Salsaludsod Dagiti Agbasbasa

Maysa kadi a kita ti panaglaok ti pammati (interfaith) ti pananggatang kadagiti pasdek ti sabali a narelihiosuan a grupo sa maaramid a Kingdom Hall?

Kaaduanna, liklikan dagiti Saksi ni Jehova ti maaddaan iti kasta a pannakinaig iti dadduma a relihion. Kaskasdi, mabalin a saan a panaglaok iti pammati ti kasta a transaksion. Mamatmatan dayta kas maminsan laeng a transaksion iti negosio. Ti lokal a kongregasion dagiti Saksi ni Jehova ket saan a makitintinnulong iti sabali a relihion tapno mangbangon iti lugar a pagdayawan nga usaren ti agsinnumbangir a grupo.

Ania ti matmatan ni Jehova a panaglaok ti pammati? Usigenyo ti bilin ni apostol Pablo: “Dikay agbalin a di agkaasmang a naisangol kadagiti di manamati. Ta ania ti pagkaduaan ti kinalinteg ken kinakillo? Wenno ania ti pakiramanan ti lawag iti sipnget? Kanayonanna, ania ti pagtunosan da Kristo ken Belial? Wenno ania ti pakiramanan ti matalek a tao iti di manamati? Ket ania ti pakitunosan ti templo ti Dios kadagiti idolo? . . . ‘Gapuna rummuarkayo manipud iti tengngada, ket isinayo ti bagbagiyo,’ kuna ni Jehova, ‘ket isardengyo a sagiden ti di nadalus a banag’; ‘ket awatenkayto.’” (2 Corinto 6:14-17) Ania ti kayat a sawen ni Pablo kadagiti sasao a ‘panagkadua’ ken ‘pannakiraman’?

Ti panagkadua a dakdakamaten ni Pablo ket nalawag a tumukoy iti panagdayaw ken naespirituan a pannakinaig kadagiti managrukbab iti idolo ken di manamati. Pinakdaaranna dagiti taga Corinto maibusor iti ‘pannakiraman iti lamisaan dagiti sairo.’ (1 Corinto 10:20, 21) No kasta, maaramid ti panaglaok ti pammati no adda pannakiraman iti panagdayaw wenno pannakikadua iti naespirituan kadagiti sabali a narelihiosuan nga organisasion. (Exodo 20:5; 23:13; 34:12) No magatang ti pasdek nga inusar ti maysa a narelihiosuan nga organisasion, ti panggepna laeng ket tapno magun-od ti maysa a kasapulan a patakder a maaramid a Kingdom Hall. Sakbay a mausar dayta kas Kingdom Hall, masapul a maikkat ti aniaman a tedda ti di umiso a panagdayaw. Kalpasan a madalusan ken mabalbaliwan, maidedikar dayta ken ni Jehova agpaay laeng iti panagdayaw kenkuana. Awan ti panagkadua wenno pannakiraman ti umiso ken di umiso a panagdayaw.

No pagsaritaan dagiti detalye ti kasta a transaksion, taginayonen koma a limitado ti pannakilangen iti aglaklako ken pagsaritaan la koma ti maipapan iti panaggatang. Nasayaat no dagiti kameng ti kongregasion Kristiano ket silalagip iti pakdaar ni Pablo a liklikan ti “agbalin a di agkaasmang a naisangol kadagiti di manamati.” Nupay ditay ibagbaga a nasaysayaattayo ngem kadagidiay addaan iti sabali a pammati, liklikantayo ti makikadua wenno maawis iti panagdayawda.a

Komusta met ti kongregasion nga agab-abang iti pasdek a kukua ti sabali a relihion? Ti panagabang masansan a kalikagumanna ti regular a pannakilangen kadagiti kameng ti sabali a relihion, a nasken a liklikan. Uray no agabang para iti maysa laeng nga okasion, nasken nga usigen dagiti bagi ti panglakayen dagiti sumaganad: Adda kadi dagiti idolo wenno narelihiosuan a simbolo iti uneg ken ruar ti pasdek? Ania ti panangmatmat dagiti tattao iti komunidad maipapan iti panangusartayo iti dayta a pasilidad? Adda kadi asinoman iti kongregasion a maitibkol no usarentayo dayta a pasdek? (Mateo 18:6; 1 Corinto 8:7-13) Tingitingen dagiti panglakayen dagitoy a banag sada mangaramid iti maitutop a desision. Nasken met nga ikabilanganda ti mismo a konsiensiada ken ti panangmatmat ti kongregasion sakbay nga ikeddengda a gatangen ken aramiden a Kingdom Hall ti kasta a pasdek.

[Footnote]

[Ladawan iti panid 27]

Daytoy a pasdek, a sigud a sinagoga, ket nagatang ken naaramid a Kingdom Hall