‘Diosko, Apay nga Impalubosmo Daytoy?’
MALAGLAGIP pay ni Ricardo daydi kanito a nakatugawda ken Maria nga asawana iti siled ti pagurayan iti doktor.a Awan kadakuada ti makaitured a mangbasa iti resulta ti kaudian a panagpaeksamen ni Maria iti doktor. Idi kuan, linuktan ni Ricardo ti sobre, ket pinadalananda a binasa ti nauneg a sasao iti report ti doktor. Nasiputanda ti sao a “kanser,” ket nagsangitda agsipud ta ammoda ti kayat a sawen dayta a sao.
“Nakaim-imbag ti doktor,” kuna ni Ricardo, “ngem nabatad nga ammona a serioso ti situasion agsipud ta sangkaibagana nga agtalekkami iti Dios.”
Sakbay a nangrugi ti panangagas babaen ti radiasion, napaliiw ti doktor nga aggarawgaraw ti makinkannawan a saka ni Maria. Impalgak dagiti kanayonan a panangeksamen a nakadanonen ti kanser iti utekna. Kalpasan ti makalawas laeng a panagpaagasna, naisardeng ti radiasion. Na-comatose ni Maria ket natay kalpasan ti dua a bulan. “Agyamanak ta nagpatinggan ti panagsagabana,” kuna ni Ricardo, “ngem mailiwak unay kenkuana ket kayatko met idin ti matay. Sangkasaludsodko iti Dios: ‘Apay nga impalubosmo a mapasamak daytoy?’”
No Adda Dakes a Pasamak, Tumaud ti Adu a Saludsod
Kas ken Ricardo, nagadu dagiti agsagsagaba ditoy lubong. Masansan a dagiti inosente ti agsagaba. Panunotenyo ti nakaro a ladingit nga iyeg dagiti panagdadangadang a mangparparigat iti sangatauan. Wenno panunotenyo ti saem a sagsagabaen ti nakaad-adu a biktima ti panangrames, panangabuso kadagiti ubbing, kinaranggas iti uneg ti pamilia, ken dadduma pay a kinadakes a gapuanan ti tao. Iti intero a historia, kasla awan pagpatinggaan ti kinaawan hustisia ken rigat a situtulok nga ipalak-am dagiti tattao iti maysa ken maysa. (Eclesiastes 4:1-3) Adda met dagiti agsagsagaba gapu kadagiti natural a didigra wenno emosional, mental, ken pisikal a sakit. Di pakasdaawan nga adu ti mangisalsaludsod iti kastoy, “Apay nga ipalubos ti Dios ti kasta a panagsagaba?”
Uray kadagidiay addaan iti narelihiosuan a pammati, saan a nalaka a daeran ti rigat. Mabalin a pampanunotenyo met no apay a ti naayat ken mannakabalin-amin a Dios ipalubosna nga agsagaba ti tao. Ti panangammo iti makapnek ken napudno a sungbat daytoy makaburibor a saludsod ket napateg tapno maaddaantayo iti talna ti panunot ken apektaranna ti relasiontayo iti Dios. Masarakan iti Biblia ti kasta a sungbat. Pangngaasiyo ta usigenyo no ania ti kuna ti Biblia kas isalaysay ti sumaruno nga artikulo.
[Footnote]
a Nabaliwan dagiti nagan.
[Dagiti Ladawan iti panid 3]
Sangkaibaga ti doktor nga agtalekkami iti Dios