Report Dagiti Manangiwaragawag iti Pagarian
“Kayatko ti Agserbi iti Dios”
“RUMMUARKAYO kenkuana, tattaok.” Dayta ti nangngeg ni apostol Juan nga impukkaw ti maysa nga anghel idi umuna a siglo K.P. Iti kaaldawantayo, minilion dagiti nasingpet panagpuspusona ti nangipangag ken rimmuar iti “Babilonia a Dakkel,” ti sangalubongan nga imperio ti palso a relihion. (Apocalipsis 18:1-4) Maysa kadakuada ni Wilner a taga Haiti, a nangisalaysay iti kapadasanna.
“Nayanakak idi 1956 iti maysa a pamilia a napeklan a Katoliko, iti bassit nga ili ti St. Marc, Haiti. Iladawanyo ti rag-o ti pamiliak idi napiliak, agraman ti dua a sabali pay a kailiak, a tumabuno iti maysa a seminario idiay St. Michel de l’Atalaye, Haiti. Kalpasanna, idi 1980, naibaonkami idiay Stavelot, Belgium, para iti kanayonan a pannakasanay. Sadiay a nageskuelakami met iti maysa a Katoliko nga unibersidad.
“Magagaranak idi damo a sumrek iti kinapadi. Maysa nga aldaw iti panganan, kinuna ti padi a mangay-aywan iti grupomi nga agbatiak iti sumagmamano a minuto gapu ta adda kayatna nga ibaga kaniak. Anian a pannakaklaatko idi sipaprangka a kinunana a kursonadanak! Liniklikak dagiti pananggandatna ngem naupayakon a naan-anay. Nagsuratak iti pamiliak maipapan iti napasamak ket pimmanawak iti seminario sumagmamano a bulan kalpasanna, nupay saanda a naragsakan. Nakasarakak iti pagdagusak iti purok ket intultuloyko ti nagadal iti sabali a kurso.
“Idi nagsubliak idiay St. Marc, awanen a pulos ti panagtalekko iti Iglesia Katolika. Kaskasdi, kayatko ti agserbi iti Dios, ngem diak ammo no ania ti aramidek. Simrekak iti iglesia a Sabatista, Ebenezer, ken Mormon. Naiwawaak iti naespirituan.
“Nalagipko a bayat ti kaaddak iti seminario idiay Belgium, agbasbasaak idi iti Biblia a Crampon. Natakuatak iti dayta ti nagan ti Dios. Gapuna, inusarko ti naganna sa nagkararagak a sipapasnek iti Dios a tulongannak a mangbirok iti pudno a relihion.
“Di nagbayag kalpasanna, dua kadagiti immakar a kaarrubak ket Saksi ni Jehova. Natalna, managraem, ken nadayawda. Nagustuak ti wagas ti panagbiagda. Maysa nga aldaw, maysa kadagiti Saksi ti nangawis kaniak a tumabuno iti tinawen a Panglaglagip iti ipapatay ni Kristo. Naragsakanak unay iti gimong ket immanamongak a makipagadal iti Biblia kadagiti Saksi. Iti agarup innem a bulan, kombinsidoak a nasarakakon ti umiso a wagas ti panagserbi iti Dios. Indedikarko ti biagko ken Jehova ket nagpabautisarak idi Nobiembre 20, 1988.”
Idi agangay, simrek ni Wilner iti amin-tiempo a serbisio. Ita, agserserbin kas maysa a panglakayen. Siraragsak nga agserserbi iti kongregasion a kadua ti asawana, agraman ti dua nga annakna.
[Ladawan iti panid 9]
Babaen ti panagbasana iti Biblia, natakuatan ni Wilner a Jehova ti nagan ti Dios