Salsaludsod Dagiti Agbasbasa
Ania ti kayat a sawen ti panagdayaw ken Jehova a “buyogen ti espiritu”?
Idi kaskasabaan ni Jesu-Kristo ti maysa a Samaritana nga immay sumakdo iti bubon ni Jacob iti asideg ti siudad ti Sicar, kinunana: “Ti Dios maysa nga Espiritu, ket dagidiay agdaydayaw kenkuana masapul nga agdayawda a buyogen ti espiritu ken kinapudno.” (Juan 4:24) Masapul a maannurot ti pudno a panagdayaw ‘buyogen ti kinapudno,’ kayatna a sawen, masapul a maitunos iti impalgak ni Jehova a Dios iti Biblia maipapan kenkuana ken kadagiti panggepna. Ti panagserbitayo iti Dios masapul met a buyogen ti espiritu iti anag a narayray wenno naregta, a ginutugot ti puso a napno iti ayat ken pammati. (Tito 2:14) Nupay kasta, ipakita ti konteksto a ti kinuna ni Jesus maipapan iti ‘panagdayaw iti Dios a buyogen ti espiritu’ ket saan laeng a mainaig iti kasasaad ti panunot a kabuyog ti panagserbitayo ken Jehova.
Saan a maipapan iti kaadda wenno kaawan ti regta iti panagdayaw ti kayat a sawen ni Jesus idi kasarsaritana ti babai iti abay ti bubon. Uray ti di umiso a panagdayaw ket mabalin a mabuyogan met iti regta ken debosion. Imbes ketdi, kalpasan ti panangibagana a saan nga iti maysa a bantay idiay Samaria wenno iti templo sadi Jerusalem ti pagdayawan iti Ama—nga agpada a literal a disso—impakita ni Jesus ti baro a wagas ti panagdayaw a naibatay iti pudno a kasasaad ti Dios. (Juan 4:21) Kinunana: “Ti Dios maysa nga espiritu.” (Juan 4:24) Ti Dios ket saan a pisikal ken di makita wenno maarikap. Saan a naisentro ti panagdayaw kenkuana iti literal a templo wenno bantay. No kasta, tuktukoyen ni Jesus ti maysa nga aspeto ti panagdayaw nga awan pakainaiganna kadagiti banag a makita.
Malaksid iti panagdayaw a buyogen ti kinapudno, ti makaay-ayo a panagdayaw ket masapul nga iwanwan met ti nasantuan nga espiritu—ti di makita nga aktibo a puersa ti Dios. Insurat ni apostol Pablo: “Ti [nasantuan nga] espiritu sukimatenna ti amin a bambanag, uray pay ti nauneg a bambanag ti Dios.” Kinunana pay: “Inawattayo, saan a ti espiritu ti lubong, no di ket ti espiritu nga aggapu iti Dios, tapno maammuantayo ti bambanag a siaasi nga impaay kadatayo ti Dios.” (1 Corinto 2:8-12) Tapno maanamongan ti panagserbitayo iti Dios, masapul nga adda kadatayo ti espirituna ken agpaidalantayo iti dayta. Kanayonanna, nasken a ti espiritutayo, wenno ti panagpampanunottayo, ket maitunos iti espiritu ti Dios babaen ti panagadal ken panangtungpal iti Saona.
[Ladawan iti panid 28]
Agdayawkayo iti Dios “a buyogen ti espiritu ken kinapudno”