Salsaludsod Dagiti Agbasbasa

Ania ti kayat a sawen ti “adda biag kenkuana met laeng”?

Ti Biblia kunaenna a ni Jesu-Kristo “adda biag kenkuana met laeng” ken dagiti pasurotna adda ‘biag iti bagbagida.’ (Juan 5:26; 6:53) Nupay kasta, saan nga agpada ti kaipapanan dagitoy dua a kasuratan.

“No kasano a ti Ama adda biag kenkuana met laeng,” kuna ni Jesus, “kasta met nga impaayna iti Anak a maaddaan iti biag kenkuana met laeng.” Sakbay nga imbagana dagitoy a nakaskasdaaw a sasao, kinuna ni Jesus: “Pudno unay kunak kadakayo, Ti dumngeg iti saok ken mamati iti daydiay nangibaon kaniak addaan iti agnanayon a biag . . . Um-umayen ti oras, ket itan dayta, a dagiti natay mangngegdanto ti timek ti Anak ti Dios ket agbiagto dagidiay nangipangag.” Tuktukoyen ditoy ni Jesus ti naisangsangayan a pannakabalin nga inted kenkuana ti Ama​—ti abilidad a mangipaay kadagiti tattao iti nasayaat a takder iti imatang ti Dios. Kanayonanna, kabaelan ni Jesus a pagungaren dagiti matmaturog ken patay ken ikkanna ida iti biag. Para ken Jesus, ti pannakaadda ti “biag kenkuana met laeng” kaipapananna a naikkan kadagitoy a pannakabalin. Kas iti Ama, ti Anak ket addaan met iti “biag kenkuana met laeng.” (Juan 5:24-26) Komusta met ngay dagiti pasurotna?

Agarup maysa a tawen kalpasanna, kinuna ni Jesus kadagiti agdengdengngeg kenkuana: “Pudno unay kunak kadakayo, Malaksid no kanenyo ti lasag ti Anak ti tao ken inumenyo ti darana, awanankayo ti biag iti bagbagiyo. Ti agtaraon iti lasagko ken uminom iti darak addaan iti agnanayon a biag, ket pagungarekto iti kamaudianan nga aldaw.” (Juan 6:53, 54) Ni Jesus pinagpadana ditoy ti pannakaadda ti “biag iti bagbagiyo” iti pananggun-od iti “agnanayon a biag.” Dagiti sasao nga addaan iti kasta met la a gramatikal a pannakasangal kas ti pannakaadda ti “biag iti bagbagiyo” ket masarakan kadagiti sabali pay a paset ti Griego a Kasuratan. Ti dua a pagarigan ket, “Maaddaankayo iti asin iti bagbagiyo” ken “aw-awatenda iti bagbagida ti naan-anay a supapak.” (Marcos 9:50; Roma 1:27) Kadagitoy nga ehemplo, dagita a sasao dina ipasimudaag ti pannakabalin a mangted iti asin wenno mangsupapak iti asinoman. Imbes ketdi, kaipapananna ti makin-uneg a kinakompleto wenno kinanaan-anay. No kasta, ti sasao a “biag iti bagbagiyo” a nausar iti Juan 6:53 kaipapananna ti pannakagun-od iti naan-anay a biag.

No maipapan kadagiti pasurotna kas addaan biag iti bagbagida, ni Jesus dinakamatna ti lasag ken darana. Idi inyussuatna ti Pangrabii ti Apo, nagsao manen ni Jesus maipapan iti lasag ken darana ken binilinna dagiti pasurotna a maiyeg iti baro a tulag a mangan ken uminumda kadagiti emblema nga awan lebadurana a tinapay ken arak. Kaipapanan kadi daytoy a dagiti laeng napulotan a Kristiano, nga adda iti baro a tulag ken Jehova a Dios, ti makagun-od iti kasta a naan-anay a biag? Saan. Makatawen ti nagbaetan dagitoy dua a pasamak. Dagidiay nakangngeg kadagiti sasao ni Jesus a nairekord iti Juan 6:53, 54 awananda iti pannakaammo iti tinawen a panangrambak a mausar dagiti emblema a mangirepresentar iti lasag ken dara ni Kristo.

Sigun iti Juan kapitulo 6, ni Jesus inyarigna nga umuna ti lasagna iti manna. Kunana: “Dagidi ammayo kinnanda ti manna idiay let-ang ket kaskasdi a natayda. Daytoy ti tinapay a bumaba manipud langit, iti kasta mabalin ti asinoman ti mangan iti dayta ket saan a matay. Siak ti sibibiag a tinapay a bimmaba manipud langit; no ti asinoman a mangan iti daytoy a tinapay isu agbiagto iti agnanayon.” Ti lasag ni Jesus, agraman ti darana, ket napatpateg ngem iti literal a manna. Kasano? Gapu ta naited ti lasagna maipaay iti “biag ti lubong,” a mamagbalin a posible iti biag nga agnanayon.a Gapuna, ti sasao maipapan iti pannakaadda ti “biag iti bagbagiyo” iti Juan 6:53 ket agaplikar kadagiti amin nga umawat iti biag nga agnanayon​—idiay langit wenno ditoy daga.​—Juan 6:48-51.

Kaano nga awaten dagiti pasurot ni Kristo ti biag iti bagbagida, wenno kaanoda a sumrek iti naan-anay a biag? Para kadagiti napulotan nga agtawid iti Pagarian, mapasamak daytoy inton mapagungarda iti nailangitan a biag kas imortal nga espiritu a parparsua. (1 Corinto 15:52, 53; 1 Juan 3:2) Dagiti “sabsabali a karnero” ni Jesus mapadasandanto ti sumrek iti naan-anay a biag kalpasan ti Sangaribu a Tawen a Panagturay ni Jesus. Iti dayta a tiempo, nasubokdanton, nasarakan a matalek, ken naideklarada a nalinteg para iti agnanayon a biag iti Paraiso a daga.​—Juan 10:16; Apocalipsis 20:5, 7-10.

[Footnote]

[Dagiti Ladawan iti panid 31]

Amin a pudno a Kristiano maaddaanda iti ‘biag iti bagbagida’