[Ladawan iti panid 6]
Naragsak ni Jesus iti panagbutengna ken Jehova