Maysa a Makapainteres a Rekord

NI EKSPLORADOR Richard E. Byrd naminlima a nagekspedision idiay Antarctica manipud idi 1928 agingga 1956. Babaen ti panangsalimetmet iti diary ken umiso a rekord ti panaglayag, nabaelanna ken dagiti kakaduana nga ammuen ti direksion ti angin, mangisagana kadagiti mapa, ken makaala iti adu nga impormasion maipapan iti kontinente ti Antarctica.

Dagiti ekspedision ni Byrd ipakitana ti kinapateg ti panangsalimetmet iti rekord. Iti rekord, wenno logbook, magupgop dagiti detalye ti panaglayag wenno panageroplano. Mausarto daytoy nga impormasion a mangrepaso no ania ti napasamak wenno manganalisar iti impormasion a mabalin a mausarto kadagiti masanguanan a panagbiahe.

Mangipaay ti Kasuratan iti makapainteres a salaysay maipapan iti Delubio idi kaaldawan ni Noe. Nagpaut dayta a sangalubongan a Layus iti nasurok a maysa a tawen. Kas panagsagana iti umay a Delubio, nangbusbos ni Noe, ti asawana, ken dagiti tallo nga annakna ken dagiti assawada iti 50 wenno 60 a tawen a nangibangon iti daong​—maysa a dakkel a pagluganan nga agarup 40,000 a metro kubiko ti kadakkelna. Ti nakairantaanna? Tapno italimengna ti dadduma a tattao ken animal bayat ti Layus.​—Genesis 7:1-3.

Kinapudnona, ti libro ti Biblia a Genesis naglaon iti rekord ni Noe maipapan iti paspasamak manipud panangrugi ti Layus agingga iti iruruarda a sangapamiliaan manipud iti daong. Adda kadi linaonna a napateg kadatayo ita?