Salsaludsod Dagiti Agbasbasa

Iti 1 Pedro 4:3, mabasatayo a naminsan nakiraman dagiti dadduma a Kristiano iti “maiparit nga idolatria.” Saan aya nga amin nga idolatria ket maiparit ken kondenaren ti Dios?

Wen, amin nga idolatria ket maiparit iti panangmatmat ti Dios. Dagidiay mangsapsapul iti anamongna saanda a mabalin ti makiraman iti idolatria.​—1 Corinto 5:11; Apocalipsis 21:8.

Nupay kasta, agparang a tuktukoyen ni apostol Pedro ti idolatria iti naiduma a panangmatmat. Maysa a rason, iti adu a nagkauna a nasion, ti idolatria ket agpadpada a gagangay ken saan nga iparit dagiti autoridad. Kayatna a sawen, ti linteg ti pagilian saanna nga iparit ti kasta nga idolatria. Dadduma nga idolatria ket paset pay ketdi ti pagannurotan ti pagilian wenno ti gobierno. Iti dayta nga anag, nakiraman ti dadduma iti ‘idolatria a saan nga iparit ti linteg’ sakbay a nagbalinda a Kristiano. (New World Translation, 1950 nga edision) Kas pagarigan, ammotayo a nangibangon ni Ari Nabucodonosor ti Babilonia iti idolatroso a ladawan a balitok, ngem dagiti adipen ni Jehova a da Sidrac, Mesac ken Abednego nagtukiadda nga agdayaw iti dayta.​—Daniel 3:1-12.

Iti sabali a panangmatmat, adu nga idolatroso a ritual ti nangiraman iti ar-aramid nga agdadata a maikaniwas iti aniaman a linteg ti nakaparsuaan ken moral a rikna a nagtaud iti natawid a konsiensia. (Roma 2:14, 15) Nagsurat ni apostol Pablo maipapan kadagiti nagrakaya nga ar-aramid a “maikaniwas iti nakaparsuaan” ken “naalas,” ket masansan a nagramuten dagitoy kadagiti narelihiosuan a ritual. (Roma 1:26, 27) Dagiti lallaki ken babbai a makiramraman iti ilegal nga idolatria ket saanda nga ipangpangag ti iparparit ti linteg ti nakaparsuaan. Talaga a maitutop a dagiti agbalin a Kristiano panawanda dagita a rinuker nga ar-aramid.

Kanayonanna, kinondenar ni Jehova a Dios dagiti kasta nga idolatria a gagangay kadagiti saan a Judio. Gapuna, dagitoy ket maikaniwas.a​—Colosas 3:5-7.

[Footnote]