Ti Maudi a Pangrabii​—Ania Dayta?

ANIA ti mapanunotyo no mangngegyo ti sasao a “ti maudi a pangrabii”? Mapanunot ti adu a tao ti magusgustuan unay a ladawan idiay Milan, Italia, nga impinta ti pintor a ni Leonardo da Vinci (1452-1519). Iti kinapudnona, ti Maudi a Pangrabii ket popular a tema kadagiti artesano, mannurat, ken musikero kadagiti sinigsiglo.

Ngem ania ti Maudi a Pangrabii, ken ania ti kaipapananna dayta kadagiti tattao iti maika-21 a siglo? Dagiti ensiklopedia ken diksionario ibagada kadakayo a ti Maudi a Pangrabii, a naawagan met iti Pangrabii ti Apo, isu ti pannangan ni Jesu-Kristo a kaduana dagiti apostolna iti rabii sakbay ti sakripisio nga ipapatayna. Yantangay dayta ti maudi a pangrabii ni Jesus a kaduana dagiti matalek a pasurotna, gagangay a naawagan dayta kas ti Maudi a Pangrabii. Ken yantangay ni Apo Jesu-Kristo a mismo ti nangyussuat iti dayta, maitutop ti awag a Pangrabii ti Apo.

Kadagiti naglabas a siglo, adu dagiti nangisakripisio iti biagda maigapu iti imbilangda a napateg a panggep. Adda dagiti nagunggonaan iti dadduma kadagitoy nga ipapatay iti las-ud ti maysa a periodo a panawen. Ngem dagitoy a sakripisio nga ipapatay, agpapan pay natan-ok, saan pulos a napatpateg ngem iti ipapatay ni Jesu-Kristo. Kanayonanna, awan ti ipapatay iti nariribuk a historia ti sangatauan ti addaan iti kasta a sapasap nga epekto. Apay?

Tapno masungbatan dayta a saludsod ken tapno matulongankayo a mangammo no ania ti kaipapananna kadakayo ti Pangrabii ti Apo, awisendakayo a mangbasa iti sumaganad nga artikulo.