Agtalekkayo ken ni Jehova

“Sika ti namnamak, O Soberano nga Apo Jehova, ti pagkammatalkak manipud kinaagtutubok.”​—Salmo 71:5.

1. Ania a karit ti sinango ti agtutubo a pastor a ni David?

NASUROK a siam a pie ti katayag daytoy a lalaki. Di pagsiddaawan nga awan kadagiti buyot ti Israel ti natured a sumango kenkuana! Iti aldaw ken rabii kadagiti adu nga agsasaruno a lawas, ti Filisteo a higante a ni Goliat linaisna ti buyot ti Israel, a kinaritna ida a mangibaon iti maingel a lalaki a makiranget kenkuana. Kamaudiananna, saan a maysa a soldado no di ket maysa laeng nga agtutubo ti nangawat iti dayta a karit. No idilig iti kabalubalna, maysa la nga ubing ti pastor a ni David. Kinapudnona, nalabit a nalaglag-an pay ngem iti kadagsen dagiti kabal ken igam ni Goliat! Kaskasdi, sinango ti agtutubo ti higante ket nagbalin a simbolo ti kinatured.​—1 Samuel 17:1-51.

2, 3. (a) Apay a nabaelan ni David a sinango a sikokompiansa ni Goliat? (b) Ania a dua nga addang ti usigentayo tapno makapagtalektayo ken ni Jehova?

² Ania ti nangted ken ni David iti kasta a tured? Usigenyo ti sumagmamano a sasao a nabatad nga insurat ni David idi lakayen: “Sika ti namnamak, O Soberano nga Apo Jehova, ti pagkammatalkak manipud kinaagtutubok.” (Salmo 71:5) Wen, kas maysa nga agtutubo, naan-anay a nagtalek ni David ken ni Jehova. Sinangona ni Goliat, a kunkunana: “Umayka kaniak nga addaanka iti kampilan ken addaanka iti pika ken addaanka iti gayang, ngem umayak kenka nga addaanak iti nagan ni Jehova ti buybuyot, ti Dios dagiti linia ti bakal ti Israel, a rinurodmo.” (1 Samuel 17:45) Nagtalek ni Goliat iti pigsana ken kadagiti igamna, ngem ni Jehova ti nagkammatalkan ni David. Gapu ta adda iti dasigna ti Soberano nga Apo iti uniberso, apay koma a pagbutngan ni David ti maysa laeng a tao, higante man dayta wenno naan-anay a nakabalan?

³ Bayat a basbasaenyo ti maipapan ken ni David, kayatyo met kadi a dakdakkel ti panagtalekyo ken ni Jehova? Nalabit adu kadatayo ti mangayat. Usigentayo ngarud ti dua nga addang a mabalintay nga aramiden tapno makapagtalektayo ken ni Jehova. Umuna, masapul a sukayen ken taginayonentayo ti abilidad a mangparmek iti maysa a gagangay a tubeng iti dayta a panagtalek. Maikadua, masapul nga ammuentayo no ania a talaga ti ramanen ti panagtalek ken ni Jehova.

Panangparmek iti Maysa a Gagangay a Lapped iti Panagtalek ken ni Jehova

4, 5. Apay a marigatan ti adu a tattao nga agkammatalek iti Dios?

⁴ Ania ti manglapped kadagiti tattao nga agtalek iti Dios? Masansan a mariro ti dadduma no apay a mapaspasamak ti kinadakes. Naisuro kadagiti adu a tattao a ti Dios ti makinggapuanan kadagiti panagsagaba. No dumteng ti didigra, ibaga dagiti klero nga “innala” ti Dios dagiti biktima tapno agbalinda a kaduana idiay langit. Maysa pay, adu a panguluen ti relihion ti mangisuro a nabayagen nga inkeddeng ti Dios ti amin a pasamak​—agraman ti tunggal trahedia ken dakes a banag​—ditoy lubong. Nagrigat la ketdi ti agkammatalek iti kasta a di mannakipagrikna a Dios. Ni Satanas, a nangbulsek iti panunot dagiti di manamati, magagaran a mangitandudo kadagiti amin a kasta a “sursuro dagiti sairo.”​—1 Timoteo 4:1; 2 Corinto 4:4.

⁵ Kayat ni Satanas a madadael ti panagtalek dagiti tattao ken ni Jehova. Dayta a kabusor ti Dios dina kayat a maammuantayo ti pudno a pakaigapuan dagiti panagsagaba ti tao. Ket no naammuantayo dagiti Nainkasuratan a pakaigapuan ti panagsagaba, kayat ni Satanas a malipatantayo dagita. Gapuna, nasayaat no pasaray repasuentayo ti tallo a kangrunaan a makagapu no apay nga agsagsagaba ti lubong. Babaen ti panangaramid iti kasta, mapatalgedantayo iti pusotayo a saan a ni Jehova ti makinggapuanan kadagiti parikuttayo.​—Filipos 1:9, 10.

6. Sigun iti 1 Pedro 5:8, ania ti maysa a pakaigapuan ti panagsagaba ti tao?

⁶ Ti maysa a makagapu no apay nga agsagsagaba ti tao ket agsipud ta kayat ni Satanas a dadaelen ti kinasungdo dagiti matalek nga adipen ni Jehova. Pinadasna a dadaelen ti kinasungdo ni Job. Nupay napaay, saan a nagsardeng ni Satanas. Kas agturay iti daytoy a lubong, ikagumaanna nga ‘alun-onen’ dagiti matalek nga adipen ni Jehova. (1 Pedro 5:8) Karamantayo amin iti dayta! Kayat ni Satanas nga agsardengtayo nga agserbi ken ni Jehova. Gapuna, masansan nga isungsongna ti panangidadanes. Nakaro man ti kasta a panagsagaba, adda nasayaat a rasontayo nga agibtur. No maaramidtayo dayta, makatulongtayo iti panangpaneknek nga ulbod ni Satanas ket maparagsaktayo ti puso ni Jehova. (Job 2:4; Proverbio 27:11) Bayat a pabpabilgennatayo ni Jehova a mangibtur iti pannakaidadanes, dumakkel ti panagtalektayo kenkuana.​—Salmo 9:9, 10.

7. Ania a pakaigapuan ti panagsagaba ti ipabigbig kadatayo ti Galacia 6:7?

⁷ Ti maikadua a rason ti panagsagaba ket masarakan iti daytoy a prinsipio: “Aniaman nga imulmula ti maysa a tao, daytoyto met ti apitenna.” (Galacia 6:7) No dadduma, agimula dagiti tattao babaen dagiti saan nga umiso a desisionda ket agapitda iti panagsagaba. Mabalin a pilienda ti agbalin a kaskasero, nga agbanag iti aksidente. Pilien ti adu ti agsigarilio, nga agresulta iti sakit ti puso wenno kanser iti bara. Dagidiay situtulok a makiraman iti seksual nga imoralidad agpegpeggadda nga agsagaba iti pannakadadael ti relasion ti pamilia, pannakaikkat ti panagraem iti bagi, sakit a mayakar babaen ti sekso, ken di matarigagayan a panagsikog. Mabalin a dagiti tattao pabasolenda ti Dios gapu kadagita a panagsagaba, ngem kinapudnona ap-apitenda laeng ti bunga dagiti di umiso a desisionda.​—Proverbio 19:3.

8. Sigun iti Eclesiastes 9:11, apay nga agsagaba dagiti tattao?

⁸ Nadakamat iti Eclesiastes 9:11 ti maikatlo a pakaigapuan ti panagsagaba: “Nagsubliak a mangkita iti baba ti init a ti lumba awan kadagiti nasiglat, ti gubat awan met kadagidiay mannakabalin, ti taraon awan met kadagiti masirib, ti kinabaknang awan met kadagidiay mannakaawat, ti parabur awan met uray kadagidiay addaan pannakaammo; agsipud ta ti tiempo ken ti di mapakpakadaan a pasamak mapagteng kadakuada amin.” No dadduma, maaksidente ti tao. Aniaman ti personal a bileg wenno pagkapuyantayo, mabalin a di ninamnama a sumangbay ti panagsagaba ken ipapatay iti tunggal maysa kadatayo iti aniaman a tiempo. Kas pagarigan, idi kaaldawan ni Jesus narpuog ti maysa a torre ti Jerusalem a nanguyos iti biag ti 18 a tattao. Inlawlawag ni Jesus a saan ida a dusdusaen ti Dios gapu kadagiti naglabas a basolda. (Lucas 13:4) Saan a ni Jehova ti makinggapuanan kadagiti kasta a panagsagaba.

9. Ania ti saan a maawatan ti adu a tattao no maipapan iti panagsagaba?

⁹ Napateg a matarusan dagiti pakaigapuan ti panagsagaba. Ngem adda aspeto dayta a banag a narigat a maawatan ti adu a tattao. Isu daytoy: Apay nga ipalubos ni Jehova a Dios ti panagsagaba?

Apay nga Ipalubos ni Jehova ti Panagsagaba?

10, 11. (a) Sigun iti Roma 8:19-22, ania ti napasamak iti “intero a sangaparsuaan”? (b) Kasanotayo a matukoy no asino ti nangipasakup iti sangaparsuaan iti kinabarengbareng?

¹⁰ Maysa a paset ti surat ni apostol Pablo kadagiti taga Roma ti manglawlawag iti dayta a napateg nga isyu. Insurat ni Pablo: “Ti sigagagar a panagsegga ti sangaparsuaan ket agur-uray iti pannakaipanayag ti annak ti Dios. Ta ti sangaparsuaan naipasakup iti kinabarengbareng, saan a babaen ti bukodna a nakem no di ket babaen kenkuana a nangipasakup iti dayta, a maibatay iti namnama a ti mismo a sangaparsuaan met mawayawayaanto iti pannakaadipen iti panagrupsa ken maaddaan iti nadayag a wayawaya ti annak ti Dios. Ta ammotayo a ti intero a sangaparsuaan agtultuloy nga agas-asug a sangsangkamaysa ken agpapaut-ot a sangsangkamaysa agingga ita.”​—Roma 8:19-22.

¹¹ Tapno matarusantayo daytoy a teksto, masapul a masungbatantayo nga umuna ti dadduma a napateg a saludsod. Kas pagarigan, Asino ti nangipasakup iti sangaparsuaan iti kinabarengbareng? Adda dagidiay agkuna a ni Satanas; dadduma ti agkuna a ni Adan. Ngem awan kadagita a dua ti nangaramid iti panangipasakup. Apay? Gapu ta ti nangipasakup iti sangaparsuaan iti kinabarengbareng inaramidna dayta “maibatay iti namnama.” Wen, ituktukonna ti namnama a dagidiay matalek “mawayawayaanto iti pannakaadipen iti panagrupsa.” Saan a kabaelan da Adan ken Satanas ti mangitukon iti kasta a namnama. Ni Jehova laeng ti makaaramid iti kasta. Nalawag ngarud nga isu ti nangipasakup iti sangatauan iti kinabarengbareng.

12. Ania dagiti nagduduma a pannakaawat iti kaipapanan ti “intero a sangaparsuaan,” ken kasano a masungbatan daytoy a saludsod?

¹² Ngem ania ti “intero a sangaparsuaan” a nadakamat iti daytoy a teksto? Sigun iti dadduma, ti “intero a sangaparsuaan” tukoyenna ti intero a literal a lubong, a pakairamanan dagiti animal ken mulmula. Ngem mangnamnama kadi dagiti animal ken mulmula a magun-odda ti “nadayag a wayawaya ti annak ti Dios”? Saan. (2 Pedro 2:12) No kasta, ti “intero a sangaparsuaan” mabalin a tukoyenna ti sangatauan laeng. Isu daytoy ti sangaparsuaan a naapektaran iti basol ken ipapatay gapu iti iyaalsa idiay Eden ket agkasapulan unay iti namnama.​—Roma 5:12.

13. Ania ti resultana iti sangatauan ti iyaalsa idiay Eden?

¹³ Ania a talaga ti epektona iti sangatauan dayta nga iyaalsa? Dineskribir ni Pablo ti resultana babaen ti maysa a sao: kinabarengbareng.a Sigun iti maysa a reperensia, tukoyen daytoy a sao ti “kinabarengbareng ti maysa a banag a di agtigtignay sigun iti nakairantaanna.” Nadisenio ti sangatauan nga agbiag nga agnanayon, nga agtrabaho a sangsangkatunos kas perpekto, nagkaykaysa a pamilia a mangaywan iti paraiso a daga. Imbes ketdi, ababa, narigat, ken masansan a nakaay-ay-ay ti biagda. Kas kinuna ni Job, “ti tao, a nayanak manipud babai, ababa ti biagna ken namelmelan iti pannakariribuk.” (Job 14:1) Talaga a kinabarengbareng dayta!

14, 15. (a) Kasano a naiparangarang ti kinahustisia iti sentensia nga impatay ni Jehova iti sangatauan? (b) Apay a kinuna ni Pablo a naipasidong ti sangaparsuaan iti kinabarengbareng “saan a babaen ti bukodna a nakem”?

¹⁴ Ita, usigentayo ti napateg a saludsod: Apay a ‘ti Ukom iti intero a daga’ impasidongna ti sangatauan iti narigat, nakaay-ay-ay a biag? (Genesis 18:25) Nainkalintegan kadi dayta nga inaramidna? Bueno, ditayo liplipatan ti inaramid ti immuna a nagannak kadatayo. Idi immalsada iti Dios, nakidasigda ken ni Satanas, ti nangpataud iti nasaknap a panangkarit iti kinasoberano ni Jehova. Babaen ti inaramidda, sinuportaranda ti kapanunotan a nasaysayaat ti pagbanagan ti tao no awan ni Jehova, nga iturayanda ti bagbagida iti sidong ti rebelioso nga espiritu a parsua. Iti panangsentensiana kadagita a rebelde, arigna nga inted ni Jehova ti birbirokenda. Impalubosna nga iturayan ti tao ti bagina babaen ti impluensia ni Satanas. Iti sidong dagita a kasasaad, ania pay koma a pangngeddeng ti ad-adda a nainkalintegan ngem iti panangipasidong iti sangatauan iti kinabarengbareng ngem naibatay iti namnama?

¹⁵ Siempre, saan a ‘bukod a nakem’ daytoy ti sangaparsuaan. Saantayo a pinili ti mayanak nga adipen ti basol ken panagrupsa. Ngem gapu iti asina, impalubos ni Jehova nga agbiag ken maaddaan iti annak da Adan ken Eva. Nupay datayo nga annakda ket naipasidong iti kinabarengbareng ti basol ken ipapatay, addaantayo iti gundaway a mangibanag iti saan a naaramidan da Adan ken Eva. Mabalintayo ti umimdeng ken ni Jehova ket iti kasta, mabigbigtayo a nalinteg ken perpekto ti kinasoberanona, idinto ta rigat, pannakapaay, ken kinabarengbareng ti iyeg ti turay ti tao a naisina ken ni Jehova. (Jeremias 10:23; Apocalipsis 4:11) Dimmegdeg pay ketdi dagiti kasasaad gapu iti impluensia ni Satanas. Paneknekan ti pakasaritaan ti tao dagitoy a kinapudno.​—Eclesiastes 8:9.

16. (a) Apay a masiguradotayo a saan a ni Jehova ti makinggapuanan iti panagsagaba a maim-imatangantayo iti lubong ita? (b) Ania a namnama ti siaayat nga impaay ni Jehova kadagiti matalek a tattao?

¹⁶ Nalawag, adda dagiti nainkalintegan a rason ni Jehova no apay nga impasidongna ti sangatauan iti kinabarengbareng. Ngem kayat kadi a sawen dayta a ni Jehova ti pakaigapuan ti kinabarengbareng ken panagsagaba a mangparparigat iti tunggal maysa kadatayo ita? Panunotenyo ti hues a mangipaulog iti nalinteg a sentensia iti maysa a kriminal. Mabalin nga agsagaba unay ti kriminal bayat nga ikarona ti sentensiana, ngem nainkalintegan kadi a pabasolenna ti hues kas pakaigapuan ti panagsagabana? Siempre, saan! Maysa pay, saan a pulos a ni Jehova ti pagtaudan ti kinadakes. Kuna ti Santiago 1:13: “Iti dakes a bambanag saan a mabalin a suoten ti Dios ket isu saanna met a suoten ti asinoman.” Laglagipentay met nga impaulog ni Jehova dayta a sentensia “maibatay iti namnama.” Siaayat nga inyurnosna para kadagiti matalek nga annak da Adan ken Eva a makitada nga agpatingga ti kinabarengbareng ken tagiragsakenda ti “nadayag a wayawaya ti annak ti Dios.” Iti agnanayon, dinto pulos a pagdanagan ti matalek a sangatauan a baka maisagmakto manen ti intero a sangaparsuaan iti nakaay-ay-ay a kasasaad ti kinabarengbareng. Ti nalinteg a panangtaming ni Jehova kadagiti bambanag ipasdeknanto ti kinanainkalintegan ti kinasoberanona iti agnanayon.​—Isaias 25:8.

17. Ania koma ti epektona kadatayo ti panangrepaso kadagiti pakaigapuan ti panagsagaba iti lubong ita?

¹⁷ Iti panangrepasotayo kadagiti pakaigapuan ti panagsagaba ti tao, adda kadi aniaman a pangibatayantayo a ni Jehova ti mapabasol kadagiti kinadakes wenno mangikkat iti panagtalektayo kenkuana? Iti kasumbangirna, ti kasta a panagsukimat ti mangted kadatayo iti rason nga umanamong kadagitoy a sasao ni Moises: “Ti Bato, naan-anay ti aramidna, ta amin a daldalanna kinahustisia. Maysa a Dios ti kinamatalek, a kenkuana awan ti di kinahustisia; isu nalinteg ken napalungdo.” (Deuteronomio 32:4) Babaen ti panangmennamenna kadagita, pasaray pabaruentayo koma ti pannakaawattayo kadagita a banag. Iti kasta, no maipasangotayo kadagiti pakasuotan, masarangettayo ti panagregget ni Satanas a mangimula kadagiti panagduadua iti isiptayo. Ngem komusta met ngay ti maikadua nga addang a nadakamat iti rugrugi? Ania ti nairaman iti panagtalek ken ni Jehova?

No Ania ti Kaipapanan ti Panagtalek ken ni Jehova

18, 19. Babaen kadagiti ania a sasao a paregtaennatayo ti Biblia nga agtalek ken ni Jehova, ngem no maipapan iti dayta, ania dagiti biddut a kapanunotan ti dadduma?

¹⁸ Idagadag kadatayo ti Sao ti Dios: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.” (Proverbio 3:5, 6) Makaay-ayo ken makaliwliwa dagita a sasao. Sigurado nga awan ti asinoman iti uniberso ti ad-adda a mapagpiaran ngem iti dungdungnguen a nailangitan nga Amatayo. Kaskasdi, nalaklaka a basaen dagita a sasao ti Proverbio ngem iti panangyaplikar iti dayta.

¹⁹ Adu ti addaan iti biddut a kapanunotan maipapan iti kaipapanan ti panagtalek ken ni Jehova. Ipapan ti dadduma a ti kasta a panagtalek ket basta pannakarikna iti ragsak a nagubbog iti puso. Agparang met a patien ti dadduma a ti panagtalek iti Dios kaipapananna a manamnamatayo a saluadannatayo manipud iti amin a rigat, a risutenna ti tunggal parikuttayo, nga aramidenna ti namnamaentayo a mapasamak kadagiti inaldaw a pakasuotantayo​—ken aramidenna dayta nga insigida! Awan ti pakaibatayan ti kasta a kapanunotan. Ti panagtalek ket realistiko, saan a basta naibatay iti emosion. Kadagiti nataengan, ti panagtalek ramanenna ti panangaramid kadagiti desision a pinanunot a naimbag.

20, 21. Ania ti ramanen ti panagtalek ken ni Jehova? Iyilustraryo.

²⁰ Imutektekanyo manen ti kuna ti Proverbio 3:5. Pinagdumana ti panagtalek ken ni Jehova ken ti panagtalek iti bukodtayo a pannakaawat, a mangipasimudaag a ditay mabalin a mapaggiddan dagita a dua. Kayatna kadi a sawen a ditay mabalin nga usaren ti pannakaawattayo? Saan. Ni Jehova, a nangted kadatayo kadagita nga abilidad, namnamaenna nga usarentayo dagita iti panagserbitayo kenkuana. (Roma 12:1) Ngem pagkammatalkan, wenno pagpannurayantayo no agaramidtayo kadagiti desision? No saan a maitunos ti pampanunottayo iti pampanunot ni Jehova, akseptarentayo kadi ti siribna​—a natantan-ok nga amang ngem iti pampanunottayo? (Isaias 55:8, 9) Ti panagtalek ken ni Jehova kaipapananna ti panagpaiwanwan iti pampanunotna.

²¹ Kas panangyilustrar: Panunotenyo ti maysa nga ubing nga adda iti makinlikud a tugaw ti kotse, nga adda dagiti dadakkelna iti sanguanan. Ni tatangna ti agmanmaneho. No tumaud ti parikut bayat ti panagbiaheda​—nalabit mariroda no ania a direksion ti turongenda wenno saan a nasayaat ti paniempo wenno ti kasasaad ti kalsada​—ania ti aramiden ti maysa a natulnog, addaan panagtalek nga anak? Manipud likud, agriaw kadi a mangisuro no kasano nga agmaneho ni tatangna? Kuestionaranna kadi dagiti pangngeddeng ti dadakkelna, wenno iyaleng-alengna ti pammalagipda kenkuana nga agusar iti seatbelt? Saan. Agtalek ketdi kadagiti dadakkelna no kasanoda a tamingen ti situasion, uray no imperpektoda. Ngem perpekto ni Jehova nga Amatayo. Saantay kadi a naan-anay nga agtalek kenkuana, nangruna no maipasangotayo kadagiti makakarit a kasasaad?​—Isaias 30:21.

22, 23. (a) Apay a nasken nga agtalektayo ken ni Jehova no maipasango kadagiti parikut, ken kasanotayo a maaramid dayta? (b) Ania ti mausig iti sumaruno nga artikulo?

²² Nupay kasta, ipamatmat ti Proverbio 3:6 a masapul nga ‘imutektekantayo ni Jehova iti amin a daldalantayo,’ saan laeng a no maipasangotayo kadagiti narigat a kasasaad. Gapuna, dagiti desision nga aramidentayo iti inaldaw iyanninawda koma ti panagtalektayo ken ni Jehova. No tumaud ti parikut, ditay koma maawanan iti namnama, aglagaw, wenno iyaleng-aleng ti panangiwanwan ni Jehova no maipapan iti kasayaatan a panangtaming kadagiti bambanag. Masapul a matmatantayo dagiti pakasuotan kas gundaway a maitandudo ti kinasoberano ni Jehova, mangpaneknek nga ulbod ni Satanas, ken mangparayray iti kinatulnog ken dadduma pay a galad a makaay-ayo ken ni Jehova.​—Hebreo 5:7, 8.

²³ Maipakitatayo ti panagtalek ken ni Jehova aniaman dagiti tubeng a maipasango kadatayo. Maaramidtayo dayta babaen ti kararagtayo ken iti panagpaiwanwantayo iti Sao ni Jehova ken iti organisasionna. Ngem kangrunaanna, kasanotayo a maiparangarang ti panagtalek ken ni Jehova no maipasangotayo kadagiti parikut a tumaud iti agdama a lubong? Usigen ti sumaruno nga artikulo dayta a banag.

[Footnote]

Ania ti Sungbatyo?

• Kasano nga impakita ni David a ni Jehova ti pagkammatalkanna?

• Ania dagiti tallo a pakaigapuan ti panagsagaba ita ti tao, ken apay a nasayaat a pasaray repasuen dagita?

• Ania a sentensia ti impaulog ni Jehova iti sangatauan, ken apay a nainkalintegan dayta a sentensia?

• Ania ti ramanen iti panagtalek ken ni Jehova?

[Dagiti Ladawan iti panid 8]

Nagkammatalek ni David ken ni Jehova

[Ladawan iti panid 10]

Inlawlawag ni Jesus nga idi narpuog ti maysa a torre iti Jerusalem, saan a ni Jehova ti makinggapuanan iti dayta