Salsaludsod Dagiti Agbasbasa
Ania ti bautismo maipaay kadagiti natay?
Idi nagsurat maipapan iti nailangitan a panagungar, adda makapainteres unay a dinakamat ni apostol Pablo. Iti Ti Biblia nga impablaak ti Philippine Bible Society, mabasatayo: “No saan koma a kasta, ania ti aramidento dagiti mabautisaran a maipaay kadagiti natay? No dagiti natay saanda nga agungar uray kaanoman, apay-apay ngarud agbautisarda a maipaay kadakuada?” Ken Ti Baro a Naimbag a Damag Biblia kastoy ti panangipatarusna iti daytoy a teksto: “Ita, anianto ti gunggona dagiti tattao a nabuniagan a maigapu kadagiti natay? Anianto ti namnamaenda a magun-od? No pudno ti kunada a di mapagungar dagiti natay, apay ngarud a mabuniagan dagitoy a tattao maigapu kadagiti natay?”—1 Corinto 15:29.
Ibagbaga kadi ditoy ni Pablo a dagiti sibibiag a tattao rumbeng a mabautisaranda maipaay kadagiti natay a di nabautisaran? Kasla kasta ti kayat a sawen dagitoy ken ti dadduma pay a patarus ti Biblia. Nupay kasta, no usigentayo a naimbag ti Kasuratan ken ti orihinal a Griego nga inusar ni Pablo, adda sabali a kaipapanan daytoy. Kayat a sawen ni Pablo a dagiti napulotan a Kristiano nabautisaranda, wenno naitanebda, iti panagbiag a natarnaw agingga iti ipapatayda a kas ken Kristo. Kalpasanna, kas ken Kristo, mapagungarda iti espiritu a biag.
Ti Biblia pasingkedanna daytoy nga eksplanasion. Insurat ni Pablo kadagiti taga Roma: “Dikay aya ammo a datayo amin a nabautisaran ken Kristo Jesus nabautisaran iti ipapatayna?” (Roma 6:3) Iti suratna kadagiti taga Filipos, kinuna ni Pablo nga isu ket ‘makiraman kadagiti panagsagaba ni Kristo, nga ipaspasakupna ti bagina iti ipapatay a kas iti ipapatayna, tapno kitaenna no iti aniaman a pamay-an magun-odna ti nasapsapa a panagungar kadagiti natay.’ (Filipos 3:10, 11) Ipagpaganetget ni Pablo a ti biag ti napulotan a pasurot ni Kristo ramanenna ti panagtalinaed a matalek iti sidong ti pannubok, inaldaw a pannakaipasango iti ipapatay, ken kamaudiananna, matay a matalek, sa mapagungar idiay langit.
Imutektekantayo a dagitoy ken dagiti dadduma pay a teksto a direkta a nangdakamat iti ipapatay mainaig kadagiti nabautisaran tuktukoyenda dagiti sibibiag a tattao a nabautisaranen, saan ket a dagidiay natay. Imbaga met ni Pablo kadagiti padana a napulotan a Kristiano: “Naitabonkayo a naikanunong kenkuana iti bautismona, ket babaen ti pannakainaig kenkuana naibangonkayo met a sangsangkamaysa babaen ti pammatiyo iti panagtignay ti Dios, a nangibangon kenkuana manipud kadagiti natay.”—Colosas 2:12.
Ti Griego a preposision a hy·perʹ, a naipatarus a “maipaay kadagiti” wenno “maigapu kadagiti” iti nagduduma a patarus ti Biblia iti 1 Corinto 15:29, mabalin a kaipapananna met ti “maipaay iti panggep a.” Maitunos kadagiti dadduma a teksto iti Biblia, ti Baro a Lubong a Patarus ti Nasantuan a Kasuratan siuumiso ngarud ti panangipatarusna iti daytoy a bersikulo: “No saan a kasta, anianto ti aramiden dagidiay mababautisaran maipaay iti panggep a panagbalin a natnatay? No saanto a pulos maibangon dagiti natay, apay a mababautisaranda met maipaay iti panggep a panagbalin a kasta?”