Salsaludsod Dagiti Agbasbasa
Naapektaran kadi ti pannakayinaw ni Jesus gapu iti kinaimperpekto ti birhen idi a ni Maria?
No maipapan iti ‘pannakayanak ni Jesus,’ kuna ti naipaltiing a rekord: “Kabayatan ti tiempo a ni inana a Maria naikari a mayasawa ken Jose, nasarakan a nagsikog babaen iti nasantuan nga espiritu sakbay a napagmaymaysada.” (Mateo 1:18) Talaga a napateg ti akem ti nasantuan nga espiritu ti Dios iti panagsikog ni Maria.
Ngem ni Maria ngay? Nausar kadi ti itlog iti aanakanna bayat ti panagsikogna? Mainaig iti inkari ti Dios kadagiti kapuonan ni Maria—da Abraham, Isaac, Jacob, Juda, ken Ari David—ti ubing a mayanak ket nasken a pudpudno a nagtaud kadakuada. (Genesis 22:18; 26:24; 28:10-14; 49:10; 2 Samuel 7:16) Kasano ngarud a ti ipasngay ni Maria ket maikari a mangtawid kadagidiay inkari ti Dios? Nasken nga isu ket talaga nga anak ni Maria.—Lucas 3:23-34.
Nagparang ti anghel ni Jehova ken ni Maria, a kunkunana: “Dika agbuteng, Maria, ta nakasarakka ti pabor iti Dios; ket, adtoy! iyinawmonto iti aanakam ken ipasngaymonto ti maysa nga anak a lalaki, ket panaganamto iti Jesus.” (Lucas 1:30, 31) Ti pannakayinaw kalikagumanna ti pannakapertilisar ti maysa nga itlog. Agparang a ni Jehova a Dios pinagbalinna a pertilisado ti maysa nga itlog iti aanakan ni Maria, babaen ti panangyakarna iti biag ti bugbugtong nga Anakna manipud iti lubong dagiti espiritu agturong iti lubong dagiti tattao.—Galacia 4:4.
Ti kadi ubing a nayinaw iti kasta a wagas babaen ti imperpekto a babai posible nga agbalin a perpekto ken awanan iti basol iti pisikal a pakabuklanna? Kasano nga agtignay dagiti linteg ti tinawidan no maiyinaw ti maysa a perpekto iti aanakan ti maysa nga imperpekto? Laglagipenyo a nausar ti nasantuan nga espiritu iti pannakayallatiw ti perpekto a puersa ti biag ti Anak ti Dios ken pakaigapuan ti pannakayinaw. Dayta ti nangikkat iti aniaman a kinaimperpekto nga adda iti itlog ni Maria. Iti kasta, napataud ti maysa a genetiko a pakabuklan a perpekto sipud idi damo.
Aniaman ti kasasaad, masiguradotayo a ti panagtignay ti nasantuan nga espiritu ti Dios iti daydi a tiempo pinatalgedanna ti panagballigi ti panggep ti Dios. Inlawlawag ni anghel Gabriel ken ni Maria: “Ti nasantuan nga espiritu umayto kenka, ket ti pannakabalin ti Kangatuan salinongannakanto. Iti dayta met a rason ti mayanak maawaganto iti nasantuan, Anak ti Dios.” (Lucas 1:35) Wen, nagaramid iti mangprotektar a bangen, no ar-arigen, ti nasantuan nga espiritu ti Dios tapno awan ti kinaimperpekto wenno makadangran a puersa a mangmulit iti nabukel a biag sipud pannakayinaw.
Nalawag a ti perpekto a biag ni Jesus ket utangna iti nailangitan nga Amana, saan nga iti asinoman a tao. “Nangisagana [ni Jehova] iti bagi” para kenkuana, ket sipud pannakayinaw ni Jesus, pudno a “di natulawan, naisina kadagiti managbasol.”—Hebreo 7:26; 10:5.
[Ladawan iti panid 19]
“Iyinawmonto iti aanakam ken ipasngaymonto ti maysa nga anak a lalaki”