Ania ti Adda Napaypayso a Pategna?
Makaparagsak ti maaddaan iti banag a pudno a napateg. Ngem ania koma dayta? Dakkel a kantidad ti kuarta? Nangina wenno naisalsalumina nga alahas? Kinalatak ken kinatan-ok? Adu a tao ti mangipatpateg unay kadagita. No adda dagita, adda ti sustento, nanamnam-ay ti biag, wenno mapennek ti tarigagay a mabigbig ken adda ti maragpatna. Pagregreggetantayo kadi a gun-oden ti kakasta a bambanag, a namnamaentayo a babaen kadagita matungpal dagiti kalat ken arapaaptayo iti masanguanan?
KAADUANNA, ipateg dagiti tattao ti banag no kasapulanda dayta wenno pennekenna ti personal a tarigagayda. Maragsakantayo kadagiti banag a mangted iti kinanam-ay ken mangipasigurado iti natalged a masakbayan. Tagipatgentayo dagiti banag a mangyeg iti madagdagus a gin-awa, liwliwa, wenno pannakabigbig. Ngem parparawpaw ken di nainsiriban ti panangibaga a napateg ti maysa a banag a maibasar kadagiti agbaliwbaliw a tarigagay wenno paginteresan. Iti kinapudnona, pudno a napateg ti maysa a banag no maawatantayo a dayta ti kapatgan a kasapulantayo.
Ania ti kapatgan a kasapulantayo? Awan ti makuna a napateg no awan ti kangrunaan a banag—ti biag. No awan ti biag, awantayo. Insurat ni Ari Solomon iti nagkauna nga Israel: “No maipapan kadagiti natay, saanda a pulos sipapanunot iti aniaman . . . Awan ti aramid wenno uray gakat wenno uray pannakaammo wenno uray sirib idiay Sheol [gagangay a tanem ti sangatauan].” (Eclesiastes 9:5, 10) No mataytayo, kapilitan a panawantayo ti amin nga ik-ikutantayo. No kasta, ti kapatgan a kasapulantayo ket ti pananggun-od iti banag a mangtaginayon iti biagtayo. Ania dayta?
Ania ti Mangtaginayon iti Biagtayo?
“Ti sirib agpaay a salaknib,” kinuna ni Ari Solomon. (Eclesiastes 7:12) No adda umdas a kuartatayo, makagatangtayo iti taraon ken maaddaan iti komportable a pagtaengan. Matagiragsaktayo ti mapan iti adayo a luglugar no adda kuartatayo. Maited ti kuarta dagiti kasapulantayo no saantayon a makapagtrabaho gapu iti kinalakay wenno an-anayen. Adu ti pagimbagan ti adda ti kuartana. Kaskasdi, saan a mataginayon ti kuarta ti biagtayo. Imbalakad ni apostol Pablo ken ni Timoteo: “Ibilinmo kadagidiay babaknang itoy agdama a sistema ti bambanag a saanda koma a napalangguad, ken isadagda ti namnamada, saan nga iti pagduaduaan a kinabaknang, no di ket iti Dios.” (1 Timoteo 6:17) Ti amin a kuarta ditoy lubong saannatayo a maipaayan iti biag.
Usigenyo ti kapadasan ti maysa a lalaki nga agnagan Hitoshi. Yantangay napadakkel iti pamilia a nakurapay, tarigagayan unay ni Hitoshi ti bumaknang. Mamati unay daytoy iti bileg ti kuarta nga impapanna a magatang ti kuarta uray ti panagayat ken kinasungdo dagiti tattao. Kalpasanna, immay ti maysa a lalaki iti pagtaengan ni Hitoshi ken nagsaludsod no ammona a natay ni Jesu-Kristo gapu kenkuana. Daytoy a saludsod ti namagpanunot ken ni Hitoshi agsipud ta impapanna nga awan ti mayat a matay maipaay iti tao a kas kenkuana. Timmabuno iti palawag publiko a naibatay iti Biblia ket nasdaaw a nakangngeg iti balakad a ‘salimetmetan ti simple a mata.’ Inlawlawag ti ispiker a ti “simple” a mata ket daydiay kumitkita iti masanguanan ken naipamaysa kadagiti naespirituan a bambanag. (Lucas 11:34) Imbes nga agbannog a manggun-od iti kuarta, inrugi ni Hitoshi nga ipangpangruna iti biagna dagiti naespirituan a banag.
Mangipaay met dagiti material a sanikua iti kinatalged ken seguridad. Saantayo a maringgoran iti inaldaw a pakasapulantayo no nanam-aytayo. Makapagpannakkeltayo no napintas ti pagtaengantayo iti makaay-ayo a lugar. Mabalin a dayawendatayo dagiti sabsabali no naestilo dagiti kawes ken naranga ti lugantayo.
Maysa a bendision a ‘makita ti imbag iti isuamin a napinget a panagtrabahotayo.’ (Eclesiastes 3:13) Ken no adda sobsobratayo, ‘makapagnam-ay, makapangan, makainum, ken makapagragragsak’ dagiti ing-ingungotentayo iti biag. Nupay kasta, aglabas ti pateg dagiti material a banag. Idi namallaag ni Jesus maipapan iti kinaagum, kinunana: “Uray no addaan kinaruay ti maysa a tao ti biagna saan nga agtaud iti bambanag nga ik-ikutanna.” (Lucas 12:15-21) Kasanoman ti kaadu wenno kinapateg ti ik-ikutantayo, saanna a magarantisaran ti biagtayo.
Kas pagarigan, ni Liz ket nakiasawa iti nabaknang. Insalaysayna: “Addaankami iti napintas a balay ken dua a lugan, ken gapu ta adu ti kuartami, nawayakami a mangtagiragsak iti aniaman a material banag a maipaay ti lubong . . . Kasla karkarna ngem pakadanagak pay laeng ti kuarta.” Inlawlawagna: “Adu ti mapukawmi. Kasla napegpeggad ti kasasaadmo no ad-adu ti sanikuam.”
Adu met ti napalalo ti panangipategda iti kinalatak ken kinatan-ok agsipud ta mangipaay dagitoy iti dayaw. Ap-apalan dagiti tattao ita ti naballigi a karera kas maysa a dakkel a gapuanan. Mabalin a lumatak ti nagantayo no patanorentayo dagiti naisalsalumina a saguday wenno paglaingantayo. Mabalin a dayawendatayo ti sabsabali, nangato ti panangikabilanganda kadagiti kapanunotantayo, ken sipapanunotda a mangay-ayo kadatayo. Mabalin a makaparagsak ken makapnek amin dagitoy. Ngem inton agangay, aglabasda. Adda ken ni Solomon ti amin a dayag ken bileg a mabalin a magun-od ti maysa nga ari, ngem insennaayna: “Daydiay masirib saan a malaglagip nga ad-adda ngem daydiay maag . . . Tunggal maysa pudno a malipatan.” (Eclesiastes 2:16) Saan a biag ti gunggona ti kinalatak wenno kinatan-ok.
Ti eskultor nga agnagan Celo tinagipategna unay ti banag nga adayo a napatpateg ngem kinalatak. Gapu ta nalaing, nakualipikar iti panagadal a nangpasayaat kadagiti abilidadna. Di nagbayag, ti media ken dagiti kritiko iti arte pinadayawanda ti obrana. Adu kadagiti kitikitna ti naipabuya kadagiti kangrunaan a siudad ti Europa. Kinuna ni Celo: “Aklonnek a ti arte ti kapatgan idi a banag iti biagko. Nupay kasta, naamirisko a ti panangitultuloyko iti karerak ket kaasping ti panagserbi iti dua nga apo. (Mateo 6:24) Patiek a ti panangikasaba iti naimbag a damag ti Pagarian ti Dios ti kapatgan a banag a maaramidko. Isu nga inkeddengko nga isardeng ti trabahok a kas maysa nga eskultor.”
Ania ti Kapatgan?
Yantangay awan ti aniaman a napateg no awan ti biag, ania ti mabalintay a gun-oden a mangipasigurado iti panagtalinaedtayo a sibibiag? Ni Jehova a Dios ti gubuayan ti amin a biag. (Salmo 36:9) Wen, “babaen kenkuana addaantayo iti biag ken aggunaytayo ken addatayo.” (Aramid 17:28) Itdenna ti agnanayon a biag kas sagut kadagiti ipatpategna. (Roma 6:23) Ania ti masapul nga aramidentayo tapno maikaritayo nga umawat iti daytoy a sagut?
Maawattayo ti sagut nga agnanayon a biag no addaantayo iti nasinged a relasion ken Jehova. No kasta, napatpateg ti anamongna ngem ti aniaman a mabalintay a matagikua. No adda kadatayo dayta, mainanamatayo ti pudpudno ken agnanayon a kinaragsak. Ngem no awan ti anamong ti Dios, agnanayonto a mapukawtayo. Gapuna, nakapatpateg ti aniaman a tumulong kadatayo a maaddaan iti nasayaat a relasion ken Jehova.
No Ania ti Masapul nga Aramidentayo
Agpannuray ti balligitayo iti pananggun-odtayo iti pannakaammo. Ti Sao ni Jehova, ti Biblia, ti gubuayan ti umiso a pannakaammo. Daytoy laeng ti mangibaga no ania ti masapul nga aramidentayo tapno maay-ayotayo ti Dios. Nasken ngarud nga adalentayo a naimbag ti Kasuratan. Maaddaantayo iti ‘pannakaammo a kaipapananna ti agnanayon a biag’ no siaanep nga ikagumaantayo nga adalen ti amin a kabaelantayo maipapan ken Jehova a Dios ken ni Jesu-Kristo. (Juan 17:3) Ti kasta a pannakaammo ket gameng a rumbeng nga ipateg!—Proverbio 2:1-5.
Ti pannakaammo a magun-odtayo iti Sao ti Dios tulongannatayo a mangaramid iti sumaganad nga addang—ti panangalagad iti pammati ken Jesu-Kristo. Imbilin ni Jehova nga amin nga umasideg kenkuana masapul nga umasidegda babaen ken Jesus. (Juan 14:6) Kinapudnona, “awan ti asinoman a sabali a pakaisalakanan.” (Aramid 4:12) Inton kamaudiananna, ti pannakaisalakantayo ket agpannuray, saan nga iti ‘pirak wenno balitok . . . , no di ket iti napateg a dara ni Kristo.’ (1 Pedro 1:18, 19) Masapul nga ipakitatayo ti pammatitayo babaen ti panamati kadagiti sursuro ni Jesus ken panangsurot iti ulidanna. (Hebreo 12:1-3; 1 Pedro 2:21) Ken anian a nagpateg ti datonna! Ti agnanayon a masanguanan ti isuamin a tattao ket agpannuray iti pannakaipakat dagiti gunggona nga itden ti datonna. No naan-anay a maipakat dayta kadatayo, maipaayantayo iti pudno a napateg a sagut a biag nga agnanayon.—Juan 3:16.
Kinuna ni Jesus: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.” (Mateo 22:37) Ti panangayat ken Jehova kaipapananna a “tungpalentayo dagiti bilinna.” (1 Juan 5:3) Ipaannurot dagiti bilinna nga agtalinaedtayo a naisina iti lubong, taginayonentayo ti nalinteg a kondukta, ken sisusungdo nga itandudotayo ti Pagarianna. Dayta ti pamay-an a ‘pilientayo ti biag’ imbes nga ipapatay. (Deuteronomio 30:19) No ‘umadanitayo iti Dios, isu umadaninto kadatayo.’—Santiago 4:8.
Ti pammasiguro nga adda kadatayo ti anamong ti Dios ket adayo a napatpateg ngem ti amin a gameng ti lubong. Dagidiay addaan iti dayta ti kababaknangan a tattao ditoy daga! Gapuna, ikagumaantay koma a gun-oden ti gameng a napaypayso ti pategna—ti anamong ni Jehova. Wen, ipangagtayo daytoy a balakad ni apostol Pablo: “Surotem ti kinalinteg, nadiosan a debosion, pammati, ayat, panagibtur, kinaalumamay ti kababalin. Makirupakka iti nasayaat a dangadang iti pammati, petpetam a sititibker ti agnanayon a biag.”—1 Timoteo 6:11, 12.
[Dagiti Ladawan iti panid 21]
Ania ti napateg unay kadakayo? Kuarta, material a sanikua, kinalatak, wenno sabali a banag?
[Ladawan iti panid 23]
Nasken nga adalentay a naimbag ti Kasuratan