Mabalinyo ti Maaddaan iti Pudno a Pammati

Idi agtawen ni Sarah Jayne iti 19, naammuanna nga adda kanserna iti aanakan. Kalpasan ti operasion, simmayaat ti panagriknana ket nangnamnama a nasayaat ti masakbayanna. Kinapudnona, nangnamnama unay ta idi agtawen iti 20 nakinobio ket nagplano para iti kasarna. Iti dayta met laeng a tawen nagsubli ti kanserna, ket naammuanna nga addaan laengen iti sumagmamano a lawas nga agbiag. Natay ni Sarah Jayne idi Hunio 2000, sakbay unay a sumagpat iti tawenna a 21.

TI NATALINGENNGEN a panagtalek ni Sarah Jayne iti masanguanan, a nabuyogan iti nauneg a pammatina iti Dios ken iti Saona, ti Biblia, ti namagsiddaaw kadagiti bumisbisita kenkuana iti ospital. Iti laksid ti nakas-ang a trahedia a sangsanguenna idi, mangnamnama unay iti panagungar​—a makitananto manen amin a gagayyemna. (Juan 5:28, 29) Kinunana: “Agkikitatayto amin iti baro a lubong ti Dios.”

Ibilang ti dadduma nga ubbaw ti kasta a pammati. Insaludsod ni Ludovic Kennedy: “Ania pay koma ti biag kalpasan ti ipapatay no di pammati laeng dagiti managbuteng, nga iti maudi nga uni ti trumpeta addanto dagiti bibingka ken serbesa, agraman ti naasinan a bugi ken uni dagiti trumpeta nga agpaay met kadakuada, nga iti maysa nga aduan bulbulong nga Eden agraragsakdanto a kadua dagiti immunan a natay ken dagidiay sumaruno a matay?” Sumraentayo dayta babaen ti maysa a saludsod. Ania ti ad-adda a nainkalintegan​—patientayo a “daytoy a biag ti kakaisuna nga adda kadatayo, isut’ gapuna a naan-anay a gundawayantayo dayta,” kas kinuna ni Kennedy, wenno mamatitayo iti Dios ken iti panagungar nga inkarina? Pinili ni Sarah Jayne ti naud-udi. Kasano a napatanorna ti kasta a pammati?

‘Sapulenyo ti Dios . . . ket Pudno a Masarakanyo’

Tapno mapatanor ti pammati ken panagtalek iti maysa a tao, masapul nga am-ammuenyo ken adalenyo no kasano ti panagpampanunot ken panagtigtignayna. Mairaman iti daytoy ti puso ken panunot. Kasta met laeng no iti panangpatanor iti pudno a pammati iti Dios. Nasken nga am-ammuenyo, adalenyo dagiti kualidad ken ti personalidadna, takuatenyo no mapagtalkan ken mapagpiaran iti amin a sinao ken inaramidna.​—Salmo 9:10; 145:1-21.

Ipagarup dagiti dadduma nga imposible daytoy. No adda man a talaga ti Dios, kunada nga isu ket adayo unay ken misterioso. Isaludsod dagiti managduadua: “No pudno ti Dios iti panangmatmat dagiti Kristiano a kas ken ni Sarah Jayne, apay a di agpabigbig met kadatayo?” Ngem talaga kadi nga adayo unay ken saan a masapulan ti Dios? Iti palawagna kadagiti pilosopo ken mamasirib idiay Atenas, kinuna ni apostol Pablo a “ti Dios a nangaramid iti lubong ken amin a bambanag nga adda iti dayta” impaayna met ti amin a kasapulan tapno “sapulenda . . . ket pudno a masarakanda.” Kinaagpaysuanna, kinuna ni Pablo: “Saan nga adayo iti tunggal maysa kadatayo.”​—Aramid 17:24-27.

Kasanoyo ngarud a ‘masapulan ti Dios . . . ket pudno a masarakanyo’? Naaramid daytoy ti dadduma babaen ti panangpaliiwda laeng iti uniberso. Iti adu, umdasen dayta a pammaneknek ken pamatianda nga adda la ketdi Namarsua.a (Salmo 19:1; Isaias 40:26; Aramid 14:16, 17) Kas ken apostol Pablo, mariknada a “dagiti di makita a kualidad [ti Dios] ket silalawag a makita manipud pannakaparsua ti lubong ken agpatpatuloy, agsipud ta matarusan ida babaen iti bambanag a naaramid, ti mismo nga agnanayon a pannakabalin ken kina-Diosna.”​—Roma 1:20; Salmo 104:24.

Kasapulanyo ti Biblia

Nupay kasta, tapno maaddaankayo iti napaypayso a pammati iti Namarsua, adda pay kasapulanyo nga impaayna. Ania dayta? Ti Biblia​—ti naipaltiing a Sao ti Dios, a nangipalgakanna iti pagayatan ken panggepna. (2 Timoteo 3:16, 17) “Ngem aguray,” kuna ti dadduma, “kasano a patienyo amin nga ibagbaga ti Biblia idinto ta makitkitayo dagiti nakaam-ames a banag nga inaramid dagiti tattao nga agkunkuna a sumursurot iti Biblia?” Pudno nga addaan ti Kakristianuan iti makapakigtot a pakasaritaan iti kinamanaginsisingpet, kinaulpit, ken imoralidad. Ngem makita ti siasinoman a nainkalintegan a tao nga agpampammarang laeng ti Kakristianuan a sumursurot kadagiti prinsipio ti Biblia.​—Mateo 15:8.

Namakdaar a mismo ti Biblia nga adu ti agkuna nga agdaydayawda iti Dios ngem, kinapudnona, ‘paglikudanda uray pay ti makinkukua a nanggatang kadakuada.’ Kinuna ni apostol Pablo a “maigapu kadagitoy mapagsawanto a sibabassawang ti dalan ti kinapudno.” (2 Pedro 2:1, 2) Kinuna ni Jesus a dagitoy ket “agar-aramid ti kinakillo” a nalawag a mailasin babaen kadagiti dakes nga aramidda. (Mateo 7:15-23) Ti panangilaksid iti Sao ti Dios gapu iti dakes a pakarsarsaritaan ti Kakristianuan ket umasping iti panangibelleng iti surat a naggapu iti mapagtalkan a gayyem gapu laeng ta dakes ti pakasarsaritaan ti tao a nangitulod iti dayta.

Imposible ti maaddaan iti pudno a pammati no awan ti Sao ti Dios. Babaen laeng kadagiti binulong ti Biblia nga ipakaammo ni Jehova ti takderna kadagiti banag. Impalgakna ti sungbat dagiti nabayagen a saludsod a kas iti no apay nga impalubosna ti panagsagaba ken ut-ot ken no ania ti aramidenna maipapan iti dayta a kasasaad. (Salmo 119:105; Roma 15:4) Namati ni Sarah Jayne a ti Biblia ti naipaltiing a Sao ti Dios. (1 Tesalonica 2:13; 2 Pedro 1:19-21) Kasano? Saan laeng a gapu ta imbaga dagiti nagannak kenkuana, no di ket gapu ta tiningitingna a naimbag dagiti amin a pammaneknek a mangipakpakita a ti Biblia ket naisalsalumina a palgaak a naggapu iti Dios. (Roma 12:2) Kas pagarigan, napaliiwna ti nabileg nga impluensia ti Biblia iti biag dagidiay mangan-annurot kadagiti prinsipio daytoy. Iti tulong dagiti publikasion kas iti Ti Biblia​—Saot’ Dios wenno Tao?,b siaannad nga inusigna met ti adu nga ebidensia a masarakan a mangpampaneknek a ti Biblia ket impaltiing ti Dios.

“Ti Pammati Sumaruno iti Banag a Nangngeg”

Nupay kasta, saan nga umdas ti basta maaddaan iti Biblia wenno uray ti panamati a daytoy ket naipaltiing. Insurat ni apostol Pablo a “ti pammati sumaruno iti banag a nangngeg.” (Roma 10:17) Ti panagdengngeg iti Biblia, saan laeng a ti basta panangikut iti dayta, ti mangpatanor iti pammati. ‘Denggenyo’ ti ibaga ti Dios babaen ti panangbasa ken panangadal iti Saona. Uray dagiti ubbing kabaelanda nga aramiden daytoy. Kinuna ni Pablo a “manipud kinamaladaga” naisuro “ti nasantuan a sursurat” ken ni Timoteo babaen ti ina ken lolana. Ipasimudaagna kadi daytoy nga adda ti naaramid a panangsabidong iti panunot? Saan! Awan ti aniaman a panangkontrol wenno panangallilaw ken ni Timoteo. ‘Naguyugoy a namati’ iti nangngeg ken nabasana.​—2 Timoteo 1:5; 3:14, 15.

Kasta met ti pannakaguyugoy ni Sarah Jayne. Kas kadagiti taga Berea idi umuna a siglo, ‘inawat[na] ti sao [manipud kadagiti nagannak kenkuana ken dadduma pay a mannursuro] buyogen ti napalalo unay a kinagagar ti panunot.’ Kas maysa nga ubing, awan duadua a naikasigudan a nagtalek iti imbaga dagiti nagannak kenkuana. Idi agangay, bayat a dumakdakkel, saanna a basta inawat ti amin a maisuro kenkuana. ‘Siaannad a sinukimatna ti Kasuratan iti inaldaw no agpayso dagitoy a banag.’​—Aramid 17:11.

Mapatanoryo ti Pudno a Pammati

Mapatanoryo met ti pudno a pammati​—ti kita ti pammati a dineskribir ni apostol Pablo iti suratna kadagiti Hebreo a Kristiano. Kinunana a ti kasta a pammati “isu ti sigurado a panangsegsegga iti bambanag nga in-inanamaen, ti nabatad a parangarang dagiti kinapudno nupay saan a makita.” (Hebreo 11:1) No addaankayo iti kasta a pammati, naan-anay a makasiguradokayo a matungpal amin a namnamaenyo ken segseggaanyo, agraman ti kari ti Dios a panagungar. Makapagtalekkayo a sigurado dagiti kasta a namnama, a saanyo laeng nga ar-arapaapen. Maammuanyo a di pulos napaay ni Jehova a mangtungpal kadagiti karina. (Josue 21:45; 23:14; Isaias 55:10, 11; Hebreo 6:18) Napaypayso kadakayo ti kari ti Dios a baro a lubong a kas man la addan. (2 Pedro 3:13) Ket babaen dagiti mata ti pammati, nalawag a makitayo a ni Jehova a Dios, ni Jesu-Kristo, ken ti Pagarian ti Dios ket kinapudno amin, saan a parparbo.

Saankayo nga agmaymaysa a mangpatanor iti pudno a pammati. Malaksid iti panangtedna iti Saona, impaay met ni Jehova ti sangalubongan a kongregasion Kristiano a naikumit a tumulong kadagiti nasingpet panagpuspusona a tattao a maaddaan iti pammati iti Dios. (Juan 17:20; Roma 10:14, 15) Awatenyo amin a tulong nga ipapaay ni Jehova babaen dayta nga organisasion. (Aramid 8:30, 31) Ken yantangay ti pammati ket maysa a bunga ti nasantuan nga espiritu ti Dios, ikararagyo a kanayon a tulongannakayo dayta nga espiritu a mangpatanor iti pudno a pammati.​—Galacia 5:22.

Saankayo a paupay kadagiti managduadua a mangumsi iti siasinoman a mamati iti Dios ken iti Saona. (1 Corinto 1:18-21; 2 Pedro 3:3, 4) Kinapudnona, nakapatpateg ti pudno a pammati iti panangpabileg iti determinasionyo a maibusor kadagiti kasta a panangatakar. (Efeso 6:16) Natakuatan ni Sarah Jayne a pudno dayta, ket kanayon a pinaregtana dagiti bimmisita kenkuana iti ospital a patanorenda ti pammatida. “Tagikuaenyo ti kinapudno,” kunana. “Adalenyo ti Sao ti Dios. Agtalinaedkayo a nadekket iti organisasion ti Dios. Agkararagkayo a kanayon. Agtalinaedkayo nga aktibo iti panagserbi ken Jehova.”​—Santiago 2:17, 26.

Maysa kadagiti nars ni Sarah Jayne a nakadlaw iti pammatina iti Dios ken iti panagungar ti nagkuna: “Talaga a mamatika iti dayta, saan kadi?” Idi napagsaludsodan no ania ti nangted kenkuana iti kasta nga optimistiko a panangmatmat iti laksid dagiti pakasuotanna, insungbatna: “Ti pammatik ken Jehova. Isu ket pudno a gayyemko, ken ay-ayatek unay.”

[Footnotes]

[Ladawan iti panid 6]

“Manipud kinamaladaga,” naisuro ken ni Timoteo “ti nasantuan a sursurat” babaen ti ina ken lolana

[Ladawan iti panid 6]

Nakomendaran dagiti taga Berea gapu iti inaldaw a panangsukimatda iti Kasuratan

[Credit Line]

Naggapu iti “Photo-Drama of Creation,” 1914

[Dagiti Ladawan iti panid 7]

Ti panagdengngeg ken panangipangag iti Biblia, saan a ti basta panangikut iti dayta, ti mangpatanor iti pammati

[Ladawan iti panid 7]

“Agkikitatayto amin iti baro a lubong ti Dios”