Report Dagiti Manangiwaragawag iti Pagarian

Pinunas ti Dios Dagiti Luana

SIBABAKNANG a mabendisionan dagiti tattao a mangitunos iti biagda kadagiti linteg ken prinsipio ni Jehova. Nupay saan a kanayon a nalaka ti agbalbaliw, adda magun-odan a tulong ken pammaregta. (Salmo 84:11) Ipakita daytoy ti sumaganad a kapadasan manipud Abagatan a Daya nga Asia.

Bayat nga agbakbakasion ti maysa a Saksi a taga Francia, nakisarita iti maysa nga akinkukua iti pagtagilakuan nga agnagan Kima maipapan iti panggep ni Jehova iti daga. Inikkanna met ni Kim iti libro a Mabalinyo ti Agbiag nga Agnanayon iti Paraiso a Daga. Idi suksukimatenna ti libro, nakita ni Kim ti sasao a, “punasennanto ti amin a lua kadagiti matada.” (Apocalipsis 21:4) “Talaga a tinignaynak daytoy a bersikulo,” malagip ni Kim. “Nupay nakaisemak ken makisarsaritaak iti paglakuan nga agmalmalem, asino koma ti makaammo a no makaawidakon idiay balay iti rabii, agsangsangitak agingga a makaturogak?” Impalgakna ti makagapu nga agladladingit, a kunana: “Makikabkabbalayak iti 18 a tawenen iti maysa a lalaki, ket malidlidayak ta dinak kayat a pakasaran. Kayatkon nga isardeng ti kastoy a biag, ngem gapu ta nabayagen a makikabkabbalayak kenkuana, diak maitured.”

Di nagbayag kalpasanna, immanamong ni Kim a makipagadal iti Biblia iti maysa kadagiti Saksi ni Jehova nga agnagan Linh. “Magagaranak a mangyaplikar kadagiti sursuro ti Biblia,” kuna ni Kim. “Kas pagarigan, insardengkon ti agdayaw kadagiti inapok, nupay nagbanag daytoy iti ibubusor ti pamiliak. Kasta met, pinadasko a pagbalinen a legal ti panagdennami, ngem nagkedked ti kabbalayko. Iti daytoy narigat a kasasaad, nagtultuloy a nagipatulod ti Saksi a taga Francia kadagiti publikasion ti Biblia, ken kasta unay ti panangparparegta kaniak ni Linh. Ti kinaanus ken naayat a suporta dagitoy a kakabsat a babbai ti nakatulong kaniak a nagtultuloy agingga a naamirisko ti pudpudno a kinatao ti kabbalayko. Natakuatak a 5 gayamen ti ‘asawana’ ket 25 ti annakna! Daytoy ti nangpatured kaniak a mangpanaw kenkuana.

“Saan a nalaka ti pumanaw iti nalawa ken komportable a balay sa mapan iti bassit nga apartment. Kasta met a pilpilitennak ti dati a kabbalayko nga agtiponkami manen, nga uray la pinangtaannak a dadaelenna ti itsurak babaen ti asido no agkedkedak. Iti tulong ni Jehova, nabaelak nga inaramid ti umiso.” Nagtultuloy a rimmang-ay ni Kim ket kamaudiananna nabautisaran idi Abril 1998. Mainayon pay, dua kadagiti kakabsatna a babbai ken ti anakna a tin-edyer ti makipagad-adalen iti Biblia kadagiti Saksi ni Jehova.

“Ipagarupko idi nga awanen a pulos ti namnama a sumayaat pay ti biagko,” kuna ni Kim. “Ngem ita, naragsakakon, ken saanakon nga agsangsangit iti rabii. Pinunasen ni Jehova ti lulua kadagiti matak.”

[Footnote]