Papigsaenyo Dagiti Imayo

ITI Biblia, nadakamat ti ima iti nasurok a 1,800 a daras. Maus-usar iti nadumaduma a wagas dagiti pannao a mainaig iti ima. Kas pagarigan, ti nadalus nga ima ipasimudaagna ti kinaawan basol. (2 Samuel 22:21; Salmo 24:3, 4) Ti panangukrad iti ima kaipapananna ti panagbalin a naparabur kadagiti dadduma. (Deuteronomio 15:11; Salmo 145:16) Daydiay mangirisgo iti biagna ket maikuna nga ikabilna ti kararuana iti imana. (1 Samuel 19:5) Ti panagsalupaypay dagiti ima kaipapananna ti pannakaupay. (2 Cronicas 15:7) Ket ti panangpapigsa iti ima kaipapananna ti panangpakired ken panangpabileg nga agtignay.​—1 Samuel 23:16.

Iti kaaldawantayo, kasapulan unay a mapapigsa dagiti imatayo. Agbibiagtayo kadagiti “napeggad a tiempo a narigat a pakilangenan.” (2 Timoteo 3:1) Kas tattao, adda pagannayasantayo a sumuko no maupaytayo, a kas man la agsalupaypay dagiti imatayo gapu iti kinakapuy. Gagangay a makakitatayo kadagiti tin-edyer a sumardeng nga ageskuela, assawa a lallaki a mangpanaw iti pamiliada, ken inna a mangbaybay-a kadagiti annakda. Kas Kristiano, nasken a papigsaentayo dagiti imatayo tapno madaerantayo dagiti suot a maipasango kadatayo iti panagserbitayo iti Dios. (Mateo 24:13) No aramidentayo dayta, maparagsaktayo ti puso ni Jehova.​—Proverbio 27:11.

No Kasano a Mapapigsa Dagiti Ima

Dagiti Judio idi kaaldawan ni Esdras kasapulan a papigsaenda dagiti imada tapno maileppas ti pannakaibangon manen ti templo ni Jehova idiay Jerusalem. Kasano a napapigsa dagiti imada? Kuna ti salaysay: “Inangayda ti piesta dagiti di nalebaduraan a tinapay iti pito nga aldaw buyogen ti panagrag-o; ta pinagrag-o ida ni Jehova, ket pinagbaw-ingna ti puso ti ari ti Asiria a maiturong kadakuada tapno papigsaenna ti im-imada iti trabaho ti balay ti pudno a Dios, ti Dios ti Israel.” (Esdras 6:22) Nalawag a ti aktibo a puersa ni Jehova ti inusarna a nanggutugot iti “ari ti Asiria” tapno palubosanna nga agsubli ti ili ti Dios, ken pinabilegna dagiti umili isu a naileppasda ti inrugida a trabaho.

Kalpasanna, idi kasapulan a matarimaan dagiti bakud ti Jerusalem, pinapigsa ni Nehemias ti im-ima dagiti padana a Judio tapno maaramidda ti trabaho. Kastoy ti mabasatayo: “Imbagak kadakuada ti maipapan iti ima ti Diosko, no kasano a naimbag kaniak, ken kasta met ti maipapan iti sasao ti ari a sinaona kaniak. Gapu itoy kinunada: ‘Tumakdertayo, ket masapul a bangonentayo.’ Gapuna pinapigsada dagiti imada maipaay iti naimbag nga aramid.” Yantangay napapigsa dagiti imada, natarimaan ni Nehemias ken dagiti padana a Judio dagiti bakud ti Jerusalem iti nakaskasdaaw a 52 nga aldaw!​—Nehemias 2:18; 6:9, 15.

Umasping iti dayta, pappapigsaen ni Jehova dagiti imatayo a mangikasaba iti naimbag a damag ti Pagarian. (Mateo 24:14) Ar-aramidenna daytoy babaen ti ‘panangkabalna kadatayo iti tunggal naimbag a banag tapno aramidentayo ti pagayatanna.’ (Hebreo 13:21) Impaayannatayo kadagiti kasayaatan nga alikamen. Addaantayo iti Biblia ken dagiti naibatay iti Biblia a libro, magasin, broshur, tract, ken dagiti nairekord nga audio ken video nga usarentayo a mangasaba kadagiti tattao iti intero a lubong. Kinapudnona, magun-odan dagiti publikasiontayo iti nasurok a 380 a pagsasao. Malaksid iti dayta, babaen kadagiti gimong ti kongregasion, asamblea, ken kombension, mangipapaay ni Jehova iti teokratiko nga edukasion ken panangsanay no kasano nga usaren dagitoy nagsayaat nga alikamen bayat nga itungtungpaltayo ti ministeriotayo.

Nupay pappapigsaen ni Jehova dagiti imatayo iti adu a wagas, namnamaenna met nga agbalintayo koma a napinget. Lagipenyo ti imbaga ni propeta Eliseo ken ni Ari Jehoas, a nagpatulong ken Eliseo a makigubat kadagiti rimmaut a Sirio. Imbaga ni Eliseo iti ari a mangala kadagiti pana ket panaenna ti daga. Kuna ti salaysay ti Biblia: “Kinabilna iti tallo a daras ket nagsardeng. Ket nagrurod kenkuana ti lalaki ti pudno a Dios; gapuna kinunana: ‘Kimmabil koma dayta iti lima wenno innem a daras! Iti dayta a kaso pudno unay a kabilem koma ti Siria agingga a maikisap, ngem ita tallo a daras a kabilemto ti Siria.’” (2 Ar-ari 13:18, 19) Gapu ta saan a napinget, saan unay a nagballigi ni Jehoas iti pannakigubatna kadagiti Sirio.

Kasta met laeng a prinsipio ti agaplikar kadatayo no kayattayo nga itungpal ti impaaramid ni Jehova kadatayo. Imbes a pagdanagantayo dagiti tubeng a maipasango kadatayo wenno ti kinarigat ti trabaho, aramidentayo koma dayta a sipipinget ken naimpusuan. Nasken a papigsaentayo dagiti imatayo ken agpannuraytayo iti tulong ni Jehova.​—Isaias 35:3, 4.

Papigsaen ni Jehova Dagiti Imatayo

Tulongannatayo ni Jehova ken papigsaenna dagiti imatayo nga agaramid iti pagayatanna. Siempre, saan nga agmilagro ti Dios tapno aramidenna ti isuamin nga agpaay kadatayo. Namnamaenna nga aramidentayo ti pasettayo​—panagbasa iti Biblia nga inaldaw, panagsagana para kadagiti gimong ken pannakigimong a regular, panangasaba a kanayon agingga iti mabalin, ken panagkararag kenkuana a patinayon. No aramidentayo a simamatalek ken sipapasnek ti pasettayo bayat nga addaantayo iti gundaway, papigsaennatayo ni Jehova a mangaramid iti namnamaenna kadatayo.​—Filipos 4:13.

Usigenyo ti kasasaad ti maysa a Kristiano a natayan iti asawa ken ina iti maysa a tawen. Dina pay nailiwliwag dayta idi pagammuan ta simmina ti asawa ti anakna a lalaki ket naglikudanna ti Nakristianuan a panagbiag. “Naadalko a ditay mabalin a pilien dagiti pakasuotantayo, no kaano wenno kasano kasansan a dumteng,” kinuna daytoy a kabsat. Kasano a napapigsa nga agibtur? “Ti panagkararag ken personal a panagadal ket kas iti maysa a pataw a nangsalbar kaniak. Ken naliwliwaak unay gapu iti suporta dagiti naespirituan a kakabsatko. Kangrunaanna, nautobko ti kinapateg ti maaddaan iti nasayaat a personal a relasion ken Jehova sakbay a tumaud dagiti narikut a situasion.”

Aniaman ti mapasaranyo, determinadokayo koma nga agtalek a naan-anay ken ni Jehova ken usarenyo a naimbag dagiti amin a probision nga ipapaayna a mangpapigsa kadagiti imayo. Iti kasta, maaramidyo ti amin a kabaelanyo nga agserbi ken Jehova a pakaidayawan ken pakaitan-okan ti napateg a naganna.​—Hebreo 13:15.

[Ladawan iti panid 31]

Gapu ta saan a napinget, saan unay a nagballigi ni Jehoas iti pannakigubatna kadagiti Sirio