Kasano a Mausartayo Dagiti Aldawtayo iti Wagas a Makaay-ayo ken Jehova?

“Napukaw idi kalman, iti nagbaetan ti isisingising ken ilelennek ti init, ti dua a nabalitokan nga oras, a tunggal maysa natampokan iti innem a pulo a diamante a minuto. Awan ti mabalin a pangsupapak ta napukawen dagita iti agnanayon!”​—Lydia H. Sigourney, Americana nga autor (1791-1865).

KASLA nagababa ken nagpartak nga aglabas dagiti aldaw ti biagtayo. Idi mautob ni salmista a David ti kaababa ti biag, inkararagna: “Ipakaammom kaniak, O Jehova, ti panungpalak, ken ti rukod dagiti aldawko​—no ania dayta, tapno maammuak no kasano ti kinaapagbiitko. Adtoy! Inaramidmo dagiti aldawko a sumagmamano laeng; ket ti kapaut ti biagko kasla awan iti sanguanam.” Kayat ni David nga usaren ti biagna iti wagas a makaay-ayo iti Dios, agpadpada iti sao ken aramidna. Inyebkasna ti panagpannurayna iti Dios babaen dagitoy a sasao: “Ti inanamak maiturong kenka.” (Salmo 39:4, 5, 7) Impangag ni Jehova. Rinukodna dagiti aramid ni David ket sinupapakanna.

Nalaka a makumikomtayo iti inaldaw gapu iti kinapartak ken kinaadu ti aramidentayo. Mabalin a madanagantayo, nangruna ta nakaad-adu ti aramidentayo ngem bassit ti tiempotayo a mangaramid kadagita. Kaslatayo kadi ken David a maseknan a mangusar iti biagna iti wagas nga anamongan ti Dios? Di pagduaduaan a palpaliiwen ken suksukimaten a naimbag ni Jehova ti tunggal maysa kadatayo. Agarup 3,600 a tawenen ti napalabas, ni Job, maysa a lalaki a managbuteng iti Dios, binigbigna a nakita ni Jehova ti kabibiagna ken tiningitingna ti amin nga aramidna. Insaludsod ni Job: “Inton mangalikagum iti pannakikuenta, ania ti maisungbatko kenkuana?” (Job 31:4-6, 14) Mausartayo dagiti aldawtayo iti wagas a makaay-ayo iti Dios babaen ti panangyun-una kadagiti naespirituan a banag, panangtungpal kadagiti bilinna, ken nainsiriban a panangusar iti tiempotayo. Usigentayo a naimbag dagitoy a banag.

Ipangpangrunatayo Dagiti Naespirituan a Banag

Maitutop nga idagadag ti naipaltiing a Kasuratan nga ipangpangrunatayo dagiti naespirituan a banag idi kunana: ‘Siguraduenyo ti napatpateg a bambanag.’ Ania dagitoy napateg a banag? Karaman kadagitoy ti “umiso a pannakaammo ken naan-anay a panangilasin.” (Filipos 1:9, 10) Ti panangammo iti panggep ni Jehova kalikagumanna ti nainsiriban a panangusar iti panawentayo. Ngem makagunggona ken makapnek ti biagtayo no ipangpangrunatayo dagiti naespirituan a banag.

Palagipannatayo ni apostol Pablo nga ‘itultuloytayo a siguraduen no ania ti makaay-ayo iti Apo.’ Ti panangsiguradotayo masapul a ramanenna ti panangamiris kadagiti motibo ken tarigagay ti pusotayo. Kuna pay ti apostol: “Itultuloyyo a lasinen no ania ti pagayatan ni Jehova.” (Efeso 5:10, 17) No kasta, ania ti makaay-ayo ken Jehova? Kastoy ti sungbat ti maysa a proverbio iti Biblia: “Ti sirib isu ti kangrunaan a banag. Gun-odem ti sirib; ket kadagiti amin a gun-odem, gun-odem ti pannakaawat. Ipategmo unay dayta, ket itan-oknakanto.” (Proverbio 4:7, 8) Maragsakan ni Jehova iti tao a gumun-od ken mangipakat iti nadiosan a sirib. (Proverbio 23:15) Nagsayaat ti kasta a sirib ta saan a mapukaw wenno madadael. Kinapudnona, saluadan ken salaknibannatayo ‘iti dakes a dalan ken kadagidiay agsasao iti balusingsing a bambanag.’​—Proverbio 2:10-15.

Anian a nainsiriban ngarud a sarangtentayo ti aniaman a pagannayasan a mangyaleng-aleng kadagiti naespirituan a banag! Masapul a sursuruentayo nga apresiaren dagiti sasao ni Jehova ken agbutengtayo kenkuana. (Proverbio 23:17, 18) Nupay mabalin a patanoren ti kasta a kababalin iti aniaman a tiempo ti panagbiagtayo, kasayaatan no bayat ti kinaagtutubo nga ipasdek ti kasta nga umiso a padron ken itukit dagiti prinsipio ti Biblia iti personalidadtayo. “Lagipem, itan, ti Naindaklan a Namarsuam kadagiti aldaw ti kinaagtutubom,” kuna ni masirib nga Ari Solomon.​—Eclesiastes 12:1.

Ti kasayaatan a pamay-an tapno sumingedtayo ken Jehova isu ti personal a panagkararag kenkuana iti inaldaw. Ammo ni David no kasano kapateg ti panagkararag ken Jehova, ta inyararawna: “Denggem ti kararagko, O Jehova, ket iti panagpatulongko umimdengka. Iti luluak dika agulimek.” (Salmo 39:12) Ti kadi nasinged a relasiontayo iti Dios tukayenna ti riknatayo nga uray la makaluatayo? Wen, ad-adda a suminged ni Jehova kadatayo no kanayon nga iyebkastayo kenkuana ti linaon ti pusotayo ken utobentayo ti Saona.​—Santiago 4:8.

Sursuruenyo ti Agtulnog

Ni Moises ti sabali pay a tao nga addaan pammati a nagpannuray iti Dios. Kas ken David, nabigbig ni Moises a ti biag ket napno iti riribuk. Dayta ti gapuna nga indawatna nga isuro koma ti Dios ‘no kasano a bilangen dagiti aldawna iti wagas a magun-odna ti puso a masirib.’ (Salmo 90:10-12) Maaddaantayo iti puso a masirib babaen laeng ti panagsursuro ken panagbiag a mayannurot kadagiti linteg ken prinsipio ni Jehova. Ammo ni Moises daytoy, isut’ gapuna nga impaganetgetna dayta a napateg a kinapudno iti nasion ti Israel babaen ti panangipalagipna kadagiti linteg ken bilbilin ti Dios sakbay ti iseserrekda iti Naikari a Daga. Asinoman a piliento ni Jehova nga agari iti Israel, masapul nga agsurat iti bukodna a kopia ti Linteg ket basaenna dayta iti amin nga aldaw ti panagbiagna. Apay? Tapno masursurona ti agbuteng iti Dios. Daytoy ti mangsubok iti kinatulnog ti ari. Iti kasta, saan nga agtangsit kadagiti kakabsatna ken tapno agpaut ti panagturayna. (Deuteronomio 17:18-20) Naulit daytoy a kari idi kinuna ni Jehova ken ni Solomon nga anak ni David: “No magnakanto iti daldalanko babaen ti panangsalimetmetmo kadagiti alagadek ken bilbilinko, kas iti pannagna ni David nga amam, paatiddogekto met dagiti aldawmo.”​—1 Ar-ari 3:10-14.

Ti panagtulnog ket serioso a banag iti imatang ti Dios. No laglag-anentayo dagiti alagaden ken bilin ni Jehova a kas man la saan a napateg dagitoy, sigurado a makitana ti kasta a kababalin. (Proverbio 15:3) Gapuna, taginayonentayo koma ti nauneg a panagraem kadagiti amin a bilin ni Jehova, uray no saan a kanayon a nalaka nga aramiden dagita. Ar-aramiden ni Satanas ti amin a kabaelanna a ‘mangbangen iti danatayo’ bayat nga ikagkagumaantayo a tungpalen dagiti linteg ken bilin ti Dios.​—1 Tesalonica 2:18.

Nangnangruna a nasken nga ipangagtayo ti Nainkasuratan a balakad maipapan iti panagtataripnong tapno agdayaw ken aglalangentayo. (Deuteronomio 31:12, 13; Hebreo 10:24, 25) Nasayaat ngarud nga isaludsodtayo iti bagbagitayo: ‘Determinado ken agtultuloy kadi nga aramidek ti pudpudno a makagunggona?’ Bumaaw ti relasiontayo ken Jehova no liwayantayo ti makilangen ken agsursuro kadagiti Nakristianuan a gimong gapu iti panangikagumaantayo a mangsierto iti pinansial a seguridad. Insurat ni apostol Pablo: “Ti wagas ti panagbiagyo siwayawaya koma iti panagayat iti kuarta, bayat a mapnekkayo iti agdama a bambanag. Ta kinuna [ni Jehova]: ‘Saankanto a pulos panawan ket saankanto a pulos baybay-an.’” (Hebreo 13:5) No situtuloktayo nga agtungpal kadagiti bilin ni Jehova, ipakpakitatayo nga adda naan-anay a panagtalektayo nga aywanannatayo.

Nasursuro ni Jesus ti agtulnog ket nagunggonaan. Kabaelantayo met dayta. (Hebreo 5:8) No kanayontayo a natulnog, nalaklaka nga aramiden dayta, uray kadagiti babassit a banag. Pudno, gapu iti kinatarnawtayo, mabalin a masapul nga ibturantayo ti di makaay-ayo ken naulpit pay ketdi a panangtrato dagiti dadduma. Mabalin a mapasamak ti kasta nangruna iti panggedan, idiay eskuelaan, wenno iti pamilia a saan nga agkakapammatian dagiti miembrona. Ngem makaliwliwa kadatayo ti naikuna kadagiti Israelita a no ‘ayatenda ni Jehova babaen ti panagimdeng iti timekna ken babaen ti panagtalinaed kenkuana, isu ti biagda ken kaatiddog ti al-aldawda.’ (Deuteronomio 30:20) Naikari met dayta kadatayo.

Usarenyo a Nainsiriban ti Tiempo

Ti nainsiriban a panangusar iti tiempotayo tulongannatayo met a mangaramat kadagiti aldawtayo iti wagas a makaay-ayo ken Jehova. Saan a kas iti kuarta a mabalin nga idulin, masapul a busbosentayo ti tiempo ta no saan, mapukaw dayta. Saanen a maisubli ti tunggal oras nga aglabas. Yantangay kanayon nga ad-adu ti mabalin nga aramiden ngem iti kabaelantayo, us-usarentayo kadi ti tiempotayo a mangragpat kadagiti kalattayo iti biag? Ti kangrunaan a panggep dagiti amin a Kristiano isu ti regular a pannakipaset iti trabaho a panangikasaba iti Pagarian ken panangaramid kadagiti adalan.​—Mateo 24:14; 28:19, 20.

Nainsiriban ti panangusartayo iti tiempo no sipapanunottayo unay iti pategna. Maitutop ti idagadag ti Efeso 5:16 a ‘gatangentayo ti tiempo maipaay iti bagbagitayo,’ a kaipapananna a baybay-antayo dagiti saan unay a napateg a banag. Kaipapanan dayta ti panangkissay kadagiti aktibidad a mangsayang iti tiempo. Mabalin a mapaksuyantayo no adu unay a panawen ti us-usarentayo nga agbuya iti telebision wenno agsawar iti Internet, agbasa kadagiti di makagunggona a sekular a babasaen, wenno no nalabes ti panaglinglingay ken panagpalpaliwatayo. Maysa pay, ti nalabes a panagurnong kadagiti material a sanikua mabalin nga agawenna ti tiempo a kasapulan iti pananggun-od iti puso a masirib.

Kuna dagiti mangiparparegta iti naannad a panangusar iti tiempo: “Saanmo a mausar a naimbag ti tiempom no awan dagiti masnup a kalatmo.” Nangisingasingda iti lima a pagannurotan iti panangipasdek kadagiti kalat: espesipiko, marukod, posible a maragpat, realistiko, ken adda naikeddeng a tiempona.

Maysa kadagiti makagunggona a kalat isu ti panangparang-ay iti panagbasatayo iti Biblia. Ti umuna nga addang ket aramidentayo nga espesipiko ti kalattayo​—panangbasa iti intero a Biblia. Kalpasanna, aramidentayo a marukod ti kalattayo. No kasta ti aramidentayo, mabantayantayo ti irarang-aytayo. Dagiti kalat ket rumbeng a manggutugot kadatayo nga agporsegi ken rumang-ay. Masapul met a posible a maragpat ken realistiko dagitoy. Masapul a maikonsiderar dagiti abilidadtayo, paglaingan, ken adda a tiempotayo. Para kadagiti dadduma, mabalin nga ad-adu a panawen ti kasapulan tapno maibanag ti kalatda. Kamaudiananna, masapul nga adda naikeddeng a tiempo a maibanag ti kalattayo. Ti panangikeddeng no kaano a maileppas ti maysa a banag mabalin nga ad-adda a gutugotennatayo a mangaramid iti dayta.

Dagiti amin a kameng ti pamilia ti Bethel iti intero a daga, nga agserserbi iti sangalubongan a hedkuarter dagiti Saksi ni Jehova wenno iti maysa kadagiti sangana iti intero a lubong, ket addaan iti espesipiko a kalat a mangbasa iti intero a Biblia kabayatan ti umuna a tawenda iti Bethel. Mabigbigda a ti makagunggona a panagbasa iti Biblia ket makatulong kadakuada a rumang-ay iti naespirituan ken pasingedenna ti relasionda ken Jehova, a mangisursuro kadakuada agpaay iti pagimbaganda. (Isaias 48:17) Mabalintay met kadi nga aramiden a kalattayo ti regular a panagbasa iti Biblia?

Dagiti Pagimbagan ti Umiso a Panangusar Kadagiti Aldawtayo

Naruay a bendision ti iyeg ti panangipangruna kadagiti naespirituan a banag. Mariknatayo a dakdakkel ti magapuanantayo ken adda panggep ti panagbiagtayo. Ti regular a pannakisao ken Jehova babaen ti naimpusuan a kararag pagbalinennatayo a nasingsinged kenkuana. Ti mismo a panagkararagtayo ipamatmatna nga agtalektayo kenkuana. Ti inaldaw a panagbasa iti Biblia ken kadagiti publikasion a naibatay iti Biblia nga ipapaay ti “matalek ken masirib nga adipen” ipakitana a sidadaantayo nga umimdeng iti Dios bayat a makisasao kadatayo. (Mateo 24:45-47) Tulongannatayo daytoy a gumun-od iti puso a masirib tapno makaaramidtayo kadagiti umiso a desision ken pangngeddeng.​—Salmo 1:1-3.

Pagragsakantayo a tungpalen dagiti bilin ni Jehova, ta saan a makapadagsen dayta. (1 Juan 5:3) Bayat nga usarentayo dagiti aldawtayo iti wagas a makaay-ayo ken Jehova, tumibker ti relasiontayo kenkuana. Agbalintayo met a pudpudno a naespirituan nga adigi kadagiti padatayo a Kristiano. Maragsakan ni Jehova a Dios no aramidentayo dagita. (Proverbio 27:11) Ken awanen ti nasaysayaat pay a gunggona ngem ti panangsagrap iti anamong ni Jehova ita ken iti agnanayon!

[Ladawan iti panid 21]

Napateg kadagiti Kristiano dagiti naespirituan a banag

[Dagiti Ladawan iti panid 22]

Nainsiriban kadi ti panangusaryo iti tiempoyo?

[Ladawan iti panid 23]

Tumibker ti relasiontayo ken Jehova no usarentayo ti tunggal aldaw iti wagas a makaay-ayo kenkuana