Ania ti Kayatmo nga Iyimtuod iti Dios?
DAGITI tattao iti intero a daga addaanda kadagiti napapateg a saludsod maipapan iti biag. Kastaka kadi? Adu dagiti nagsaludsod kadagiti mannursuro ti relihion ngem saanda a napnek kadagiti sungbat. Personal nga inutob ti dadduma dagitoy a saludsod. Inkararag dagiti dadduma ti pannakaiwanwan. Posible kadi a talaga a magun-od ti sungbat ti Dios maipapan kadagiti banag a mangburburibor kenka? Dagitoy ti sumagmamano kadagiti saludsod a dinakamat ti adu a kayatda nga iyimtuod iti Dios.
Siasinoka a talaga, Apo?
Dagiti tattao matmatanda ti Dios sigun iti kulturada, relihion dagiti dadakkelda, ken mabalin a sigun iti kayatda a mismo. Adda panangawag ti dadduma iti Dios; dagiti dadduma awaganda lattan iti Dios. Talaga kadi a napateg dayta? Adda kadi maymaysa a pudno a Dios nga ipalgakna kadatayo ti nagan ken kinasiasinona?
Apay a nagadu ti panagsagaba?
Mabalin nga agreklamo ti tao a nalulok wenno imoral ti panagbiagna no madadael ti salun-atna wenno pimmanglaw. Ngem ammona no apay nga agsagsagaba.
Nupay kasta, adu ti nakaro nga agsagsagaba ngem saanda a gapuanan dagitoy. Adda dagiti nakaro ti sakitda. Sarangten ti dadduma dagiti kasla di maparmek a tubeng tapno maaddaanda iti pagnaedan ken umdas a taraon para iti pamiliada. Minilion dagiti biktima ti krimen, gubat, awan pilpilienna a kinaranggas, natural a didigra, wenno kinaawan hustisia dagiti autoridad.
Di pakasdaawan nga iyimtuod ti adu: ‘Apay a nasaknap unay ti kasta a kasasaad? Apay nga ipalubos ti Dios dagitoy amin a panagsagaba?’
Apay nga addaak ditoy? Ania ti panggep ti biag?
Masansan a tumaud dagitoy a saludsod gapu iti pannakapaay a marikna ti maysa a tao no saan a mangyeg iti pudno a pannakapnek ti inaldaw a trabahona—ket pudno dayta iti adu a tattao. Mamati ti minilion a tattao a nasaksakbay nga intuding ti Dios ti pagbanagan ti biag ti tunggal tao. Pudno kadi dayta? No talaga nga adda naisangsangayan a panggep ti Dios kenka, awan duadua a kayatmo nga ammuen no ania dayta.
Kadagiti amin a libro ditoy lubong, adda maysa a libro a nalawag nga impaltiing ti Dios. Kas namnamaem iti maysa a mensahe a talaga a naggapu iti Dios para iti amin a tattao, daytoy a libro ket mabasa iti adayo nga ad-adu a lenguahe ngem iti aniaman a sabali a libro a naaramid. Isu daytoy ti Nasantuan a Biblia. Babaen dayta, ti Namarsua iti langit ken daga, ti Dios a mismo, ipalgakna ti kinasiasinona ken no ania ti naganna. Ammom kadi dayta a nagan? Ammom kadi no ania ti ibagbaga ti Biblia maipapan iti kita a Persona ti Dios? Ammom kadi no ania ti ibagana maipapan kadagiti kalikaguman ti Dios kenka?
[Picture Credit Line iti panid 2]
AKKUB: Chad Ehlers/Index Stock Photography]
[Picture Credit Line iti panid 3]
Ti Bantay: Chad Ehlers/Index Stock Photography