Salsaludsod Dagiti Agbasbasa
Iti nadumaduma a patarus ti Biblia, apay nga agsasabali ti pannakanumero dagiti salmo ken bersikulo iti libro dagiti Salmo?
Ti immuna a kompleto a Biblia a nabingbingay kadagiti kapitulo ken bersikulo ket ti Pranses a patarus nga impablaak ni Robert Estienne idi 1553. Nupay kasta, sakbay dayta, agparang a nabayag idin a nabingbingay ti libro dagiti Salmo, yantangay maysa daytoy a koleksion dagiti indibidual a salmo, wenno kanta, a pinutar ti adu a tattao.
Nalawag nga idi damo, inturong ni Jehova ni David a mamagtitipon kadagiti salmo a mausar iti publiko a panagdayaw. (1 Cronicas 15:16-24) Maipagarup a ni Esdras, maysa a padi ken “nalaing a managkopia,” ti namagtipon idi agangay iti intero a libro dagiti Salmo iti agdama a pormana. (Esdras 7:6) Gapuna, ti libro dagiti Salmo ket buklen dagiti napagtitipon nga indibidual a salmo.
Idi nagpalawag ni apostol Pablo iti sinagoga idiay Antioquia (Pisidia) iti umuna a panagdaliasatna kas misionero, nagadaw iti libro dagiti Salmo ket kinunana: “Kas met iti adda a naisurat iti maikadua a salmo, ‘Sika ti anakko, nagbalinak nga Amam itoy nga aldaw.’” (Aramid 13:33) Kadagiti Biblia itatta, agparang pay laeng dagita a sasao iti maikadua a salmo, Sal 2 bersikulo 7. Nupay kasta, agsasabali ti pannakanumero ti adu a salmo iti nadumaduma a patarus ti Biblia. Dadduma ngamin a patarus ket naibatay iti Hebreo a Masoretiko a teksto, idinto a naibatay dagiti dadduma iti Griego a Septuagint, maysa a patarus ti Hebreo a teksto a nakompleto idi maikadua a siglo K.K.P. Kas pagarigan, ti Latin Vulgate, a nakaibasaran ti adu a Katoliko a Biblia, inusarna dagiti numero dagiti salmo a masarakan iti Septuagint, idinto ta ti Hebreo a teksto ti sinurot ti Baro a Lubong a Patarus ken dadduma pay.
Ania dagiti espesipiko a nagdudumaanda? Iti Hebreo a teksto, agdagup iti 150 ti bilang dagiti salmo. Ngem ti Septuagint pinagmaymaysana ti Salmo 9 ken 10 ken ti Salmo 114 ken 115. Maysa pay, biningayna ti Salmo 116 ken 147 iti sagdudua a salmo. Nupay saan a nabaliwan ti dagup a bilang dagiti salmo, kurang iti maysa no idilig iti Hebreo a teksto ti bilang dagiti salmo manipud iti Salmo 10 agingga iti Salmo 146. Dayta ti gapuna a ti nalatak a maika-23 a Salmo ket agparang kas Salmo 22 iti Douay Version, a naibatay iti panangnumero ti Latin Vulgate, a naibatay met iti Septuagint.
Kamaudiananna, mabalin nga agsasabali met ti numero dagiti bersikulo ti dadduma a salmo iti nadumaduma a patarus. Apay? Adda ngamin dagiti patarus a nangsurot iti “kaugalian dagiti Judio a nangibilang iti superscription kas umuna a bersikulo,” kuna ti Cyclopedia da McClintock ken Strong, ngem saan a sinurot dayta dagiti dadduma. Kinapudnona, no atiddog ti paulo wenno superscription, masansan a maibilang dayta kas dua a bersikulo, ket iti kasta umadu ti bilang dagiti bersikulo iti salmo.