Ipatpategyo Kadi Dagiti Natataengan a Kapammatianyo?
IDI nakitulag ti Dios kadagiti nagkauna nga Israelita, nabilinda: “Iti sanguanan ti ubanan rebbeng a tumakderka, ket masapul nga ipakitaam ti konsiderasion ti kinatao ti maysa a lakay, ket masapul nga agbutengka iti Diosmo.” (Levitico 19:32) Ngarud, sagrado a rebbengen ti panagraem kadagiti natataengan ken nainaig dayta iti panagpasakup iti Dios. Nupay awanen iti sidong ti Mosaiko a Linteg dagiti Kristiano iti kaaldawantayo, palagipannatayo dayta a napateg iti imatang ni Jehova dagiti lallakay ken babbaket nga agserserbi kenkuana. (Proverbio 16:31; Hebreo 7:18) Matmatmatantayo kadi ida kas iti panangmatmat ni Jehova kadakuada? Ipatpategtay met laeng kadi dagiti natataengan a Kristiano a kakabsattayo?
Impategna ti Laklakay a Gayyemna
Masarakan iti libro a Maikadua nga Ar-ari ti maysa a salaysay ti Biblia a nangitampok iti panagraem kadagiti natataengan. Ilawlawagna no kasano a ti ub-ubing a propeta a ni Eliseo sinunuanna ni propeta Elias. Imutektekanyo no ania ti napasamak iti maudi nga aldaw ni Elias kas propeta iti pagarian ti Israel a buklen ti sangapulo a tribu.
Iti dayta nga aldaw, binilin ni Jehova ni propeta Elias nga agbiahe manipud Gilgal nga agturong iti Bethel, sa mapan idiay Jerico, kalpasanna, mapan idiay Karayan Jordan. (2 Ar-ari 2:1, 2, 4, 6) Kabayatan dayta a panagbiahe nga agarup 50 a kilometro, namitlo nga indagadag ni Elias ken ni Eliseo nga isardengnan ti sumurot kenkuana. Nupay kasta, kas ken ub-ubing a Ruth a siiinget a nagkedked a mangpanaw ken Noemi, sinigsiglo idin ti napalabas, nagkedked met ni Eliseo a mangpanaw iti lakayen a propeta. (Ruth 1:16, 17) Namitlo nga imbaga ni Eliseo: “Kas sibibiag ni Jehova ken kas sibibiag ta kararuam, saankanto a panawan.” (2 Ar-ari 2:2, 4, 6) Agarup innem a tawen idin a tultulongan ni Eliseo ni Elias. Ngem tinarigagayanna ti agserbi a kadua ni Elias agingga iti maudi a kanito. Kinapudnona, kuna pay ti salaysay: “Naaramid a bayat a magmagnada, nga agsasaoda bayat ti pannagnada, ay ket, adtoy! . . . ni Elias nagpangato.” (Bersikulo 11) Nagpatpatang da Elias ken Eliseo agingga iti maudi a kanito ti ministerio ni Elias iti Israel. Nalawag a magagaran ti ub-ubing a propeta a mangtandaan kadagiti adu nga instruksion ken pammaregta manipud iti natataengan ken ad-adu ti kapadasanna a propeta. Nabatad nga impategna ti laklakay a gayyemna.
‘Kas Amma ken Inna’
Nalaka a makita no apay nga inayat ni Eliseo ti laklakay a propeta kas gayyemna—kas naespirituan nga amana pay ketdi. (2 Ar-ari 2:12) Sakbay la unay a nagpatingga ti trabaho ni Elias idiay Israel, kinunana ken Eliseo: “Kiddawem no ania ti rebbeng nga aramidek maipaay kenka sakbay a maalaak kenka.” (Bersikulo 9) Agingga iti maudi a kanito, naseknan ni Elias iti naespirituan a pagimbagan ti kasunona ken iti pannakaitultuloy ti trabaho ti Dios.
Iti kaaldawantayo, makapabileg a makita ti kasta met la a pannakaseknan dagiti natataengan a Kristiano kakabsat kas amma ken inna bayat a sibubuslon nga iranranudda ti pannakaammo ken siribda kadagiti ub-ubing. Kas pagarigan, situtulok a tulongan dagiti nabayagen nga agserserbi kas boluntario kadagiti sanga nga opisina dagiti Saksi ni Jehova dagiti kabbaro a kameng ti pamilia ti Bethel tapno masursuroda dagiti paglaingan a kasapulan iti panagserbida. Kasta met, dagiti agdaldaliasat a manangaywan ken dagiti assawada a bumisbisita kadagiti kongregasion iti adun a tawen, siraragsak nga iranranudda dagiti adu a kapadasanda kadagiti sansanayenda nga agserbi kas agdaldaliasat a ministro. Kanayonanna, kadagiti kongregasion dagiti Saksi ni Jehova iti intero a lubong, adda dagiti natataengan a kakabsat a sisusungdo nga agserserbi ken ni Jehova iti adun a dekada ken siraragsak nga iranranudda dagiti praktikal a sirib ken kapadasanda kadagiti kabbaro a kameng iti kongregasion.—Proverbio 2:7; Filipos 3:17; Tito 2:3-5.
Agbalin a pudpudno a makaparagsak ti panagraem kadagiti maipatpateg a natataengan a Kristiano gapu iti panangipakitada iti naimpusuan a pannakaseknan. Ngarud, kayattay a tuladen ti ulidan ni Eliseo babaen ti nauneg a panangipateg kadagiti natataengan a kapammatiantayo. Pinalagipannatayo ni apostol Pablo nga itultuloytayo a tratuen “ti maysa a lakay . . . a kas ama” ken ‘dagiti babbaket a kas inna.’ (1 Timoteo 5:1, 2) No aramidentay dayta, dakkel ti maitulongtayo iti umiso a panagandar ken irarang-ay ti kongregasion Kristiano iti intero a lubong.
[Ladawan iti panid 30]
Tinarigagayan ni Eliseo ti agserbi a kadua ni Elias agingga iti maudi a kanito
[Dagiti Ladawan iti panid 31]
Adu ti masursuro dagiti ub-ubing kadagiti natataengan a Kristiano