Ti Panamati iti Dios a Nalabit Ditay Am-ammo
MAMATI iti Dios ti dua iti kada tallo a tao idiay Alemania. Ngem idi nakiddaw iti nasurok sangaribu a tattao a deskribirenda ti Dios a patpatienda, nganngani agsasabali amin ti sungbatda. “Agduduma ti kapanunotan dagiti Aleman maipapan iti Dios a kas met laeng iti panagduduma dagiti mismo a tattao,” impadamag ti magasin a FOCUS. Nupay nasayaat ti panamati iti Dios, saan kadi a nakalkaldaang ti mamati kenkuana a di met ammo ti kinasiasinona?
Saan laeng nga idiay Alemania a nalibeg ti pannakaammo iti kinasiasino wenno personalidad ti Dios; kasta met laeng iti dadduma a paset ti Europa. Ipakita ti surbey idiay Austria, Britania, ken Netherlands a nasaknap ti panamati iti Dios kas “maysa a nabileg a pannakabalin wenno maysa a di mailadawan a palimed.” Ti Dios ket maysa a misterio nangruna kadagiti agtutubo, uray kadagiti mamati kenkuana.
Personal Kadi nga Am-ammoyo ti Dios?
Adda dakkel a nagdumaan ti basta panangammo iti maysa ken personal a panangammo kenkuana. Ti basta panangammo iti maysa a tao—di maasitgan nga ari, kalaingan nga atleta, wenno artista iti pelikula—ket panangbigbig laeng iti kaaddana. Nalawlawa ti kayat a sawen ti personal a panangammo iti maysa. Iramanna ti panagbalin a pamiliar iti dayta a persona—iti karakter, kababalin, rikrikna, kayat ken di kayat, ken planona para iti masanguanan. Mabalin a patanoren ti nasinged a relasion iti maysa no personal a maam-ammo.
Mamati ti ginasut a ribu a tao a saan nga umdas ti basta pannakaadda iti nalibeg nga ideya maipapan iti Dios—wenno ti basta pannakaammo nga isu ket adda. Rimmang-ayda babaen ti sisisinged a panangammoda iti Dios. Nagunggonaanda kadi iti dayta? Maysa a lalaki nga agnagan Paul, nga agnanaed idiay makin-amianan nga Alemania ken sigud nga addaan laeng iti kadawyan a panamati iti Dios, ti nangikeddeng nga ad-adda a personal nga am-ammuenna ti Dios. Inlawlawag ni Paul: “Kasapulan ti panawen ken panagregget tapno maam-ammo a naimbag ti Dios, ngem makagunggona unay ti resultana. Adayo a nasaysayaat ti inaldaw a panagbiag no adda nasinged a relasion iti Namarsua.”
Kasapulan kadi ti panawen ken panagregget tapno sisisinged a maam-ammo ti Dios? Pangngaasiyo ta basaenyo ti sumaganad nga artikulo.
[Blurb iti panid 3]
Adda dakkel a nagdumaan ti basta panangammo iti maysa ken personal a panangammo kenkuana