“Umaykayo Kaniak, . . . ket Pagin-awaenkayto”
“Ipastoranyo ti Arban ti Dios”
“Kanayon a sidadaankayo a dumngeg ken mangiranud kadagiti makapabileg a linaon ti Biblia.”—Pamela.
“Pagyamanan ti amin nga inaramidyo agpaay kadakami. Dakkel ti naitulongyo kadakami.”—Robert.
NATIGNAY da Pamela ken Robert a mangisurat kadagitoy nga ebkas ti apresasion kadagiti Kristiano a panglakayen kadagiti kongregasionda. Dagiti dadduma nga adipen ti Dios iti sangalubongan agyamyamanda met gapu iti agtultuloy a suporta ken panangaywan kadakuada dagidiay ‘mangipaspastor iti arban ti Dios.’ (1 Pedro 5:2) Wen, agyamyaman ti ili ni Jehova gapu kadagiti adu a maar-aramidan dagiti panglakayen para kadakuada ken gapu iti pamay-anda a mangibanag kadagita.
‘Aduan iti Aramiden’
Adu a pagrebbengan ti naitalek kadagiti Kristiano a panglakayen. (Lucas 12:48) Isaganada dagiti palawagda kadagiti gimong ti kongregasion ken makiramanda iti publiko a panangikasaba iti naimbag a damag ti Pagarian ti Dios. Responsabilidadda met nga ipastoran dagiti kapammatianda. Mangipaay dagiti panglakayen iti tiempo kadagidiay nangnangruna a makasapul iti tulong—dagiti lallakay wenno babbaket ken dadduma pay—ngem dida met liwayan nga ipaay ti naespirituan ken material a kasapulan dagiti mismo a pamiliada. (Job 29:12-15; 1 Timoteo 3:4, 5; 5:8) Adda dagiti panglakayen a tumulong a mangibangon kadagiti Kingdom Hall. Adda dagiti agserbi kas kameng dagiti Hospital Liaison Committee wenno Patient Visitation Group. Adu met kadakuada ti agbolboluntario nga agtrabaho kadagiti pagasambleaan ken kombension. Wen, dagiti panglakayen ‘aduanda ti aramiden iti trabaho ti Apo.’ (1 Corinto 15:58) Gapu ta nagagetda, di pagsiddaawan a kasta unay ti panangraem kadakuada dagidiay naitalek nga aywananda!—1 Tesalonica 5:12, 13.
Dagiti panglakayen ket gubuayan ti pammaregta gapu iti regular a panangbisitada kadagiti pada a Kristiano iti pagtaengan wenno iti sadinoman tapno mangparegta iti naespirituan. Ni Thomas, nga awanan iti ama iti pagtaengan, kunana: “No saan a gapu iti naayat a tulong ken pammaregta dagiti panglakayen, diak la ammo no agserserbiak ita kas amin-tiempo a ministro.” Adu nga agtutubo a dimmakkel iti pamilia nga awanan iti ama wenno ina ti mangibaga a natulonganda a maaddaan iti personal a relasion iti Dios babaen ti tulong dagiti panglakayen.
Ti panangipastor ket tagipatgen met unay dagiti natataengan iti kongregasion. Kalpasan ti panangsarungkar kadakuada ti dua a panglakayen, kastoy ti insurat ti agassawa a misionero nga agtawen iti 85: “Kayatmi nga iyebkas ti panagyamanmi iti naayat a panagbisitayo. Idi pimmanawkayo, binasami manen dagiti kasuratan nga inusigtayo. Pulos a saanminto a malipatan dagiti pammaregtayo.” Maysa a balo nga agtawen iti 70 ti nagsurat kadagiti panglakayen: “Inkarkararagko ken Jehova a tulongannak, ket imbaonnakayo a dua a panglakayen tapno umaykayo iti pagtaengak. Ti panagsarungkaryo ket bendision manipud ken Jehova!” Natulongankayo kadi iti nabiit pay a panagbisita dagiti panglakayen iti kongregasionyo? Sigurado nga apresiarentayo amin ti panangikagumaanda a mangipastor iti arban a naitalek kadakuada!
Dagiti Pastor a Tumultulad iti Dios ken ni Kristo
Naayat a Pastor ni Jehova. (Salmo 23:1-4; Jeremias 31:10; 1 Pedro 2:25) Ni Jesu-Kristo ket naisangsangayan met a Pastor a mangipapaay kadagiti naespirituan a kasapulantayo. Kinapudnona, isut’ naawagan a “nasayaat a pastor,” “naindaklan a pastor,” ken “panguluen a pastor.” (Juan 10:11; Hebreo 13:20; 1 Pedro 5:4) Kasano ti panangtrato ni Jesus kadagidiay agtarigagay nga agbalin nga adalanna? Sibabara nga iyawisna kadakuada: “Umaykayo kaniak, dakayo amin a mabambannogan ken madagdagsenan, ket pagin-awaenkayto.”—Mateo 11:28.
Dagiti panglakayen ita ikagumaanda met ti agbalin a gubuayan ti bang-ar ken salaknib iti arban. Dagiti kasta a lallaki agbalinda a “kas paglemmengan a lugar manipud iti angin ken lugar a pakaitalimengan manipud iti natutudo a bagyo, kas barbaresbes ti danum iti awanan danum a pagilian, kas salinong ti maysa a nadagsen a napasdok a bato iti napaksuyan a daga.” (Isaias 32:2) Dagitoy a mangipaay iti salaknib mangyegda iti bang-ar, magun-odda ti panagraem ti arban, ken anamong ti Dios.—Filipos 2:29; 1 Timoteo 5:17.
Dagiti Napateg a Suporta Dagiti Assawada
Ti ili ti Dios apresiarenda dagiti Kristiano a panglakayen ken dagiti assawada a naayat a tumultulong kadakuada. Iti panagbalinda a manangsuporta kadagiti assawada, masansan nga agsakripisio dagitoy a babbai. No dadduma, mabatida iti pagtaengan no mangipastor wenno asikasuen dagiti lallakayda dagiti annongen iti kongregasion. No dadduma, maitantan dagiti naikeddeng a plano ti agassawa gapu iti sumagmamano a parikut a tumaud iti kongregasion a nasken a tamingen a dagus. “Nupay kasta,” kinuna ni Michelle, “no makitak nga okupado unay ni lakayko iti panangisagana kadagiti gimong wenno iti panangipastor, laglagipek a trabaho ni Jehova ti ar-aramidenna, isu nga aramidek ti kabaelak a mangsuporta kenkuana.”
Kinuna met ni Cheryl, a panglakayen ti asawana: “Ammok a dagiti kakabsat iti kongregasion kasapulanda dagiti makatungtong a panglakayen, ket kayatko nga iparikna kadakuada a mabalinda ti umasideg ken lakayko aniaman nga oras a kasapulanda.” Kas kada Michelle ken Cheryl, situtulok nga agsakripisio dagiti manangsuportar a babbai tapno dagiti karnero ti Dios ket maaywanan dagiti lallakayda. Maapresiar dagiti assawa dagiti panglakayen gapu iti manangsuportar a kababalinda.
Kaskasdi, ti okupado a panglakayen dina liwayan nga ipaay ti naespirituan ken dadduma pay a kasapulan ti asawa ken annakna. Ti naasawaan a panglakayen masapul a “siwayawaya iti pammabasol, asawa ti maymaysa a babai, addaan iti manamati nga annak a saan a napabasol iti kinagaramugam ket saanda met a nagulo.” (Tito 1:6) Masapul nga aywananna ti pamiliana sigun iti wagas ti Dios kas ikalikagum ti Kasuratan kadagiti Kristiano a manangaywan.—1 Timoteo 3:1-7.
Para iti maysa nga okupado a panglakayen, nagpateg ti manangsuportar nga asawa! Kasta ti talaga a marikna dagiti napasnek a naasawaan a panglakayen. Kas iti ibaga ti Biblia: “Nakasarak kadi ti maysa iti naimbag nga asawa a babai? Isu nakasarak iti naimbag a banag.” (Proverbio 18:22) Iti sao ken aramid, mangipakita dagiti kasta a panglakayen iti naimpusuan nga apresasion kadagiti assawada. Malaksid iti napasnek a kararag ken naragsak a sangsangkamaysa a panagadal, dagitoy a Kristiano a pagassawaan mangitudingda iti tiempo tapno tagiragsakenda dagiti banag a kas iti panagpasiar iti aplaya, kadagiti kakaykaywan, wenno iti parke. Wen, makasarak dagiti panglakayen iti rag-o no sidudungngo nga aywananda dagiti assawada.—1 Pedro 3:7.
Dagiti panglakayen a di agimbubukodan a mangipaspastor iti arban ti Dios ket gubuayan ti naespirituan a bang-ar para iti ili ni Jehova. Dagitoy ket pudno a “sagut a tattao,” bendision iti kongregasion!—Efeso 4:8, 11-13.