Apay a Nagrigat ti Agpadispensar?
IDI Hulio 2000, inaprobaran ti California State Legislature idiay Estados Unidos ti singasing a linteg a mangabsuelto kadagiti nakaaksidente no iyebkasda ti pannakipagriknada iti tao a nadangranda. Ania ti rason nga inaramidda dayta a linteg? Napaliiw a no adda nasugatan wenno nadadael gapu iti aksidente, dagiti tattao masansan a bumdengda nga agpadispensar amangan ta matmatan dayta ti korte kas panangamin iti basol. Iti sabali a bangir, mabalin a makaunget dagidiay mangipapan a naagrabiadoda no dida man la makangngeg a dagus iti panagpadispensar, ket nalabit agbalin a dakkel a supiat ti bassit nga aksidente.
Siempre, saan a nasken ti agpadispensar no saan a dakayo ti makimbasol iti aksidente. Adda met dagiti gundaway a nainsiriban no naannadtayo iti ibagatayo. Kuna ti maysa a nagkauna a proverbio: “Iti kinaruay ti sasao saan a maaw-awan ti salungasing, ngem daydiay mangmedmed kadagiti bibigna agtigtignay a simamasirib.” (Proverbio 10:19; 27:12) Kaskasdi, mabalinyo ti agbalin a nadayaw ken manangtulong.
Ngem saan aya a pudno nga adu a tao ti saanen nga agpadpadispensar, uray no awan ti panangidarum? Iti pagtaengan, mabalin nga iyasug ti asawa a babai, ‘Diak pulos mangngeg ni lakayko nga agpadispensar.’ Iti pagtrabahuan, mabalin nga ireklamo ti maysa a kapatas, ‘Dagiti trabahadorko saanda nga akuen ti biddutda, ken manmano nga agpadispensarda.’ Idiay eskuelaan, mabalin nga ireport ti mannursuro, ‘Saan a nasanay dagiti ubbing nga agpadispensar.’
Ti maysa a rason no apay a bumdeng nga agpadispensar ti maysa a tao ket nalabit gapu ta maamak a guraenda. Gapu ta pampanunotenna a laisenda, mabalin a saanna nga iyebkas no ania a talaga ti riknana. Kinapudnona, ti tao a nadangran nalabit naan-anay a liklikanna ti nakabasol, ket marigatandanto nga agkappia.
Ti sabali pay a rason no apay a bumdeng nga agpadispensar ti dadduma ket nalabit gapu iti kinaawan pannakaseknan iti rikna ti sabali. Mabalin nga ikalinteganda, ‘Nakabasolak latta uray agpadispensarak.’ Adda pay dagiti dadduma a bumdeng nga agpadispensar gapu kadagiti posible a pagdaksan. Pampanunotenda, ‘Mapabasolakto ngata ket pagbayadendak?’ Nupay kasta, ti kinatangsit ti kangrunaan a lapped iti panangamin iti basol. Ti tao a di makaibaga iti “dispensarennak” gapu ta natangsit ket arig ibagbagana, ‘Diak kayat ti maibabain babaen ti panangamin iti basolko. Maipababa la ketdi ti kinataok.’
Aniaman ti makagapu, adu a tao ti marigatan nga agpadispensar. Ngem kasapulan kadi a talaga ti agpadispensar? Ania dagiti pagimbagan ti panagpadispensar?
[Ladawan iti panid 3]
“Saan a nasanay dagiti ubbing nga agpadispensar”
[Ladawan iti panid 3]
“Dagiti trabahadorko saanda nga akuen ti biddutda”
[Ladawan iti panid 3]
“Diak pulos mangngeg ni lakayko nga agpadispensar”