Salsaludsod Dagiti Agbasbasa
Umiso kadi ti umadani iti Dios iti kararag uray ditay ibaga ti “iti nagan ni Jesus”?
Ipakita ti Biblia a dagiti Kristiano nga agtarigagay nga umadani ken ni Jehova iti kararag rumbeng nga aramidenda ti kasta iti nagan ni Jesus. Kinuna ni Jesus kadagiti adalanna: “Awan ti umay iti Ama malaksid no baeten kaniak.” Innayonna pay: “Aniaman ti dawatenyo iti naganko, aramidekto daytoy, tapno ti Ama maipadayag koma mainaig iti Anak. No dawatenyo ti aniaman a banag iti naganko, aramidekto dayta.”—Juan 14:6, 13, 14.
Maipapan iti naisangsangayan a saad ni Jesus, kuna ti Cyclopedia of Biblical, Theological, and Ecclesiastical Literature: “Dios laeng ti rumbeng a pagkararagan, babaen ken Jesu-Kristo kas Manangibabaet. Gapuna, amin nga araraw kadagiti santo wenno anghel ket saan laeng nga awan serserbina, no di ket panagtabbaaw. Amin a panagdayaw iti parsua, uray kasano katan-ok dayta, ket idolatria, ken siiinget a naiparit iti sagrado a linteg ti Dios.”
Kasano ngay no ti maysa, kalpasan ti makagunggona unay a kapadasan, kunaenna, “Pagyamanan Jehova” nga awan ti “iti nagan ni Jesus”? Di umiso kadi daytoy? Saan met ketdi a kasta. Ipapantayo a maipasango ti maysa a Kristiano iti di mapakadaan a peggad ket kunaenna: “Jehova, tulongannak!” Saan nga agkedked ti Dios a tumulong iti adipenna gapu laeng iti dina panangibaga “iti nagan ni Jesus.”
Ngem tandaanantayo koma, a ti basta pannakisao iti Dios dina kaipapanan a maysa a kararag dayta. Kas pagarigan, kalpasan ti panangukom ni Jehova kenkuana gapu iti panangpapatayna ken ni Abel a kabsatna, kinuna ni Cain: “Ti dusak gapu iti biddut dakkel unay nga awiten. Adtoy pudno a pagtaltalawennak itoy nga aldaw iti rabaw ti daga, ket manipud iti sanguanam mailingedak; ket agbalinakto a managallaalla ken pugante iti daga, ket sigurado nga asinoman a makasarak kaniak papatayennakto.” (Genesis 4:13, 14) Nupay inturong ni Cain ti sasaona ken Jehova, ti panangipeksana iti rikriknana ket panagasug maipapan iti napait a bunga ti basol.
Kunaen ti Biblia kadatayo: “Ti Dios busorenna dagiti natangsit, ngem mangted iti di kaikarian a kinamanangngaasi kadagiti napakumbaba.” Ti basta pannakisao iti Kangatuan a kas man la maysa laeng a tao ket panangipakita iti kinaawan ti kinapakumbaba. (Santiago 4:6; Salmo 47:2; Apocalipsis 14:7) Kinaawan ti panagraem met no ammo ti maysa ti kunaen ti Sao ti Dios maipapan iti akem ni Jesus ngem igagarana ti agkararag a dina bigbigen ni Jesu-Kristo.—Lucas 1:32, 33.
Di kayat a sawen daytoy a namnamaen ni Jehova ti maysa nga estilo wenno espesipiko a pamay-an no agkararagtayo. Ti napateg isu ti kasasaad ti puso ti maysa a tao. (1 Samuel 16:7) Idi umuna a siglo K.P., ti maysa a Romano nga opisial nga agnagan Cornelio “nagtultuloy nga immararaw iti Dios.” Ni Cornelio a maysa a di nakugit a Gentil, ket saan a dedikado ken Jehova. Nupay saanna a dinakamat ti nagan ni Jesus kadagiti kararagna, “nagpangatoda a kas pakalaglagipan iti sanguanan ti Dios.” Apay? Agsipud ta “ti manangsukimat kadagiti puso,” nakitana a ni Cornelio ket “napeklan a tao ken maysa a managbuteng iti Dios.” (Aramid 10:2, 4; Proverbio 17:3) Idi naammuanna ti maipapan ken “Jesus a taga Nazaret,” immawat ni Cornelio iti nasantuan nga espiritu ken nagbalin a bautisado nga adalan ni Jesus.—Aramid 10:30-48.
Kamaudiananna, saan a dagiti tattao ti mangikeddeng no ania a kararag ti denggen ti Dios. Saan a rumbeng a makonsiensia ti maysa a Kristiano no iti naminsan a nagkararag iti Dios ket nalipatanna nga usaren ti sasao a kas ti “iti nagan ni Jesus.” Naan-anay nga ammo ni Jehova ti limitasiontayo ken kayatnatayo a tulongan. (Salmo 103:12-14) Makainanamatayo a no ipakitatay ti pammatitayo iti “Anak ti Dios . . . , uray ania ti dawatentayo maitunos iti pagayatanna, denggennatayo.” (1 Juan 5:13, 14) Nupay kasta, nangnangruna no ibagida dagiti sabsabali iti publiko a kararag, rumbeng a bigbigen dagiti pudno a Kristiano ti nadakamat iti Kasuratan nga akem ni Jesus iti panggep ni Jehova. Ken situtulnog nga ikagumaanda nga idayaw ni Jesus babaen ti panangiturong kadagiti kararagda iti Dios baeten kenkuana.